1. Akoz nou kapab konpar Satan avek en saser?

EN SASER i annan zis en lobzektif. I anvi atrap en zannimo oubyen touy sa zannimo. Parey Labib i dir, en saser i kapab servi diferan pyez oubyen latrap. (Zob 18:8-10) Ki mannyer saser i atir zannimo dan son latrap? I obzerv byen sa zannimo. Kote sa zannimo i ale? Ki sa zannimo i kontan? Ki sa pli bon latrap ki i pou servi pour atrap sa zannimo? Satan i parey sa saser. I obzerv nou byen, i vwar kote nou ale e i vwar sa ki nou kontan. Apre, i swazir en latrap ki i krwar i kapab atrap nou ler ki nou pa pe ekspekte. Kantmenm sa, Labib i dir nou ki si nou ganny atrape, nou kapab sape. Labib i osi montre nou ki nou kapab fer pour evit tou bann latrap Satan.

2. Ki sa de latrap Satan ki mars pli byen?

² De latrap Satan ki mars pli byen i lorgey ek vorasite. * Pour plizyer milye lannen, Satan in servi sa de move tre pour atrap en kantite dimoun. I parey en saser zwazo ki atir son viktim dan en pyez oubyen i esey atrap li dan en lasenn. (Ps. 91:3) Me nou kapab pa ganny atrape avek Satan parski Zeova in montre nou bann teknik ki Satan i servi.​—2 Kor. 2:11.

3. Akoz Zeova in fer ekri dan Labib legzanp bann dimoun ki ti vin orgeye e voras?

 ³ Zeova i montre nou ki lorgey ek vorasite i danzere. I dir nou sa ki ti arive avek serten son serviter, pour ki nou pa fer menm fot. Dan sa lartik, nou pou vwar ki mannyer Satan ti reisi atrap serten ki’n servi Zeova pour en kantite letan. Eski sa i vedir ki nou osi nou pou tonm dan sa latrap? Non. Zeova in fer sir ki sa bann legzanp in ganny ekrir dan Labib “konman en lavertisman pour nou.” (1 Kor. 10:11) I konnen ki sa bann legzanp i kapab montre nou ki mannyer pour evit oubyen sap bann latrap Satan.

4. Ki i kapab arive avek nou si nou orgeye?

⁴ Satan i anvi ki nou vin orgeye. I konnen ki si nou vin orgeye nou pou vin parey li e nou pa pou ganny lavi eternel. (Prov. 16:18) Alor zapot Pol ti averti nou ki en dimoun i kapab “vin orgeye e ganny menm kondannasyon ki Dyab.” (1 Tim. 3:6, 7) Sa i kapab arive avek nenport parmi nou ki swa nou nouvo dan laverite ouswa nou pe servi Zeova pour plizyer lannen.

5. Dapre Eklezyast 7:16, 20, ki mannyer en dimoun i kapab montre ki i orgeye?

⁵ Dimoun ki orgeye i mazin zis zot prop lekor. Satan i esey fer nou konsantre lo nou prop lekor e pa mazin Zeova sirtou ler nou pe fer fas avek problenm. Par egzanp, eski ou’n deza ganny akize pour en keksoz ki ou pa’n fer? Oubyen eski ou’n deza ganny trete dan en fason enzis? Satan ti pou kontan ou blanm Zeova oubyen ou bann frer ek ser. Satan i anvi ki ou krwar ki sa sel fason pour rezourd ou problenm, i pour fer keksoz dan ou prop fason dan plas swiv gidans ki Zeova i donn ou dan son Parol.​—Lir Eklezyast 7:16, 20.

