LARTIK LETID 30
KANTIK 36 Protez nou leker
Bann leson enportan ki nou aprann avek bann lerwa Izrael
“Ankor enn fwa, zot pou vwar diferans ant en dimoun drwat ek en move dimoun, ant enn ki pe servi Bondye e enn ki pa pe servi li.”—MAL. 3:18.
TOPIK
Nou pou aprann ki mannyer legzanp bann lerwa Izrael i kapab ed nou pour konnen ki nou bezwen fer pour fer Zeova plezir.
1-2. Ki Labib i dir nou konsernan serten lerwa Izrael?
LABIB i koz lo plis ki 40 zonm ki ti dirize konman lerwa Izrael. a Labib i osi dir nou dan en fason onnet bann keksoz ki serten sa bann lerwa ti fer. Par egzanp, menm bann bon lerwa ti fer bann move keksoz. Annou vwar legzanp Lerwa David ki ti en bon lerwa. Zeova ti dir: “Mon serviter David. . . [ti] swiv mwan avek tou son leker. I ti fer zis sa ki ti byen dan mon lizye.” (1 Rwa. 14:8) Kantmenm sa, sa zonm ti komet imoralite seksyel avek en madanm marye e i ti fer plan pour fer son msye ganny touye dan en lager.—2 Sam. 11:4, 14, 15.
2 Labib i osi koz lo serten bon keksoz ki bann lerwa ki pa ti fidel avek Zeova ti fer. Annou vwar legzanp Reoboam. Zeova ti konsider Reoboam konman en lerwa ki “ti fer sa ki mal.” (2 Kron. 12:14) Kantmenm sa, Reoboam ti fer serten bon keksoz. Par egzanp, i ti obei Zeova ler Zeova ti dir li pa lager avek sa 10 tribi Izrael e les zot swazir en lot lerwa. I ti osi fortifye bann lavil dan son rwayonm pour protez pep Bondye kont zot bann lennmi.—1 Rwa. 12:21-24; 2 Kron. 11:5-12.
3. Ki nou pou vwar dan sa lartik?
3 I enportan pour nou konn larepons sa kestyon swivan. Si bann lerwa Izrael ti fer bann bon keksoz e osi bann move keksoz, kwa ki ti fer Zeova konsider en lerwa konman en lerwa ki fidel? Larepons sa kestyon pou ed nou konpran ki nou bezwen fer pour fer Zeova plezir. Nou pou aprann konsernan trwa keksoz ki Zeova i pran kont ler i pe deside si en lerwa ti fidel oubyen pa fidel. Premyerman, Zeova ti gete si sa lerwa ti kontan li avek tou son leker. Dezyenmman, i ti gete si sa lerwa in repantir senserman apre ki i’n fer en move keksoz. Trwazyenmman, i ti gete si sa lerwa i kontinyen ador li dan sa bon fason.
KONTAN ZEOVA AVEK TOU OU LEKER
4. Ki diferans ti annan ant bann lerwa ki ti fidel ek bann ki pa ti fidel?
4 Bann lerwa ki ti fer Zeova plezir ti servi Zeova avek tou zot leker. b Lerwa Zeosafat ki ti en bon lerwa ti “rod Zeova avek tou son leker.” (2 Kron. 22:9) Konsernan Zosya, Labib i dir: “I ti napa en lerwa ki ti parey li avan sa, ki ti retourn kot Zeova e ador li avek tou son leker.” (2 Rwa. 23:25) Ki Labib i dir konsernan Salomon ki dan son bann vye zour i ti fer sa ki mal? Labib i dir: “I pa ti servi Zeova son Bondye avek tou son leker.” (1 Rwa. 11:4) Konsernan Abiyam, ki ti en lot lerwa ki pa ti fidel avek Zeova, Labib i dir: “I pa ti servi Zeova son Bondye avek tou son leker.”—1 Rwa. 15:3.
5. Ki i vedir pour servi Zeova avek tou ou leker? Eksplike.
5 Ki i vedir pour servi Zeova avek tou nou leker? En dimoun ki servi Zeova avek tou son leker pa servi Zeova zis akoz i konnen i devret ador Zeova. Me i servi Zeova parski i vreman kontan Zeova e i annan respe pour Zeova. I kontinyen demontre sa lanmour ek respe pour Zeova tou dilon son lavi.
6. Ki mannyer nou kapab kontinyen kontan Zeova avek tou nou leker? (Proverb 4:23; Matye 5:29, 30)
6 Ki mannyer nou kapab swiv legzanp bann lerwa ki ti kontan Zeova avek tou zot leker? Nou fer sa ler nou evit bann move lenfliyans. Nou bezwen evit okenn keksoz ki kapab afeblir nou lanmour pour Zeova. Par egzanp, nou bezwen fer atansyon bann keksoz ki nou gete oubyen fer ler nou pe detann. Nou osi bezwen swazir bann bon zanmi e evite krwar ki bann keksoz materyel i sa keksoz pli enportan dan nou lavi. Si nou realize ki en keksoz pe afeblir nou lanmour pour Zeova, nou bezwen azir deswit e fer bokou zefor pour sanz nou fason panse ek aksyon pour ki sa keksoz pa fer nou aret kontan Zeova.—Lir Proverb 4:23; Matye 5:29, 30.
