Devlop konpasyon pour “tou sort kalite dimoun”
LER Zezi ti ansenny son bann disip ki mannyer pour pres sa bon nouvel, i ti averti zot ki dimoun pa ti pou toultan anvi ekout zot. (Lik 10:3, 5, 6) Sa i osi arive dan nou travay predikasyon ozordi. Serten dimoun ki nou zwenn i menm kapab azir dan en fason brit oubyen agresif. Ler sa i arive, nou kapab vwar li difisil pour demontre konpasyon e anvi pres avek zot.
En dimoun ki annan konpasyon i vwar bezwen ek problenm lezot, i santi li mal pour sa ki zot pe pas atraver e i oule ed zot. Me ki pou arive si nou nepli demontre konpasyon pour bann dimoun ki nou zwenn dan predikasyon? Nou pou perdi nou devouman, andotmo, nou pa pou anvi pres avek zot e nou pa pou kapab ed zot. Nou kapab konpar nou devouman avek en dife. Pour en dife kontinyen brile, nou bezwen met plis dibwa dan sa dife. Pareyman, pour nou kontinyen annan devouman, nou bezwen annan konpasyon!—1 Tesalonisyen 5:19, not.
Ki mannyer nou kapab aprann pour demontre plis konpasyon, menm ler i difisil? Annou vwar trwa legzanp ki nou kapab imite: Zeova, Zezi ek zapot Pol.
IMIT KONPASYON ZEOVA
Pour plizyer milye lannen, dimoun in koz manti lo Zeova. Me i kontinyen “bon anver sa bann ki pa rekonesan e ki move.” (Lik 6:35) Ki mannyer i demontre son labonte? I demontre pasyans anver tou dimoun. Zeova i anvi “ki tou sort kalite dimoun i ganny sove.” (1 Timote 2:3, 4) Menm si Bondye i ay lemal, bann dimoun i annan en gran valer pour li e i pa anvi ki personn i perdi zot lavi.—2 Pyer 3:9.
Zeova i konnen ki Satan i kapab fer dimoun krwar dan bann mansonz. (2 Korentyen 4:3, 4) En kantite dimoun in ganny ansennyen bann mansonz lo Bondye depi ler zot ti ankor ptipti. Alor sa ki zot mazinen e resanti i kapab fer li difisil pour zot aksepte laverite. Me Zeova i vreman anvi ed zot. Ki mannyer nou konnen?
Pran par egzanp, lafason ki Zeova ti santi anver bann dimoun dan lavil Niniv. Menm si zot ti vyolan, Zeova ti dir Zonas: “Eski mwan, mon pa devre pran pitye pour Niniv, sa gran lavil ki annan plis ki 120,000 zabitan inosan ki pa konn zot lanmen drwat avek zot lanmen gos?” (Zonas 4:11) Zeova ti pran pitye pour sa bann dimoun ki pa ti konn laverite lo li. Alor i ti anvoy Zonas pour averti zot.
Nou annan menm santiman ki Zeova i annan pour bann dimoun. Zot annan bokou valer. Parey Zeova, nou vreman anvi ed zot aprann konn li menm ler i paret ki zot pa pou aksepte laverite.
IMIT KONPASYON ZEZI
Zis parey son Papa, Zezi ti annan pitye pour dimoun “parski zot ti pe ganny maltrete e rezete parey mouton ki napa berze.” (Matye 9:36) Zezi ti konpran akoz zot ti dan sa sityasyon. I ti akoz zot bann sef relizye pa ti tret zot byen e ansenny zot bann mansonz. Menm si Zezi ti konnen ki en kantite dimoun ki ti vin ekout li pa ti pou vin son bann disip pour plizyer rezon, sa pa ti anpes li pour ansenny zot en kantite keksoz.—Mark 4:1-9.
Pa dekouraze si en dimoun pa ekout ou premye fwa
Ler bann sirkonstans lavi i sanze, dimoun i kapab reazir dan en diferan fason anver laverite
Ler dimoun i mal reazir ler nou anons sa bon nouvel avek zot, nou bezwen esey konpran akoz zot fer sa. Petet zot annan en move lopinyon lo Labib oubyen lo bann Kretyen akoz zot in vwar ki serten ki dir ki zot Kretyen i fer bann move keksoz. Petet lezot in tann bann keksoz ki pa vre konsernan nou krwayans. Osi i annan lezot ki per ki zot fanmir oubyen dimoun dan zot kominote pou boufonn zot si zot koz avek nou.
I kapab ki serten dimoun ki nou zwenn in pas atraver bann move leksperyans ki’n vreman afekte zot. En misyonner ki apel Kim i dir ki en kantite dimoun dan son teritwar ti’n pas atraver lager e zot ti’n perdi tou sa ki zot ti annan. Zot napa okenn lespwar pour lavenir. Zot fristre e zot napa konfyans dan personn. Souvandfwa dimoun dan sa teritwar i esey anpes bann Temwen prese. En fwa Kim ti menm ganny atake ler i ti dan predikasyon.
