1-2. (a) Dapre sa lord ki Zezi ti donnen dan Matye 28:18-20, ki lobzektif prensipal kongregasyon Kretyen i annan? (b) Ki bann kestyon nou pou reponn dan sa lartik?

APRE ki Zezi ti’n resisite, i ti demann son bann disip pour zwenn li lo en montanny Galile. I tre probab ki zot ti vreman eksite pour al zwenn li laba. (Mat. 28:16) Petet i lanmenm ler ki Zezi “ti aparet avek plis ki 500 frer an menm tan.” (1 Kor. 15:6) Akoz Zezi ti’n demann son bann disip pour zwenn li laba? I ti pe al donn zot en responsabilite vreman eksitan: “Al kot bann dimoun dan tou nasyon e fer zot vin mon disip.”​—Lir Matye 28:18-20.

² Bann disip ki ti tann Zezi donn sa lord ti vin sa premye kongregasyon Kretyen dan premye syek. Lobzektif prensipal ki sa kongregasyon ti annan ti pour zot fer plis dimoun vin disip Kris. * Ozordi, i annan plizyer milye kongregasyon Kretyen partou dan lemonn e zot ankor annan sa menm lobzektif prensipal. Dan sa lartik, nou pou reponn kat kestyon: Akoz sa travay pour fer disip i sitan enportan? Kwa ki enplike dan sa travay? Eski tou Kretyen i partisip dan sa travay pour fer disip? Akoz nou bezwen annan pasyans pour fer sa travay?

3. Dapre Zan 14:6 ek 17:3, akoz sa travay pour fer disip i sitan enportan?

³ Akoz sa travay pour fer disip i sitan enportan? Parski zis bann disip Kris ki kapab vin zanmi Bondye. An plis ki sa, bann disip Kris i viv en pli bon lavi la konmela e zot annan sa lespwar pour viv pour touzour a lavenir. (Lir Zan 14:6; 17:3.) I kler ki Zezi in donn nou en responsabilite vreman  enportan, me nou pa pe fer sa travay nou tousel. Pol ti dir ki li ek lezot Kretyen dan premye syek ti “travay ansanm avek Bondye.” (1 Kor. 3:9) Pa sa i en gran privilez ki Zeova ek Kris in donn bann imen enparfe!

4. Ki nou kapab aprann avek leksperyans Ivan ek Matilde?

⁴ Nou kapab ganny en kantite lazwa ler nou partisip dan sa travay pour fer disip. Pran par egzanp Ivan ek son madanm Matilde ki reste Kolonbi. Zot ti anons sa bon nouvel avek en zenn onm ki apel Davier. Davier ti dir zot: “Mon anvi sanz mon lavi, me mon zis pa kapab.” Davier ti en bokser ki ti servi drog, bwar tro bokou e i ti pe reste avek Erika, sa fiy ki i ti avek. Ivan i eksplike: “Nou ti konmans etidye Labib avek li, me i ti reste dan en vilaz ki ti lwen. Alor i ti pran nou plizyer erdtan par bisiklet pour ariv kot li. An plis ki sa, i ti annan en kantite labou lo semen. Ler Erika ti vwar ki Davier ti’n sanz son konportman ek latitid, li osi i ti konmans etidye Labib.” Avek letan, Davier ti aret servi drog, i ti aret bwar e i ti aret bokse. I ti osi marye avek Erika. Matilde i dir: “Ler Davier ek Erika ti batize an 2016, nou ti rapel ki Davier ti abitye dir, ‘Mon anvi sanz mon lavi, me mon zis pa kapab.’ Nou ti sitan kontan ki nou ti plere.” Nou kapab asire ki nou pou ganny bokou lazwa ler nou ed en dimoun vin disip Kris.

5. Ki sa premye keksoz nou bezwen fer pour fer disip?

⁵ Premye keksoz ki nou bezwen fer pour fer disip, i “rode lekel” ki pare pour aprann konn Zeova. (Mat. 10:11) Ler nou koz lo Zeova avek tou dimoun ki nou zwenn, nou montre ki nou vreman bann Temwen Zeova. Ler nou obei lord Kris e anons sa bon nouvel, nou prouve ki nou bann vre Kretyen.

6. Kwa ki kapab ed nou pour reisi dan predikasyon?

⁶ Serten dimoun ki nou zwenn i vreman anvi aprann sa ki Labib i dir, me en kantite dimoun ki nou zwenn pa vreman enterese o konmansman. Alor, kekfwa nou pou bezwen evey zot lentere. Pour reisi dan predikasyon, nou bezwen prepar byen. Mazin lo bann topik spesifik ki pou enteres bann dimoun ki ou zwenn. Apre sa, mazin lo ki mannyer ou pou entrodwir sa topik.

7. Ki mannyer ou kapab konmans en konversasyon avek en dimoun e akoz ou krwar i enportan pour ekout e respekte son pwennvi?

