1-2. Ki difikilte ki nou fer fas avek ki en pe parey avek sa ki Lot ti pas ladan?

 LER nou vwar standar moral bann dimoun ozordi, sa i fer nou santi parey Lot. Lot ti konnen ki son Papa ki dan lesyel i ay bann move kondwit, alor “son lespri ti fatige en kantite akoz move kondwit bann dimoun dezobeisan.” (2 Pyer 2:7, 8) Vi ki Lot ti annan en gran respe pour Bondye e i ti kontan Bondye, i ti ay bann keksoz imoral ki bann dimoun otour li ti pe fer. Nou osi nou pe viv parmi bann dimoun ki napa bokou oubyen ki napa ditou respe pour bann standar moral Zeova. Kantmenm sa, nou kapab kontinyen swiv bann standar moral Zeova, si nou kontinyen annan lanmour pour Zeova e nou aprann pour annan en gran respe pour li.​—Prov. 14:2.

² Pour ed nou fer sa, Zeova i donn nou lankourazman atraver liv Proverb. Tou Kretyen ki swa zonm, madanm, zenn oubyen bann aze i kapab ganny bann byenfe atraver bann konsey saz ki trouve dan liv Proverb.

3. Dapre Proverb 17:3, ki en rezon akoz nou bezwen protez nou leker? (Vwar portre.)

³ En rezon enportan ki nou protez nou leker senbolik, setadir sa dimoun ki nou ete anndan, i akoz Zeova i egzamin nou leker. Sa i vedir ki i pa zis vwar sa ki lezot i vwar me i osi vwar sa kalite dimoun ki nou vreman ete. (Lir Proverb 17:3.) I pou kontan nou si nou kontinyen mazin son bann konsey ki kapab ed nou viv pour touzour. (Zan 4:14) Si nou kontinyen mazin bann konsey saz Zeova, i pou napa plas dan nou lespri pour bann mansonz ki Satan ek son lemonn pe propaze e nou pa pou swiv kondwit bann move dimoun. (1 Zan 5:18, 19) Anmezir ki nou vin pli pros avek Zeova, nou pou annan plis lanmour ek respe pour li. Vi ki nou pa anvi bles santiman nou Papa, nou pa pou ni menm mazin pour fer  en keksoz mal. Ler nou ganny tante pour fer sa ki mal, nou pou demann nou lekor, ‘Ki mannyer mon kapab volonterman bles santiman sa Enn ki’n demontre en sitan gran lanmour pour mwan?’​—1 Zan 4:9, 10.

4. Ki mannyer respe pour Zeova ti anpes en ser fer en keksoz mal?

⁴ En ser ki reste Kroasi, ki apel Marta ti ganny tante pour komet imoralite seksyel. b Marta i dir: “Mon ti vwar li difisil pour rezonn byen e pour reziste sa dezir pour fer sa ki mal. Me sa gran respe ki mon annan pour Zeova ti protez mwan.” Ki mannyer sa gran respe ki Marta ti annan pour Bondye ti protez li? Marta i dir ki i ti reflesir lo sa ki ti pou arive si i ti fer en move desizyon. Nou osi nou kapab fer parey. Sa pli move konsekans ki kapab arive, i ki nou fer Zeova sagren e nou perdi sa loportinite pour ador li pour touzour.​—Zen. 6:5, 6.

5. Ki ou kapab aprann avek leksperyans Leo?

⁵ Ler nou annan en gran respe pour Zeova, nou pou fer sir ki nou pa toler bann move konportman. Leo ki reste Kongo ti vwar ki sa i vre. Kat-r-an apre son batenm, i ti fer zanmi avek bann dimoun ki ti fer bann move keksoz. I ti krwar ki sa pa ti mal tan ki li i pa ti pe fer bann move keksoz. Me i pa ti pran bokou letan pour li ganny enfliyanse pour abiz lalkol e pour komet imoralite seksyel. Apre i ti konmans reflesir lo sa ki son paran ti’n ansenny li konsernan Zeova e lo sa lazwa ki i ti annan ler i ti pe servi Zeova. Ki ti arive apre? I ti konmans fer sa ki byen ankor. Avek led bann ansyen i ti retourn kot Zeova. Ozordi i en ansyen e i en pionye spesyal.

