1-2. Lekel Zadok? (1 Kronik 12:22, 26-28)

 IMAZIN en lafoul plis ki 340,000 zonm. Zot in rasanble lo montanny Ebronn pour fer David vin lerwa lo Izrael antye. Pour sa trwa zour ki zot in lo sa montanny, zot in riye, koze e sant bann kantik louanz pour Zeova. (1 Kron. 12:39) Parmi sa lafoul, i ti annan en zenn garson ki ti apel Zadok. En kantite dimoun pa ti pou’n remark li. Me Zeova ti fer sir ki nou konnen ki Zadok ti la. (Lir 1 Kronik 12:22, 26-28.) Lekel Zadok?

² Zadok ti en pret ki ti travay pros avek Granpret Abyatar. Zadok ti osi en zonm ki ti ganny bann vizyon e Bondye ti donn li en kantite lasazes ek sa abilite pour konpran Son lavolonte. (2 Sam. 15:27) Dimoun ti demann Zadok konsey ler zot ti bezwen led. I ti osi en zonm ki ti annan kouraz. Dan sa lartik, nou pou vwar ki mannyer Zadok ti demontre kouraz.

3. (a) Akoz bann serviter Zeova i bezwen annan kouraz? (b) Ki nou pou vwar dan sa lartik?

³ Pandan sa bann dernyen zour, Satan pe fer plis ki zanmen oparavan pour fer nou aret annan lafwa dan Zeova. (1 Pyer 5:8) Anmezir ki nou esper Zeova detri Satan ek son move lemonn, nou bezwen annan kouraz. (Ps. 31:24) Annou vwar trwa fason ki nou kapab demontre kouraz parey Zadok.

SIPORT RWAYONM BONDYE

4. Akoz pep Zeova i bezwen annan kouraz pour siport Rwayonm Bondye? (Vwar portre.)

⁴ Konman pep Zeova, nou donn Rwayonm Bondye tou nou sipor. Me souvandfwa nou bezwen annan kouraz pour fer sa. (Mat. 6:33) Par egzanp, nou bezwen annan kouraz pour viv dapre bann standar Zeova e pour anons sa bon nouvel konsernan Rwayonm dan sa move lemonn. (1 Tesa.  2:2) Sa lemonn i vin deplizanpli divize akoz bann zafer politik. Alor nou bezwen annan kouraz pour nou pa pran kote dan bann zafer politik. (Zan 18:36) En kantite parmi pep Zeova in fer fas avek problenm larzan, zot in ganny bate oubyen ganny met dan prizon parski zot pa oule partisip dan politik oubyen antre dan larme.

5. Akoz Zadok ti bezwen annan kouraz pour li siport David?

⁵ Zadok ti’n al Ebronn pa zis pour selebre lefet ki David ti’n vin lerwa, i ti’n osi al avek son bann zarm. (1 Kron. 12:38) I ti pare pour al lager ansanm avek David e pour defann Izrael kont son bann lennmi. Menm si Zadok ti napa bokou leksperyans konman en gerye, i ti en zonm ki ti annan bokou kouraz.

6. Ki mannyer David ti en bon legzanp kouraz pour Zadok? (Psonm 138:3)

⁶ Ki mannyer Zadok ki ti en pret ti’n kapab devlop kouraz? I ti konn en kantite zonm ki ti for e ki ti annan kouraz. San dout, i ti aprann avek zot legzanp. Par egzanp, vi ki David ti en dirizan e en gerye ki ti annan bokou kouraz, sa ti motiv tou bann Izraelit pour siport li. (1 Kron. 11:1, 2) David ti toultan depan lo Zeova pour ed li kont son bann lennmi. (Ps. 28:7; lir Psonm 138:3.) Zadok ti konn lezot zonm ki ti annan kouraz. Par egzanp, i ti konn Zeoada ek son garson Benaya, ki ti en gerye e osi 22 lezot sef tribi, ki ti siport David. (1 Kron. 11:22-25; 12:26-28) Tou sa bann zonm ti determinen pour fer David vin lerwa e pour protez li.

