1. Ki i kapab arive ler serten dimoun i fer paryaz avek lezot?

OZORDI dan lemonn, bokou dimoun pe fer paryaz avek lezot. Zot pa fatig zot si zot aksyon i bles lezot. Par egzanp, en biznesmenn ki anvi fer pli byen ki lezot biznes i kapab fer keksoz ki fer ditor lezot dimoun. En atlet i kapab fer dimal en zwer dan en lot lekip pour ki son lekip i ranport laviktwar. I kapab ki en etidyan i kopye dan legzanmen pour li kalifye pour antre dan en bon liniversite. Konman Kretyen, nou konnen ki sa bann keksoz i mal e i form parti “bann move kondwit lekor enparfe.” (Gal. 5:19-21) Me eski i posib ki serten frer ek ser pa realize ki zot pe fer paryaz avek lezot e zot pe enfliyans lezot pour fer parey? Nou bezwen reflesir lo sa kestyon. Parski si bann frer ek ser i fer paryaz avek kanmarad, i pou napa linite dan kongregasyon.

2. Ki nou pou diskite dan sa lartik?

² Dan sa lartik, nou pou diskit lo bann tre ki kapab fer nou fer paryaz ouswa konpetisyon avek nou bann frer ek ser. Nou pou osi vwar legzanp bann serviter Zeova dan Labib ki pa ti fer konpetisyon avek lezot. Premyerman, annou vwar ki mannyer nou kapab egzamin nou motivasyon.

3. Ki kestyon nou devret demann nou lekor?

³ I byen pour egzamin nou motivasyon tanzantan. Nou kapab demann nou lekor: “Eski mon santi mwan pli byen zis ler mon krwar ki mon pli meyer ki lezot? Eski mon travay dir dan kongregasyon parski mon anvi vin sa enn ki pli bon ouswa pli meyer ki en serten frer oubyen ser? Ouswa eski mon zis anvi donn Zeova mon meyer?” Akoz nou devret demann nou lekor sa bann kestyon? Annou vwar ki Parol Bondye i dir.

4. Dapre Galat 6:3, 4, akoz nou pa devret konpar nou avek lezot?

⁴ Labib i dir ki nou pa devret konpar nou avek lezot. (Lir Galat 6:3, 4.) Akoz? En rezon i akoz si nou krwar ki nou pli meyer ki nou frer oubyen ser, nou kapab vin orgeye. De lot kote, si nou krwar ki nou frer oubyen ser pe fer pli byen ki nou, i tre probab ki nou pou dekouraze. Tou le de fason panse i pa rezonnab. (Rom. 12:3) En ser ki apel Katerina * e ki reste Lagres, i dir: “Mon ti abitye konpar mwan avek lezot ki paret pli zoli, ki pli efikas dan predikasyon e ki fer zanmi pli fasilman. Sa ti fer mwan santi ki mon pa vo nanryen.” Nou bezwen rapel ki Zeova in atir nou ver li pa akoz nou zoli, nou koz byen ouswa akoz en kantite dimoun i kontan nou, me akoz nou kontan li e nou ekout son garson.​—Zan 6:44; 1 Kor. 1:26-31.

5. Ki nou aprann avek sa ki ti arive avek en frer ki apel Hyun?

⁵ En lot kestyon ki nou kapab demande i, ‘Eski bann frer ek ser i vwar mwan konman en dimoun ki kontan fer lape avek lezot ouswa eski mon souvan annan en dezakor avek lezot?’ Annou vwar ki ti arive avek en frer ki apel Hyun ki reste Sid Kore. I ti krwar ki serten frer ki annan responsabilite dan kongregasyon ti pe fer konmsi zot pli siperyer ki li. I dir: “Mon ti kritik sa bann frer e souvan mon pa ti dakor avek sa ki zot ti dir.” Ki lefe sa ti fer? Hyun i dir: “Mon latitid ti anmenn divizyon dan kongregasyon.” Serten son bann zanmi ti ed li pour vwar ki i annan en problenm. Hyun ti fer bann sanzman neseser e ozordi i pe desarz byen son responsabilite konman ansyen. Si nou vwar ki nou annan sa tandans pour fer konpetisyon avek lezot olye promet lape, nou bezwen fer bann sanzman deswit.

6. Dapre Galat 5:26, ki bann move tre ki kapab fer nou fer konpetisyon avek lezot?

⁶ Lir Galat 5:26. Ki bann move tre ki kapab fer nou fer konpetisyon avek lezot? Enn i lorgey. En dimoun ki orgeye i vantar e i mazin zis son prop lekor. En lot move tre i groker. En dimoun ki groker i pa zis anvi sa ki en lot dimoun i annan me i osi anvi pran sa keksoz avek sa dimoun. Alor en dimoun ki groker i ay son prosen. Nou devret fer sir ki nou pa devlop sa bann move tre.

