Mon ti ne an 1954, dan lavil St. Paul, Minnesota, Leta-z-ini. Mon paran pa ti ni pov, ni ris e nou ti Katolik. Mon paran ti annan senk zanfan e mwan mon dezyenm zanfan. Mon ti al lekol dan en lekol Katolik e mon ti en lanfandker. Me mon pa ti konn bokou keksoz lo Labib. Menm si mon ti krwar ki i annan en Bondye ki’n kree tou keksoz, mon ti nepli annan lafwa dan legliz.

Pandan mon premye lannen dan liniversite William Mitchell College of Law, en koup Temwen Zeova ti vin kot mon lakour. Mon ti pe lav mon lenz alor sa koup ti zantiman dakor pour retourn pli tar. Ler zot ti retournen, mon ti demann zot de kestyon: “Akoz bann move dimoun i toultan pli prospere ki bann bon dimoun?” e “Ki mannyer nou kapab vreman ere?” Mon ti aksepte en kopi liv The Truth That Leads to Eternal Life ek New World Translation of the Holy Scriptures, ki son lapo ti ver. Mon ti osi dakor pour konmans en letid Labib. Sa letid Labib ti ed mwan konpran en kantite keksoz. Mon ti vreman  kontan pour aprann ki Rwayonm Bondye i sa gouvernman ki pou diriz later. Mon ti kapab vwar ki bann imen pa ti’n reisi diriz byen e ki zot in anmenn soufrans, lenzistis ek maler dan lemonn.

Mon ti dedye mon lavi avek Zeova boner an 1982 e mon ti batize pli tar sa menm lannen dan lasanble ki ti annan pour tenm “Kingdom Truth.” Sa lasanble ti ganny fer St. Paul Civic Center. Son semenn answit, mon ti retourn St. Paul Civic Center pour mwan fer legzanmen pour vin en avoka. An Oktob 1982, mon ti kalifye pour vin en avoka.

Dan sa lasanble “Kingdom Truth,” mon ti rankontre Mike Richardson ki ti dan Betel Brooklyn e i ti dir mwan ki i ti annan en departman legal ki ti’n fek ganny formen dan Betel. Mon ti mazin parol sa zofisye Etyopyen ki dan Akt 8:36 e mon ti demann mon lekor, “Kwa ki anpes mwan demande pour travay dan Departman Legal?” Alor mon ti fer en laplikasyon pour al Betel.

Mon paran pa ti kontan ki mon ti’n vin en Temwen Zeova. Mon papa ti demann mwan si mon travay dan Betel ti pou benefisye mwan konman en avoka. Mon ti dir li ki mon pe al fer en travay volonter e ki mon ti pou ganny 75 dolar pour ed mwan avek mon bann depans. Sa ti menm kantite ki tou bann Betelit ti gannyen.

Mon pa ti kapab antre dan Betel deswit parski mon ti deza pe travay ankour. Alor, mon ti konmans mon servis dan Betel Brooklyn, New York, an 1984. Mon ti ganny demande pour al travay dan Departman Legal. Sa travay ki mon ti’n fer ankour ti’n prepar mwan pour sa ki ti pou arive apre.

An Novanm 1983, lorganizasyon Temwen Zeova ti aste Stanley Theater ki sitye Jersey City, New Jersey. Bann frer ti rod bann permi neseser pour bann plonber ek elektrisyen kapab fer renovasyon dan sa batiman. Ler bann frer ti zwenn bann zofisye sa lavil, zot ti eksplike ki zot ti anvi ki Stanley Theater i vin en lasal lasanble pour bann Temwen Zeova. Sa ti en problenm parski dapre bann lalwa Jersey City, bann landrwa ladorasyon ti devret zis dan bann landrwa rezidansyel. Vi ki Stanley Theater ti dan teritwar biznes, bann zofisye sa lavil ti refize donn nou bann permi. Bann frer ti demann ankor permisyon me zot pa ti gannyen.

Pandan mon premye semenn Betel, lorganizasyon ti anmenn sa zafer ankour. Vi ki  mon ti’n travay de-z-an ankour St. Paul, Minnesota, mon ti konn byen sa bann ka parey. Enn nou bann avoka ti dir ki Stanley Theater ti’n ganny servi pour plizyer aktivite piblik, tel parey pour bann film ek spektak lanmizik. Alor, i pa ti devret kont lalwa pour fer en aktivite relizye. Lakour ti deside ki Jersey City pa ti’n respekte nou drwa pour pratik nou larelizyon. Lakour ti ordonnen ki nou ganny bann permi neseser e mon ti vwar ki mannyer Zeova ti servi bann mwayen legal pour kontinyen son travay. Mon ti vreman kontan pour form parti sa travay.

