1. Ki mannyer ou santi anver sa laverite ki dan Labib?

 PEP Zeova i kontan sa laverite ki dan Parol Bondye. Nou lafwa i baze lo sa laverite. (Rom. 10:17) Nou konvenki ki Zeova in etabli kongregasyon konman “en pilye ek sipor pour laverite.” (1 Tim. 3:15) Nou kontan pour soumet avek “bann ki pe diriz” nou anmezir ki zot eksplik nou laverite ki dan Labib e donn nou lenstriksyon ki an armoni avek lavolonte Bondye.—Ebr. 13:17.

2. Dapre Zak 5:19, ki i kapab arive avek nou apre ki nou’n aprann laverite?

² Menm apre ki ou’n aksepte laverite e aksepte ki nou bezwen swiv gidans lorganizasyon Bondye, i kapab arive ki nou elwannyen avek laverite. (Lir Zak 5:19.) Satan ti pou kontan ki nou aret annan konfyans dan Labib oubyen dan bann lenstriksyon ki nou gannyen sorti kot lorganizasyon Bondye.—Efe. 4:14.

3. Akoz nou bezwen reste ferm dan laverite? (Efezyen 6:13, 14)

³ Lir Efezyen 6:13, 14. Byento Dyab pou servi bann mansonz pour anbet bann nasyon pour fer zot opoz Zeova. (Rev. 16:13, 14) Nou osi konnen ki Satan pou fer plis zefor pour anbet pep Zeova. (Rev. 12:9) I pour sa rezon ki i enportan ki nou aprann fer diferans ant laverite ek bann mansonz e pour obei laverite. (Rom. 6:17; 1 Pyer 1:22) I enportan ki nou fer sa pour nou kapab sirviv gran ladetres.

4. Ki nou pou vwar dan sa lartik?

⁴ Dan sa lartik, nou pou vwar de kalite ki nou bezwen annan pour nou kapab idantifye sa laverite ki sorti dan Labib e pour obei lenstriksyon sorti kot lorganizasyon Bondye. Apre nou pou vwar trwa keksoz ki nou bezwen fer pour nou kapab kontinyen reste ferm dan laverite.

 BANN KALITE KI NOU BEZWEN POUR ED NOU KONN FER DIFERANS ANT LAVERITE EK MANSONZ

5. Ki mannyer ler nou annan en gran respe pour Zeova, sa i ed nou pour idantifye laverite?

⁵ Nou bezwen annan en gran respe pour Zeova. Ler nou annan en gran respe pour Zeova, nou telman kontan li, ki nou pa pou zanmen fer okenn keksoz ki pa pou fer li plezir. Nou vreman anvi aprann fer diferans ant sa ki byen ek sa ki mal e ant laverite ek bann mansonz. Sa pou ed nou pour ganny laprouvasyon Zeova. (Prov. 2:3-6; Ebr. 5:14) Nou pa devret zanmen les lafreyer pour zonm vin pli for ki nou lanmour pour Zeova parski souvandfwa sa ki fer imen plezir, pa fer Zeova plezir.

6. Ki mannyer lafreyer pour zonm ti fer dis sef Izraelit devir laverite?

⁶ Si nou annan lafreyer zonm plis ki nou annan respe pour Bondye, sa i kapab fer nou elwanye avek laverite. Annou vwar legzanp sa douz sef ki ti’n al espyonn sa pei ki Zeova ti’n promet pour donn bann Izraelit. Pour dis parmi sa bann espyon, zot lafreyer pour bann Kananeen ti pli for ki zot lanmour pour Zeova. Zot ti dir bann Izraelit: “Nou pa pou kapab lager avek sa pep, parski zot pli for ki nou.” (Nom. 13:27-31) Dapre pwennvi imen, i vre ki bann Kananeen ti pli for ki bann Izraelit. Me ler zot ti dir ki bann Izraelit pa ti pou kapab ranport laviktwar kont zot lennmi, zot pa ti pran kont ki Zeova i avek zot. Sa dis espyon ti’n devret konsantre lo sa ki Zeova i anvi bann Izraelit i fer. Zot ti’n osi devret medit lo sa ki Zeova ti’n fer pour zot pa bokou letan avan sa. Sa ti pou’n fer zot realize ki bann Kananeen ti fay konpare avek Zeova, ki tou pwisan. Zozye ek Kaleb pa ti parey sa bann espyon ki ti napa lafwa dan Zeova. Zot ti  anvi ganny laprouvasyon Zeova. Zozye ek Kaleb ti dir pep Izrael: “Si nou annan laprouvasyon Zeova, i pou sirman anmenn nou dan sa pei e i pou donn nou sa pei.”—Nom. 14:6-9.