7. Akoz i mal pour vin orgeye e groker? Donn en legzanp.

⁷ Groker ek lorgey i kapab ganny konpare avek karya ki pe manz twatir en lakaz. Menm si sa twatir i paret zoli, avek letan i pou tonbe. Pareyman en dimoun i kapab konmans servi Zeova me si i vin orgeye e groker apre en serten letan i  pou tonbe. (Prov. 16:18, NWT) I pou aret servi Zeova e fer ditor son prop lekor ek lezot. Alor, ki nou kapab fer pour pa vin groker e orgeye?

8. Ki mannyer nou kapab evite vin orgeye?

⁸ Nou kapab evite vin orgeye ler nou aplik konsey ki zapot Pol ti donn bann Filipyen: “Pa fer nanryen avek en leta lespri dispit oubyen egois, me avek limilite konsider lezot pli siperyer ki zot.” (Fili. 2:3) Si nou konsider lezot pli siperyer ki nou, nou pa pou fer konpetisyon avek bann ki annan plis abilite ki nou. O kontrer, nou pou kontan pour zot. Sa i vre sirtou si zot pe servi zot abilite pour loue Zeova. An retour si en frer oubyen en ser ki annan en kantite abilite i aplik sa konsey Pol, i pou vwar nou bann bon kalite. Sa pou fer ki nou tou nou pou promot lape ek linite dan kongregasyon.

9. Ki mannyer nou kapab evite vin groker?

⁹ Si nou rekonnet ki i annan serten keksoz ki nou pa kapab fer byen, sa pou anpes nou vin groker. Si nou annan limilite, nou pa pou esey montre ki nou pli meyer ki lezot. O kontrer nou pou aprann avek bann ki annan plis abilite ki nou. Par egzanp, i kapab ki en frer dan kongregasyon i fer bann zoli diskour. Nou kapab demann li ki mannyer i prepar son bann diskour. Si en ser i kwi byen manze, ou kapab demann li bann sizesyon pour ed ou kwi byen manze. Si en zenn pa kapab fer zanmi fasilman, i kapab demann konsey avek en dimoun ki fer zanmi fasilman. Ler nou fer sa, nou pa pou vin groker e nou pou amelyor nou prop abilite.

10. Ki problenm ki Gideonn ti fer fas avek?

¹⁰ Mazin sa ki ti arive avek Gideonn ki ti sorti dan tribi Manase e avek bann zonm sorti dan tribi Efraim. Gideonn ti’n kapab vin orgeye parski Zeova ti’n  ed li ek son 300 zonm pour ranport laviktwar dan en batay. Pli tar, bann zonm sorti dan tribi Efraim ti vin zwenn li, pa pour felisit li me pour fer kankan avek li. I paret ki zot ti ofanse parski Gideonn pa ti’n envit zot ler li ek son 300 zonm ti pe al lager kont bann lennmi Bondye. I ti vreman enportan pour zot, ki dimoun i respekte zot tribi, me zot ti’n oubliye ki i ti pli enportan ki Gideonn ti’n ede pour onor Zeova e pour protez Son pep.​—Ziz 8:1.

11. Ki Gideonn ti dir bann zonm sorti dan tribi Efraim?

¹¹ Gideonn ti demontre limilite e i ti dir avek bann zonm sorti dan tribi Efraim: “Kwa ki mon’n fer konpare avek zot?” Apre i ti fer zot rapel ki mannyer Zeova in beni zot. Sa ki Gideonn ti dir “ti kalme zot lakoler.” (Ziz 8:2, 3) Gideonn ti pare pour demontre limilite pour gard lape parmi pep Bondye.

12. Ki nou aprann avek legzanp bann zonm sorti dan tribi Efraim e avek legzanp Gideonn?

¹² Ki nou kapab aprann avek sa resi? Atraver legzanp bann zonm sorti dan tribi Efraim, nou aprann ki nou pa devret konsantre lo onor nou prop lekor me lo onor Zeova. Konman bann sef fanmir ek ansyen, nou kapab aprann en leson avek legzanp Gideonn. Si en dimoun i ankoler akoz en keksoz ki nou’n fer, nou devret esey konpran akoz sa dimoun i ankoler. Nou kapab osi felisit sa dimoun pour sa ki i’n fer byen. Pour fer sa nou bezwen annan limilite sirtou si sa lot dimoun i annan tor. Me i pli enportan pour annan en bon lanmitye avek nou frer oubyen ser olye montre ki nou annan rezon.

