1-2. (a) Ki lavertisman Zezi ti donn son bann disip? (b) Akoz bann disip ti abandonn Zezi? (Vwar portre.)

 “LESPRI i anvi fer sa ki byen, me lekor enparfe i feb.” a (Mat. 26:41b) Ler Zezi ti dir sa parol, i ti pe montre ki i konpran ki nou enparfe e ki nou fer fot. Me Zezi ti pe osi averti nou pour nou pa krwar ki nou pou toultan ase for pour fer sa ki byen. En pe letan avan ki Zezi ti dir sa parol, son bann disip ti’n promet ki zot pa pou zanmen abandonn li. (Mat. 26:35) Zot ti anvi fer sa ki byen me zot pa ti realize ki dan en sityasyon difisil, zot ti pou kapab fasilman vin feb e fer sa ki mal. I pour sa rezon ki Zezi ti dir zot: “Kontinyen veye e kontinyen priye pour ki zot pa tonm dan tantasyon.”—Mat. 26:41a.

² Malerezman bann disip pa ti fer sa ki Zezi ti’n dir zot. Ler Zezi ti ganny arete, eski zot ti reste avek li oubyen zot ti per e zot ti sove? Vi ki sa bann disip pa ti kontinyen veye, zot ti fer sa ki zot ti dir zot pa pou zanmen fer setadir abandonn Zezi.—Mat. 26:56.

3. (a) Pour nou reste fidel avek Zeova, akoz nou pa devret annan tro bokou konfidans dan nou lekor? (b) Ki nou pou vwar dan sa lartik?

³ Nou pa devret annan tro bokou konfidans dan nou lekor e krwar ki nou pou toultan ase for pour nou fer sa ki byen. I vre ki nou determinen pour pa fer nanryen ki pa fer Zeova plezir me nou enparfe e nou kapab fasilman ganny tante pour fer sa ki mal. (Rom. 5:12; 7:21-23) San ekspekte, nou kapab vwar nou dan en sityasyon kot nou ganny tante pour fer sa ki mal. Pour nou reste fidel avek Zeova  ek son Garson, nou bezwen swiv konsey Zezi pour kontinyen veye pour ki nou pa tonm dan tantasyon e fer pese. Sa lartik i kapab ed nou pour fer sa. Premyerman, nou pou vwar bann keksoz ki nou bezwen kontinyen fer atansyon. Apre nou pou vwar ki nou kapab fer pour pa tonm dan tantasyon. Finalman nou pou vwar ki nou kapab fer pour nou kapab kontinyen veye pour nou pa tonm dan tantasyon.

KONN OU BANN FEBLES

4-5. Akoz i enportan ki nou pa komet menm bann pese ki pa grav?

⁴ Serten pese pa sitan grav parey lezot. Me zot kapab fer nou konmans elwannyen avek Zeova e avek letan, nou kapab fer en pese grav.

⁵ Nou tou nou ganny tante pour fer keksoz mal. Nou tou nou annan diferan febles. Alor i annan serten keksoz spesifik ki pou tant nou pour fer sa ki mal. Par egzanp, petet en dimoun pe lager avek son lekor pour pa komet imoralite seksyel. En lot dimoun petet pe lalit pour li pa fer en keksoz enpir par egzanp, mastirbasyon oubyen get pornografi. I kapab ki en lot dimoun pe lalit avek lafreyer zonm, lorgey, lakoler oubyen en lot keksoz. Alor nou konpran akoz Zak ti dir ki “en dimoun i ganny teste ler i ganny atire e anbete par son prop dezir.”—Zak 1:14.

6. Konsernan kwa ki nou bezwen onnet?

⁶ Eski ou konn bann keksoz ki kapab fasilman tant ou pour fer sa ki mal? Si nou inyor nou bann febles oubyen nou krwar ki nou ase for pour reziste tantasyon, sa i danzere pour nou. (1 Zan 1:8) Rapel ki zapot Pol ti dir ki menm bann “ki matir spirityelman” i kapab fer sa ki mal si zot pa fer atansyon. (Gal. 6:1) Nou bezwen onnet avek nou lekor e konn nou febles.—2 Kor. 13:5.

