POUR en kantite lannen, bann Izraelit ti abitye donn larzan pour siport vre ladorasyon. Me dan letan Zezi, bann Zwif ti bezwen pey en kantite taks e sa ti fer lavi difisil pour zot.

Tou adilt ti bezwen pey en lanmwatye sekel (de drak) pour siport vre ladorasyon kot tabernak e pli tar kot tanp. Dan letan Zezi, sa taks ti ganny servi pour bann sakrifis e pour okip tanp ki Erod ti’n konstri. Serten Zwif ti demann zapot Pyer si Zezi ti pey sa taks e Zezi ti dir ki i napa nanryen mal pour pey sa taks. Anfet, i ti dir Pyer kote i pou ale pour li ganny en pyes larzan pour pey sa taks.​—Mat. 17:24-27.

Pep Bondye ti osi bezwen pey en lot taks ki apel ladim. Zot ti pou bezwen donn 10 poursan tou sa ki zot later ti prodwi ouswa zot lapey. (Lev. 27:30-32; Nom. 18:26-28, NWT) Bann sef relizye ti ensiste ki i vreman enportan pour bann dimoun pey ladim menm lo “lanmant, dil ek lanni.” Zezi pa ti dir ki i mal pour pey ladim me i ti dir ki lafason ki bann profeser lalwa ek Farizyen ti pe aplik sa lalwa konsernan ladim ti mal.​—Mat. 23:23.

Me sa letan, bann Zwif ti osi bezwen pey en kantite taks avek bann Romen, ki ti pe diriz zot. Par egzanp, bann ki ti annan later ti bezwen pey taks avek larzan ouswa avek sa ki zot later i prodwi. Bann dimoun ti bezwen pey apepre 20 a 25 poursan taks. I ti osi annan en taks pour Sezar ki sak Zwif ti bezwen peye. I ti konsernan sa taks ki bann Farizyen ti kestyonn Zezi. Zezi ti montre ki mannyer nou devret konsider pey taks ler i ti dir: “Rann sa ki pour Sezar avek Sezar, me sa ki pour Bondye avek Bondye.”​—Mat. 22:15-22.

I ti osi annan en taks lo bann marsandiz ki ti antre ouswa sorti dan en pei. Sa taks ti ganny anmase lo bann por, pon, krwaze semen, dan larantre lavil ouswa dan bazar.

Bann Zwif ti bezwen pey bann Romen en kantite taks. En istoryen Romen ki apel Tacitus ti dir ki pandan renny lanperer Tiber ler Zezi ti lo later, ‘Siri ek Zide ti sipliye pour pey mwens taks parski i ti’n vin tro difisil pour zot.’

Sa ki ti fer sa taks pli bokou, i lafason ki sa bann taks ti ganny kolekte. Sa travay pour kolekte taks ti ganny vann e sa dimoun ki ti ofer plis larzan ti kapab ganny sa travay. Apre, sa dimoun ti anploy lezot dimoun pour kolekte sa bann taks e zot tou zot ti pe esey fer profi. I paret ki Zase ti anploy lezot kolekter taks pour travay pour li. (Lik 19:1, 2) Nou kapab konpran akoz bann dimoun pa ti kontan sa e zot pa ti kontan bann kolekter taks.