1. Ki nou bezwen fer pour sirviv zour Zeova?

 LER Labib i koz lo “zour Zeova,” i refer avek sa letan ler Zeova i ziz son bann lennmi e sov son pep. Dan lepase, Zeova ti pini serten nasyon. (Iza. 13:1, 6; Ezek. 13:5; Zef. 1:8) Dan nou letan, “zour Zeova” i konmans ler bann dirizan politik i detri Gran Babilonn e i pou fini avek lager Armagedon. Pour nou kapab sirviv “zour Zeova,” nou bezwen prepar nou la konmela. Zezi ti ansennyen ki nou devret “met” pare pour gran ladetres. Sa i montre ki i en keksoz ki nou devret kontinyen fer.​—Mat. 24:21; Lik 12:40.

2. Ki mannyer sa premye let ki Pol ti ekri pour bann Tesalonisyen i kapab ed nou?

² Dan sa premye let ki zapot Pol ti ekri pour bann Kretyen Tesalonik, i ti servi en kantite legzanp pour ed sa bann Kretyen pour toultan pare pour zour zizman Zeova. Ler Pol ti ekri sa let, i ti konnen ki zour Zeova pa ti pou vin deswit. (2 Tesa. 2:1-3) Kantmenm sa, Pol ti ankouraz son bann frer ek ser pour prepare pour sa bann zour konmsi sa zour ti pe vin son lannmen. Nou osi nou kapab aplik son konsey. Annou vwar ki Pol ti dir: (1) konsernan lafason ki zour Zeova ti pou vini, (2) konsernan lekel ki pa pou sirviv zour Zeova e (3) konsernan ki nou kapab fer pour nou sirviv zour Zeova.

3. Ki mannyer zour Zeova pou vin parey en voler dan lannwit? (Vwar portre.)

³ “Parey en voler dan lannwit.” (1 Tesa. 5:2) Sa i sa premye legzanp ki Pol ti servi pour dekri lafason ki zour Zeova pou vini. Souvandfwa, bann voler i azir vit e zot al vole pandan lannwit ler dimoun pa pe ekspekte zot. Zour Zeova pou vin en sel kou e i pou sirprann laplipar dimoun. Menm bann serviter Zeova i kapab sirprann avek lavites ki bann keksoz i arive. Me nou pa pou ganny detrir parey bann move dimoun.

4. Ki mannyer zour Zeova i parey douler lakousman?

 ⁴ “Parey douler lakousman en madanm ansent.” (1 Tesa. 5:3) En madanm ansent pa kapab dir egzakteman ki ler i pou ganny son zanfan. Me i asire ki i pou ganny son zanfan. I tre probab ki douler lakousman pou vin en sel kou, i pou vreman fermal e sa madanm pa pou kapab fer nanryen pour aret sa. Dan menm fason, nou pa konnen ki zour e ki ler ki zour Zeova pou konmanse. Kantmenm sa, nou asire ki i pe vini e ki Zeova pou ziz bann move dimoun en sel kou e zot pa pou kapab sape.

5. Ki mannyer gran ladetres i parey konmansman en nouvo zour?

⁵ Parey konmansman en nouvo zour. Pol i servi en trwazyenm legzanp. Ankor enn fwa, i koz lo bann voler ki pe vole dan fernwanr. Me i paret ki safwasi, Pol ti konpar zour Zeova avek konmansman en nouvo zour. (1 Tesa. 5:4) Bann voler ki al vole pandan lannwit i kapab pa remarke ki letan pe pase. Alor zot kapab sirprann ler soley i konmans leve e lalimyer soley i fer dimoun vwar zot. Pareyman, gran ladetres pou montre lekel ki parey bann voler, setadir bann ki dan fernwanr, ki kontinyen fer bann keksoz ki pa fer Bondye plezir. Me nou, nou kapab met nou pare pour gran zour Zeova par evite fer bann keksoz ki pa fer plezir Zeova e par fer “tou sort keksoz ki byen, drwat e vre.” (Efe. 5:8-12) Apre sa, Pol ti servi de lezot legzanp pour dekri bann ki pa pou sirviv gran zour Zeova.