6. Ki sa de madanm ki nou pe al koz lo la?

⁶ Aprezan annou vwar Proverb sapit 9 kot nou pou lir konsernan de madanm. Enn i reprezant lasazes e lot i reprezant  enbesilite. (Konpar Romen 5:14; Galat 4:24.) Anmezir nou fer sa, gard antet ki lemonn Satan i kontan tou sa ki annan pour fer avek imoralite seksyel ek pornografi. (Efe. 4:19) Alor i vreman enportan ki nou kontinyen devlop en gran respe pour Bondye e rezet sa ki mal. (Prov. 16:6) I pour sa rezon ki nou tou, ki swa msye oubyen madanm, nou kapab ganny bann byenfe avek sa ki sa sapit i koz lo la. Dapre sa sapit, sa de madanm pe envit bann ki napa leksperyans, setadir bann ki “napa lasazes,” kot zot. I konmsi zot pe dir ‘Antre dan mon lakaz e vin pran en repa.’ (Prov. 9:1, 5, 6, 13, 16, 17) Sa ki arive avek bann ki aksepte lenvitasyon sa madanm ki reprezant lasazes i diferan avek sa ki arive avek bann ki aksepte lenvitasyon sa madanm ki reprezant enbesilite.

7. Dapre Proverb 9:13-18, ki i arive avek bann ki aksepte lenvitasyon sa madanm bet? (Vwar portre.)

⁷ Annou vwar konsernan sa lenvitasyon ki sa “madanm bet” i ofer. (Lir Proverb 9:13-18.) Sa madanm i annan lardyes. I envit dimoun ki napa leksperyans pour vin dan son lakaz pour pran en repa avek li. Ki i arive avek bann ki aksepte sa lenvitasyon? Labib i dir ki “se lanmenm kot bann mor ki napa lafors i ete.” Petet sa i fer ou rapel ki dan bann sapit avan dan liv Proverb, bann mo en pe parey i ganny servi. Nou ganny averti konsernan en madanm ki dezord e imoral. Nou ganny dir ki “son lakaz pou desann dan lanmor.” (Prov. 2:11-19) Dan Proverb 5:3-10 i annan en lavertisman konsernan en lot “madanm dezord” ki “son lipye i desann ver lanmor.”

8. Ki desizyon nou bezwen fer?

⁸ Bann ki tann lenvitasyon sa “madanm bet” i bezwen deside si zot pou aksepte sa lenvitasyon oubyen non. Petet nou osi nou bezwen fer en desizyon koumsa. Ki nou pou fer si en dimoun i esey fer nou fer en keksoz imoral oubyen si en sel kou nou vwar en keksoz ki annan pour fer avek pornografi?

9-10. Ki serten rezon akoz nou devret evit bann aksyon ki annan pour fer avek imoralite seksyel?

⁹ I annan bann bon rezon akoz nou devret evite fer bann aksyon ki annan pour fer avek imoralite seksyel. Sa “madanm bet” i dir: “Delo ki’n ganny vole i dou.” Ki i vedir “delo ki’n ganny vole”? Labib i konpar sèks ant en msye ek son madanm marye avek delo ki rafresir. (Prov. 5:15-18) En msye avek son madanm marye i ganny drwa fer sèks avek kanmarad. Me sa i diferan avek “delo ki’n ganny vole.” Sa i kapab  pe refer avek relasyon seksyel ki pa apropriye. Souvandfwa sa i ariv an sekre, zis parey en voler i esey vol en keksoz an sekre. Sa “delo ki’n ganny vole” i kapab paret dou si sa bann ki enplike i krwar ki personn pa pou konnen ki zot in fer. Malerezman zot pe anbet zot lekor! Zeova i vwar tou. Napa nanryen ki pli anmer ki ler nou perdi laprouvasyon Zeova. Sa i pa en keksoz ki “dou.” (1 Kor. 6:9, 10) Me i annan plis keksoz ki kapab arive.