6. Ki ou aprann avek leksperyans en ser ki reste Pei Ba?

⁶ Annou vwar legzanp en ser ki reste Pei Ba. I ti ankoler avek bann frer ek ser  akoz zot defo. I ti deside ki i ti nepli anvi pas letan avek sa bann dimoun. I dir: “Mon ti santi mon tousel e mon pa ti kapab sanz lafason ki mon ti santi anver bann frer ek ser. Mon ti dir mon msye ki nou bezwen sanz kongregasyon.” Apre sa ser ti get progranm Televizyon JW pour Mars 2016. Dan sa progranm, i ti annan bann sizesyon lo ki mannyer pour aksepte defo lezot. Sa ser i dir: “Mon ti aprann ki mon bezwen annan limilite e reflesir lo mon prop defo dan plas esey sanz mon bann frer ek ser. Sa progranm ti ed mwan pour konsantre lo Zeova ek son drwa pour dirize.” Eski ou’n vwar sa leson? Ler ou annan en problenm, konsantre lo Zeova. Sipliy li pour ed ou vwar lezot parey li i vwar. Ou Papa ki dan lesyel i vwar fot ou bann frer ek ser. Kantmenm sa i pare pour pardonn zot. I anvi ki ou fer parey.​—1 Zan 4:20.

7. Ki ti arive avek Lerwa Ouzya?

⁷ Ouzya ki ti lerwa Zida, ti fer en kantite keksoz byen. I ti ganny laviktwar dan bokou lager, konstri bann lavil e i ti annan plizyer laferm. “Sa vre Bondye ti fer li prospere.” (2 Kron. 26:3-7, 10, NWT) Me lorgey ti fer Ouzya pa ekout konsey e i ti fer en keksoz ki i ti napa drwa fer. Labib i dir: “Dek ki i ti vin for, lorgey ti devlope dan son leker ziska ki i ti fer son prop maler.” Avan sa, Zeova ti’n donn lord ki zis bann pret ki ti annan drwa bril lansan dan tanp. Me Lerwa Ouzya ti al dan tanp pour li bril lansan. Zeova pa ti kontan e i ti donn li lalep. Ouzya ti reste en lepre ziska ler i ti mor.​—2 Kron. 26:16-21, NWT.

8. Dapre 1 Korentyen 4:6, 7, ki mannyer nou kapab evite vin orgeye?

⁸ Eski nou kapab vin orgeye e fer pese parey Ouzya? Annou vwar legzanp José. I ti en gran biznesmenn e i ti osi en ansyen dan kongregasyon. I ti fer bann diskour dan lasanble e sirveyan rezyonal ti demann li konsey. José i dir: “Me mon ti depan lo mon prop abilite ek leksperyans. Mon pa ti depan lo Zeova. Mon ti krwar ki mon ti for, alor mon pa ti ekout bann lavertisman ek konsey sorti kot Zeova.” José ti fer en pese grav e i ti ganny ekskli dan kongregasyon. Detrwa lannen  pase, i ti revin en Temwen Zeova. Aprezan i dir: “Zeova in montre mwan ki sa ki pli enportan pour nou, i pa sa responsabilite me sa ki pli enportan i fer sa ki Zeova i demande.” Annou rapel ki nenport abilite ki nou annan ouswa nenport responsabilite ki nou gannyen dan kongregasyon i sorti kot Zeova. (Lir 1 Korentyen 4:6, 7.) Si nou orgeye, Zeova pa pou servi nou.

9. Ki vorasite ti fer Satan ek Ev fer?

⁹ Ler nou mazin vorasite, i tre probab ki nou pou mazin Satan. Ler Satan ti en lanz, i bezwen ki i ti annan en kantite privilez. Me i ti anvi plis. I ti anvi sa ladorasyon ki zis Zeova ki merit gannyen. Satan i anvi nou vin parey li, alor i esey fer nou anvi plis ki sa ki nou deza annan. Premye fwa ki i ti esey fer sa, i ler i ti koz avek Ev. Zeova ti’n donn Ev ek son msye, en kantite bon keksoz pour zot manze. Zot ti kapab manz “fri dan tou pye dibwa sa zarden” eksepte enn. (Zen. 2:16, NWT) Me Satan ti fer Ev krwar ki i ti bezwen manz fri dan sa pye dibwa ki i pa ti sipoze manze. Ev pa ti satisfe avek sa ki i ti annan, i ti anvi plis. Nou konnen ki i ti arive apre. Ev ti fer pese e pli tar i ti mor.​—Zen. 3:6, 19.