7. Ki mannyer nou kapab annan plis respe pour Zeova? (Vwar portre.)

⁷ Pour nou annan plis respe pour Zeova, nou bezwen reflesir lo ki mannyer pour fer li plezir dan tou desizyon ki nou fer. (Ps. 16:8) Anmezir ou lir bann resi dan Labib, demann ou lekor, ‘Ki mon ti pou fer si mon ti dan sa sityasyon?’ Par egzanp, imazin ou pe ekout sa dis sef Izraelit pe dir avek bann Izraelit ki zot pa pou kapab ranport laviktwar lo bann Kananeen. Eski ou ti pou krwar sa bann espyon e annan lafreyer zonm oubyen eski ou lanmour pour Zeova ek ou dezir pour fer li plezir ti pou pli for? En zenerasyon Izraelit pa ti krwar ki Zozye ek Kaleb ti pe koz laverite. Sa ti fer ki zot ti perdi sa loportinite pour antre dan Later Promiz.—Nom. 14:10, 22, 23.

8. Ki kalite ki nou devret fer zefor pour devlope e akoz?

⁸ Nou bezwen annan limilite. Zeova i revel laverite avek bann ki annan limilite. (Mat. 11:25) Avek limilite, nou ti aksepte led lezot pour ed nou aprann laverite. (Akt 8:30, 31) Kantmenm sa, nou bezwen fer atansyon pour pa vin orgeye. Si nou en dimoun orgeye, nou kapab konmans krwar ki nou lopinyon personnel i saz, zis parey bann prensip Labib ek bann lenstriksyon ki sorti kot lorganizasyon Zeova.

9. Ki mannyer nou kapab kontinyen annan limilite?

⁹ Pour nou kontinyen annan limilite, nou bezwen rapel ki nou ptipti konpare avek Zeova. (Ps. 8:3, 4) Nou kapab osi demann Zeova pour ed nou pour annan plis limilite e pour pli pare pour aprann. Zeova i fer nou konn son fason panse atraver son Parol ek son lorganizasyon e sa i ed nou pour met son fason panse avan sa ki pour nou. Ler ou lir Labib, rod bann levidans ki montre ki Zeova i kontan limilite e i ay lorgey ek larogans. Osi fer zefor pour kontinyen annan limilite ler ou ganny en responsabilite ki donn ou serten lotorite oubyen ki fer ou paret enportan.

KI MANNYER NOU KAPAB RESTE FERM DAN LAVERITE?

10. Lekel ki Zeova in servi pour donn lenstriksyon e gid son pep?

¹⁰ Kontinyen annan konfyans dan gidans sorti kot lorganizasyon Zeova. Dan letan bann Izraelit, Zeova ti servi Moiz e apre Zozye pour donn lenstriksyon Son pep. (Zoz. 1:16, 17) Ler bann Izraelit ti vwar sa bann zonm konman bann reprezante Zeova, zot ti ganny bann benediksyon. Plizyer santenn lannen pli tar, ler kongregasyon Kretyen ti ganny formen, sa 12 zapot ki ti donn lenstriksyon pep Bondye. (Akt 8:14, 15) Pli tar, i ti annan lezot ansyen Zerizalenm ki ti zwenn ansanm avek sa 12 zapot pour diriz pep Zeova. Ler bann frer ek ser ti swiv gidans sa bann zonm fidel, “lafwa bann kongregasyon ti vin deplizanpli for e lakantite disip ti ogmante zour apre zour.” (Akt 16:4, 5) Dan nou letan, nou osi ganny bann benediksyon ler nou obei bann lenstriksyon sorti kot lorganizasyon Zeova. Me ki mannyer Zeova pou santi si nou refize aksepte bann ki i’n apwente pour diriz son lorganizasyon? Pour reponn sa kestyon, annou vwar ki ti arive ler bann Izraelit ti pe al dan Later Promiz.

11. Ki ti arive avek bann Izraelit ki ti rebel kont Moiz, sa enn ki Zeova ti’n swazir pour diriz zot? (Vwar portre.)

 ¹¹ Ler bann Izraelit ti pe al dan Later Promiz, serten zonm enportan ti kestyonn lotorite Moiz ek sa rol ki Zeova ti’n donn li. Zot ti dir: “Lepep antye [pa zis Moiz] i sen, zot tou zot sen e Zeova i avek zot.” (Nom. 6:1-3) Menm si i vre ki pour Zeova “lepep antye” ti sen, Zeova ti’n swazir Moiz pour diriz Son pep. (Nom. 16:28) Ler sa bann rebel ti pe kritik Moiz, anfet zot ti pe kritik Zeova. Zot pa ti konsantre lo sa ki Zeova ti anvi me lo sa ki zot, zot ti anvi setadir ganny plis pouvwar e vin pli enportan. Bondye ti touy sa bann zonm ki ti’n konmans sa rebelyon e osi sa plizyer milye dimoun ki ti’n dakor avek sa ki sa bann zonm ti pe fer. (Nom. 16:30-35, 41, 49) Ozordi, nou kapab asire ki bann ki napa respe pour bann laranzman ki i annan dan lorganizasyon Zeova, zot napa laprouvasyon Zeova.