¹⁰ Imoralite seksyel i kapab anmenn laont, i kapab fer en dimoun santi ki i pa vo nanryen. I kapab anmenn en lansentman ki personn pa ti anvi e i kapab kas fanmir. I kler alor, ki i saz pour rezet lenvitasyon sa madanm bet. Apard ki gat zot lanmitye avek Zeova, en kantite dimoun ki komet imoralite seksyel i ganny bann maladi ki kapab touy zot. (Prov. 7:23, 26) Proverb 9:18 i dir: “Son bann envite i dan fon Latonm.” Me akoz en kantite dimoun i aksepte lenvitasyon sa madanm bet menm si sa i anmenn en kantite problenm?​—Prov. 9:13-18.

11. Akoz i vreman mal pour get pornografi?

¹¹ Enn bann keksoz ki fer bokou dimoun aksepte lenvitasyon sa madanm bet, i pornografi. Serten i krwar ki i pa mal pour get pornografi. O kontrer en dimoun ki get pornografi i fer ditor son prop lekor. I perdi respe pour son lekor e pour lezot e i vreman difisil pour li aret get pornografi. Enn fwa ki en dimoun in vwar bann portre imoral, i difisil pour li oubliye. Osi, pornografi pa ed en dimoun pour rezet bann move dezir. O kontrer i fer sa bann dezir vin pli for. (Kol. 3:5; Zak 1:14, 15) Sa i fer ki en kantite dimoun ki get pornografi, i komet imoralite seksyel.

12. Ki mannyer nou kapab montre ki nou pe esey evit bann portre ki kapab fer nou annan bann dezir ek panse imoral?

¹² Konman bann Kretyen, ki nou devret fer si en sel kou nou vwar en portre ki annan pour fer avek pornografi? Nou devret deswit aret get sa portre. Si nou rapel ki nou lanmitye avek Zeova i sa keksoz ki pli presye pour nou, sa pou fer li pli fasil pour nou aret get sa portre. Anfet, menm bann portre ki pa paret annan pour fer avek pornografi i kapab fer nou annan bann panse ek dezir imoral. Akoz nou devret evit sa bann kalite portre? Parski nou pa ni menm anvi mazin okenn keksoz ki kapab fer nou komet imoralite seksyel. (Mat. 5:28, 29) En ansyen ki apel David e ki reste Taylenn i dir: “Mon demann mon lekor, ‘Menm si sa bann portre pa paret annan pour fer avek pornografi, si mon kontinyen get zot, eski sa pou fer Zeova plezir?’ Ler mon mazin koumsa, sa i ed mwan pour fer bann desizyon ki saz.”

13. Kwa ki kapab ed nou pour fer bann desizyon ki saz?

¹³ Ler nou annan en gran respe pour Zeova e nou per pour fer keksoz ki pa fer li plezir, sa pou ed nou fer bann desizyon ki saz. Ler nou annan en “gran respe pour Zeova [sa] i premye pa ver lasazes.” (Prov. 9:10) Nou kapab vwar sa o konmansman Proverb sapit 9. Dan sa bann verse, nou lir konsernan en lot madanm ki ganny konpare avek “vre lasazes.”

14. Ki lenvitasyon nou lir dan Proverb 9:1-6?

¹⁴ Lir Proverb 9:1-6. Dan sa bann verse, nou lir konsernan en lenvitasyon sorti kot Zeova, ki nou Kreater e sours tou lasazes. (Prov. 2:6; Rom. 16:27) Nou lir konsernan en gran lakaz ki annan set pilye. Sa i montre ki Zeova i zenere e i akeyir tou bann ki anvi aprann avek li pour zot kapab vin saz.

