Mon papa ti en ansyen dan United Church of Canada dan sa landrwa kot nou reste. Alor tou le semenn, i ti anvoy mwan ek mon ser swiv laklas ki legliz ti fer pour bann zanfan dan Dimans bomaten. Apre sa, 11 er nou ti al avek li lanmes. Dan apremidi, nou ti al avek nou manman kot Lasal Rwayonm. Nou ti fasilman vwar diferans ant sa de larelizyon.

Mon manman ti koz lo son krwayans avek son de bon zanmi, Bob ek Marion Hutcheson e zot osi zot ti aksepte laverite ki dan Labib. An 1958, bann Hutcheson ti anmenn mwan ek zot trwa garson pour asiste Divine Will International Assembly ki ti ganny fer pandan wit zour New York City. Aprezan mon realize ki i pa ti fasil pour zot anmenn mwan avek zot me sa lasanble i enn sa pli bon souvenir ki mon annan.

Ler mon ti ankor en adolesan, nou ti reste lo en laferm kot mon ti okip bann zannimo. Mon ti pe menm mazin pour vin en veteriner. Mon manman ti koz lo la avek en ansyen. Zantiman, sa ansyen ti dir mwan ki nou pe viv dan “bann dernyen zour” e i ti demann mwan si mon al liniversite pour plizyer lannen, ki lefe sa ti pou annan lo mon lanmitye avek Zeova. (2 Tim. 3:1) Alor mon ti deside pour pa al liniversite.

 Me mon ti ankor pe mazinen ki mon pou fer ler mon fini segonder. Menm si mon ti pe partisip dan predikasyon tou le wikenn, mon pa ti kontan fer predikasyon e mon pa ti krwar si mon ti pou kapab vin en pionye. Antretan mon papa ek mon tonton ti pe ankouraz mwan pour travay a plen tan dan en gran lakonpannyen lasirans ki ti baze Toronto. Mon tonton ti annan en pozisyon enportan dan sa lakonpannyen alor mon ti aksepte sa travay.

Ler mon ti Toronto, mon ti pas plis letan pe travay e avek bann dimoun ki pa ti pe servi Zeova. Sa ti fer ki mon pa ti pe asiste renyon ek predikasyon regilyerman. Premye kou mon ti reste avek mon granpapa ki pa ti pe servi Zeova me ler i ti mor mon ti bezwen rod en lot landrwa reste.

Lafanmir Hutcheson, sa fanmir ki ti anmenn mwan sa lasanble an 1958, ti parey bann paran pour mwan. Zot ti envit mwan pour vin reste kot zot e zot ti ed mwan pour batir mon lanmitye avek Zeova. An 1960, mon ti batize ansanm avek zot garson John. John ti konmans fer pionye e sa ti ankouraz mwan pour fer plis dan predikasyon. Bann frer dan kongregasyon ti remarke ki mon ti pe fer progre alor mon ti ganny apwente konman serviter pour Lekol Minister Teokratik. a

An 1966, mon ti marye avek Randi Berge, ki ti en pionye devoue e ki ti anvi al servi kot i ti annan bezwen pour plis proklanmater. Nou sirveyan rezyonal ti demontre en lentere personnel dan nou. I ti ankouraz nou pour ed kongregasyon Orillia, Ontario. Alor deswit nou ti fer nou bagaz e nou ti ale.

Ler nou ti ariv Orillia, deswit mon ti konmans fer pionye ordiner ansanm avek Randi. Nou tou le de nou ti vreman kontan pour fer sa servis. Apre ki mon ti’n travay dir pour vin en bon pionye, mon ti zwaye ler mon ti pe servi Labib e ler mon ti vwar dimoun pe konpran laverite. Mon ti vreman kontan pour ed en koup ki ti pe reste Orillia pour fer  bann sanzman dan zot lavi e vin bann serviter Zeova.

Pandan en vizit ki nou ti pe fer Toronto, mon ti zwenn Arnold MacNamara, ki ti enn bann frer responsab dan Betel. I ti demann mwan si nou ti pou kontan fer pionye spesyal. Deswit mon ti reponn: “Definitivman! Nenport landrwa me pa Quebec!” Bann dimoun ki koz Angle Kanada ti’n dir bann move keksoz konsernan bann problenm ki i ti annan dan provens Quebec kot dimoun i koz Franse e sa in annan en move lenfliyans lo mwan. Sa letan, bann dimoun ti pe proteste kont gouvernman e zot ti anvi ki sa provens Quebec i vin endepandan avek larestan Kanada.

Arnold ti dir mwan: “Quebec i sa sel landrwa kot biro brans pe anvoy bann pionye spesyal pour lemoman.” Deswit mon ti dakor pour ale. Mon ti deza konnen ki Randi ti enterese pour al servi laba. Pli tar mon ti realize ki sa ti enn bann pli bon desizyon ki nou’n fer dan nou lavi!

