Levidans i montre ki Zezi ti vin Granpret ler i ti batize lannen 29. Ki mannyer nou konn sa? Ler Zezi ti batize, i ti aksepte pour ofer son lekor konman sakrifis lo lotel senbolik. Sa lotel i reprezant “lavolonte” Bondye, alor sa zour Zezi ti pe aksepte pour fer lavolonte Bondye e pour mor konman en sakrifis. (Gal. 1:4; Ebr. 10:5-10) Lotel i en parti enportan dan en tanp. Vi ki sa lotel ti vin an egzistans ler Zezi ti batize, i bezwen ki gran tanp spirityel Zeova osi ti vin an egzistans ler Zezi ti batize. Gran tanp spirityel Zeova i reprezant tou sa ki fer li posib pour nou ador li dan sa bon fason lo baz sakrifis Zezi.​—Mat. 3:16, 17; Ebr. 5:4-6.

Vi ki aprezan i ti annan en gran tanp spirityel, i ti bezwen annan en granpret. Alor, Zeova ti swazir Zezi “avek lespri sen e donn li son pwisans.” (Akt 10:37, 38; Mark 1:9-11) Me ki mannyer nou asire ki Zezi ti ganny swazir konman Granpret avan son lanmor ek rezireksyon? Legzanp Aaron ek lezot granpret apre li pou ed nou reponn sa kestyon.

Dapre Lalwa ki Zeova ti donn Moiz, zis granpret ki ti annan drwa antre dan Tre Sen dan tabernak e pli tar dan Tre Sen dan tanp. I ti annan en rido ki ti separ lasanm Tre Sen avek lasanm Sen. Zour Rekonsilyasyon, granpret ti pas atraver sa rido pour antre dan Tre Sen. (Ebr. 9:1-3, 6, 7) Aaron ek lezot granpret apre li, ti bezwen vin granpret avan ki zot ti kapab travers sa rido pour antre dan Tre Sen. Alor, i bezwen ki Zezi osi ti’n fini vin Granpret avan i ti mor e avan i ti pas “atraver rido setadir son lekor,” pour li al dan lesyel. (Ebr. 10:20) I pour sa rezon ki zapot Pol ti dir ki Zezi ti vini “konman en granpret” e apre i ti “antre dan sa latant ki pli gran e pli parfe ki pa’n ganny fer par zonm” setadir “dan lesyel menm.”​—Ebr. 9:11, 24.

I napa diferans ant ler sa nouvo lalyans ti ganny etablir ek ler i ti pran lefe. I pa de moman diferan. Akoz non? Ler Zezi ti mont dan lesyel e prezant valer son lavi parfe pour sov nou, i ti konmans sa prosedir ki ti pou etabli oubyen konfirm sa nouvo lalyans. Sa menm prosedir ti fer ki sa nouvo lalyans ti pran lefe. Ki bann keksoz ki ti ganny fer?

Premyerman, Zezi ti al devan Zeova, i ti prezant valer son lavi parfe avek Zeova e finalman, Zeova ti aksepte valer disan Zezi ki’n ganny verse. Tan ki sa bann keksoz pa ti’n ganny fer, sa nouvo lalyans pa ti ankor pran lefe.

Labib pa dir egzakteman kan ki Zeova ti aksepte valer sakrifis Zezi. Alor, nou pa kapab dir egzakteman kan ki sa nouvo lalyans ti ganny etablir e osi kan ki i ti pran lefe. Toudmenm, nou konnen ki Zezi ti mont dan lesyel dis zour avan Lapannkot lannen 33. (Akt 1:3) A en serten moman pandan sa ptigin letan, i ti prezant valer son sakrifis avek Zeova e Zeova ti aksepte. (Ebr. 9:12) Zour Lapannkot, i ti vin vreman evidan ki nouvo lalyans ti’n fini pran lefe. (Akt 2:1-4, 32, 33) I kler alor, ki sa nouvo lalyans ti’n fini pran lefe zour Lapannkot lannen 33.

Alor, sa nouvo lalyans ti ganny etablir e i ti pran lefe apre ki Zeova ti’n aksepte valer disan Zezi ki’n ganny verse e ki i ti’n aksepte bann Kretyen swazir dan sa nouvo lalyans. Konman Granpret, Zezi i Medyater sa lalyans.​—Ebr. 7:25; 8:1-3, 6; 9:13-15.