7. Kwa ki nou bezwen vey byen? Donn en legzanp.

⁷ Ki nou devret fer ler nou’n idantifye bann keksoz ki kapab fasilman tant nou pour fer sa ki mal? Fer zefor pour pli byen kapab reziste sa bann tantasyon. Pour konpran sa, annou vwar en legzanp. Dan letan Labib, sa parti pli fay avek miray bann lavil ti son bann baro. I pour sa rezon ki i ti annan en kantite gardyen kot baro pour protez lavil. Pareyman, nou bezwen vey bann keksoz ki nou konnen i kapab tant nou pour fer sa ki mal.—1 Kor. 9:27.

 KI MANNYER POUR REZISTE TANTASYON POUR FER PESE?

8-9. Ki mannyer sa garson ki Proverb sapit 7 i koz lo la, ti’n kapab evite fer en pese grav? (Proverb 7:8, 9, 13, 14, 21)

⁸ Ki mannyer nou kapab evit bann tantasyon ki kapab fer nou fer pese?Annou vwar sa ki nou kapab aprann avek sa garson ki Proverb sapit 7 i koz lo la. I ti komet imoralite seksyel avek en madanm imoral. Verse 22 i dir ki sa garson ti swiv sa madanm “en sel kou.” Bann verse avan i montre ki avan sa garson ti komet imoralite seksyel, i ti fer plizyer desizyon ki pa saz. Sa bann desizyon ti fer pli fasil pour li fer pese.

⁹ Ki sa garson ti fer avan ki i ti fer sa pese grav? Premyerman, i ti “pas dan semen pros o bor kot sa madanm i reste,” aswar. Apre, i ti al dan direksyon lakaz sa madanm. (Lir Proverb 7:8, 9.) Ler i ti vwar sa madanm, i pa ti kit sa landrwa. O kontrer, i ti les sa madanm anbras li e i ti ekoute ler sa madanm ti pe koz lo bann sakrifis lape ki i ti’n fer. Petet sa madanm ti dir li sa pour fer sa garson krwar ki i pa ti en move dimoun. (Lir Proverb 7:13, 14, 21.) Si sa garson pa ti’n fer tou sa bann move desizyon, i ti pou’n evit sa tantasyon pour fer sa ki mal e i pa ti pou’n fer pese.

10. Ki mannyer en dimoun i kapab fer menm fot ki sa garson dan Proverb ti fer?

¹⁰ Sa resi i montre nou sa ki kapab arive avek en serviter Zeova. I kapab fer en pese grav e apre krwar ki tou keksoz in ariv “en sel kou.” Oubyen i kapab dir: “I’n zis arive.” Me si i reflesir lo sa ki’n arive, i tre probab ki i pou realize ki avan ki i ti fer sa pese grav, i’n fer plizyer move desizyon. Petet in swazir bann zanmi ki pa kontan Zeova oubyen petet bann divertisman ki i’n swazir, bann sit Enternet ki i’n al lo la oubyen bann landrwa ki i’n ale, pa bon pour en Kretyen. Petet in osi aret priye, lir Labib, asiste renyon oubyen partisip dan sa travay predikasyon. Parey sa garson ki Proverb i koz lo la, i kapab ki i pa’n fer sa pese “en sel kou” parey i krwar me i’n fer sa pese akoz bann move desizyon ki i’n fer.

11. Ki nou devret fer pour nou pa fer pese?

¹¹ Ki leson nou aprann? Nou pa zis bezwen evite fer pese me nou bezwen osi evite fer bann move desizyon ki kapab fer nou fer pese. I sanmenm sa ki Salomon ti eksplike apre ki i ti’n koz lo sa ki ti’n arive ant sa garson ek sa madanm imoral. Salomon ti dir sa konsernan sa madanm: “Pa bezwen kit ou semen pour al dan son bann santye.” (Prov. 7:25) I ti osi dir sa konsernan sa madanm ki rebele: “Reste lwen avek sa madanm, pa bezwen al o bor larantre son lakaz.” (Prov. 5:3, 8) Pour protez nou lekor pour pa fer pese, nou bezwen evit bann keksoz ek bann sityasyon ki kapab fer nou fer en keksoz mal. b Sa i vedir ki menm si en keksoz i pa mal pour en Kretyen fer, nou pa pou fer sa keksoz si nou konnen ki i pou tant nou pour fer en keksoz mal.—Mat. 5:29, 30.