15. Ki Bondye i anvi nou fer?

¹⁵ Atraver legzanp sa madanm ki reprezant  “vre lasazes” ki dan Proverb sapit 9, nou aprann ki Zeova i zenere e i donn nou en kantite bon keksoz. Sa resi i dir ki sa madanm in byen prepar lavyann, i’n melanz son diven e i’n aranz son latab pour akeyir son bann envite. (Prov. 9:2) Osi, dapre verse 4 ek 5, sa madanm ki pe reprezant vre lasazes, “i dir bann ki bet: ‘Vin manz mon dipen.’” Akoz nou devret aksepte lenvitasyon sorti kot sa madanm? Zeova i anvi ki son bann zanfan i vin saz e reste sen e sof. I pa anvi ki nou fer bann fot ki pou fer nou soufer. I pour sa rezon ki “Bondye i anmas lasazes pour bann dimoun drwat.” (Prov. 2:7) Ler nou annan en gran respe pour Zeova, nou pou anvi fer li plezir. Nou ekout son konsey saz e nou kontan pour aplik sa konsey.​—Zak 1:25.

16. Ki mannyer sa gran respe ki Alain ti annan pour Zeova ti ed li pour fer en desizyon ki saz e ki ti arive?

¹⁶ Annou vwar ki mannyer ler Alain ti annan en gran respe pour Bondye, sa ti ed li fer en desizyon ki saz. Alain i en ansyen dan en kongregasyon e i osi en ansenyan dan en lekol. I dir: “En kantite mon bann koleg i krwar ki i normal pour servi bann film pornografi pour aprann plis konsernan sèks.” Me Alain ti konnen ki sa pa vre. I dir: “Vi ki mon ti kontan e annan en gran respe pour Zeova, mon ti refize get sa bann film. Mon ti osi eksplik mon bann koleg akoz ki mon pa pou get sa bann film.” Alain ti pe aplik konsey sorti kot “vre lasazes” ki dir “mars lo semen lentelizans.” (Prov. 9:6) Serten parmi lezot ansenyan ti sitan enpresyonnen avek sa ki Alain ti fer, ki aprezan zot pe etidye Labib e asiste renyon.

17-18. Ki benediksyon bann ki aksepte lenvitasyon sorti kot “vre lasazes” i gannyen e ki benediksyon zot pou gannyen dan lavenir? (Vwar portre.)

¹⁷ Zeova in servi legzanp sa de madanm pour montre nou ki mannyer nou kapab annan en bon lavenir. Bann ki aksepte sa lenvitasyon sorti kot sa “madanm bet” i konsantre lo bann plezir ki imoralite seksyel i anmennen. Zot pa realize ki sa ki zot pe fer pou annan en lefe lo sa ki pou arive avek zot dan lavenir. Sa ki zot pe fer pou anmenn zot “dan fon Latonm.”​—Prov. 9:13, 17, 18.

¹⁸ Sa i diferan avek sa ki arive avek bann ki aksepte lenvitasyon sorti kot sa madanm ki reprezant “vre lasazes.” Son bann envite i zwaye parski zot annan tou sa ki zot bezwen pour reste pros avek Zeova. (Iza. 65:13) Atraver profet Izai, Zeova i dir: “Ekout mwan byen e manz sa ki bon e zot pou ganny bokou plezir dan sa ki vreman ris.” (Iza. 55:1, 2) Nou pe aprann  pour nou kontan sa ki Zeova i kontan e ay sa ki Zeova pa kontan. (Ps. 97:10) Nou kontan parski nou envit lezot pour aprann avek “vre lasazes.” I konmsi nou pe “kriye lo bann oter ki toultour lavil: ‘Sa enn ki napa leksperyans, vin isi.’” Bann byenfe ki nou tou ki’n aksepte sa lenvitasyon i gannyen i pa zis pour la konmela. Me nou pou kontinyen ganny sa bann byenfe e i pou permet nou pour “viv” pour touzour, anmezir ki nou “mars lo semen lentelizans.”​—Prov. 9:3, 4, 6.

19. Dapre Eklezyast 12:13, 14, ki nou devret determinen pour fer? (Vwar sa bwat “ Bann byenfe ki nou gannyen ler nou annan en gran respe pour Zeova.”)

¹⁹ Lir Eklezyast 12:13, 14. Ler nou annan en gran respe pour Zeova, sa pou protez nou e ed nou pour reste prop moralman e reste pros avek Zeova pandan sa bann dernyen zour. Sa gran respe ki nou annan pour Zeova pou motiv nou pour kontinyen envit otan dimoun posib pour rod “vre lasazes” e pour aprann avek li.