13. Ki problenm Ana ti fer fas avek e ki i ti fer?

¹³ Mazin osi lo legzanp Ana. Ana ti’n marye avek en Levit ki ti apel Elkana ki ti kontan li en kantite. Me Elkana ti annan en lot madanm ki ti apel Penina. Elkana ti kontan Ana plis ki i ti kontan Penina me ‘Penina ti annan zanfan, tandis ki Ana ti napa.’ Sa ti fer ki Penina ti ‘provok Ana pour fer li sagren.’ Ki mannyer Ana ti santi? I ti vreman sagren! Ana “ti plere e i pa ti manze.” (1 Sam. 1:2, 6, 7) Me Labib pa dir ki Ana ti esey pran revanz lo Penina. O kontrer i ti dir Zeova ki mannyer i ti santi e i ti annan konfyans ki Zeova ti pou ed li. Eski Penina ti aret provok Ana? Labib pa dir. Me nou konnen ki Ana ti reganny son lape lespri e “i ti nepli tris.”​—1 Sam. 1:10, 18.

14. Ki nou aprann avek legzanp Ana?

¹⁴ Ki nou kapab aprann avek legzanp Ana? Si en dimoun i fer konpetisyon  avek ou, rapel ki ou kapab kontrol ou reaksyon. Ou pa bezwen fer konpetisyon avek sa dimoun. Olye rann mal pour mal esey fer lape avek li. (Rom. 12:17-21) Menm si i pa anvi sanze, ou pou annan ou lape lespri.

15. Ki Apolos ek zapot Pol ti annan an komen?

¹⁵ Finalman, annou vwar ki nou kapab aprann avek legzanp Apolos ek zapot Pol. Tou le de zonm ti konn byen lekritir. Zot ti byen koni e zot ti de bon ansenyan. Zot ti ede pour fer en kantite disip me zot pa ti zalou kanmarad.

16. Ki kalite dimoun Apolos ti ete?

¹⁶ Apolos ti ne Aleksandri, en landrwa byen renonmen kot dimoun ti al lekol. I ti koz byen e i “ti konn byen Lekritir.” (Akt 18:24) Ler Apolos ti servi dan kongregasyon Korent, serten frer ti montre ki zot ti kontan li plis ki zapot Pol ek lezot frer. (1 Kor. 1:12, 13) Eski Apolos ti ankouraz zot pour annan sa kalite latitid? Nou pa kapab imazinen ki i ti fer sa. Anfet, en pe letan apre ki Apolos ti’n kit Korent, Pol ti demann li pour retourn laba. (1 Kor. 16:12) Pol pa ti pou’n zanmen demann li pour fer sa si i ti’n santi ki Apolos ti pe fer divizyon dan kongregasyon. I kler ki Apolos ti servi son bann abilite dan en bon fason pour anons sa bon nouvel e ankouraz son bann frer ek ser. Nou kapab osi asire ki Apolos ti annan limilite. Par egzanp, Labib pa dir ki i ti ofanse ler Akila ek Prisil ti “eksplik li semen Bondye dan en fason pli egzakt.”​—Akt 18:24-28.

17. Ki mannyer zapot Pol ti promot lape?

¹⁷ Zapot Pol ti konn bann bon travay ki  Apolos ti pe fer. Me Pol pa ti enkyet ki dimoun ti pou krwar ki Apolos ti pe fer en pli bon travay ki li. Ler nou lir sa ki Pol ti ekri bann Kretyen Korent, nou kapab vwar ki i ti annan limilite e i ti en dimoun rezonnab. I pa ti kontan ler dimoun ti dir: “Mwan mon pour Pol.” O kontrer i ti donn tou loner Zeova ek Zezi Kri.​—1 Kor. 3:3-6.

18. Dapre 1 Korentyen 4:6, 7, ki nou kapab aprann avek legzanp Apolos ek zapot Pol?

¹⁸ Ki nou kapab aprann avek legzanp zapot Pol ek Apolos? I kapab ki nou fer en kantite pour Zeova e nou ed en kantite dimoun pour progrese ziska batenm. Me nou konpran ki sa i posib zis akoz Zeova i ed nou. Atraver legzanp Apolos ek zapot Pol, nou osi aprann ki ler nou annan plis responsabilite dan kongregasyon nou kapab fer plis pour promot lape dan kongregasyon. Nou vreman apresye ler bann ansyen ek bann serviter kongregasyon i ed nou pour reste ini e anpe avek kanmarad. Zot fer sa ler zot donn nou bann konsey ki sorti dan Labib. Zot pa esey vin pli enportan me zot esey ed tou bann frer ek ser pour obei e swiv legzanp Zezi.​—Lir 1 Korentyen 4:6, 7.

19. Ki nou tou nou kapab fer? (Vwar osi bwat “ Pa fer paryaz avek kanmarad.”)

¹⁹ Nou tou nou annan bann abilite. Nou kapab servi nou abilite “pour servi lezot.” (1 Pyer 4:10) Nou kapab mazinen ki sa ki nou fer i pa vreman enportan. Me rapel ki bann pti keksoz ki nou fer pour gard kongregasyon ini i parey bann pti difil ki koud en lenz pour fer li tenir. Nou tou nou devret kontinyen fer zefor pour pa fer konpetisyon avek lezot. Annou fer tou sa ki nou kapab pour promot lape ek linite dan kongregasyon.​—Efe. 4:3.