7. (a) Lekel ki pe demontre kouraz dan nou letan? (b) Ki nou’n aprann avek legzanp Frer Nsilu dan sa video?

⁷ Ler nou reflesir lo lafason ki lezot in demontre kouraz pour zot kapab reste fidel avek Zeova ek son Rwayonm, sa i motiv nou pour demontre kouraz nou osi.  Ler nou Lerwa, Zezi Kri ti lo later, i ti reziste sa presyon pour form parti sistenm politik sa lemonn Satan. (Mat. 4:8-11; Zan 6:14, 15) I ti toultan depan lo Zeova pour li kapab ganny kouraz. Dan nou letan, i annan legzanp en kantite garson ki’n refize pour zwenn larme oubyen partisip dan bann aktivite politik. Petet ou kapab lir lo zot bann leksperyans ki lo jw.org. a

ED OU BANN FRER EK SER

8. Kan ki petet bann ansyen i bezwen kouraz pour zot kapab ed zot bann frer ek ser?

⁸ Pep Zeova i kontan ed kanmarad. (2 Kor. 8:4) Me parfwa i demann kouraz pour fer sa. Par egzanp, ler i annan en lager, bann ansyen i realize ki zot bann frer ek ser i bezwen lankourazman ek sipor. Petet zot osi bezwen ganny akse avek Labib ek nou bann piblikasyon oubyen bann keksoz materyel parey manze, lenz ek en landrwa reste. Bann ansyen i kontan zot bann frer ek ser. I pour sa rezon ki zot donn zot bann frer ek ser sa ki zot bezwen menm ler i danzere pour fer sa. (Zan 15:12, 13) Ler zot fer sa, zot pe swiv legzanp Zadok ki ti demontre kouraz.

9. Parey nou vwar dan 2 Samyel 15:27-29, ki David ti demann Zadok pour fer? (Vwar portre.)

⁹ Annou vwar ki mannyer Zadok ti ed son bann frer dan en letan difisil. Absalonm, garson David ti determinen pour touy David pour li vin lerwa. (2 Sam. 15:12, 13) David ti bezwen kit Zerizalenm deswit. I ti dir son bann serviter: “Leve e annou sove, parski ni enn ant nou pa pou kapab sap Absalonm!” (2 Sam. 15:14) Ler bann serviter ti pe ale, David ti realize ki en dimoun ti pou bezwen reste Zerizalenm pour aprann plis  lo plan Absalonm. Alor i ti fer Zadok ek lezot pret retourn dan lavil pour zot vin bann espyon. (Lir 2 Samyel 15:27-29.) Sa bann pret ti bezwen fer byen atansyon parski sa ki David ti’n demann zot pour fer ti vreman danzere. Absalonm ti en zonm ki ti vyolan e egois. I ti’n trai son prop papa. Zis mazin sa ki Absalonm ti’n kapab fer Zadok ek sa bann lezot pret si i ti konnen ki zot ti bann espyon.

10. Ki mannyer Zadok ek bann dimoun ki ti avek li ti protez David?

¹⁰ David ti fer en plan ansanm avek Zadok ek Ousay, ki ti en lot son zanmi fidel. (2 Sam. 15:32-37) Ousay ti swiv sa plan. I ti fer krwar ki i ti pe siport Absalonm e i ti donn Absalonm konsey lo ki mannyer pour atak David dan en fason ki ti pou donn David letan pour prepare pour sa latak. Apre Ousay ti dir Zadok ek Abyatar konsernan plan Absalonm. (2 Sam. 17:8-16) Apre sa, sa de zonm ti anvoy en mesaz pour David. (2 Sam. 17:17) Avek led Zeova, Zadok ek lezot pret ti ede pour protez David.—2 Sam. 17:21, 22.