12. Ki desizyon ferm Zob ti fer e ki mannyer sa ti ed li pour pa tonm dan tantasyon? (Zob 31:1)

¹² Pour evit bann sityasyon ki kapab fer nou fer pese, nou bezwen fer en desizyon ferm. I sanmenm sa ki Zob ti fer. I ti “fer en promes pour pa get” lezot madanm avek bann dezir imoral. (Lir Zob 31:1.) Ler i ti fer sa, sa ti ed li pour evite komet adilter. Nou osi nou kapab fer en desizyon ferm pour evit okenn keksoz ki kapab fer nou tonm dan tantasyon.

13. Akoz nou bezwen vey byen sa ki nou mazin lo la? (Vwar portre.)

 ¹³ Nou osi bezwen vey byen sa ki nou mazinen. (Egz. 20:17) Serten dimoun i krwar ki i napa nanryen mal pour imazin zot pe fer en keksoz mal tan ki zot pa pe fer sa keksoz. Me sa fason panse i mal parski pli en dimoun i kontinyen mazin lo en keksoz mal, pli i pou anvi fer sa ki i pe mazinen. Dan en sans, i kree en tantasyon ki aprezan i pou bezwen reziste. Byensir parfwa nou pou annan bann move panse. Ler sa i arive, i enportan ki nou deswit tir sa bann panse dan nou lespri e nou ranplas li avek sa ki bon. Ler nou fer sa, nou pa pou fer en pese grav parski nou pa pou’n les en move panse vin sitan for ki i difisil pour nou lager avek.—Fili. 4:8; Kol. 3:2; Zak 1:13-15.

14. Kwa ankor ki nou kapab fer pour anpes nou tonm dan tantasyon?

¹⁴ Kwa ankor ki nou kapab fer pour anpes nou tonm dan tantasyon? Nou bezwen asire ki nou pou toultan ganny bann byenfe ler nou obei bann lalwa Zeova. Parfwa nou kapab vwar li difisil pour fer ki nou bann panse ek nou bann dezir i fer Zeova plezir. Me ler nou fer zefor, nou pou vreman zwaye.

15. Ki mannyer ler nou annan bann dezir ki fer Zeova plezir, sa i kapab ed nou pour reziste tantasyon?

¹⁵ Nou bezwen annan bann dezir ki fer Zeova plezir. Si nou aprann pour “ay sa ki mal e kontan sa ki byen,” nou pou pli determinen pour fer sa ki byen e evit bann sityasyon ki kapab fer nou fer pese. (Amos 5:15) Ler nou annan bann dezir ki fer Zeova plezir, nou pou pli byen kapab reziste bann tantasyon ler nou dan en sityasyon ki nou pa pe ekspekte.

16. Ki mannyer nou bann aktivite spirityel i kapab ed nou pour kontinyen veye? (Vwar portre.)

¹⁶ Kwa ki pou ed nou pour annan bann dezir ki fer Zeova plezir? Nou bezwen reste okipe dan bann aktivite spirityel. Ler nou asiste renyon e partisip dan predikasyon, sa i fer nou pli anvi fer Zeova plezir  e pour reziste sa tantasyon pour fer sa ki mal. (Mat. 28:19, 20; Ebr. 10:24, 25) Ler nou lir, etidye e medit lo Parol Bondye, sa i fer nou pli kontan sa ki byen e ay sa ki mal. (Zoz. 1:8; Ps. 1:2, 3; 119:97, 101) Rapel sa ki Zezi ti dir son bann disip: “Kontinyen priye pour ki zot pa tonm dan tantasyon.” (Mat. 26:41) Ler nou koz avek nou Papa ki dan lesyel dan lapriyer, nou donn li sa loportinite pour ed nou e sa i fer nou pli determinen pour fer li plezir.—Zak 4:8.

