1. Dapre 1 Pyer 5:2, ki privilez bann ansyen i annan?

 BANN ansyen dan kongregasyon in ganny konfye sa responsabilite pour pran swen avek bann mouton presye Zeova. Zot rekonesan ki Zeova in donn zot sa privilez pour servi zot bann frer ek ser e zot travay dir pour vin ‘bann berze ki vreman pran swen’ avek troupo Bondye. (Zer. 23:4; lir 1 Pyer 5:2.) Nou rekonesan pour annan bann zonm koumsa dan nou kongregasyon!

2. Ki difikilte serten ansyen i kapab fer fas avek?

² Bann ansyen i fer fas avek en kantite difikilte ler zot pe desarz zot bann responsabilite. Par egzanp, bann ansyen i bezwen travay dir pour pran swen avek kongregasyon. Tony, en ansyen ki reste Leta-z-ini ti bezwen konn son limit konsernan lakantite travay ki i ti aksepte pour fer. I dir: “O konmansman, pandemi COVID-19, mon ti pe deplizanpli fer plis travay pour organiz renyon predikasyon. Me menm si mon ti pe fer bokou, i ti toultan annan plis pour fer. Mon ti vin telman bizi ki mon pa ti pe pas ase letan pour lir Labib, etidye e priye.” En ansyen ki apel Ilir, ki reste Kosovo ti fer fas avek en lot kalite difikilte. I ti reste dan en landrwa kot i ti annan lager e i ti vwar li difisil pour li obei bann lenstriksyon sorti kot lorganizasyon Zeova. I dir: “Mon ti bezwen demontre kouraz ler Biro Brans ti demann mwan pour al ed bann frer ek ser dan en landrwa danzere. Mon ti per e sa lenstriksyon pa ti paret fer sans pour mwan.” En misyonner ki apel Tim, ki pe servi Lazi ti vwar li difisil pour fer tou sa ki i ti annan pour fer dan en lazournen. I dir: “Parfwa, mon ti santi mwan tro fatige mantalman e emosyonnelman pour mwan pran swen avek mon bann frer ek ser.” Kwa ki kapab ed bann ansyen ki pe fer fas avek bann difikilte en pe parey?

3. Ki byenfe nou tou nou kapab gannyen avek legzanp Ziz Gideonn?

 ³ Bann ansyen i kapab aprann avek legzanp Ziz Gideonn. (Ebr. 6:12; 11:32) I ti protez e gid pep Bondye. (Ziz 2:16; 1 Kron. 17:6) Parey Gideonn, bann ansyen in ganny apwente pour pran swen avek pep Bondye pandan en letan vreman difisil. (Akt 20:28; 2 Tim. 3:1) Nou kapab aprann avek legzanp Gideonn. Gideonn ti konn son limit, i ti annan limilite e i ti obei Zeova. I ti bezwen andire ler i ti pe desarz son responsabilite. Ki swa nou en ansyen oubyen non, nou kapab demontre plis lapresyasyon pour nou bann ansyen. Nou kapab ed sa bann frer ki pe travay dir pour pran swen avek nou dan kongregasyon.​—Ebr. 13:17.

4. Ki mannyer Gideonn ti montre ki i annan limilite e ki i konn son limit?

⁴ Gideonn ti en zonm ki ti annan limilite e i ti konn son limit. b Ler en lanz Zeova ti dir Gideonn ki i’n ganny swazir pour sov Izrael dan lanmen bann Madyanit, sa zonm ki ti annan limilite, ti reponn: “Mon fanmir i sa fanmir ki mwen enportan dan tribi Manase e mwan, mon sa enn ki pli pa enportan dan lakaz mon papa.” (Ziz 6:15) I pa ti santi li alaoter pour pran sa responsabilite. Me Zeova ti konnen ki i kapab fer li. Avek led Zeova, Gideonn ti desarz son responsabilite byen.

5. Kan ki i kapab difisil pour en ansyen konn son limit e demontre limilite?

⁵ Bann ansyen i fer zot mye pour rekonnet ki zot annan limit e zot demontre limilite dan tou sa ki zot fer. (Mik. 6:8; Akt 20:18, 19) Zot pa fer vantar konsernan sa ki zot kapab fer oubyen sa ki zot in fer e zot pa santi ki zot pa vo nanryen parski zot in deza fer fot. Me parfwa i kapab difisil pour en ansyen rekonnet son limit e annan limilite. Par egzanp, i kapab ki i aksepte en kantite responsabilite e apre i vwar li difisil pour desarz tou sa bann responsabilite. Oubyen i kapab difisil pour li rekonnet son limit e annan limilite ler serten dimoun i felisit li e serten dimoun i kritik li pour lafason ki i fer keksoz. Ki bann ansyen i kapab aprann avek legzanp Gideonn ki pou ed zot dan bann sityasyon koumsa?

