1. Akoz parfwa bann serviter Zeova i kapab santi zot tousel?

LAPLIPAR nou, nou santi nou tousel parfwa. Pour serten, sa santiman pa al pour bokou letan. Lezot i kapab santi zot tousel pour en kantite letan. Nou kapab santi nou tousel menm ler nou parmi lezot dimoun. Serten frer ek ser i vwar li difisil pour fer zanmi dan en nouvo kongregasyon. Lezot i sorti dan en fanmir kot zot abitye fer keksoz ansanm, me ler zot al reste lwen avek zot fanmir, zot santi zot tousel. I annan lezot ki mank enn zot manm fanmir ki’n mor, ki zot ti abitye pas letan avek. I annan serten ki fek konn laverite, ki santi zot tousel ler zot fanmir oubyen zanmi ki pa ador Zeova i rezet zot oubyen persekit zot.

2. Ki kestyon nou pou reponn?

² Zeova i konn nou byen e i konpran nou. Ler nou santi nou tousel, i konnen ki mannyer nou santi e i anvi ed nou sirmont sa bann santiman. Dan sa lartik, nou pou reponn sa bann kestyon swivan: Ki mannyer Zeova i ed nou? Ki nou kapab fer pour ed nou lekor? Ki mannyer nou kapab ed bann dan kongregasyon ki santi zot tousel?

3. Ki mannyer Zeova ti montre ki i vreman enterese avek lafason ki Eliya ti santi?

³ Zeova i anvi tou son bann adorater i ere. I pros avek sakenn ant nou e i konnen ler nou sagren e dekouraze. (Ps. 145:18, 19) Remarke ki mannyer Zeova ti vreman enterese avek lafason ki profet Eliya ti santi e ki mannyer i ti ed li. Profet Eliya ti viv dan en letan vreman difisil dan listwar pep Izrael. Sa letan, bann lennmi Bondye ti pe persekit bann adorater Zeova e zot ti vreman anvi touy Eliya. (1 Rwa. 19:1, 2) I kapab ki Eliya ti osi dekouraze akoz i ti krwar ki i ti sa sel profet ki pe servi Zeova.  (1 Rwa. 19:10) Me deswit Bondye ti ed Eliya. Zeova ti anvoy en lanz pour reasir Son profet ki i pa tousel. Sa lanz ti dir Eliya ki i annan ankor en kantite Izraelit ki pe servi Zeova.​—1 Rwa. 19:5, 18.

4. Dapre Mark 10:29, 30, ki mannyer Zeova i santi konsernan bann ki nepli annan sipor zot fanmir ek zanmi?

⁴ Zeova i konnen ki ler nou swazir pour servi li, serten parmi nou i bezwen fer bokou sakrifis. Enn bann keksoz ki nou kapab perdi, i led ki nou gannyen avek nou fanmir ek zanmi ki pa servi Zeova. I kapab ki zapot Pyer ti enkyet ler i ti demann Zezi: “Nou’n kit tou sa ki nou ti annan e nou’n swiv ou, alor ki nou pou gannyen?” (Mat. 19:27) Zezi ti dir son bann disip ki kongregasyon ti pou parey en fanmir pour zot. (Lir Mark 10:29, 30.) Osi, Zeova nou Papa ki dan lesyel, i promet pour ed tou bann ki anvi servi li. (Ps. 9:10) Aprezan, annou vwar serten keksoz ki ou kapab fer pour ganny led Zeova ler ou santi ou tousel.

5. Akoz i bon pour mazin lafason ki Zeova pe ed ou?

⁵ Mazin lafason ki Zeova pe ed ou. (Ps. 55:22) Sa pou ed ou pour vwar ki ou pa tousel. En ser selibater ki apel Carol, * ki son fanmir pa dan laverite, i dir: “Ler mon mazin lafason ki Zeova in ed mwan pour fer fas avek mon bann difikilte, mon santi ki mon pa tousel. Sa i asir mwan ki Zeova pou toultan ed mwan.”