10. Ki ti arive avek Lerwa David ler i ti vin voras?

¹⁰ Zeova ti donn Lerwa David en kantite keksoz. I ti fer li vin lerwa, i ti donn li larises e i ti fer li ranport laviktwar dan bann lager. David ti rekonesan e i ti dir ki kado Bondye ti “tro bokou pour rakonte.” (Ps. 40:5, NWT) Me apre David ti vin voras e ti anvi plis ki sa ki Zeova ti’n donn li. David ti annan plizyer madanm me i ti konmans anvi en madanm ki ti’n marye. Menm si Zeova ti’n dir ki sa i mal. Sa madanm ti apel Bat-Seba e son msye ti apel Ourya. David ti annan relasyon seksyel avek Bat-Seba e i ti tonm ansent. Sa ki David ti fer ti vreman mal me apre sa i ti fer en keksoz pli mal ankor. David ti fer Ourya ganny touye. (2 Sam. 11:2-15) Ki David ti pe mazinen? Eski i ti krwar ki Zeova pa vwar li? Menm si David ti’n servi Zeova pour en kantite letan, i ti vin voras e sa ti fer li soufer en  kantite. Pli tar David ti konfes son pese e i ti repantir. I ti rekonesan ki Zeova ti’n pardonn li.​—2 Sam. 12:7-13.

11. Dapre Efezyen 5:3, 4, kwa ki kapab ed nou pour pa vin voras?

¹¹ Ki nou aprann avek legzanp David? Nou aprann ki si nou rekonesan anver Zeova pour tou sa ki i’n donn nou, nou pa pou voras. (Lir Efezyen 5:3, 4.) Nou bezwen kontant nou avek sa ki nou annan. Ler nou konmans fer letid avek en dimoun, nou ankouraz li pour mazin en bon keksoz ki Zeova in donn li e pour remersye Zeova. Si en dimoun i fer sa toulezour pour en semenn, i pou vedir ki in priy konsernan set diferan keksoz. (1 Tesa. 5:18) Eski ou fer en keksoz en pe parey? Si ou reflesir lo tou sa ki Zeova in fer pour ou, sa pou ed ou vin rekonesan. Ler ou rekonesan, ou pou kontant ou avek sa ki ou annan. Ler ou kontant ou avek sa ki ou annan, ou pa pou voras.

12. Ki Zida Iskaryot ti fer apre ki i ti’n vin voras?

¹² Zida Iskaryot ti fer en keksoz vreman mal. I ti trai Zezi parski i ti’n vin voras. Me Zida pa ti toultan en move dimoun. (Lik 6:13, 16) Zezi ti swazir li konman en zapot. I ti annan konfyans dan li e i ti met li ansarz bwat larzan. Zezi ek bann zapot ti servi sa larzan pour siport zot travay predikasyon. Sa larzan ti parey donasyon ki ganny fer ozordi pour siport travay predikasyon ki pe ganny fer dan lemonn. Me apre serten letan, Zida ti konmans vol sa larzan, menm si i ti’n tann Zezi averti dimoun plizyer fwa pour pa vin voras. (Mark 7:22, 23; Lik 11:39; 12:15) Zida pa ti ekout sa bann lavertisman.