6. Ki bann ansyen i kapab aprann konsernan konn zot limit avek legzanp Gideonn? (Vwar portre.)

 ⁶ Demann led. En dimoun ki konn son limit, i konnen ki i annan keksoz ki i pa kapab fer. Gideonn ti montre ki i konn son limit parski i ti demann led avek lezot. (Ziz 6:27, 35; 7:24) Bann ansyen ki saz i swiv legzanp Gideonn. Tony, ki’n ganny mansyonnen pli boner, i dir: “Lafason ki mon ti grandi ti fer mwan annan sa tandans pour aksepte plis travay ki mon ti kapab fer. Alor mon ti deside pour etidye lo lenportans pour konn nou limit dan nou ladorasyon fanmir e mon ti demann mon madanm son lopinyon lo sa size. Mon ti get sa video ki annan pour tit Train, Trust, and Empower Others, as Jesus Does ki lo jw.org.” Tony ti konmans demann lezot pour ed li avek bann keksoz ki i ti annan pour fer. Ki ti arive? Tony i dir: “Bann travay dan kongregasyon pe ganny fer e mon annan plis letan pour vin pli pros avek Zeova.”

7. Ki mannyer bann ansyen i kapab swiv legzanp Gideonn si zot ganny kritike? (Zak 3:13)

⁷ Pa ankoler si en dimoun i kritik ou. En lot difikilte ki bann ansyen i kapab fer fas avek i ler lezot i kritik zot. Ankor enn fwa, legzanp Gideonn i kapab ed zot. Gideonn ti rekonnet ki i enparfe alor i ti reste kalm ler bann zonm Efraim ti kritik li. (Ziz 8:1-3) Gideonn pa ti koz avek zot avek lakoler. Gideonn ti montre ki i ti annan limilite par ekout zot ler zot ti pe konplent e par koz avek zot dan en bon fason. Bann ansyen ki saz i swiv legzanp Gideonn par ekout byen ler lezot i kritik zot e par reponn avek ladouser. (Lir Zak 3:13.) Dan sa fason, zot ede pour gard lape dan kongregasyon.

8. Ki mannyer bann frer ki annan responsabilite i devret azir ler zot ganny felisite? Donn en legzanp.

⁸ Donn tou loner Zeova. Ler bann dimoun ti onor Gideonn parski i ti’n ranport laviktwar lo bann Madyanit, Gideonn ti donn loner Zeova. (Ziz 8:22, 23) Ki mannyer bann frer ki annan responsabilite dan kongregasyon i kapab swiv legzanp Gideonn? Zot kapab donn loner Zeova pour bann keksoz ki zot akonpli. (1 Kor. 4:6, 7) Par egzanp, si en ansyen i ganny felisite parski i en bon ansenyan, i kapab dir ki sa lenstriksyon i sorti dan Parol Bondye e ki nou tou nou ganny formasyon sorti kot lorganizasyon Zeova. Bann ansyen i kapab reflesir lo si zot fason ansennyen pe donn loner Zeova oubyen si zot pe esey enpresyonn lezot. Annou vwar leksperyans en ansyen ki apel Timothy. Ler Timothy ti fek ganny apwente konman ansyen, i ti kontan fer diskour piblik. I dir: “Mon ti fer bann lentrodiksyon e donn bann legzanp ki gran e konplike e souvan sa ti fer mwan ganny felisite en kantite. Me malerezman, latansyon ti tant pour lo mwan olye lo Labib oubyen Zeova.” Avek letan, Timothy ti realize ki i bezwen sanz lafason ki i ansennyen pour ki lezot pa tro konsantre lo li. (Prov. 27:21) Ki ti arive apre? I dir: “Aprezan bann frer ek ser i dir mwan ki mannyer mon diskour in ed zot fer fas avek en problenm, pour andire oubyen pour vin pli pros avek Zeova. Sa bann komanter koumsa i fer mwan pli kontan ki bann komanter avan, ler zot ti pe felisit mwan.”

9. Kwa ki ti fer li difisil pour Gideonn obei Zeova e demontre kouraz? (Vwar portre lo kouvertir.)

⁹ Apre ki Gideonn ti’n ganny apwente konman ziz, i ti bezwen kontinyen obei Zeova e demontre kouraz. Zeova ti demann li pour detri lotel ki son papa ti servi pour ador Baal e sa ti en keksoz danzere pour fer. (Ziz 6:25, 26) Pli tar, ler Gideonn ti’n rasanble en larme, de fwa Zeova ti dir li ki i devret fer son larme pli pti. (Ziz 7:2-7) Apre, Zeova ti dir li atak kan lennmi dan milye lannwit.​—Ziz 7:9-11.