6. Ki mannyer 1 Pyer 5:9, 10 i kapab ankouraz bann ki santi zot tousel?

⁶ Mazin lafason ki Zeova pe ed nou bann frer ek ser ki santi zot tousel. (Lir 1 Pyer 5:9, 10.) En frer ki apel Hiroshi, ki pour plizyer lannen i sel Temwen Zeova dan son fanmir, i dir: “Dan kongregasyon i fasil pour vwar ki tou dimoun i annan problenm. Nou konnen ki nou tou, nou pe fer nou mye pour servi Zeova e sa i kapab ankouraz tou bann parmi nou ki tousel dan laverite.”

7. Ki mannyer lapriyer i ed ou?

 ⁷ Priye, lir Labib e asiste renyon regilyerman. Ou devret dir Zeova egzakteman sa ki ou pe santi. (1 Pyer 5:7) Ler en zenn ser ki apel Massiel ti deside pour servi Zeova, i ti santi li tousel parski son fanmir pa ti servi Zeova. Massiel i dir: “Enn parmi bann keksoz pli enportan ki’n ed mwan ler mon santi mwan tousel, i ler mon devid mon leker avek Zeova dan lapriyer. I ti parey en Papa pour mwan. Mon ti fer lapriyer avek li toulezour e plizyer fwa par zour, pour fer li konnen ki mannyer mon ti santi.”

8. Ki mannyer ler ou lir Labib e medit lo la sa i kapab ed ou?

⁸ Lir Labib regilyerman e medit lo bann resi ki montre ki Zeova i kontan ou. Bianca, en ser ki son fanmir i dir li bann parol dekourazan, i dir: “Ler mon lir e medit lo bann resi dan Labib ek biografi bann serviter Zeova ki’n fer fas avek bann sityasyon parey pour mwan, sa i vreman ed mwan.” Serten serviter Zeova ti aprann bann verse rekonfortan parker parey Psonm 27:10 ek Izai 41:10. Lezot i ekout lanrezistreman odyo bann piblikasyon ki pou ganny etidye pandan renyon oubyen ler zot pe lir Labib. Zot dir ki sa i ed zot pour pa santi zot tro tousel.

9. Ki byenfe ou gannyen ler ou asiste renyon?

⁹ Fer tou sa ki ou kapab pour asiste renyon regilyerman. Sa ki pase dan renyon pou ankouraz ou e ou pou kapab aprann konn ou bann frer ek ser. (Ebr. 10:24, 25) Massiel, ki’n ganny mansyonnen pli boner, i dir: “Menm si mon ti vreman timid, mon ti deside pour asiste tou renyon e fer komanter dan renyon. Sa ti ed mwan pour santi mwan pros avek bann frer ek ser dan kongregasyon.”

10. Akoz i enportan pour vin zanmi avek bann frer ek ser dan kongregasyon?

¹⁰ Vin zanmi avek bann frer ek ser dan kongregasyon. Fer zanmi avek bann ki ou kapab aprann avek zot. I kapab ki zot pli vye oubyen pli zenn ki ou, ouswa zot annan en lot kiltir. Labib i fer nou rapel ki “i annan lasazes parmi bann aze.” (Zob 12:12, NWT) Bann ki pli aze i kapab aprann en kantite avek bann ki pli zenn dan kongregasyon. Menm si David ti bokou pli zenn ki Zonatan, sa pa ti anpes zot annan en bon lanmitye. (1 Sam. 18:1, NWT) Zot ti ed kanmarad pour servi Zeova dan bann sityasyon difisil. (1 Sam. 23:16-18) En ser ki apel Irina, ki son fanmir pa Temwen Zeova, i dir: “Dan kongregasyon  ou kapab ganny bann paran oubyen bann frer ek ser spirityel. Zeova i kapab servi zot pour vin sa fanmir ki nou bezwen.”