6. Akoz Labib i dir ki laplipar dimoun pe dormi? (1 Tesalonisyen 5:6, 7)

⁶ “Bann ki dormi.” (Lir 1 Tesalonisyen 5:6, 7.) Pol ti dir ki bann ki pa pou sirviv  zour Zeova i parey bann dimoun ki pe dormi. Zot pa konnen ki pe arive otour zot oubyen zot pa konnen ki letan pe pase. Alor, zot pa konnen ler en keksoz enportan pe arive otour zot e zot pa kapab reazir. Ozordi laplipar dimoun i parey bann dimoun ki pe dormi. (Rom. 11:8) Zot pa krwar dan bann levidans ki montre ki nou pe viv dan “bann dernyen zour” e ki byento gran ladetres pou konmanse. Ler i annan bann gran sanzman dan lemonn, serten dimoun i enterese avek sa mesaz Rwayonm. Me en kantite i retonm dormi olye reste eveye. Menm serten ki krwar ki en zour Bondye pou ziz bann move dimoun, zot krwar ki sa pa pou ariv konmela. (2 Pyer 3:3, 4) Me nou, nou rekonnet ki avek sak zour ki pase, i enportan pour nou reste eveye.

7. Ki mannyer bann ki Bondye pou detri i parey bann soular?

⁷ “Bann soular.” Zapot Pol ti dir ki bann dimoun ki Bondye pou detri, i parey bann soular. Bann dimoun ki sou, i tarde pou reazir ler en keksoz pe arive otour zot e zot fer bann move desizyon. Dan menm fason, bann move dimoun pa reazir anver bann lavertisman ki Bondye i donnen. Zot swazir pou viv zot lavi dan en fason ki pou anmenn ver destriksyon. Me Labib i dir ki bann Kretyen i bezwen reste azen, setadir kontinyen rezonn byen. (1 Tesa. 5:6) En spesyalis Labib i dir ki en dimoun ki azen i reste kalm e i pa panik. I kapab reflesir byen pour li kapab fer sa bon desizyon. Akoz nou bezwen reste kalm e pa panik? Pour ki nou pa mel dan bann problenm sosyal ek politik. Anmezir ki zour Zeova i aprose, i pou annan plis presyon pour nou pran kote dan bann problenm sa lemonn. Kantmenm sa, nou pa bezwen trakase konsernan ki mannyer nou pou reazir. Lespri sen Bondye i kapab ed nou pour reste kalm e pa panik e pour fer bann desizyon ki saz.​—Lik 12:11, 12.

8. Ki 1 Tesalonisyen 5:8 i dir konsernan bann kalite ki pou ed nou reste eveye e pour kontinyen rezonn byen? (Vwar portre.)

⁸ “Met . . . proteksyon pour nou pwatrin e . . . kask lo nou latet.” Pol ti dir ki nou parey bann solda ki alert e ki annan tou nou lekipman pour lager. (Lir 1 Tesalonisyen 5:8.) Dimoun i ekspekte ki en solda i toultan pare pour lager nenport ler ki i annan en lager. I menm parey pour nou osi. Nou bezwen toultan pare pour gran zour Zeova par met lafwa ek lanmour konman en proteksyon pour nou pwatrin e lespwar konman en kask lo nou latet. Sa bann kalite i kapab ed nou pour toultan pare pour gran zour Zeova.

9. Ki mannyer nou lafwa i protez nou?

⁹ En proteksyon pour pwatrin i protez leker en solda. Lafwa ek lanmour i protez nou leker senbolik, setadir sa dimoun ki nou ete anndan. Sa de kalite pou ed nou pour kontinyen servi Bondye e pou kontinyen swiv Zezi. Lafwa i fer nou asire ki Zeova pou rekonpans nou parski nou pe vreman rod li avek tou nou leker. (Ebr. 11:6) Lafwa pou motiv nou pour reste fidel avek Zezi, ki nou Sef, menm si nou fer fas avek bann difikilte. Nou kapab fer nou lafwa vin pli for par aprann avek legzanp bann serviter Zeova dan nou letan, ki’n reste fidel menm ler zot in ganny persekite oubyen ler zot in fer fas avek problenm ekonomik. Nou osi kapab evite tonm dan sa latrap pour kontan larzan ek bann keksoz materyel, par swiv legzanp bann serviter Bondye ki senplifye zot lavi e met Rwayonm premye. b