10. Kwa ki kapab fer li difisil pour en ansyen obei?

 ¹⁰ Bann ansyen i devret “pare pour obei.” (Zak 3:17) En ansyen ki obeisan i pare pour aplik sa ki Labib i dir e pour soumet avek lorganizasyon Bondye. Sa i fer li vin en bon legzanp pour lezot. Me kantmenm sa, i kapab difisil pour li obei. Par egzanp, i kapab vwar li difisil pour li obei ler i annan en kantite lenstriksyon oubyen ler sa bann lenstriksyon i sanz vitman. Dan serten ka, i kapab mazinen si serten lenstriksyon i fer sans oubyen saz. Oubyen i kapab ki i ganny demande pour pran en responsabilite ki kapab fer li ganny met dan kaso. Ki mannyer bann ansyen i kapab swiv legzanp Gideonn e obei dan bann sityasyon koumsa?

11. Kwa ki montre ki bann ansyen i obeisan?

¹¹ Ekout byen lenstriksyon e obei. Zeova ti dir Gideonn ki mannyer pour detri lotel ki son papa ti servi pour ador fo bondye. I ti dir li kote pour konstri en nouvo lotel pour Zeova e ki zannimo i pou sakrifye lo sa lotel. Gideonn pa ti kestyonn sa bann lenstriksyon. I ti fer egzakteman sa ki Zeova ti’n dir li fer. Ozordi, bann ansyen i ganny bann lenstriksyon sorti kot lorganizasyon Zeova atraver bann let, bann lanons e lezot lenstriksyon ki ed nou pour reste sen e sof e pros avek Zeova. Nou kontan bann ansyen parski zot swiv bann lenstriksyon sorti kot lorganizasyon Zeova. Ler bann ansyen i fer sa, sa i anmenn byenfe pour kongregasyon an antye.​—Ps. 119:112.

12. Ki mannyer bann ansyen i kapab aplik Ebre 13:17 si lorganizasyon i demann zot pour sanz lafason ki zot fer keksoz?

¹² Pare pour adapte. Rapel ki Zeova ti’n dir Gideonn pour fer laplipar son bann solda retourn kot zot. (Ziz 7:8) I kapab ki Gideonn ti mazinen: ‘Eski i neseser pour fer sa sanzman? Eski sa ti pou marse?’ Kantmenm sa, Gideonn ti obei. Ozordi, bann ansyen i swiv legzanp Gideonn par obei ler lorganizasyon Zeova i donn lenstriksyon konsernan bann sanzman ki zot devret fer. (Lir Ebre 13:17.) Par egzanp, an 2014, Konsey Direkter ti donn bann nouvo lenstriksyon konsernan larzan ki ganny servi pour konstri Lasal Rwayonm ek Lasal Lasanble. (2 Kor. 8:12-14) Dan lepase, lorganizasyon ti donn bann kongregasyon en lón pour zot kapab konstri zot Lasal Rwayonm e apre sa kongregasyon ti rann lorganizasyon sa larzan. Me aprezan, lorganizasyon i servi bann kontribisyon sorti kot tou kongregasyon dan lemonn pour konstri bann Lasal Rwayonm ek Lasal Lasanble kot i annan bezwen. Sa i ganny fer menm si sa kongregasyon napa bokou larzan pour kontribye. Ler José ti tann konsernan sa sanzman, i pa ti krwar ki sa ti pou marse. I ti mazinen ki ‘napa en Lasal Rwayonm ki pou ganny konstrir e ki keksoz pa mars koumsa dan sa landrwa kot i reste.’ Kwa ki ti ed José pour siport sa laranzman? I dir: “Proverb 3:5, 6 i fer mwan rapel ki mon devret annan konfyans dan Zeova. Mon’n vwar ki sa laranzman in anmenn bann bon rezilta. Nou pa pe  zis konstri plis Lasal Rwayonm me nou pe kontribye dan en fason pour ki keksoz i balanse.”

13. (a) Ki Gideonn ti asire? (b) Ki mannyer bann ansyen i kapab swiv legzanp Gideonn? (Vwar portre.)