11. Ki mannyer nou kapab fer bann bon zanmi?

¹¹ I kapab difisil pour fer zanmi sirtou si ou en dimoun timid. Ratna, en ser timid ki’n aprann laverite malgre lezot i opoz li, i dir: “Mon ti bezwen aksepte ki mon bezwen led mon bann frer ek ser dan kongregasyon.” I kapab difisil pour dir avek en dimoun ki mannyer ou pe santi me ler ou fer sa, sa dimoun i kapab vin en bon zanmi. Ou bann zanmi i anvi ankouraz ou e ed ou me ou bezwen fer zot konnen ki zot kapab fer pour ed ou.

12. Ki mannyer predikasyon i kapab ed ou pour fer bann bon zanmi?

¹² Enn bann pli bon fason ki nou kapab fer zanmi, i ler nou fer predikasyon avek nou bann frer ek ser. Carol, ki’n ganny mansyonnen pli boner, i dir: “Mon’n fer en kantite bon zanmi ler mon pas letan avek bann ser dan predikasyon e ler nou fer lezot keksoz dan servis Zeova. Pandan sa bann lannen ki’n pase, Zeova in servi sa bann ser pour ed mwan.” I vo lapenn fer zanmi avek bann frer ek ser dan kongregasyon. Zeova i servi sa bann zanmi pour ankouraz ou ler ou dekouraze, par egzanp ler ou santi ou tousel.​—Prov. 17:17.

13. Ki responsabilite nou tou nou annan dan kongregasyon?

¹³ Nou tou dan kongregasyon, nou annan sa responsabilite pour fer kongregasyon en landrwa ki annan lape ek lanmour, kot personn pa santi zot tousel. (Zan 13:35) Sa ki nou dir e fer i kapab ankouraz lezot en kantite. En ser ti dir: “Ler mon ti aprann laverite, bann frer ek ser ti vin mon fanmir. Mon pa ti pou kapab vin en Temwen Zeova san zot led.” Ki ou kapab fer pour ed bann frer ek ser ki napa fanmir dan laverite pour zot santi ki zot form parti kongregasyon?

14. Ki mannyer ou kapab fer zanmi avek bann nouvo dan kongregasyon?

¹⁴ Esey fer zanmi avek bann nouvo. Nou kapab konmans par akeyir bann nouvo dan kongregasyon. (Rom. 15:7) Me nou bezwen fer plis ki sa. Nou anvi devlop en bon lanmitye avek zot. Alor demontre labonte e montre ki ou enterese avek bann nouvo. Pa demann zot kestyon ki pou fer zot anbarase. O kontrer, esey konpran ki problenm ki zot pe fer fas avek. I kapab difisil pour serten koz lo zot santiman, alor pa met presyon lo zot. O kontrer, servi bon zizman ler ou pe demann zot kestyon e ekout zot avek pasyans. Par egzanp, ou kapab demann zot ki mannyer zot in konn laverite.

15. Ki mannyer bann Kretyen matir i kapab ed lezot dan kongregasyon?

¹⁵ Lafwa tou dimoun dan kongregasyon i vin pli for, ler nou montre ki nou kontan kanmarad sirtou ler bann ansyen ek lezot Kretyen matir i fer sa. Melissa, ki’n grandi avek son manman dan laverite, i dir: “Mon vreman rekonesan anver bann frer ki pandan bann lannen ki’n pase ti parey bann papa pour mwan. Zot ti pas letan avek mwan e zot in demontre lentere dan mwan. Nenport ler ki mon anvi koz lo mon problenm, i annan en dimoun pour ekout mwan.” En zenn frer ki apel Mauricio ti sagren e i ti santi li  tousel ler sa frer ki ti fer son letid ti kit laverite. Mauricio i dir: “Bann ansyen ti montre ki zot kontan mwan e sa in ed mwan en kantite. Tanzantan zot ti koz avek mwan. Zot ti travay avek mwan dan predikasyon, zot ti partaz sa ki zot in vwar enteresan dan zot letid Labib personnel avek mwan e zot ti menm pas bann moman detant avek mwan.” Aprezan, Melissa ek Mauricio pe servi Zeova a plen tan.