10. Ki mannyer lanmour pour Bondye ek bann dimoun i ed nou pour andire?

 ¹⁰ Pour nou reste eveye e pour kontinyen rezonn byen, nou osi bezwen annan lanmour. (Mat. 22:37-39) Lanmour pour Zeova i ed nou pour kontinyen partisip dan sa travay predikasyon menm si sa i fer nou ganny problenm. (2 Tim. 1:7, 8) Vi ki nou osi kontan bann dimoun ki pa servi Zeova, nou kontinyen anons sa bon nouvel dan nou teritwar. Nou menm fer sa atraver let e par telefonn. Nou toultan annan lespwar ki en zour bann dimoun pou sanze e zot pou konmans fer sa ki byen.​—Ezek. 18:27, 28.

11. Ki mannyer lanmour pour nou bann frer ek ser i ed nou? (1 Tesalonisyen 5:11)

¹¹ Nou osi kontan nou bann frer ek ser. Nou montre ki nou kontan zot par “ankouraz kanmarad e batir kanmarad zis parey [nou] pe deza fer li.” (Lir 1 Tesalonisyen 5:11.) Parey bann solda ki pe lager kot a kot, nou ankouraz kanmarad. Menm si i kapab arive ki en solda i bles en lot solda ki pe lager akote li, i pa pou zanmen fer sa par ekspre. Pareyman, nou pa pou zanmen anvi bles santiman nou bann frer ek ser par ekspre oubyen rann mal pour mal. (1 Tesa. 5:13, 15) Nou osi demontre nou lanmour par demontre respe pour bann frer ki pe dirize dan kongregasyon. (1 Tesa. 5:12) Ler Pol ti ekri sa let pour bann Kretyen Tesalonik, i ti fer mwens ki enn an depi ki sa kongregasyon ti’n ganny formen. I tre probab ki bann zonm ki ti annan responsabilite dan sa kongregasyon ti napa leksperyans e i kapab ki zot ti fer fot. Kantmenm sa, zot ti merit respe. Anmezir ki gran ladetres i aprose, petet nou pou bezwen depan plis lo bann ansyen dan nou kongregasyon pour donn nou lenstriksyon. I kapab ki nou perdi kontak avek biro prensipal Temwen Zeova e sa biro brans ki responsab pour nou teritwar. Alor, i enportan pour nou aprann kontan e annan respe pour nou bann ansyen la konmela. Nenport kwa ki arive, annou kontinyen rezonn byen e pa konsantre lo defo ki bann ansyen i annan. Me konsantre lo lefet ki Zeova pe servi Zezi pour gid sa bann zonm fidel.

12. Ki mannyer nou lespwar i protez nou fason panse?

 ¹² Zis parey en kask i protez latet en solda, nou lespwar i protez nou fason panse. Ler nou asire ki bann promes Zeova pou vin vre, nou konpran ki sa ki sa lemonn i ofer pa vo nanryen. (Fili. 3:8) Nou lespwar i ed nou pour reste kalm e pa panik. Sanmenm ki en koup ki apel Wallace ek Laurinda ti eksperyanse. Wallace ek Laurinda pe servi Lafrik e dan lespas trwa semenn, sakenn ti perdi en paran dan lanmor. Zot pa ti kapab al kot zot fanmir akoz pandemi COVID-19. Wallace i ekri: “Sa lespwar pour rezireksyon i ed mwan pour mazin zot. Mon pa mazin zot parey zot ti ete avan zot ti mor me mon imazin zot parey zot pou ete ler zot pou resisite dan nouvo lemonn. Sa lespwar i fer mwan santi mwan kalm ler mon vreman sagren ouswa ler mon mank zot.”

