1. Akoz Zeova ti konpar son lekor avek en manman ki donn tete son zanfan?

“ESKI en fanm i kapab oubliy son pti baba ki i pe donn tete?” Sa i en kestyon ki Zeova ti demande dan letan profet Izai. Bondye ti dir son pep: “Menm si i oubliy li, mwan mon pa pou oubliy ou.” (Iza. 49:15) Zeova pa souvan konpar son lekor avek en manman me safwasi i ti fer li. Zeova ti konpar son santiman pour son bann serviter avek sa lanmour ki en manman i annan pour son zanfan, parski i ti anvi ki son bann serviter i konnen ki i kontan zot en kantite. Laplipar manman i santi parey en ser ki apel Jasmin. Jasmin i dir: “Ler ou donn tete ou zanfan, ou form en relasyon spesyal pour larestan zot lavi.”

2. Ki mannyer Zeova i santi ler enn son zanfan i aret servi Li?

² Zeova i konnen ler enn son serviter i aret vin renyon e i aret anons sa bon nouvel. Alor, Zeova i bezwen vreman sagren ler i vwar plizyer milye son bann serviter i vin inaktif * sak lannen.

3. Ki Zeova i anvi?

³ En kantite sa bann frer ek ser ki’n vin inaktif i retourn dan kongregasyon e nou kontan ler zot fer sa! Zeova i anvi zot retournen e nou osi parey. (1 Pyer 2:25) Ki mannyer nou kapab ed zot pour retournen? Avan nou reponn sa kestyon, i ti pou byen pour nou konnen akoz serten i aret asiste renyon e aret partisip dan predikasyon.

4. Ki lefe travay i kapab annan lo serten?

⁴ Serten in les zot travay vin sa keksoz pli enportan dan zot lavi. En frer ki apel Hung * e ki reste Lazi, i dir: “Mon ti pas tro bokou letan dan mon travay. Mon ti bet pour krwar ki si mon ti annan plis larzan, mon ti pou servi Zeova pli byen. Alor mon ti travay plis. Mon ti konmans mank renyon pli souvan e finalman mon ti aret al renyon. Satan i servi sa lemonn pour distrer bann dimoun e fer zot ptitapti aret servi Bondye.”

5. Ki mannyer en ser ti reazir avek tou son problenm ki i ti annan?

⁵ Serten frer ek ser i annan en kantite problenm ki fer zot dekouraze. En ser ki apel Anne, ki reste Langleter, i annan senk zanfan. I dir: “Enn mon zanfan ti ne avek bann dezabilite. Pli tar, enn mon fiy ti ganny ekskli e enn mon garson ti devlop en maladi mantal. Mon ti telman dekouraze ki mon ti aret asiste renyon e aret al predikasyon. Avek letan mon ti vin inaktif.” Nou vreman sagren pour Anne ek son fanmir e pour lezot ki pe fer fas avek bann problenm parey.

6. Akoz en dimoun ki pa aplik Kolosyen 3:13 i kapab elwannyen avek pep Bondye?

⁶ Lir Kolosyen 3:13. Serten serviter Zeova in ankoler akoz sa ki en frer oubyen en ser in fer. Zapot Pol ti rekonnet ki parfwa nou kapab annan “rezon pour konplent akoz” en frer oubyen ser. I kapab ki nou’n menm ganny trete dan en fason enzis. Si nou pa fer atansyon, nou kapab gard rankin. Ler nou ankoler e nou gard rankin, sa i kapab fer en dimoun elwannyen avek pep Zeova. Annou vwar leksperyans en frer ki apel Pablo ki reste Sid Lanmerik. I ti ganny akize konmkwa in fer en keksoz mal. Menm si i ti inosan, bann ansyen ti krwar ki i koupab e alor i ti perdi son privilez ki i ti annan dan kongregasyon. Ki mannyer i ti reakte? Pablo i dir: “Mon ti ankoler e gradyelman mon ti elwannyen avek kongregasyon.”

7. Ki i kapab arive avek en dimoun ki santi li koupab?

⁷ En dimoun ki’n komet en pese grav dan lepase, i kapab santi li koupab pour en kantite letan. I kapab santi ki Bondye pa kapab kontan li ankor. Menm si i’n repantir e ganny pardonnen, i kapab santi ki i nepli diny pour form parti pep Bondye. En frer ki apel Francisco ti santi koumsa. I dir: “Mon ti ganny reprimande akoz mon ti komet imoralite seksyel. Menm si o konmansman mon ti kontinyen asiste renyon, mon ti tonm dan en depresyon e mon ti santi ki mon pa diny pour form parti pep Bondye. Mon ti santi mwan koupab e mon ti konvenki ki Zeova pa ti’n pardonn mwan. Avek letan, mon ti aret asiste renyon e aret al predikasyon.” Ki mannyer ou santi anver bann frer ek ser ki pe pas dan bann sityasyon parey sa bann ki’n ganny diskite? Eski ou kapab konpran ki mannyer zot santi? Pli enportan ankor, ki mannyer Zeova i santi anver zot?