7. Akoz i enportan pour nou rezet bann move lenfliyans?
7 Nou pa devret les nanryen anpes nou kontan Zeova avek tou nou leker. Si nou pa fer atansyon, nou pou kapab krwar ki vi ki nou okipe dan servis Zeova, nou pa pou ganny enfliyanse par bann move keksoz. Annou vwar en legzanp. Imazin ou pe netway lakaz e apre sa, ou ouver laport e ou les lapousyer antre. Nou kapab konpar sa legzanp avek nou lanmitye avek Zeova. I pa ase pour nou zis fer bann keksoz ki pou fer nou vin pros avek Zeova. Zis parey nou pa pou les lapousyer antre dan nou lakaz, nou bezwen rezet okenn keksoz ki kapab afeblir nou lanmour pour Zeova.—Efe. 2:2.
NOU BEZWEN REPANTIR POUR NOU BANN PESE
8-9. Ki mannyer Lerwa David ek Lerwa Ezekya ti reazir ler zot ti ganny konseye? (Vwar kouvertir.)
8 Parey nou’n vwar dan premye paragraf, Lerwa David ti fer en pese grav. Me ler profet Natan ti dir David konsernan lafason ki Zeova i santi anver son pese, David ti demontre limilite e i ti repantir. (2 Sam. 12:13) David pa ti fer krwar ki i ti regrete pour anbet Natan oubyen pour li pa ganny pini. O kontrer sa ki David ti ekrir dan Psonm 51 i montre ki David ti vreman regrete pour sa ki i ti’n fer.—Ps. 51:3, 4, 17, lentrodiksyon.
9 Lerwa Ezekya osi ti fer pese kont Zeova. Labib i dir: “I ti vin arogan. Sa ti fer Bondye ankoler avek li e avek Zida ek Zerizalenm.” (2 Kron. 32:25) Akoz Ezekya ti vin arogan? Petet i ti santi koumsa akoz Zeova ti’n donn li en kantite larises, ti’n ed li pour ranport laviktwar lo bann Asiryen oubyen akoz Zeova ti’n geri li avek en maladi ki ti pou touy li. I kapab i akoz Ezekya ti arogan ki i ti montre bann Babilonnyen tou son larises e sa ti fer ki profet Izai ti dir li ki Zeova ti ankoler avek li. (2 Rwa. 20:12-18) Me parey David, Ezekya ti demontre limilite e i ti repantir. (2 Kron. 32:26) Sa ti fer ki Zeova ti vwar li konman en lerwa ki ti fidel e ki ti “kontinyen fer sa ki byen.”—2 Rwa. 18:3.
Ler Lerwa David ek Lerwa Ezekya ti ganny konseye akoz zot pese, zot ti demontre limilite e repantir (Vwar paragraf 8-9)
10. Ki mannyer Lerwa Amazya ti reazir ler i ti ganny konseye?
10 Lerwa Amazya ki ti lerwa Zida ti diferan avek Lerwa David ek Ezekya. I ti fer sa ki byen “me i pa ti fer li avek tou son leker.” (2 Kron. 25:2) Ki move keksoz Lerwa Amazya ti fer? Apre ki Zeova ti’n ed Amazya pour ranport laviktwar lo bann Edonmit, Amazya ti konmans ador zot bann fo bondye. c Me ler en profet Zeova ti koz avek li konsernan sa ki i ti’n fer, sa lerwa pa ti anvi ekout zot e i ti fer zot ale.—2 Kron. 25:14-16.
11. Dapre 2 Korentyen 7:9, 11, ki nou devret fer pour Zeova pardonn nou? (Vwar portre.)
11 Ki nou aprann avek sa bann legzanp? Nou bezwen repantir pour nou bann pese e fer tou sa ki nou kapab pour pa repet ankor sa bann pese. Ki nou pou fer si bann ansyen i konsey nou lo bann keksoz ki nou krwar i pa tro grav? Nou pa devret santi ki Zeova pa kontan nou oubyen ki bann ansyen pa enterese avek nou. Menm bann lerwa Izrael ki ti fer sa ki byen ti bezwen ganny konseye. (Ebr. 12:6) Ler nou ganny konsey, nou devret (1) demontre limilite e aksepte sa konsey, (2) fer bann sanzman neseser e (3) kontinyen servi Zeova avek tou nou leker. Si nou repantir pour nou bann pese, Zeova pou pardonn nou.—Lir 2 Korentyen 7:9, 11.