16-17. Ki lezot keksoz nou kapab fer pour ed lezot?

¹⁶ Fer keksoz pour ed lezot. (Gal. 6:10) En misyonner ki apel Leo ki pe servi dan en landrwa ki lwen avek son fanmir, i dir: “Souvan ou bezwen zis en pti led dan sa bon moman. Mon rapel en zour ler mon ti fer en aksidan loto. Ler mon ti finalman ariv kot lakour, mon ti vreman strese. Me en koup ti envit mwan kot zot pour pran en pti repa. Mon pa rapel sa ki nou ti manze me mon rapel ki zot ti ekout mwan. Apre sa, mon ti santi mwan bokou pli byen.”

¹⁷ Nou tou nou kontan bann moman kot nou kapab pas letan avek nou bann frer ek ser e koz lo bann diskour ki nou’n tande, parey dan lasanble. Par kont, Carol, ki’n ganny mansyonnen pli boner, i dir: “Mon vwar li difisil pour mwan al lasanble.” Akoz Carol i santi koumsa? I dir: “Menm si mon parmi plizyer santenn oubyen menm plizyer milye frer ek ser, souvan zot avek zot fanmir. Ler mon vwar zot, mon santi mwan tousel.” Lezot i vwar li difisil pour al lasanble pour premye fwa apre ki zot konzwen in mor. Eski ou konn en dimoun ki pe pas dan bann problenm koumsa? Petet laprosenn fwa ou kapab envit li pour pas letan oubyen asiz ansanm avek ou ek ou fanmir pandan lasanble.

18. Ki mannyer nou kapab aplik 2 Korentyen 6:11-13 ler nou demontre lospitalite?

¹⁸ Pas letan ansanm. Esey pas letan avek diferan frer ek ser, sirtou bann ki kapab pe santi zot tousel. Nou anvi “ouver gran nou leker,” sirtou anver sa bann frer ek ser. (Lir 2 Korentyen 6:11-13.) Melissa ki’n ganny mansyonnen pli boner,  i dir: “Nou ti vreman kontan ler bann frer ek ser ti envit nou pour pas letan avek zot ek zot fanmir kot zot lakour ouswa pour al bann landrwa ansanm.” Eski i annan en dimoun dan ou kongregasyon ki ou kapab demontre lospitalite avek?

19. Petet kan ki serten frer ek ser pou pli kontan nou pas letan avek zot?

¹⁹ I kapab annan serten letan ki bann frer ek ser pou vreman kontan nou pas letan avek zot. Serten i kapab vwar li difisil pour avek zot fanmir ki pa Temwen Zeova, ler zot pe selebre bann lafet fo larelizyon. Lezot i kapab sagren lo serten dat, parey dat ki en dimoun ki zot kontan ti mor. Ler nou ofer pour pas letan avek bann frer ek ser ki pe pas dan sa bann problenm, nou montre zot ki nou “vreman enterese avek zot byennet.”​—Fili. 2:20.

20. Ki mannyer parol Zezi dan Matye 12:48-50 i kapab ed nou ler nou santi nou tousel?

²⁰ I annan plizyer rezon akoz en Kretyen i kapab parfwa santi li tousel. Kantmenm sa, nou pa devret zanmen oubliye ki Zeova i konnen ki mannyer nou santi. Souvan i servi nou bann frer ek ser pour donn nou sa ki nou bezwen. (Lir Matye 12:48-50.) An retour, nou montre Zeova ki nou apresye kongregasyon ler nou fer nou mye pour ed nou bann frer ek ser. Nenport fason ki nou santi parfwa, nou pa zanmen tousel parski Zeova i toultan pros avek nou!