⁷ Par egzanp, ou kapab demann sa met lakour: “Eski mon kapab demann ou en kestyon silvouple? Si bann problenm ki nou fer fas avek ozordi i afekte dimoun partou dan lemonn, eski ou krwar ki nou bezwen en gouvernman ki diriz lo later antye pour rezourd sa bann problenm?” Apre sa, ou kapab lir e diskit lo Danyel 2:44. Oubyen ou kapab dir avek en vwazen: “Ki ou panse i sa pli bon fason pour ed manrmay devlop en bon konportman?” Apre sa, ou kapab lir e diskit lo Deterononm 6:6, 7. Nenport topik ki ou swazir pour koz lo la, mazin sa bann dimoun ki ou pe al koz avek. Mazin lo ki mannyer zot pou benefisye ler zot aprann sa ki Labib i vreman dir. Ler ou pe koz avek zot, i enportan ki ou ekout zot e respekte zot pwennvi. Sa pou ed ou pour pli byen konpran zot e i pou fer li pli fasil pour zot ekout ou.

8. Akoz nou bezwen kontinyen esey fer retourn vizit?

⁸ Avan ki en dimoun i deside pour etidye  Labib, kekfwa ou pou bezwen fer plizyer retourn vizit e sa i demann en ta letan ek zefor. Akoz? Parski ler nou retourn kot dimoun, kekfwa zot pa la oubyen zot pa kapab koze. An plis, kekfwa ou pou bezwen retourn plizyer fwa avan ki en met lakour i santi li ase konfortab pour li aksepte en letid Labib. Gard antet ki i annan plis sans pour en plant pouse si i ganny aroze souvan. Pareyman, ler nou diskit lo Parol Bondye regilyerman avek en dimoun ki enterese, i annan plis sans ki i pou devlop plis lanmour pour Zeova ek Kris.

9-10. Akoz nou kapab dir ki tou disip Kris i partisip dan sa travay pour rod bann dimoun ki anvi aprann plis lo Zeova?

⁹ Tou disip Kris i partisip dan sa travay pour rod dimoun ki anvi aprann plis lo Zeova. Nou travay i en pe parey ler nou pe rod en zanfan ki’n perdi. Dan ki sans? Mazin lo sa ki ti arive avek en pti garson trwa-z-an ki ti perdi. Apepre 500 dimoun ti ede pour rod li. Finalman, apepre 20 erdtan pli tar, en msye ki ti pe ede ti vwar sa pti garson dan en plantasyon mai. Sa msye pa ti anvi ganny okenn laglwar akoz i ti’n vwar sa pti garson. I ti dir: “Nou’n vwar sa pti garson akoz nou tou nou’n travay ansanm.”

¹⁰ En kantite dimoun i parey sa pti garson, zot santi konmsi zot in perdi dan lavi. Zot napa okenn lespwar, me zot anvi ganny ede. (Efe. 2:12) I annan plis ki wit milyon nou ki pe travay ansanm pour rod sa bann kalite dimoun. I kapab ki ou pa pou trouv en dimoun ki anvi etidye Labib avek ou. Par kont, lezot proklanmater ki pe travay dan sa menm teritwar, i kapab trouv en dimoun ki anvi aprann laverite sorti dan Parol Bondye. Ler en frer  oubyen en ser i trouv en dimoun ki vin en disip Kris, tou bann ki’n partisip dan sa travay i annan rezon pour zwaye.

11. Menm si ou napa en letid Labib, ki lezot fason ou kapab ede pour fer disip?

¹¹ Menm si pour le moman ou napa en letid Labib, ou ankor kapab ede pour fer disip. Par egzanp, ler ou vwar en nouvo dimoun kot Lasal Rwayonm, ou kapab akeyir e ed li. Si ou demontre lanmour dan sa fason, ou kapab ed li pour vwar ki nou bann vre Kretyen. (Zan 13:34, 35) Menm si ou bann larepons dan renyon i kourt, ler ou reponn avek respe, sa i montre ki ou pran aker santiman lezot. Sa i ed bann nouvo pour aprann ki mannyer pour eksprim zot lafwa dan en fason senser e avek respe. Ou osi kapab travay avek en nouvo proklanmater dan predikasyon e ed li pour aprann ki mannyer pour servi Labib pour rezonn avek bann dimoun. Ler ou fer sa, ou pe ed li pour aprann ki mannyer pour swiv legzanp Kris.​—Lik 10:25-28.

12. Eski nou bezwen bann abilite spesyal pour nou kapab fer disip? Eksplike.

¹² Personn parmi nou pa devret krwar ki zot bezwen annan en abilite spesyal pour zot kapab ansenny dimoun pour vin disip Zezi. Akoz nou dir sa? Annou vwar legzanp Faustina ki reste Bolivi. Ler i ti fek zwenn bann Temwen Zeova i pa ti konn lir. Me depi sa letan, i’n aprann pour lir en ptigin. Ozordi i’n batize e i kontan ansenny lezot lo Zeova. Normalman, i kondwir senk letid Labib par semenn. Menm si bann letid Labib Faustina i lir pli byen ki li, i’n anmenn sis dimoun dan laverite.​—Lik 10:21.