Bann frer ti fer an gran renovasyon lo sa batiman ki ozordi i apel Lasal Lasanble Jersey City. Mwens ki enn an apre ki sa travay reparasyon ti’n konmanse, le 8 Septanm 1985, bann etidyan 79yenm laklas Lekol Gilead ti ganny zot sertifika dan sa lasal lasanble. Mon ti vreman kontan pour ede dan sa travay pour Zeova parski i ti fer mwan pli zwaye ki sa travay ki mon ti fer konman en avoka avan ki mon ti vin Betel. Sa letan mon pa ti konnen ki Zeova ti pou servi mwan pour lezot ka ankour.

Dan bann lannen 1980, bann dokter ek lopital ti souvandfwa pa respekte desizyon bann Temwen adilt ki ti refize pran okenn tretman medikal ki ti annan bann konponan disan ladan. Souvan bann ziz ti krwar ki bann madanm ansent ti napa drwa pour refiz transfizyon disan. Zot ti krwar ki si en manman i refize fer transfizyon disan, i ti pou mor e sa zanfan ti pou grandi san en manman.

Le 29 Desanm 1988, Ser Denise Nicoleau ti perdi en ta disan apre ki i ti’n donn nesans son pti garson. Son nivo hemoglobin ti desann par anba 5.0 e dokter ti demande si i ti pou aksepte pour fer transfizyon disan. Ser Nicoleau ti refize. Son landmen bomaten sa lopital ti demann en ziz permisyon pour fer transfizyon disan. Sa ziz pa ti donn ni ser Nicoleau, ni son msye sa loportinite pour eksplike akoz zot refize fer transfizyon disan. Sa ziz pa ti ni menm enform zot ki i ti’n donn permisyon lopital pour fer transfizyon disan.

Vandredi le 30 Desanm, bann travayer lopital ti met disan avek Ser Nicoleau menm si son msye avek lezot manm fanmir pa ti dakor. Sa menm swar, plizyer manm fanmir ansanm avek detrwa ansyen, ti ganny arete parski zot ti’n ganny akize konmkwa zot in anserkle lili sa ser pour anpes bann ners fer transfizyon disan. Son landmen bomaten, bann zournal, stasyon televizyon ek radyo dan New York City ek Long Island ti konmans fer reportaz lo sa ki ti’n arive.

 Son Lendi bomaten, mon ti koz avek Milton Mollen, en ziz Lakour Siprenm New York. Mon ti koz avek li lo sa ka. Mon ti fer kler ki sa ziz ki ti’n siny sa lord pour fer transfizyon disan, pa ti’n les Ser Nicoleau ek son fanmir eksplike akoz zot ti refize fer transfizyon disan. Ziz Mollen ti demann mwan pour vin dan son lofis apremidi, pour koz lo sa sityasyon e bann lalwa ki annan pour fer avek sa ka. Sa apremidi, frer Philip Brumley ti al avek mwan ler mon ti al dan lofis Ziz Mollen. Sa ziz ti osi envit sa avoka ki ti reprezant lopital pour li vin sa renyon. Nou konversasyon ti sitan entans ki Frer Brumley ti ekri lo en papye, “kalme ou en pe.” Sa ti en bon konsey parski mon ti pe konmans nerve ler mon ti pe montre sa lot avoka ki sa ki i ti pe dir i mal.

Apre ki nou ti’n diskite pour enn erdtan, Ziz Mollen ti dir ki sa ka ti pou pas premye devan lakour landmen bomaten. Anmezir ki nou ti pe kit son lofis, Ziz Mollen ti dir avek sa lot avoka ki i ti annan en travay difisil. Sa ti montre ki i pa ti pou fasil pour sa avoka prouve ki sa lopital ti annan drwa fors Ser Nicoleau fer transfizyon disan. Mon ti santi konmsi Zeova ti pe reasir nou ki nou ti kapab ranport laviktwar. Mon ti vreman kontan pour vwar lafason ki Zeova ti servi nou pour akonpli son lavolonte.