Ler nou ganny konseye, nou devret (1) demontre limilite, (2) fer bann sanzman neseser e (3) kontinyen servi Zeova avek tou nou leker (Vwar paragraf 11) f
ADOR ZEOVA DAN SA BON FASON
12. Kwa ki ti fer bann lerwa ki ti fidel diferan avek bann lerwa ki pa ti fidel?
12 Bann lerwa ki Zeova ti konsider konman fidel ti ador Zeova dan sa fason ki Zeova ti anvi e zot ti ankouraz pep Zeova pour fer parey. Me parey nou’n vwar, zot ti osi fer fot. Kantmenm sa, zot ti ador zis Zeova e zot ti travay dir pour detri bann zidol ki ti annan dan zot pei. d
13. Akoz Zeova ti konsider Lerwa Aab konman en lerwa ki pa ti fidel?
13 Akoz Zeova ti konsider serten lerwa konman bann ki pa ti fidel? Nou kapab asire ki pa tou sa ki zot ti fer ki ti move. Par egzanp, apre ki move Lerwa Aab ti’n tande ki Nabot ti’n ganny touye akoz li, i ti demontre limilite e i ti sagren. (1 Rwa. 21:27-29) I ti osi konstri bann lavil e i ti osi ranport laviktwar dan bann lager pour Izrael. (1 Rwa. 20:21, 29; 22:39) Me Aab ti les son madanm enfliyans li pour ankouraz lezot pour ador bann fo bondye e pour sa, Aab pa ti zanmen repantir.—1 Rwa. 21:25, 26.
14. (a) Akoz Zeova ti vwar Reoboam konman en lerwa ki pa ti fidel? (b) Ki laplipar bann lerwa ki pa ti fidel ti fer?
14 Annou vwar legzanp en lot lerwa ki pa ti fidel. Sa i Lerwa Reoboam. Parey in ganny mansyonnen dan paragraf 2, Reoboam ti fer en kantite bon keksoz ler i ti pe dirize konman lerwa. Me ler i ti’n vin en lerwa ki for, i ti aret obei Lalwa Zeova e i ti konmans ador bann fo bondye. (2 Kron. 12:1) Apre sa, parfwa i ti ador Zeova e parfwa i ti ador bann fo bondye. (1 Rwa. 14:21-24) Reoboam ek Aab pa ti sa sel de lerwa ki ti aret ador Zeova dan sa bon fason. Anfet laplipar bann lerwa ki pa ti fidel ti ador bann fo bondye e zot ti ankouraz lezot pour fer parey. I kler alor ki pour Zeova konsider en lerwa konman bon ouswa move, sa ti annan pour fer avek si sa lerwa ti pe ador Zeova dan sa bon fason.
15. Akoz i enportan pour Zeova ki son bann serviter i ador li dan sa bon fason?
15 Akoz i ti enportan pour Zeova ki bann lerwa ti ador li dan sa bon fason? En rezon i akoz sa bann lerwa ki ti annan sa responsabilite pour ed pep Bondye pour ador Zeova dan sa bon fason. Osi ler bann dimoun ti ador bann fo bondye, sa ti fer zot fer lezot pese grav e zot pa ti tret kanmarad byen. (Ose. 4:1, 2) An plis ki sa, bann Izraelit ti’n ganny dedye avek Zeova. I pour sa rezon ki ler zot ti pe ador bann fo bondye, Labib i dir ki i konmsi zot ti pe komet adilter. (Zer. 3:8, 9) Ler en dimoun i komet adilter, i pa fidel avek son konzwen e i bles santiman son konzwen. Dan menm fason, ler en serviter Zeova pa reste fidel avek Zeova, i fer leker Zeova fermal. e—Det. 4:23, 24.
16. Dapre pwennvi Zeova, kwa ki fer en bon dimoun diferan avek en move dimoun?
16 Ki leson nou kapab aprann? Nou devret determinen pour evit tou keksoz ki annan pour fer avek fo larelizyon. Me nou bezwen osi toultan ador Zeova dan sa fason ki i anvi nou fer li e kontinyen reste okipe dan son servis. Profet Malaki ti dir klerman kwa ki fer en bon dimoun diferan avek en move dimoun dapre pwennvi Zeova. I ti dir: “Ankor enn fwa, zot pou vwar diferans ant en dimoun drwat ek en move dimoun, ant enn ki pe servi Bondye e enn ki pa pe servi li.” (Mal. 3:18) Nou anvi ki Zeova i konsider nou konman en dimoun drwat, alor nou pou fer atansyon ki okenn keksoz, ni menm nou lenperfeksyon ek bann fot ki nou fer, pa zanmen fer nou aret servi Zeova. Anfet, i en pese grav pour aret servi Zeova.