Apre ki nou ti’n asiste en laklas Franse ki ti dire pour senk semenn, nou de Randi ansanm avek en lot koup, nou ti al Rimouski ki ti apepre 540 kilomet dan nordes Montreal. I ti ankor annan en kantite pour nou aprann e sa ti vin evidan pandan en renyon ler mon ti bezwen lir serten lanons. Mon ti dir ki pour nou prosenn lasanble, nou pou ganny en kantite “delege ostrich” olye dir “delege ki sorti Lotris.”

Ler nou ti Rimouski nou tou le kat, kat ser selibater ki ti byen devoue e osi frer ek ser Huberdeaus ek zot de fiy, ti zwenn ansanm avek nou. Frer ek ser Huberdeaus ti lwe en gro lakaz e tou bann pionye ki ti reste laba ti fer kontribisyon pour pey sa landrwa. Nou ti apel sa lakaz “White House” parski sa lakaz son devan ti blan e i ti annan bann pilye blan. Normalman i ti annan ant 12 a 14 dimoun ki ti reste laba. Konman bann pionye, nou de Randi nou ti pe fer predikasyon dan bomaten, apremidi ek aswar. Alor nou ti rekonesan pour annan en dimoun pour al ansanm avek nou dan predikasyon, menm aswar dan letan liver kot i ti fer fre.

Nou ti vin vreman pros avek sa bann pionye ki zot ti vin parey nou prop fanmir. Parfwa nou ti asize ansanm otour en dife oubyen i ti annan en zour kot nou ti kwi manze ansanm. Enn parmi sa bann frer ti en mizisyen, alor dan Sanmdi swar souvan nou ti sante e danse.

En kantite dimoun Rimouski ti enterese pour konn plis lo Labib. Dan lespas senk an, nou ti kontan ler nou ti vwar ki serten nou bann etidyan Labib ti progrese e batize. Nou ti osi kontan pou vwar kongregasyon grandi pour vin apepre 35 proklanmater.

Ler nou ti Quebec, nou ti ganny bann bon formasyon konman bann predikater. Nou ti vwar ki mannyer Zeova ti ed nou dan predikasyon e avek nou bann bezwen materyel. An plis, nou ti aprann pour kontan bann dimoun ki koz Franse, zot langaz ek kiltir e sa ti fer nou apresye lezot kiltir osi.​—2 Kor. 6:13.

Me san ekspekte, biro brans ti demann nou pour al reste dan en lavil ki apel Tracadie ki ti dan les lakot New Brunswick. I pa ti en keksoz fasil pour fer parski nou ti’n fek siny en kontra pour lwe en lakaz e mon ti annan en kontra travay a mi tan avek lekol. An plis, serten nou bann etidyan  Labib ti’n fek vin bann proklanmater e nou ti dan milye en proze konstriksyon Lasal Rwayonm.

Nou ti priye tou dilon wikenn konsernan al Tracadie e nou ti osi vizit sa landrwa. I ti vreman diferan avek Rimouski. Me nou ti deside ki si Zeova i anvi nou al laba, nou pou ale. Nou ti teste Zeova e nou ti vwar ki Zeova ti retir tou sa bann lobstak. (Mal. 3:10) Vi ki Randi ti annan en bon lanmitye avek Zeova, i ti pare pour fer sakrifis e i ti en dimoun ki ti kontan fer riye, sa ti fer li fasil pour nou deplase.

Robert Ross ti sa sel ansyen dan nou kongregasyon. I’n fer pionye dan sa landrwa ansanm avek son madanm Linda e zot in deside pour reste laba apre ki zot garson ti ne. Menm si zot ti pe pran swen avek zot pti garson, zot ti ankouraz nou de Randi par lafason ki zot ti akey nou byen e lefet ki zot ti devoue dan sa travay predikasyon.

Apre ki nou ti’n fer predikasyon pour de-z-an Tracadie, nou ti ganny en lot sirpriz. Nou ti ganny envite pour vin sirveyan rezyonal. Pour set an, nou ti travay dan en teritwar Angle. Apre nou ti ganny anvoye dan teritwar ki koz Franse Quebec. Nou sirveyan distrik Quebec, ki ti apel Léonce Crépeault, ti felisit mwan pour mon bann diskour. Me apre i toultan dir mwan: “Ki mannyer ou diskour i kapab vin pli pratik?” b Sa latansyon ki i ti donn mwan ti ed mwan pour konsantre lo fer mon diskour pli fasil pour konpran.