13. Menm si nou vreman bizi, ki serten byenfe nou gannyen ler nou partisip dan sa travay pour fer disip?

¹³ En kantite Kretyen i vreman bizi akoz zot annan bann gro responsabilite. Kantmenm sa, zot fer letan pour kondwir bann letid Labib e sa i anmenn bokou lazwa pour zot. Annou vwar legzanp Melanie ki reste Alaska. I ti en paran tousel ki ti pe elve son pti fiy wit an. I ti osi pe travay a plen tan e i ti pe pran swen avek son papa ki ti annan kanser. Melanie ti sel Temwen dan sa pti lavil kot i ti reste. I ti priy Zeova regilyerman e demann li lafors pour al prese menm si i ti fer fre, parski i ti vreman anvi ganny en letid Labib. Avek letan, i ti zwenn Sara ki ti byen kontan pour aprann ki Bondye i annan en non. Apre en pe letan, Sara ti aksepte en letid Labib. Melanie i dir: “Dan Vandredi swar apre travay mon ti fatige, me toudmenm, mwan ek mon fiy ti kontinyen al fer sa letid e nou tou le de nou ti benefisye. I ti gou pour fer resers lo bann  kestyon ki Sara ti demann nou e nou ti vreman kontan pour vwar li vin zanmi Zeova.” Sara ti demontre kouraz. I ti fer fas avek persekisyon, kit son larelizyon e batize.

14. (a) Ki mannyer bann dimoun ki partisip dan sa travay pour fer disip i parey bann peser? (b) Ki ou ganny motive pour fer ler ou lir parol Pol ki dan 2 Timote 4:1, 2?

¹⁴ Menm si ou pa ankor trouv en dimoun ki anvi vin en disip Kris, kontinyen rode. Rapel ki Zezi ti dir ki sa travay pour fer disip i parey ler ou al lapes. I kapab pran bann peser plizyer erdtan avan ki zot ganny okenn pwason. Souvandfwa zot travay tar dan lannwit oubyen lo granmaten. An plis, parfwa zot menm bezwen al bann gran zistans pour ganny pwason. (Lik 5:5) Pareyman, serten Kretyen i pas plizyer erdtan pe esey lapes, setadir pe rod bann dimoun dan diferan landrwa ek ler. Akoz? Pour zot zwenn plis dimoun. Souvandfwa, bann proklanmater ki fer plis zefor i ganny rekonpanse parski zot zwenn bann dimoun ki enterese pour ekout nou mesaz. Eski ou kapab esey al predikasyon en ler kot i annan plis sans pour ou zwenn dimoun? Oubyen eski ou kapab al prese dan bann landrwa kot i annan plis sans pour ou zwenn dimoun?​—Lir 2 Timote 4:1, 2.

15. Akoz nou bezwen annan pasyans pour fer bann letid Labib?

¹⁵ Akoz ou bezwen annan pasyans pour fer bann letid Labib? En rezon, se ki nou bezwen fer plis ki zis ed nou letid  pour aprann konn e kontan sa ki Labib i dir. Nou bezwen ed li pour aprann konn e kontan Loter Labib. An plis, i pa ase pour zis ed nou etidyan pour aprann kwa ki Zezi ti demann son bann disip pour fer. Nou osi bezwen ed li pour aprann ki mannyer pour aplik sa bann lansennyman dan son lavi pour li kapab viv konman en vre Kretyen. Nou bezwen annan pasyans e ed li anmezir ki i fer zefor pour aplik bann prensip Labib. Serten etidyan i kapab sanz zot fason panse ek latitid dan zis detrwa mwan, tandis ki lezot i bezwen plis letan ki sa.

16. Ki ou’n aprann avek leksperyans Raúl?

¹⁶ En misyonner ki pe servi Peru, ti annan en leksperyans ki montre akoz i bon pour annan pasyans. I ti dir: “Mon ti’n etidye de liv avek en msye ki apel Raúl. Me kantmenm sa, i ti ankor vwar li difisil pour aplik sa ki i ti aprann dan Labib. I ti napa en bon lavi maryaz, i ti zoure e son zanfan ti napa respe pour li akoz son move konportman. Par kont, i ti vin renyon regilyerman, alor mon ti kontinyen vizit li pour ed li ek son fanmir. Plis ki trwa-z-an apre ki mon ti’n zwenn li, i ti kalifye pour batenm.”

17. Ki nou pou diskite dan sa lot lartik?

¹⁷ Zezi in demann nou pour “al kot bann dimoun dan tou nasyon e fer zot vin [son] disip.” Sa i fer ki souvandfwa nou koz avek dimoun ki annan bann krwayans ki konpletman diferan avek sa ki pour nou. Serten i dir ki zot napa en larelizyon oubyen ki zot pa ni menm krwar dan Bondye. Dan sa lot lartik, nou pou vwar ki mannyer nou kapab anons sa bon nouvel avek sa bann dimoun.