17. Akoz nou bezwen fer atansyon avek lekel ki nou swazir pour marye avek?
17 Si ou en selibater e ou pe mazin pour marye, sa ki Malaki i dir i kapab ed ou pour swazir en bon konzwen. Reflesir lo sa: I kapab ki en dimoun i annan bann bon kalite me si sa dimoun pa pe servi Zeova, eski Zeova i vwar li konman en dimoun drwat? (2 Kor. 6:14) Si ou marye avek sa dimoun, eski i pou ed ou reste fidel avek Zeova? Reflesir lo sa. I kapab ki bann madanm Salomon ti annan serten bon kalite. Me zot pa ti ador Zeova e avek letan zot ti enfliyans Salomon pour konmans ador bann fo Bondye.—1 Rwa. 11:1, 4.
18. Ki bann paran i devret ansenny zot zanfan?
18 Paran, ou kapab servi legzanp bann lerwa dan Labib pour ed ou zanfan pour devlop sa dezir pour servi Zeova. Ed ou zanfan konpran ki bann lerwa ki Zeova ti konsider konman bann lerwa ki ti fidel ti bann ki ti ador Zeova e ki ti ankouraz lezot pour ador Zeova zot osi. Ansenny ou zanfan par sa ki ou dir e fer ki bann keksoz spirityel parey lir Labib, asiste renyon e partisip dan predikasyon, i bann keksoz ki pli enportan dan ou lavi. (Mat. 6:33) Si en paran pa fer sa, en zanfan i kapab krwar ki zot kapab servi Zeova akoz zot paran pe fer li me pa akoz zot, zot anvi ador Zeova. Sa pou fer ki zot kapab santi ki i pa vreman enportan pour ador Zeova oubyen zot menm kapab aret servi Zeova.
19. Ki lespwar i annan pour bann ki’n aret servi Zeova? (Vwar bwat “ Ou kapab retourn kot Zeova!”)
19 Si en dimoun in aret servi Zeova, eski sa i vedir ki i pa kapab revin zanmi Zeova? Non parski i kapab repantir e rekonmans servi Zeova ankor. Pour li fer sa, i bezwen demontre limilite e aksepte led ki bann ansyen dan kongregasyon i donn li. (Zak 5:14) I vo lapenn pour li fer sa pour li kapab revin zanmi Zeova ankor.
20. Si nou swiv legzanp bann lerwa ki ti fidel, ki mannyer Zeova pou vwar nou?
20 Ki leson nou aprann avek bann lerwa Izrael? Nou kapab fer parey bann lerwa ki ti fidel si nou kontinyen kontan Zeova avek tou nou leker. Annou aprann avek nou bann fot, repantir e fer bann sanzman neseser. Osi gard antet ki i enportan pour ador sa sel vre Bondye dan sa fason ki i anvi. Si ou reste fidel avek Zeova, Zeova pou konsider ou konman en dimoun drwat.
KANTIK 45 Meditasyon mon leker
a Dan sa lartik, sa lekspresyon “bann lerwa Izrael” pe refer avek tou bann lerwa ki’n diriz pep Zeova. Sa i enkli bann lerwa ki ti diriz lo sa de tribi Zida, lo sa dis tribi Izrael oubyen lo tou sa 12 tribi.
b KI SA I VEDIR? Souvandfwa Labib i servi sa mo “leker” pour refer avek sa dimoun ki nou ete anndan. Sa i enkli nou dezir, sa ki nou mazinen, nou latitid, nou motivasyon ek nou bann lobzektif.
c Dan letan Labib, ler bann lerwa ki pa ti Izraelit ti ranport laviktwar lo en nasyon, souvandfwa sa bann lerwa ti ador bann bondye sa nasyon.
d Lerwa Asa ti fer bann pese vreman grav. (2 Kron. 16:7, 10) Me Labib i dir ki Asa ti fer sa ki drwat dan lizye Zeova. Menm si o konmansman i pa ti aksepte konsey, i kapab ki pli tar i ti repantir. Zeova ti vwar ki i ti annan plis bon kalite ki sa ki mal. Osi, Asa ti ador zis Zeova e i ti determinen pour tir tou bann zidol dan son rwayonm.—1 Rwa. 15:11-13; 2 Kron. 14:2-5.
e Nou kapab vwar ki i enportan pour Zeova ki nou ador li dan sa bon fason parski sa de premye komannman dan Lalwa Moiz ti enterdi bann dimoun pour ador en lot personnaz oubyen okenn lezot keksoz apard Zeova.—Egz. 20:1-6.
f LEKSPLIKASYON PORTRE: En zenn ansyen i koz avek en frer konsernan son labitid bwar. Sa frer i demontre limilite e aksepte konsey, i fer bann sanzman neseser e i kontinyen servi Zeova fidelman.