KONTINYEN VEYE POUR NOU PA TONM DAN TANTASYON

17. Ki febles Pyer ti annan ki i ti bezwen kontinyen lalit avek?

¹⁷ I tre probab ki nou kapab sirmont serten nou bann febles konpletman. Me i kapab ki nou bezwen kontinyen lalit avek lezot febles pour plis letan. Annou vwar legzanp zapot Pyer. Trwa fwa i ti dir ki i pa konn Zezi parski i ti annan lafreyer zonm. (Mat. 26:69-75) Pli tar i paret ki Pyer ti’n sirmont sa febles ler i ti rann temwannyaz lo Zezi devan Sannedren. (Akt 5:27-29) Me detrwa lannen pli tar, i ti aret manz avek serten Kretyen ki pa ti Zwif parski i ti per sa ki sa bann ki ti “an faver sirkonsizyon” ti pou panse lo li. (Gal. 2:11, 12) Sa febles ki Pyer ti annan ti’n retournen. Petet sa i akoz i pa ti’n konpletman sirmont sa febles.

18. Ki i kapab arive avek serten febles ki nou annan?

¹⁸ Parey Pyer, i kapab ki parfwa nou bezwen lalit avek en febles ki nou krwar nou ti’n fini sirmonte. Annou vwar legzanp en frer. Sa frer ti dir: “Pour di z an, mon ti’n aret get pornografi e mon ti asire ki mon ti nepli annan sa problenm. Me dan serten sityasyon, mon ti ganny tante pour get pornografi ankor.” Me nou frer ti kontinyen lager avek son febles. I ti realize ki tou le zour, i ti pou bezwen fer en keksoz pour lalit avek son febles e i tre probab ki i pou bezwen fer sa tou dilon son lavi ziska lafen sa move lemonn. Avek led son madanm ek bann ansyen dan kongregasyon, i’n fer plis atansyon pour reste lwen avek pornografi.

19. Ki nou kapab fer si nou annan en febles ki nou ankor bezwen sirmonte?

 ¹⁹ Ki nou kapab fer pour anpes en febles ki nou ankor annan fer nou fer sa ki mal? Nou bezwen swiv sa konsey ki Zezi ti donnen konsernan tantasyon. I ti dir: “Kontinyen veye.” Menm dan bann moman kot ou santi ou for, kontinyen evit bann sityasyon kot ou kapab tonm dan tantasyon. (1 Kor. 10:12) Kontinyen fer bann keksoz ki ti’n deza ed ou pour lalit avek ou bann febles. Proverb 28:14 i dir: “En dimoun ki toultan vey sa ki i fer pou kontan.”—2 Pyer 3:14.

KI BYENFE NOU GANNYEN LER NOU KONTINYEN VEYE?

20-21. (a) Ki byenfe nou pou gannyen anmezir nou kontinyen veye pour nou pa tonm dan tantasyon? (b) Ki Zeova pou fer pour nou si nou fer zefor pour lalit avek tantasyon? (2 Korentyen 4:7)

²⁰ Nou kapab asire ki i vo lapenn fer zefor pour kontinyen veye pour nou pa tonm dan tantasyon. Nou pou trouv plis lazwa ler nou viv dapre bann standar Zeova olye dan okenn plezir ki pese i anmennen pour “zis en serten letan.” (Ebr. 11:25; Ps. 19:8) Sa i akoz nou’n ganny kree pour viv dapre bann standar Bondye. (Zen. 1:27) Ler nou viv dan en fason ki fer Zeova plezir, nou pou annan en konsyans kler e en zour, nou pou kapab viv pour touzour.—1 Tim. 6:12; 2 Tim. 1:3; Zid 20, 21.

²¹ I vre ki nou “lekor enparfe i feb” me sa pa vedir ki nou pa kapab fer nanryen konsernan nou bann febles. Zeova i pare pour donn nou sa lafors ki nou bezwen. (Lir 2 Korentyen 4:7.) Me remarke ki Zeova i donn nou sa lafors ki pli pwisan ki nou prop lafors. Me avan ki Zeova i donn nou sa lafors, nou bezwen servi nou prop lafors pour lalit avek tantasyon. Si nou fer sa, nou kapab asire ki Zeova pou reponn nou lapriyer e donn nou plis lafors ler nou bezwen. (1 Kor. 10:13) Avek led Zeova, nou kapab kontinyen veye pour nou pa tonm dan tantasyon.