1-2. Dapre Psonm 25:14, ki nou bezwen fer si nou anvi annan en bon lanmitye avek Zeova?

 KI BANN kalite ki ou krwar i enportan pour annan si ou anvi reste zanmi avek en dimoun? I tre probab ki ou pou dir ki bann bon zanmi i devret kontan e siport kanmarad. Petet ou pa pou mazinen ki respe i sitan enportan pour annan en bon lanmitye. Me parey verse tenm pour sa lartik i montre, bann ki anvi annan en bon lanmitye avek Zeova i bezwen annan “en gran respe” pour li.​—Lir Psonm 25:14.

² Nenport ki kantite letan nou pe servi Zeova, nou tou nou bezwen kontinyen annan en gran respe pour li. Me ki i vedir annan en gran respe pour Bondye? Ki mannyer nou kapab devlop en gran respe pour Bondye? Ki nou kapab aprann konsernan annan en gran respe pour Bondye avek legzanp Obadya, Granpret Zeoada ek Lerwa Zeoas?

3. Ki mannyer lafreyer i kapab protez nou? Eksplike.

³ Ler ou annan en gran respe pour Bondye, ou per pour fer en keksoz ki pa fer li plezir. Menm si i pa gou ler nou annan lafreyer, lafreyer i kapab ed nou pour fer bann bon desizyon. Par egzanp, ler nou per pour tonbe, sa i kapab anpes nou mars tro o bor en ranpar. Ler nou per ki nou ganny dimal, sa i kapab fer nou evit bann sityasyon danzere. Ler nou per ki nou gat nou lanmitye avek en dimoun ki nou kontan, sa pou fer nou evite dir ouswa fer en keksoz ki pou bles son santiman.

4. Ki mannyer Satan i anvi nou santi anver Zeova?

⁴ Satan i anvi ki dimoun i per Zeova. Satan i anvi ki nou krwar ki Zeova i toultan ankoler, i anvi pini nou e ki nou  pa pou zanmen kapab fer li plezir. (Zob 4:18, 19) Satan i anvi ki nou sitan per Zeova ki nou aret servi Li. Me nou pa devret per Zeova. O kontrer, nou devret per pour fer keksoz ki bles son santiman e nou devret aprann pour annan en gran respe pour li.

5. Ki i vedir ler nou annan en gran respe pour Bondye?

⁵ En dimoun ki annan en gran respe pour Bondye i kontan Bondye e i pa anvi fer okenn keksoz ki pou gat son lanmitye avek Li. Zezi ti annan en “gran respe pour Bondye.” (Ebr. 5:7) I pa ti zanmen per Zeova. (Iza. 11:2, 3) O kontrer, i ti vreman kontan Zeova e i ti anvi obei li. (Zan 14:21, 31) Parey Zezi, nou osi nou annan en gran respe pour Zeova parski i kontan nou, i saz, i annan lazistis e i pwisan. Nou osi konnen ki lafason ki nou reazir ler Zeova i ansenny nou, i annan en lefe lo li. Sa ki nou fer i kapab fer Zeova kontan ouswa i kapab fer li sagren.​—Ps. 78:41; Prov. 27:11.

6. Ki en fason ki nou kapab devlop en gran respe pour Bondye? (Psonm 34:11)

⁶ Nou bezwen devlop en gran respe pour Zeova parski nou pa’n ne avek sa kalite. (Lir Psonm 34:11.) En fason ki nou kapab devlop en gran respe pour Zeova, i par etidye kreasyon. Ler nou realize ki mannyer “bann keksoz ki Bondye in fer” i montre son lasazes, son pwisans ek son lanmour pour nou, sa pou fer nou annan plis respe pour li e nou pou kontan li plis. (Rom. 1:20) En ser ki apel Adrienne i dir: “Ler mon vwar tou sa ki Zeova in kree e mon vwar ki mannyer Zeova i saz, sa i enpresyonn mwan e i fer mwan realize ki Zeova i konnen kwa ki pli bon pour mwan.” Adrienne ti pran letan pour medit lo sa ki i vwar dan kreasyon e apre sa i ti dir: “Mon pa anvi fer okenn keksoz ki pou gat mon lanmitye avek Zeova parski i sa Enn ki’n donn mwan lavi.” Eski ou osi ou kapab pran en pe letan sa semenn pour reflesir lo en keksoz ki Zeova in kree? Sa pou fer ou annan plis respe ek lanmour pour Zeova.​—Ps. 111:2, 3.