Enn bann travay ki mon mazin byen, i sa enn ki mon ti gannyen an 1978 dan en lasanble enternasyonal Montreal ki ti annan pour tenm “Victorious Faith.” Mon ti travay dan servis manze. Nou ti pe ekspekte ganny 80,000 dimoun e nou ti bezwen trouv en lot fason pour donn zot manze. Tou keksoz ti nouvo. Nou ti pou servi bann lekipman, meni e en lot fason pour prepar manze. Nou ti annan apepre 20 gran karavann ki ti bann refrizerater e ki parfwa pa ti marse. Avan ki lasanble ti konmanse lo son premye zour, nou pa ti ni menm kapab antre lo stad pour met tou keksoz pare. Minwi ki nou ti ganny sans antre parski i ti annan en levennman sportif ki ti pe ganny fer dan sa stad. Osi nou ti bezwen alim bann four avan lizour i fer pour nou fer brekfas! Nou ti fatige me mon ti aprann en kantite avek lafason ki lezot volonter i travay dir, zot matirite e lafason ki zot ti fer zot  travay avek lazwa. Nou ti aprann konn kanmarad e sa ti fer ki nou’n vin bann bon zanmi ziska ozordi. I ti en gran lazwa pour asiste sa lasanble enportan Quebec, sa menm landrwa kot i ti annan persekisyon ant bann lannen 1940 ziska 1960.

Mon ti aprann en kantite avek lezot sirveyan rezyonal pandan nou gran lasanble ki ti fer Montreal. I ti annan en lannen kot David Splane ki konmela i en manm lo Konsey Direkter, ti prezidan sa lasanble. Pandan en lot lasanble, ler mon ti ganny demande pour vin prezidan pour sa lasanble, David ti donn mwan tou son sipor.

An 2011, apre ki mwan ek Randi nou ti’n servi pour 36 an konman sirveyan rezyonal, mon ti ganny envite pour vin en formater dan lekol pour bann ansyen. Nou ti dormi lo 75 diferan lili pandan de-z-an me tou sa sakrifis ti vo lapenn. A lafen sak semenn, bann ansyen ti vreman rekonesan parski zot ti santi ki Konsey Direkter i enterese avek zot lanmitye avek Zeova.

Pli tar, mon ti vin en formater pour Lekol pour bann Predikater Rwayonm. Bann zelev ti souvan santi zot fatige avek sa progranm sarze. Zot ti bezwen asiz dan en laklas pour apepre set erdtan par zour, fer travay lakour pour trwa erdtan par zour e zot ti annan kat oubyen senk partisipasyon par semenn. Sa lot formater ti dir ki zot pa ti pou kapab fer li san led Zeova. Mon pou toultan rapel lafason ki bann zelev ti sirprann pour vwar ki ler zot depan lo Zeova, zot ti kapab fer bokou plis ki sa ki zot ti krwar zot kapab fer.

Lafason ki mon manman ti demontre lentere dan lezot ti ed son bann etidyan Labib pour progrese e menm ed mon papa pour sanz son latitid anver laverite. Trwa zour apre ki mon manman ti’n mor, mon papa ti sirprann nou ler i ti vin ekout en diskour piblik kot Lasal Rwayonm. I ti kontinyen asiste renyon pandan 26 an. Menm si mon papa pa’n zanmen pran batenm, bann ansyen ti dir mwan ki i ti toultan premye pour ariv lasal sak semenn.

Mon manman ti en bon legzanp pour mwan ek mon bann ser. Tou le trwa mon bann ser ek zot msye pe servi Zeova fidelman. De parmi mon bann ser pe servi dan bann biro brans. Enn i Portigal e lot i Haiti.

Aprezan nou de Randi nou pionye spesyal, Hamilton, Ontario. Ler mon ti sirveyan rezyonal, nou ti kontan akonpanny lezot lo zot bann retourn vizit ek letid Labib. Me aprezan nou kontan pour vwar nou bann etidyan pe progrese e pe vin pli pros avek Zeova. Anmezir nou vin pli pros avek nou bann frer ek ser dan nou nouvo kongregasyon, nou vwar lafason ki Zeova i siport zot dan botan e dan movetan e sa i vin en lankourazman pour nou.

Ler nou mazin bann lannen ki’n pase, nou vreman apresye lentere personnel ki lezot in demontre anver nou. An retour, nou’n esey demontre en lentere senser anver lezot par ankouraz zot pour servi Zeova dan sa pli bon fason ki zot kapab. (2 Kor. 7:6, 7) Par egzanp dan en fanmir, en madanm, son garson ek son fiy, zot tou zot ti dan servis a plen tan. Mon ti demann sa msye si in deza mazin pour fer pionye. I ti dir mwan ki i pe deza siport trwa pionye. Alor mon demann li: “Eski ou kapab siport zot pli byen ki Zeova?” Mon ti ankouraz li pour ganny sa menm lazwa ki zot pe gannyen. Dan sis mwan, i ti vin en pionye.

Nou de Randi, nou pou kontinyen “koz . . . avek sa lot zenerasyon” lo “bann travay merveye” ki Zeova in fer e nou swete ki zot pou servi Zeova otan ki posib parey nou.​—Ps. 71:17, 18.