8. Eski Zeova i oubliy bann ki ti servi li? Eksplike.

⁸ Zeova pa oubliy bann ki ti servi li me ki’n aret servi li pour en pe letan. I pa ni oubliy bann travay ki zot in fer dan son servis. (Ebr. 6:10) Profet Izai in donn en zoli legzanp pour montre ki degre  Zeova i enterese avek son pep. I ti ekri: “Parey en berze, i pou pran swen avek son troupo. Avek son lanmen, i pou rasanble bann pti mouton ansanm; e i pou anmenn zot dan son lebra.” (Iza. 40:11, NWT) Ki mannyer Zeova, sa Gran Berze, i santi ler enn son serviter i aret servi li? Zezi ti montre ki mannyer Zeova i santi ler i ti demann son bann disip: “Ki zot panse? Si en zonm i annan 100 mouton e enn i perdi, pa i pou kit sa 99 lezot mouton lo montanny e al rod sa enn ki’n perdi? Si i retrouv li, mon asir zot, ki i pou annan plis lazwa pour sa enn ki pour sa 99 ki pa’n perdi.”​—Mat. 18:12, 13.

9. Dan letan Labib, ki mannyer bann bon berze ti tret zot bann mouton? (Vwar portre lo kouvertir.)

⁹ Akoz nou kapab konpar Zeova avek en berze? Parski dan letan Labib, en bon berze ti vreman kontan son bann mouton. Par egzanp, David ti lager avek en lyon ek en lours pour protez son troupo. (1 Sam. 17:34, 35) En bon berze pou remarke si menm enn son mouton i manke. (Zan 10:3, 14) En berze koumsa pou met son 99 lezot mouton dan berkay oubyen i pou demann en lot berze pour pran swen avek zot pour fer sir ki zot sen e sof. Apre, li i pou al rod sa enn ki’n perdi. Zezi ti servi sa legzanp pour ansenny nou en laverite enportan: “Mon Papa dan lesyel pa anvi ki ni enn sa bann dimoun ki parey en zanfan i perdi.”​—Mat. 18:14.

10. Dapre Ezekyel 34:11-16, ki Zeova in promet pour fer pour son bann mouton perdi?

¹⁰ Zeova i kontan sakenn ant nou, enkli bann “zanfan” ki’n elwannyen avek son troupo. Atraver profet Ezekyel, Bondye ti promet ki i pou rod son bann mouton perdi e ed zot reganny en bon lanmitye avek li. Bondye ti dir ki i pou fer pour sov zot. Sa ki i pou fer i parey sa ki en berze Izraelit ti pou fer si en mouton ti perdi. (Lir Ezekyel 34:11-16.)  Premyerman, sa berze pou rod sa mouton e sa pou pran letan ek zefor. Apre, ler i’n trouv sa mouton perdi, sa berze pou anmenn li kot troupo. Osi, si sa mouton in ganny blese oubyen i lafen, avek lanmour sa berze pou ed sa zannimo ki fay, pans son blesir, anmenn li e donn li manze. Konman bann berze ki pran swen avek “troupo Bondye,” bann ansyen i bezwen fer menm keksoz pour ed nenport ki ki’n elwannyen avek kongregasyon. (1 Pyer 5:2, 3) Bann ansyen i rod zot, ed zot pour retourn dan kongregasyon e demontre lanmour pour zot par ed zot vin zanmi Zeova. *

11. Ki en bon berze ti konpran?

¹¹ En bon berze ti konpran ki bann mouton i kapab perdi e si en mouton ti kit troupo, sa berze pa ti pini li. Annou vwar ki Bondye ti fer pour ed serten son bann serviter ki ti elwannyen avek li pour en pe letan. Sa pou en bon legzanp pour nou.

12. Ki mannyer Zeova ti tret Zonas?

¹² Profet Zonas ti dezobeir Zeova e i pa ti al Niniv. Kantmenm sa, Zeova pa ti abandonn Zonas. Parey en bon berze, Zeova ti sov li e ed li pour ganny sa lafors ki i ti bezwen pour fer sa travay ki Zeova ti’n dir li fer. (Zonas 2:7; 3:1, 2) Pli tar Bondye ti fer pouse en plant pour ed Zonas konpran valer lavi sak dimoun. (Zonas 4:10, 11) Ki leson nou aprann? Bann ansyen pa devret vitman abandonn bann ki’n vin inaktif. Plito, zot devret esey konpran kwa ki’n fer sa mouton elwannyen avek troupo. Ler sa mouton i retourn kot Zeova, zot bezwen kontinyen demontre lanmour ek lentere pour li.