11. Ki mannyer nou kapab annan kouraz parey Zadok ler nou pe ed nou bann frer ek ser?

¹¹ Ki mannyer nou kapab demontre kouraz parey Zadok si nou ganny demande pour ed nou bann frer ek ser pandan en letan difisil? (1) Swiv lenstriksyon. Dan bann sityasyon koumsa, i enportan ki nou obei bann lenstriksyon parski sa pou ed nou reste ini. Alor, swiv lenstriksyon ki nou gannyen sorti kot sa biro brans ki nou tonm anba la. (Ebr. 13:17) Bann ansyen i devret regilyerman revwar bann lenstriksyon konsernan lafason ki sak dimoun i devret prepare pour en dezas e ki pour fer ler i annan en dezas. (1 Kor. 14:33, 40) (2) Demontre kouraz me fer atansyon. (Prov. 22:3)  Reflesir avan ou azir. Pa pran bann risk ki pa neseser. (3) Depan lo Zeova. Rapel ki Zeova i anvi ki ou ek ou bann frer ek ser, zot reste sen e sof. I kapab ed ou pour ed ou bann frer ek ser dan en fason kot zot tou zot sen e sof.

12-13. Ki ou aprann avek leksperyans Viktor ek Vitalii? (Vwar portre.)

¹² Annou vwar legzanp Viktor ek Vitalii, de frer ki ti ede pour anmenn manze ek delo pour bann frer ek ser Likrenn. Viktor i dir: “Nou ti al partou pour al rod manze. Souvandfwa kot nou ti ale, nou ti tann dimoun pe tir fizi. En frer ki ti annan en laboutik ti donn nou manze. Sa ti fer ki en kantite proklanmater ti annan sa ki zot ti bezwen pour en pe letan. Anmezir ki nou ti pe met konmisyon dan nou transpor, en bonm ti tonm apepre 20 met avek kot nou ti ete. Pandan lazournen, mon ti sipliy Zeova pour donn mwan sa kouraz ki mon ti bezwen pour kontinyen ed bann proklanmater.”

¹³ Vitalii i dir: “Nou ti bezwen annan en kantite kouraz. Mon premye vwayaz ti pran 12 erdtan e mon ti priy Zeova tou dilon semen.” Vitalii ti annan kouraz me i ti osi fer atansyon. I dir: “Mon ti kontinyen demann Zeova pour donn mwan lasazes e pour ed mwan konn mon limit. Mon ti servi zis bann semen ki lotorite ti’n dir nou kapab servi. Mon lafwa ti vin pli for ler mon ti vwar lafason ki bann frer ek ser ti pe travay ansanm. Zot ti tir bann debri lo semen, al sers manze, lenz ek lezot keksoz e met dan nou transpor. Zot ti menm donn nou de Viktor manze ek landrwa pour repoze pandan nou vwayaz.”

RESTE FIDEL AVEK ZEOVA

14. Ki mannyer nou kapab santi si en dimoun ki nou kontan i kit Zeova?

¹⁴ Enn bann problenm pli difisil ki nou kapab fer fas avek i ler enn nou manm fanmir oubyen zanmi pros i kit Zeova. (Ps. 78:40; Prov. 24:10) Pli nou kontan sa dimoun, pli i difisil pour aksepte sa sityasyon. Si ou’n deza pas en sityasyon koumsa, lafason ki Zadok ti reste fidel avek David ek Zeova i kapab ankouraz ou.

