Ki mannyer pour fer ou letid Labib pli efikas e pli gou?

ZWE

ZOZYE ti bezwen diriz nasyon Izrael ler zot ti pe antre dan Later Promiz. Sa ti pou vreman difisil. Par kont, Zeova ti donn li lafors e ankouraz li par dir: “Reste for e pran kouraz.” I ti dir Zozye ki si i lir e obei Lalwa, i ti pou fer bann bon desizyon e reisi.—Zozye 1:7, 8.

Nou pe viv dan “en letan vreman difisil,” alor lavi pa fasil. (2 Timote 3:1) Si nou anvi reisi parey Zozye, nou bezwen swiv sa menm konsey ki Zeova ti donn li. Nou bezwen lir Labib regilyerman e servi sa ki nou aprann pour nou kapab fer bann bon desizyon.

Me petet serten parmi nou pa konnen ki mannyer pour etidye oubyen nou pa kontan etidye. Par kont, i vreman enportan pour nou annan en letid Labib personnel. Anmezir ki ou pas lo sa bwat “ Esey sa bann sizesyon,” ou pou ganny bann nide ki pou ed ou benefisye avek ou letid e fer li pli gou.

En psalmis ti sante: “Gid mwan lo semen ou bann komannman akoz mon kontan met zot an pratik.” (Psonm 119:35, nou ki’n met an gro lekritir nwanr.) Ou osi ou kapab kontan pour etidye Parol Bondye. Ou pou dekouver bann zoli panse anmezir ki ou kontinyen etidye Labib.

Menm si ou pa bezwen diriz en nasyon parey Zozye, ou annan ou prop difikilte. Alor, parey Zozye, lir e obei Parol Bondye. Si ou fer sa, ou pou fer bann bon desizyon e reisi.

ESEY SA BANN SIZESYON

Priye avan ou etidye. Dan Labib i annan bann panse Zeova e zot in ganny ekrir pour ou benefis. Alor ler ou lir Labib, demann Zeova pour ed ou konpran, rapel e servi sa ki ou pe lir pour fer bann bon desizyon dan ou lavi.—Ezra 7:10, NWT.
Demann ou lekor bann kestyon anmezir ki ou lir Labib ouswa bann piblikasyon baze lo Labib. Par egzanp, ‘Ki mon aprann lo Zeova dan sa seksyon? Ki mannyer sa i relye avek tenm Labib? Ki mannyer mon kapab servi sa bann pwen pour ed lezot?’
Medit lo sa ki ou etidye. Fer en pti poz e reflesi lo sa ki ou fek lir. Demann ou lekor: ‘Ki mannyer sa i fer mwan santi? Akoz i fer mwan santi koumsa? Ki mannyer i relye avek sa ki mon ti pas atraver dan lepase, sa ki mon pe pas atraver la konmela oubyen sa ki mon kapab pas atraver a lavenir? Ki mannyer mon kapab aplik sa bann prensip Labib oubyen konsey dan mon lavi?’ (Zob 23:5; Psonm 49:3) Ler ou medite, vwar si ou kapab eksplike akoz Zeova i demann son pep pour evit serten pratik. Oubyen mazin lo ki ti pou’n arive si sa dimoun ki ou fek lir lo la ti’n fer keksoz dan en lot fason.—Deterononm 32:28, 29.
Servi ou limazinasyon ler ou pe lir. Par egzanp, eski ou kapab imazin sa senn kot bann frer Zozef ti vann li avek bann Ismaelit? (Zenez 37:18-28) Ki ou vwar, tande e santi? Met ou lekor dan plas sa bann dimoun dan sa resi. Ki zot ti pe mazinen e santi? Ler ou servi ou limazinasyon, ou pou pli benefisye avek ou letid.
Servi bann zouti Labib ki lorganizasyon i donnen. Sa bann zouti i kapab fer ou resers pli enteresan. Aprann ki mannyer pour servi bann zouti ki disponib dan ou langaz, sa ki lo Enternet ek sa ki’n ganny enprimen. Pa ezite pour demann lezot pour ed ou aprann ki mannyer pour servi zot byen. Par egzanp, Watch Tower Publications Index oubyen Liv resers pour Temwen Zeova pou ed ou trouv lenformasyon lo serten topik ek leksplikasyon pour en kantite verse Labib. Servi sa pti liv En led pour etidye Parol Bondye. Sa bann zouti i annan bann lenformasyon itil parey bann map, lord ki bann levennman ti arive, ki kalite pwa ek mezir ki ti ganny servi dan letan Labib e lezot size ankor.
Fer en rezimen lo bann pwen prensipal. Sa pou ed ou rapel sa ki ou fek etidye. Pli bon ankor, koz avek lezot lo sa ki ou’n aprann. Eski i annan en keksoz ki ou kapab servi dan predikasyon? Ler ou fer sa, ou pou rapel bann pwen prensipal e lezot osi pou benefisye avek ou letid.