13. Ki nou kapab aprann avek lafason ki Zeova ti azir anver sa ekriven Psonm 73?

¹³ Sa ekriven Psonm 73 ti dekouraze ler i ti vwar ki mannyer bann move dimoun ti kontinyen prospere. I ti demande si i  vo lapenn fer lavolonte Bondye. (Ps. 73:12, 13, 16) Ki mannyer Zeova ti reazir? I pa ti kondann sa zonm. Anfet, Bondye in met parol sa psalmis dan Labib. Pli tar, sa psalmis ti konpran ki i napa nanryen pli bon dan lavi ki ler ou zanmi Zeova. (Ps. 73:23, 24, 26, 28) Ki leson nou aprann? Bann ansyen pa devret vit pour ziz bann ki konmans kestyonnen si i vo lapenn servi Zeova. Olye kondann zot, bann ansyen i devret esey konpran akoz zot koz e azir dan sa fason. Apre sa, bann ansyen i kapab servi Labib pour ankouraz zot.

14. Akoz Eliya ti bezwen led e ki mannyer Zeova ti ed li?

¹⁴ Profet Eliya ti sove akoz i ti per Larenn Zezabel. (1 Rwa. 19:1-3) I ti krwar ki Zeova ti napa okenn lezot profet e i ti santi ki son travay ti anven. Eliya ti sitan dekouraze ki i ti anvi mor. (1 Rwa. 19:4, 10) Dan plas kondann Eliya, Zeova ti asir li ki i pa ti tousel, ki i ti kapab annan konfyans dan pwisans Bondye e ki i ti annan ankor en kantite travay pour li fer. Zeova ti zantiman ekout bann konsern Eliya e i ti donn li bann nouvo travay pour fer. (1 Rwa. 19:11-16, 18, NWT) Ki leson nou aprann? Nou tou, espesyalman bann ansyen, nou devret tret bann serviter Zeova avek labonte. Si en dimoun i dir ki i ankoler oubyen ki i santi ki Zeova pa pou zanmen pardonn li, bann ansyen pou ekout li ler i dir zot ki mannyer i santi. Apre, zot esey reasir sa mouton perdi ki Zeova i kontan li.

15. Dapre Zan 6:39, ki mannyer Zezi ti santi anver bann mouton son Papa?

¹⁵ Ki mannyer Zeova i oule nou santi anver son bann mouton perdi? Zezi in kit en bon legzanp pour nou. I ti konnen ki tou bann mouton Zeova i presye pour Li, alor Zezi ti fer tou sa ki i ti kapab pour ed “bann mouton perdi pep Izrael” retourn kot Zeova. (Mat. 15:24; Lik 19:9, 10) Konman sa bon berze, Zezi ti osi fer tou sa ki i ti kapab pour pa perdi okenn mouton Zeova.​—Lir Zan 6:39.

16-17. Ki mannyer bann ansyen i devret santi konsernan ed sa bann ki’n elwannyen? (Vwar bwat “ Lafason ki en mouton perdi i kapab santi.”)

¹⁶ Zapot Pol ti sipliy bann ansyen dan kongregasyon Efez pour swiv legzanp Zezi. I ti dir: “Fodre . . . ed sa bann ki feb e zot devret gard antet parol nou Senyer Zezi ler li menm i ti dir: ‘I annan plis lazwa pour donnen ki pour resevwar.’” (Akt 20:17, 35) Sa bann verse i montre ki bann ansyen i annan sa responsabilite enportan pour pran swen avek pep Bondye. En ansyen ki apel Salvador e ki reste Lespanny, i dir: “Ler mon mazinen ki kantite Zeova i kontan son bann mouton perdi, sa i fer mwan anvi fer tou sa ki mon kapab pour ed zot. Konman en berze spirityel, mon konvenki ki Zeova i anvi ki mon pran swen avek zot.”

¹⁷ Tou sa bann frer ek ser ki’n ganny mansyonnen dan sa lartik, ki ti’n elwannyen avek Zeova, in ganny led e zot in kapab retourn kot Zeova. Ozordi, i annan bokou plis ankor ki’n elwannyen ki anvi fer parey. Dan sa lartik ki swiv, nou pou vwar plis detay lo ki nou kapab fer pour ed zot retourn kot Zeova.