7. Ki mannyer lapriyer i ed nou pour annan en gran respe pour Zeova?

⁷ En lot fason ki nou kapab devlop en gran respe pour Bondye, i ler nou priy Bondye regilyerman. Nou vin pli pros avek Zeova sak fwa ki nou koz avek li dan lapriyer. Sak fwa ki nou demann Zeova sa lafors pour nou andir en problenm, sa i fer nou rapel ki Zeova i vreman pwisan. Ler nou remersye li pour donn nou son Garson konman ranson, sa i fer nou rapel ki Zeova i kontan nou. Ler nou sipliy Zeova pour ed nou fer fas avek en problenm, sa i fer nou rapel ki Zeova i vreman saz. Bann lapriyer koumsa i ed nou pour annan plis respe pour Zeova e nou pli determinen pour pa fer okenn keksoz ki pou gat nou lanmitye avek li.

8. Ki nou kapab fer pour kontinyen annan en gran respe pour Bondye?

⁸ Pour nou kontinyen annan en gran respe pour Bondye, nou bezwen etidye Labib avek sa lobzektif pour aprann avek bann bon ek bann move legzanp ki dan Labib. Annou vwar legzanp de serviter fidel Zeova. Sa i Obadya, ki ti ansarz pale Lerwa Aab ek Granpret Zeoada. Apre nou pou vwar ki nou kapab aprann avek Lerwa Zeoas, ki ti lerwa Zida. Lerwa Zeoas ti en serviter Zeova me pli tar i ti aret servi Zeova.

9. Ki mannyer sa gran respe ki Obadya ti annan pour Zeova ti ed li? (1 Lerwa 18:3, 12)

⁹ Premye fwa ki Labib i koz lo Obadya b i dir: “Obadya ti annan en gran respe pour Zeova.” (Lir 1 Lerwa 18:3, 12.) Ki mannyer respe ki Obadya ti annan pour Zeova ti ed li? Premyerman, sa respe ki Obadya ti annan pour Zeova ti fer li vin en dimoun onnet e diny konfyans. Sa ti fer ki lerwa ti met li ansarz pale. (Konpar Neemya 7:2.) Sa respe ki Obadya ti annan pour Zeova ti osi ed li pour annan en kantite kouraz e sa i en kalite ki i ti vreman bezwen. I ti viv dan sa letan kot move Lerwa Aab ti diriz Izrael. Aab ti fer “pli pir dan lizye Zeova ki tou bann lerwa ki ti avan li.” (1 Rwa. 16:30) Osi, madanm Aab ki ti apel Zezabel ti ador Baal. Zezabel ti sitan ay Zeova, ki i ti esey anpes tou dimoun dan sa dis tribi Izrael ador Zeova. I ti menm touy en kantite profet Bondye. (1 Rwa. 18:4) I kler ki Obadya ti ador Zeova pandan en letan ki ti difisil.

10. Ki mannyer Obadya ti demontre en kantite kouraz?

¹⁰ Ki mannyer Obadya ti demontre en kantite kouraz? Ler Zezabel ti pe rod bann profet Bondye pour touye, Obadya ti kasyet 100 profet “par group 50 dan en kavern e [i] ti kontinyen anmenn dipen ek delo pour zot.” (1 Rwa. 18:13, 14) Si Zezabel ti konnen ki Obadya ti pe fer, i ti pou’n fer touy Obadya. Byensir, i kapab ki Obadya ti per e i pa ti anvi mor. Me Obadya ti kontan Zeova e i ti kontan bann ki ti servi Zeova plis ki i ti kontan son prop lavi.