Nou ti travay ziska tar sa zour swar pour prepar sa ki nou ti pou dir son landmen bomaten. Lakour siprenm ti vreman pros avek Betel Brooklyn, alor laplipar nou ti marse pour al laba. Apre ki kat ziz ti’n ekout nou defann nou ka, zot ti deside ki sa lord pour fer transfizyon disan pa ti’n devret ganny donnen. Lakour Siprenm New York ti rann zizman dan faver Ser Nicoleau e zot ti dir ki i ti kont drwa imen pour siny en lord san ekout pwennvi sa pasyan avan.

Zis apre sa, Lakourdapel New York ti konfirm drwa Ser Nicoleau pour ganny tretman medikal san transfizyon disan. Ka Ser Nicoleau ti premye parmi kat ka ki annan pour fer avek disan ki mon’n annan sa privilez pour ede defann. Sa bann ka ti pas dan diferan lakour Leta-z-ini. (Vwar bwat “ Bann laviktwar dan Lakour Siprenm Leta-z-ini.”) Mon ti osi travay ansanm avek lezot avoka dan Betel dan bann ka ki konsern divors, desizyon  ki annan pour fer avek lekel zanfan pou reste e lalwa konsernan lafason ki bann propriyete ek batiman i kapab ganny servi.

Premye fwa ki mon ti zwenn mon madanm, Dawn, i ti’n divorse e pe elve trwa zanfan. I ti pe travay e an menm tan i ti pe fer pionye. Son lavi pa’n fasil e mon ti vreman enpresyonnen avek son determinasyon pour servi Zeova. An 1992, nou ti al en Lasanble Distrik dan lavil New York, ki ti annan pour tenm “Light Bearers.” Ler nou ti laba, mon ti demann li si nou kapab aprann konn kanmarad. Enn an pli tar, nou ti marye. I ti en kado sorti kot Zeova pour annan en madanm ki toultan met Zeova premye e ki ti annan lazwa de viv. Tou dilon nou lavi ansanm, Dawn in fer mwan vreman ere.​—Prov. 31:12, NWT.

Ler nou ti marye, son bann zanfan ti annan 11 an, 13 an ek 16 an. Mon ti anvi vin en bon papa pour zot, alor mon ti lir e aplik tou sa ki mon ti trouve dan nou bann piblikasyon konsernan ki mannyer pour vin en bon boper. Dan bann lannen ki ti swiv, nou ti fer fas avek bokou difikilte, me mon kontan ki sa bann zanfan in aksepte mwan konman en zanmi ki zot annan konfyans ladan e konman en papa ki kontan zot. Nou ti toultan akeyir zanmi nou bann zanfan kot nou lakour e nou ti kontan pour annan sa bann zenn kot nou.

An 2013, nou de Dawn, nou ti al Wisconsin pour ede pran swen avek nou bann paran aze. Mon pa ti pe ekspekte ki mon ti pou kapab kontinyen servi dan Betel. Mon ti ganny envite pour kontinyen ed lorganizasyon dan bann ka legal.

An Septanm 2018, mon ti remarke ki mon ti toultan annan flenm dan mon lagorz. Dokter ti egzamin mwan me i pa ti konnen kwa ki ti pe fer sa. Pli tar, en lot dokter ti sizere ki mon vwar en spesyalis. An Zanvye 2019, en lot spesyalis ti dir ki i tre probab ki mon annan en maladi vreman rar (progressive supranuclear palsy) e ki avek letan i ti pou afekte mon lekor antye.

Trwa zour apre, ler mon ti pe fer mon sport prefere, mon ti tonbe e kas mon ponnyen drwat. Tou mon lavi mon’n fer sa sport e mon ti bon lo la. Alor, mon ti konnen ki mon ti pe konmans perdi mon abilite pour kontrol mon bann misk. Mon ti sirprann avek lafason ki sa maladi ti agrav sitan vit. I ti vin pli difisil pour mwan koze, marse e anvale.

Mon vreman kontan ki mon’n kapab ed lorganizasyon Zeova konman en avoka. Osi, mon’n annan sa privilez pour ekri plizyer lartik pour bann magazin ki bann dokter, avoka e ziz i lir. Mon’n osi partisip dan bann seminar partou dan lemonn, pour defann drwa Temwen Zeova pour swazir swen medikal san fer transfizyon disan. Kantmenm sa, parey Lik i dir dan Lik 17:10: ‘Mon en lesklav bon nanryen. Sa ki mon’n fer, sanmenm ki mon ti’n devret fer.’