15. Akoz Zadok ti bezwen kouraz pour reste fidel avek Zeova? (1 Lerwa 1:5-8)

¹⁵ Zadok ti reste fidel avek Zeova ler son zanmi pros Abyatar pa ti reste fidel avek Zeova. Sa ti arive ver lafen renny Lerwa David. Ler David ti pros pour mor, son garson Adoniya ti esey vin lerwa menm si Zeova ti’n promet ki Salomon ki ti pou vin lerwa. (1 Kron. 22:9, 10) Abyatar ti swazir pour siport Adoniya. (Lir 1 Lerwa 1:5-8.) Ler Abyatar ti fer sa, i ti montre ki i pa ti fidel avek David e osi avek Zeova. Zis mazinen ki mannyer Zadok ti’n bezwen sagren e dezapwente. Pour plis ki 40 an, Zadok ek Abyatar ti’n travay ansanm konman bann pret. (2 Sam. 8:17) Zot ti’n pran swen avek “Lars sa vre Bondye” ansanm. (2 Sam. 15:29) O konmansman, tou le de zonm ti siport David konman zot lerwa e zot ti fer en kantite keksoz dan servis Zeova.—2 Sam. 19:11-14.

16. Petet kwa ki ti ed Zadok pour reste fidel?

¹⁶ Zadok ti reste fidel avek Zeova menm si Abyatar pa ti reste fidel avek Zeova. David ti konnen ki i ti toultan kapab annan konfyans dan Zadok. Ler David ti konn sa ki Adoniya ti pe fer, David ti fer Zadok, Natan ek Benaya apwent  Salomon konman lerwa. (1 Rwa. 1:32-34) Zadok ti’n bezwen ganny ankouraze avek legzanp lezot serviter Zeova parey Natan, ki ti fidel avek Zeova e ki ti siport Lerwa David. (1 Rwa. 1:38, 39) Ler Salomon ti vin lerwa, i ti “donn pret Zadok responsabilite ki Abyatar ti annan.”—1 Rwa. 2:35.

17. Ki mannyer ou kapab swiv legzanp Zadok si en dimoun ki ou kontan i kit Zeova?

¹⁷ Ki mannyer ou kapab swiv legzanp Zadok? Si en dimoun ki ou kontan i swazir pour kit Zeova, montre Zeova ki ou swazir pour reste fidel avek li. (Zoz. 24:15) Zeova pou donn ou sa lafors ek kouraz ki ou bezwen. Priy Zeova e depan lo li, reste pros avek lezot serviter Zeova ki fidel. Zeova i apresye ou fidelite e i pou rekonpans ou.—2 Sam. 22:26.

18. Ki ou aprann avek leksperyans Marco ek Sidse?

¹⁸ Annou vwar legzanp Marco ek son madanm, Sidse. Zot de fiy ti deside pour aret servi Zeova. Marco i dir: “Depi sa zour ki ou zanfan i ne, ou kontan zot en kantite. Ou pou fer nenport keksoz pour protez zot. Me ler zot swazir pour kit Zeova, sa i fer leker vreman fermal.” Marco i osi dir: “Me Zeova in toultan ed nou pour andire. I’n fer sir ki nou kapab ankouraz kanmarad. Ler mwan, mon ti fay, mon madanm ti for e ler li i ti fay, mwan, mon ti for.” Sidse i dir: “Nou pa ti pou’n kapab andire si Zeova pa ti’n donn nou sa lafors ki nou bezwen. Mon ti vreman sagren parski mon ti santi ki i ti mon lafot ki mon bann fiy ti’n aret servi Zeova e mon ti koz avek Zeova lo la dan lapriyer. Pa bokou letan apre, en ser ki mon pa ti’n vwar pour en kantite lannen ti vin kot mwan, i ti met lanmen lo mon zepol, i ti get mwan dan mon lizye e dir mwan: ‘Sidse, rapel ki i pa ou lafot.’ Avek led Zeova, mon ti kapab kontinyen annan lazwa dan mon servis.”

19. Ki ou determinen pour fer?

¹⁹ Zeova i anvi ki tou son bann serviter i annan kouraz parey Zadok. (2 Tim. 1:7) Me i pa anvi ki nou depan lo nou prop lekor. I anvi ki nou depan lo li. Alor ler ou dan en sityasyon kot ou bezwen annan kouraz, rod led avek Zeova. Ou kapab asire ki i pou fer ou annan kouraz parey Zadok.—1 Pyer 5:10.