¹³ Demontre kouraz e fer lavolonte Zeova. Gideonn ti obei Zeova menm ler i ti per e son lavi ti an danze. (Ziz 9:17) Apre ki Zeova ti’n reasir Gideonn, Gideonn ti konvenki ki Zeova ti pou ed li protez Son pep. Bann ansyen ki reste dan bann landrwa kot sa travay predikasyon i ganny enterdi, i swiv legzanp Gideonn. Sa bann ansyen i demontre kouraz e zot organiz bann renyon ek predikasyon menm si zot kapab ganny met dan kaso, ganny kestyonnen, perdi zot travay oubyen ganny atake. c Pandan gran ladetres, bann ansyen pou bezwen kouraz pour obei nenport lenstriksyon ki zot gannyen menm si sa pou met zot lavi an danze. Par egzanp, nou kapab ganny bann lenstriksyon konsernan ki mannyer pour anons sa mesaz zizman e ki nou bezwen fer pour sirviv latak Gog sorti Magog.​—Ezek. 38:18; Rev. 16:21.

14. Akoz i ti difisil pour Gideonn andire?

¹⁴ Konman en ziz, Gideonn ti travay dir. Ler bann Madyanit ti sove pandan lager dan lannwit, Gideonn ti tay deryer zot depi Vale Zizreel ziska Larivyer Zourden, kot i tre probab ti annan en kantite pye dibwa. (Ziz 7:22) Eski ler zot ti ariv kot Larivyer Zourden Gideonn ti aret tay deryer zot? Non. Menm si Gideonn ek son 300 zonm ti fatige, zot ti travers larivyer e kontinyen tay deryer sa bann Madyanit ziska zot ti zwenn zot. Finalman, zot ti ranport laviktwar lo bann Madyanit.​—Ziz 8:4-12.

15. Akoz parfwa i kapab difisil pour en ansyen andire?

¹⁵ Bann ansyen i annan sa responsabilite pour pran swen avek zot fanmir e avek kongregasyon. Me parfwa, zot kapab santi zot vreman fatige. Dan bann sityasyon koumsa, ki mannyer bann ansyen i kapab swiv legzanp Gideonn?

16-17. Kwa ki ti ed Gideonn pour andire e ki bann ansyen i kapab asire? (Izai 40:28-31) (Vwar portre.)

 ¹⁶ Annan konfyans ki Zeova pou donn ou lafors. Gideonn ti annan konfyans ki Zeova ti pou donn li lafors e i sanmenm ki Zeova ti fer. (Ziz 6:14, 34) En fwa, Gideonn ek son bann zonm ti pe tay deryer de lerwa Madyann. I tre probab ki sa de lerwa ti lo samo e Gideonn ek son bann zonm ti apye. (Ziz 8:12, 21) Me Bondye ti ed bann Izraelit pour atrap sa de lerwa e pour ranport laviktwar lo zot. Pareyman bann ansyen i kapab depan lo Zeova, sa enn ki “pa zanmen fatige, ni epwize.” Zeova pou donn zot lafors ler zot bezwen.​—Lir Izai 40:28-31.

¹⁷ Annou vwar leksperyans Matthew, ki en ansyen ki lo Hospital Liaison Committee (HLC). Kwa ki ed Matthew pour andire? Matthew i dir: “Mon’n ganny lafors sorti kot Zeova parey Filipyen 4:13 i koz lo la. Plizyer fwa, mon’n sitan fatige ki mon ti krwar ki mon pa ti pou kapab kontinyen. Dan sa bann moman, mon’n sipliy Zeova pour donn mwan sa lafors ki mon ti bezwen pour ed mon bann frer ek ser e mon santi ki Zeova in servi son lespri sen pour donn mwan lafors e ed mwan andire.” Parey Gideonn, nou bann ansyen i travay vreman dir pour pran swen avek pep Zeova menm si i pa toultan fasil. Byensir, zot bezwen konn zot limit e realize ki zot pa pou toultan kapab fer tou sa ki zot anvi fer. Me zot kapab annan konfyans ki Zeova pou tann zot ler zot demann li led e i pou donn zot lafors pour andire.​—Ps. 116:1; Fili. 2:13.

18. Parey nou’n vwar dan sa lartik, ki mannyer bann ansyen i kapab swiv legzanp Gideonn?

¹⁸ Bann ansyen i kapab aprann en kantite keksoz avek legzanp Gideonn. Bann ansyen i bezwen demontre limilite e konn zot limit konsernan lakantite travay ki zot aksepte pour fer e ler lezot i felisit oubyen kritik zot. Zot bezwen obei Zeova ek son lorganizasyon e demontre kouraz sirtou la ki lafen sa lemonn pe aprose. Zot bezwen osi annan konfyans ki nenport difikilte ki zot fer fas avek, Bondye i kapab donn zot lafors. Nou vreman apresye sa bann berze ki travay dir e nou “kontinyen montre lapresyasyon pour bann zonm koumsa.”​—Fili. 2:29.