13. Kan ki Zida ti montre ki i ti’n vin voras?

¹³ Pa bokou letan avan Zezi ti ganny touye, Zida ti montre ki i ti’n vin voras. Zezi ek son bann disip, enkli Mari ek son ser Mart, ti’n ganny envite kot Simon sa lepre. Pandan sa repa, Mari ti debout e vers en delwil parfimen ki ti kout vreman ser, lo latet Zezi. Zida ek lezot disip ti vreman ankoler. I kapab ki lezot disip ti santi ki sa larzan ti’n kapab ganny servi dan predikasyon. Me Zida ti ankoler pour en lot rezon. I ti en “voler” e i ti anvi vol larzan dan bwat. Vi ki Zida ti’n vin voras, i ti trai Zezi pour larzan.​—Zan 12:2-6; Mat. 26:6-16; Lik 22:3-6.

14. Ki mannyer en koup ti aplik sa leson dan Lik 16:13?

¹⁴ Zezi ti rapel son bann disip sa laverite enportan: “Ou pa kapab lesklav Bondye ek Larises an menm tan.” (Lir Lik 16:13.) Sa i ankor leka ozordi. Annou vwar ki mannyer en koup ki reste Laroumani ti aplik sa ki Zezi ti dir. Zot ti ganny ofer en travay tanporer dan en pei ki pli ris. Zot dir: “Nou ti annan en gro lón labank pour nou peye. O konmansman nou ti krwar ki sa travay ti en benediksyon sorti kot Zeova.” Me i ti annan en problenm. Si zot ti aksepte sa travay zot pa ti pou annan ase letan pour servi Zeova. Apre ki zot ti’n lir sa lartik “Reste fidel avek en leker ini” dan Latour Veyer le 1 Out 2008, zot ti fer en desizyon. Zot dir: “Si nou al travay dan en lot pei pour ganny plis larzan me i difisil pour servi Zeova, i ti pou konmsi nou lanmitye avek Zeova pa ti sa keksoz pli enportan dan nou lavi. Nou ti asire ki sa ti pou gat nou lanmitye avek Zeova.” Alor zot pa ti aksepte sa travay. Ki i ti arive apre? Sa  msye ti ganny en travay dan son pei ki ti pey ase byen pour zot ganny sa ki zot ti bezwen. Sa madanm i dir: “Zeova pou toultan ed son bann serviter.” Sa koup i kontan ki zot in fer Zeova vin zot Met olye larzan.

15. Akoz nou kapab asire ki nou kapab sap bann pyez Satan?

¹⁵ Ki nou devret fer si nou vwar ki nou pe vin orgeye ouswa voras? Nou kapab sanze! Zapot Pol ti dir ki bann ki’n “ganny atrape vivan par Dyab” i kapab sape dan son pyez. (2 Tim. 2:26) Sanmenm sa ki ti arive avek David. I ti ekout konsey Natan, repantir e revin zanmi avek Zeova. Pa zanmen oubliye ki Zeova i pli for ki Satan. Alor si nou aksepte led Zeova, nou pou kapab sap nenport pyez oubyen latrap ki Satan i mete.

16. Kwa ki pou ed nou evite vin orgeye ouswa voras?

¹⁶ I ti pou pli byen pour nou pa vin orgeye oubyen voras. Nou kapab fer sa zis avek led Zeova. Me nou pa devret krwar ki nou tro for e ki sa pa pou zanmen arive avek nou. Menm bann serviter Zeova ki’n servi li pour en kantite letan in vin orgeye ouswa voras. Alor priy Zeova toulezour pour ed ou egzamin ou panse ek aksyon. (Ps. 139:23, 24, NWT) Esey ou mye pour pa vin orgeye ouswa voras.

17. Ki pou arive byento avek nou lennmi Dyab?

¹⁷ Pour plizyer milye lannen Satan in en saser. Me byento i pou ganny anmare apre i pou ganny detrir. (Rev. 20:1-3, 10) Nou enpasyan pour sa zour. Ziska ki sa i arive, nou bezwen vey byen bann latrap Satan. Fer bokou zefor pour pa vin orgeye ouswa voras. Annou determinen pour “opoz Dyab e i pou sov lwen avek [nou].”​—Zak 4:7.