12. Akoz nou kapab kontinyen annan konfyans dan lorganizasyon Zeova?

¹² Nou kapab kontinyen annan konfyans dan lorganizasyon Zeova. Ler i kler ki en azisteman i bezwen ganny fer dan lafason ki nou konpran en laverite ki dan Labib oubyen i bezwen annan en azisteman dan lafason ki nou servi Zeova, bann ki pe dirize dan lorganizasyon Zeova pa ezite pour fer sa bann sanzman neseser. (Prov. 4:18) Zot fer sa parski zot anvi fer plezir Zeova plis ki okenn lezot keksoz. Zot fer zot mye pour fer bann desizyon dapre Parol Bondye, ki sa standar ki tou serviter Bondye i bezwen obei.

13. (a) Sa lekspresyon “standar ek bann bon lansennyman” pe refer avek kwa? (b) Ki nou devret fer avek sa “standar ek bann bon lansennyman”?

¹³ “Kontinyen reste atase avek standar  ek bann bon lansennyman.” (2 Tim. 1:13) Sa “standar ek bann bon lansennyman” ki sa verse pe koz lo la pe refer avek bann lansennyman ki dan Labib. (Zan 17:17) Tou sa ki nou krwar ladan i baze lo bann lansennyman koumsa. Lorganizasyon Zeova in ansenny nou pour nou fer sir ki sa ki nou krwar ladan i baze lo sa standar. Tan ki nou fer sa, nou pou ganny bann benediksyon.

14. Kwa ki ti fer serten Kretyen pa reste atase avek sa “standar ek bann bon lansennyman”?

¹⁴ Ki i kapab arive si nou pa reste atase avek sa “standar ek bann bon lansennyman”? Annou vwar en legzanp. Dan premye syek, i ti annan en rimer parmi bann Kretyen konmkwa zour Zeova ti’n arive. I kapab ki sa ti akoz i ti annan en let ki dimoun ti krwar in ganny ekrir par zapot Pol. Serten Kretyen Tesalonik pa ti tyeke si sa ti vre me zot ti krwar sa rimer e zot ti menm repet sa avek lezot. Si zot ti rapel sa ki zapot Pol ti’n ansenny zot ler i ti avek zot, zot pa ti pou’n ganny anbete. (2 Tesa. 2:1-5) Pol ti dir son bann frer ek ser ki zot pa devret krwar tou sa ki zot tande. Pour ed sa bann Kretyen pour pa ganny anbete dan lavenir, Pol ti fini sa dezyenm let ki i ti anvoy pour sa bann Kretyen avek sa parol: “Mwan Pol mon fer zot salanm. Sa mon’n ekri avek mon prop lanmen. Sa i mon lekritir ki konfirmen ki tou sa bann let i sorti kot mwan.”—2 Tesa. 3:17.

15. Ki mannyer nou kapab protez nou lekor kont bann mansonz ki paret vre? Donn en legzanp. (Vwar portre.)

¹⁵ Ki nou kapab aprann avek sa ki Pol ti dir bann Kretyen Tesalonik? Ler nou tann en keksoz ki pa an armoni avek sa ki nou’n aprann dan Labib oubyen nou tann en zistwar sokan, nou bezwen annan disernman. En fwa dan ansyen Linyon Sovyetik, nou bann lennmi ti donn bann frer en let ki zot ti dir i sorti kot biro prensipal Temwen Zeova. Sa let ti ankouraz serten frer pour form zot prop lorganizasyon. Sa let ti paret konmsi i  ti vreman sorti kot biro prensipal. Me bann frer fidel pa ti ganny anbete. Zot ti realize ki sa mesaz ki dan sa let pa ti an armoni avek sa ki zot ti’n ganny ansennyen. Ozordi, bann dimoun ki pa kontan laverite i parfwa servi bann keksoz parey Enternet ek rezo sosyal pour esey konfiz e diviz nou. Olye les lezot “konfiz [nou],” nou kapab protez nou lekor par reflesir lo si sa ki nou’n tande oubyen lir, i an armoni avek sa laverite ki nou’n aprann.—2 Tesa. 2:2; 1 Zan 4:1.

16. Dapre Romen 16:17, 18, ki nou devret fer si serten i konmans partaz bann lenformasyon ki pa an armoni avek laverite?

¹⁶ Reste ini avek bann ki fidel avek Zeova. Bondye i anvi ki nou ador li dan linite avek nou bann frer ek ser. Nou pou reste ini tan ki nou reste atase avek laverite. Okenn dimoun ki partaz bann lenformasyon ki pa an armoni avek laverite, i senm divizyon dan kongregasyon. Alor Bondye i dir nou “evit” zot. Si nou pa fer sa, nou osi nou kapab konmans krwar bann keksoz ki pa vre e nou pa pou reste fidel avek Zeova.—Lir Romen 16:17, 18.

17. Ki byenfe nou gannyen ler nou rekonnet e reste atase avek laverite?

¹⁷ Ler nou rekonnet laverite e nou reste atase avek laverite, nou pou reste pros avek Zeova e nou lafwa pou reste for. (Efe. 4:15, 16) Nou pa pou ganny anbete avek bann fo lansennyman ek propagann Satan e Zeova pou pran swen avek nou pandan gran ladetres. Alor kontinyen reste atase avek sa ki vre “e sa Bondye lape pou avek zot.”—Fili. 4:8, 9.