11. Ki mannyer bann serviter Zeova dan nou letan i parey Obadya? (Vwar portre.)

¹¹ Ozordi, en kantite serviter Zeova i reste dan bann landrwa kot sa travay predikasyon in ganny enterdi. Zot demontre respe anver bann gouvernman. Parey Obadya, zot donn Zeova en devosyon ki zis pour li tousel. (Mat. 22:21) Zot montre ki zot annan en gran respe pour Bondye  par obei li plito ki zonm. (Akt 5:29) Zot fer sa par kontinyen anons sa bon nouvel e asiste renyon an sekre. (Mat. 10:16, 28) Zot esey fer sir ki zot bann frer ek ser i annan sa ki zot bezwen pour reste pros avek Zeova. Annou vwar legzanp Henri, ki reste dan en pei Lafrik kot nou travay ti ganny enterdi pour en pe letan. Pandan ki nou travay ti anba restriksyon, Henri ti pare pour anmenn bann piblikasyon ki baze lo Labib kot bann frer ek ser. I ekri: “Mon en dimoun ki timid. Alor mon asire ki i sa gran respe ki mon annan pour Zeova ki’n donn mwan sa kouraz ki mon ti bezwen.” Eski ou ti pou annan kouraz parey Henri? Ou osi ou kapab annan kouraz si ou devlop en gran respe pour Bondye.

12. Ki mannyer Granpret Zeoada ek son madanm ti montre ki zot fidel avek Zeova?

¹² Granpret Zeoada ti annan en gran respe pour Zeova e sa respe ti motiv li pour reste fidel avek Zeova e pour ankouraz lezot pour ador Zeova. Sa ti evidan ler Atalya, fiy Zezabel ti pran tronn pardfors e konmans dirize konman larenn Zida. Bann dimoun ti annan rezon per Atalya. I ti kriyel e i ti sitan anvi vin larenn, ki i ti menm esey touy tou son bann pti zanfan. (2 Kron. 22:10, 11) Zis Zeoas, enn sa bann zanfan ki ti sirviv parski Zeosabeat, madanm Zeoada ti sov li. Zeosabeat ek Zeoada ti kasyet sa garson e pran swen avek li. Dan sa fason, Zeoada ek Zeosabeat ti fer sir ki en dimoun dan fanmir David ti sirviv pour vin lerwa. Zeoada ti fidel avek Zeova e i pa ti les son lafreyer pour Atalya anpes li fer sa ki byen.​—Prov. 29:25.

13. Ler Zeoas ti annan set an, ki mannyer Zeoada ti montre ki i fidel avek Bondye?

¹³ Ler Zeoas ti annan set an, ankor enn fwa Zeoada ti montre ki i fidel avek Zeova. I ti fer en plan. Si son plan ti marse, Zeoas ti pou vin lerwa parski i ti en zeritye David. Me si son plan pa ti reisi, nou kapab asire ki Zeoada ti pou ganny touye. Sa plan ti marse avek led Zeova. Avek led bann sef ek bann levit, Zeoada ti fer Zeoas vin lerwa e fer Atalya ganny touye. (2 Kron. 23:1-5, 11, 12, 15; 24:1) Apre sa, Zeoada “ti fer en lalyans ant Zeova, lerwa ek tou dimoun, ki zot ti pou reste konman pep Zeova.” (2 Rwa. 11:17) Zeoada ti “osi met bann gardyen baro kot bann baro kot lakaz Zeova, pour ki nenport dimoun ki enpir dan okenn fason, pa ti pou kapab antre.”​—2 Kron. 23:19.

14. Ki mannyer Zeova ti onor Zeoada?

¹⁴ Pli boner, Zeova ti dir: “Mon pou onor bann ki onor mwan.” Sanmenm sa ki i ti fer. I ti rekonpans Zeoada. (1 Sam. 2:30) Par egzanp, Zeova in fer sir ki sa ki Zeoada in fer, in ganny mete dan Labib pour ki nou kapab aprann avek legzanp Zeoada. (Rom. 15:4) Ler Zeoada ti mor, i ti ganny sa loner pour ganny antere “dan Lavil David ansanm avek bann lerwa akoz i ti’n fer bann bon keksoz pour pep Izrael, pour sa vre Bondye e pour Son lakaz.”​—2 Kron. 24:15, 16.