Ki mannyer Kim i kontinyen demontre konpasyon, menm ler dimoun pa tret li byen? I toultan esey mazin Proverb 19:11 (NWT) ki dir: “En zonm ki annan bon konprenezon pou sirman tarde pran lakoler e i en zoli keksoz pour li les pase en lofans.” Ler i mazin lo sa ki dimoun dan son teritwar in pas atraver, sa i ed li pour annan konpasyon pour zot. Deplis, pa tou dimoun ki i zwenn ki azir dan en fason brit. Dan sa menm teritwar, i annan bann bon retourn vizit.
Nou kapab demann nou lekor, ‘Si mon pa ti konn laverite, ki mannyer mon ti pou reazir ler Temwen Zeova i vin pres avek mwan?’ Par egzanp, ki nou ti pou fer si nou ti’n tann bann keksoz ki pa vre lo Temwen Zeova? Petet nou osi nou ti pou mal reazir e bezwen ki bann Temwen i demontre konpasyon anver nou. Zezi ti dir ki nou bezwen tret lezot parey nou ti a kontan zot tret nou. Alor nou bezwen esey konpran santiman lezot e demontre pasyans anver zot, menm si i difisil.—Matye 7:12.
IMIT KONPASYON POL
Zapot Pol ti demontre konpasyon anver bann dimoun, menm si zot ti reazir dan en fason vyolan ler i ti pres avek zot. Akoz? Parski i ti rapel ki kalite dimoun i ti ete avan. I ti dir: “Avan mon ti koz an mal lo Bondye, persekit lezot e mon ti arogan. Pourtan Bondye ti pran pitye pour mwan akoz mon pa ti konnen ki mon ti pe fer e mon ti napa lafwa.” (1 Timote 1:13) Pol ti konnen ki Zeova ek Zezi ti’n demontre en kantite konpasyon anver li. I ti kapab konpran bann dimoun ki ti anvi anpes li prese, parski li osi i ti’n deza santi parey zot.
Par ler, Pol ti zwenn bann dimoun ki ti vreman krwar dan bann fo lansennyman. Ki mannyer sa ti fer li santi? Dan Akt 17:16, nou lir ki ler Pol ti dan lavil Atenn, “i ti byen mekontan ler i ti vwar sa kantite zidol ki ti annan dan sa lavil.” Par kont, Pol ti servi sa menm keksoz ki ti fer li mekontan pour ansenny bann dimoun. (Akt 17:22, 23) I ti adapte son fason prese e i ti servi diferan rezonnman pour pres avek dimoun ki ti annan en lot kiltir pour li “kapab sov serten parmi zot par tou mwayen posib.”—1 Korentyen 9:20-23.
Ler nou pres avek bann dimoun ki mal reazir oubyen ki annan bann fo krwayans, nou kapab fer parey Pol. Nou kapab servi sa ki nou konnen lo zot pour ed zot aprann “bon nouvel, ki proklanm delivrans.” (Izai 52:7) En ser ki apel Dorothy i dir: “Dan nou teritwar, en kantite dimoun in ganny ansennyen ki Bondye i ziz dan en fason sever. Mon felisit sa bann dimoun pour zot krwayans dan Bondye e atir zot latansyon lo sa ki Labib i dir lo zoli personnalite Zeova ek son bann promes pour lavenir.”
“KONTINYEN DOMIN LEMAL AVEK SA KI BYEN”
Anmezir lafen i vin pli pros, nou kapab ekspekte ki latitid bann dimoun pou vin “deplizanpli pli move.” (2 Timote 3:1, 13) Me nou pa devret les zot fason azir fer nou aret demontre konpasyon oubyen perdi nou lazwa. Zeova i kapab donn nou lafors pour “kontinyen domin lemal avek sa ki byen.” (Romen 12:21) En pionye ki apel Jessica i dir ki souvandfwa i zwenn dimoun orgeye ki monk nou ek nou mesaz. I azoute: “Sa i kapab fatigan. Ler mon konmans en konversasyon, mon fer en pti lapriyer avek Zeova e demann li pour ed mwan vwar sa dimoun parey li i vwar.” Sa i ed Jessica pour pa konsantre lo son prop santiman me plito pour mazin lo ki mannyer i kapab ed sa dimoun.
Nou kontinyen rod bann ki anvi konn laverite
Avek letan, serten dimoun pou aksepte nou led e aprann laverite
Nou devret osi esey ankouraz nou bann frer ek ser ler nou pres ansanm avek zot. Jessica i dir ki ler i dan predikasyon avek lezot e enn parmi zot i annan en move leksperyans, i esey pa konsantre lo la. O kontrer, i koz lo en keksoz pozitif, tel parey bann bon rezilta ki nou gannyen dan predikasyon menm si serten i mal reazir.
Zeova i konn tre byen ki par ler i difisil pour nou prese. Me i vreman kontan ler nou imit son konpasyon! (Lik 6:36) Byensir, Zeova pa pou demontre konpasyon ek pasyans anver bann dimoun dan sa lemonn pour touzour. Nou kapab asire ki i konn egzakteman kan ki i pou anmenn lafen. Ziska ler sa i arive, annou pa tarde pour anons sa bon nouvel. (2 Timote 4:2) Alor annou kontinyen pres avek devouman e annan vre konpasyon pour “tou sort kalite dimoun.”