13. Ki nou kapab fer pour ganny lespri sen Bondye?

¹³ “Pa anpes lespri sen travay dan zot.” (1 Tesa. 5:19) Zapot Pol ti dir ki lespri sen i travay dan nou. Ler nou les lespri sen travay dan nou, nou pou vreman devoue e nou pou vreman anvi fer sa ki byen. Nou pou osi travay dir pour Zeova. (Rom. 12:11) Ki nou kapab fer pour nou ganny lespri sen? Nou kapab priy Zeova e demann li son lespri sen. Nou kapab osi, etidye Parol Bondye e form parti son lorganizasyon. Sa pou ed nou devlop “fri lespri sen.”​—Gal. 5:22, 23.

14. Ki nou bezwen evite fer si nou anvi kontinyen ganny lespri sen Bondye? (Vwar portre.)

¹⁴ Apre ki Bondye in donn nou son lespri sen, nou bezwen fer atansyon ki nou “pa anpes lespri sen travay dan [nou].” Bondye i donn son lespri sen avek zis bann ki annan en fason panse ek kondwit ki prop. I pa pou kontinyen donn nou son lespri sen si nou kontinyen mazin bann keksoz ki enpir e nou fer sa bann keksoz. (1 Tesa. 4:7, 8) Pour kontinyen ganny lespri sen, nou osi bezwen “pa konsider bann profesi konman pa enportan.” (1 Tesa. 5:20) Dan sa verse, “profesi” i vedir bann mesaz ki Zeova in  donn nou atraver son lespri sen, sa i enkli bann profesi konsernan zour Zeova e bann profesi ki montre ki nou pe viv dan bann dernyen zour. Nou pa devret krwar ki zour Zeova oubyen Armagedon pa pou ariv dan nou letan. O kontrer, nou gard sa zour antet oubyen nou montre ki nou ekspekte ki sa zour pou arive byento par reste okipe toulezour, pe fer “bann aksyon ki demontre ki [nou] annan en devosyon pour Bondye” e par annan en bon kondwit.​—2 Pyer 3:11, 12.

15. Ki nou kapab fer pour nou pa ganny anbete avek bann lenformasyon ek mesaz ki ganny enspire par bann demon? (1 Tesalonisyen 5:21)

¹⁵ Byento, bann dimoun ki opoz Bondye pou dir ki i annan “lape ek sekirite!” (1 Tesa. 5:3) Sa pou en mesaz ki’n ganny enspire par bann demon e sa mesaz pou anbet laplipar dimoun. (Rev. 16:13, 14) Me nou pa pou ganny anbete si nou “verifye tou keksoz.” (Lir 1 Tesalonisyen 5:21; vwar not letid dan nwtsty.) Sa mo Grek ki’n ganny tradwir “verifye” ti ganny servi pour dekri lafason ki dimoun ti teste bann metal parey lor ek larzan pour fer sir ki zot ti vreman lor ek larzan. Dan menm fason, nou bezwen teste sa ki nou tande oubyen lir pour verifye si i laverite. I ti enportan pour bann Tesalonisyen fer sa e i pli enportan pour nou fer sa anmezir ki gran ladetres i arive. Olye krwar tou sa ki lezot i dir, nou bezwen servi nou abilite pour rezonnen pour konpar sa ki nou lir oubyen tande avek sa ki Labib ek lorganizasyon Zeova i dir. Ler nou fer sa, nou pa pou ganny anbete avek bann parol ki’n ganny enspire par bann demon.​—Prov. 14:15; 1 Tim. 4:1.

16. Ki lespwar nou annan e ki sa i fer nou determinen pour fer?

¹⁶ Nou konnen ki pep Zeova pou pas atraver gran ladetres. Me nou pa konnen ki i kapab arive avek nou demen. (Zak 4:14) Kantmenm sa, ki swa nou pas atraver gran ladetres oubyen nou mor avan ki gran ladetres i arive, si nou reste fidel, Zeova pou donn nou lavi eternel. Bann Kretyen swazir pou al dan lesyel avek Kris e lezot mouton pou dan paradi lo later. Alor annou konsantre lo nou lespwar e toultan pare pour gran zour Zeova!