15. Ki nou kapab aprann avek sa resi konsernan Zeoada? (Vwar portre.)

¹⁵ Sa resi konsernan Zeoada i kapab ed nou pour annan en gran respe pour Zeova. Bann ansyen i kapab swiv legzanp Zeoada par toultan rod fason pour protez kongregasyon. (Akt 20:28) Bann frer ek ser aze i kapab aprann avek legzanp  Zeoada. Zot kapab aprann ki ler zot annan en gran respe pour Zeova e zot reste fidel avek li, i kapab servi zot pour akonpli son plan. Menm si zot in aze, Zeova pa rezet zot. Bann zenn i kapab aprann avek lafason ki Zeova ti tret Zeoada. Zot kapab swiv legzanp Zeova par onor bann frer ek ser aze sirtou bann ki’n servi Zeova pour en kantite lannen. (Prov. 16:31) Me nou tou nou kapab aprann avek bann sef ek bann Levit ki ti ed Zeoada. Annou siport “bann ki pe diriz” nou par obei zot.​—Ebr. 13:17.

16. Kwa ki montre ki Lerwa Zeoas pa ti en dimoun ki ti for?

¹⁶ Zeoada ti ed Lerwa Zeoas pour vin en bon dimoun. (2 Rwa. 12:2) Sa ti fer ki ler Lerwa Zeoas ti ankor zenn, i ti anvi fer plezir Zeova. Me apre ki Zeoada ti’n mor, Zeoas ti ekout bann prens ki pa ti servi Zeova. Ki ti arive apre? Zeoas ek son pep ti “konmans ador bann poto sakre ek bann zidol.” (2 Kron. 24:4, 17, 18) Menm si sa ki zot ti fer, ti fer Zeova vreman sagren, Zeova ti “kontinyen anvoy bann profet kot zot pour fer zot retourn kot [li] . . . , me zot pa ti oule ekoute.” Zot pa ti ekout Zekarya, garson Zeoada. Zekarya ti en profet, en pret e osi kouzen Zeoas. Anfet, Zeoas pa ti demontre rekonesans anver sa fanmir ki ti’n ed li en kantite. I ti fer touy Zekarya.​—2 Kron. 22:11; 24:19-22.

17. Ki ti arive avek Zeoas?

¹⁷ Zeoas pa ti kontinyen annan en gran  respe pour Zeova e keksoz ti al vreman mal pour li. Zeova ti’n dir: “Bann ki mank respe pour mwan pou ganny abese.” (1 Sam. 2:30) Pli tar, en pti larme Siriyen ti ranport laviktwar lo larme Zeoas, ki ti en “gran larme.” Zeoas ti ganny en gran blesir. Apre ki bann Siriyen ti’n ale, bann serviter Zeoas ti touy li parski i ti’n touy Zekarya. Bann Izraelit ti krwar ki Zeoas ti sitan en move lerwa ki zot pa ti anter li “dan simityer bann lerwa.”​—2 Kron. 24:23-25; vwar not letid “son of Barachiah” dan nwtsty dan Matye 23:35.

18. Dapre Zeremi 17:7, 8, ki nou kapab fer pour nou pa vin parey Zeoas?

¹⁸ Ki nou kapab aprann avek sa ki ti arive avek Zeoas? Zeoas ti parey en pye dibwa ki son rasin pa’n al dan fon e ki bezwen ganny apiye avek en dibwa. Zeoada ti parey sa dibwa ki ti pe siport Zeoas. Ler Zeoada ti mor, Zeoas ti konmans ekout bann aposta e i pa ti reste fidel avek Zeova. Sa legzanp i montre ki nou pa devret obei Zeova zis akoz nou fanmir ek lezot dan kongregasyon pe fer li e zot pe kit en bon legzanp pour nou. Pour nou reste pros avek Zeova, nou bezwen devlop plis lanmour ek respe pour li par etidye son Parol regilyerman, medite e fer lapriyer.​—Lir Zeremi 17:7, 8; Kol. 2:6, 7.

19. Ki Zeova i demann nou pour fer?

¹⁹ Zeova pa demann nou pour fer en kantite keksoz pour nou kapab fer li plezir. Sa ki Zeova i demann nou pour fer i ganny dekrir dan Eklezyast 12:13 ki dir: “Annan en gran respe pour sa vre Bondye e obei son bann komannman, sanmenm tou ki en dimoun i devret fer.” Ler nou annan en gran respe pour Zeova, nou pou kapab fer fas avek okenn difikilte ki nou rankontre dan lavenir e nou pou reste fidel avek Zeova parey Obadya ek Zeoada ti fer. Nanryen pa pou kapab gat nou lanmitye avek Zeova.