Mon ti ne Paddington, en landrwa kot bokou dimoun i reste Lonn, Langleter. Mon ti reste avek mon manman ek mon trwa gran ser. Mon papa ti zis pas pase tanzantan akoz i ti en alkolik.

Letan mon ti ankor zanfan, mon manman ti montre mwan ki mannyer i fer lapriyer tou le swar. Mon ti annan en pti Labib ki ti annan zis liv Psonm e mon ti sant zot lo bann ler ki mon ti envante. Mon ankor mazin en fraz ki mon ti lir dan en liv ki dir: “En zour pou napa demen.” Sa bann parol ti fatig mwan. Aswar mon pa ti dormi, mon ti mazin zis lavenir. Dan mwan menm mon ti mazinen ki lavi i bezwen annan en bi e ki i annan en rezon akoz nou la. Mon pa ti anvi mor!

Mon ti konmans mel dan bann zafer ki annan pour fer avek grigri. Mon ti esey koz avek bann dimoun mor, al dan simityer avek mon bann zanmi lekol e nou ti get bann film fer per. Nou ti krwar ki sa ti efreyan e an menm tan eksitan.

Mon ti konmans rebele letan mon ti annan zis di-z-an. Mon ti konmans fim sigaret e mon ti vin adikt vitman. Pli tar, mon ti konmans fim kanabis. A laz 11 an, mon ti konmans servi lalkol. Kantmenm mon pa ti kontan son gou, mon ti kontan sa lefe ki lalkol ti annan lo mwan letan mon ti sou. Mon ti osi kontan lanmizik e danse. Mon ti al bann parti e dan bann diskotek sak fwa ki mon ti kapab. Mon ti abitye sove aswar e retourn lo granmaten. Vi ki mon ti fatige, son lannmen mon pa ti al lekol. Ler mon ti al lekol, souvandfwa mon ti bwar lalkol ant bann leson.

Mon pa ti ganny bann bon rezilta dan mon dernyen lannen lekol. Mon manman pa ti vreman konnen ki ti pe pase dan mon lavi, alor i ti dezapwente e ankoler. Nou ti dispit e apre sa mon ti kit lakour mon manman. Pour en pe letan, mon ti al reste avek mon boyfriend Tony, ki ti en Rasta. Tony ti vann drog e vole. I ti osi annan repitasyon konman en dimoun ki ti vreman vyolan. En pti pe letan apre, mon ti tonm ansent e a laz 16 an, mon ti donn nesans nou garson.

Sa premye fwa ki mon ti zwenn Temwen Zeova mon ti pe reste dan en landrwa kot bann manman tousel i reste avek zot pti baba. Gouvernman ti’n donn mwan en lasanm dan sa landrwa. Laba i ti annan de ser Temwen Zeova ki ti regilyerman vizit serten sa bann zenn manman. En zour, mon ti antre dan zot konversasyon akoz mon ti anvi montre ki zot mal. Me san pran lakoler, zot ti klerman reponn tou mon bann kestyon par servi Labib. Mon ti kontan ki zot ti zantiy avek mwan, alor mon ti aksepte pour etidye Labib avek zot.

Pa tro lontan apre, mon ti aprann en keksoz dan Labib ki ti sanz mon lavi. Depi ptipti, mon ti per pour mor me aprezan mon ti aprann sa ki Zezi ti’n ansennyen konsernan rezireksyon. (Zan 5:28, 29) Mon ti osi aprann ki Bondye i enterese avek mwan personnelman. (1 Pyer 5:7) Mon ti ganny touse par sa parol dan Zeremi 29:11, ki dir: “Mon konn byen bann plan ki mon annan pour ou, [“Zeova,” NWT] i deklare: Bann plan ki pou anmenn prosperite pour ou, pa dezas; bann plan ki pou donn ou en lavenir ranpli avek lespwar.” Mon ti konmans krwar ki mon kapab annan sa lespwar pour viv pour touzour dan Paradi lo later.​—Psonm 37:29, NWT.

Temwen Zeova ti montre vre lanmour anver mwan. Letan mon ti asiste enn zot bann renyon pour premye fwa, bann dimoun ti vreman akeyan e zantiy. (Zan 13:34, 35) Sa ti vreman diferan avek sa lakey ki mon ti gannyen kot en legliz. Bann Temwen Zeova ti akey mwan malgre mon sirkonstans. Zot ti pas letan avek mwan, pran swen avek mwan e menm donn mwan bann led pratik. Mon ti santi konmsi mon ti form parti en gran fanmir ki kontan mwan.

Atraver mon letid Labib, mon ti realize ki mon ti pou bezwen fer bann sanzman dan mon lavi pour mwan kapab viv annakor avek bann standar Bondye. I pa ti fasil pour mwan aret fim sigaret. Mon ti osi realize ki serten lanmizik ti ogmant mon dezir pour fim kanabis, alor mon ti sanz kalite lanmizik ki mon ti ekoute. Mon ti aret al bann parti ek diskotek pour mwan pa ganny tante pour bwar ziska sou. Mon ti osi rod bann zanmi ki ti pou annan en bon lenfliyans lo mwan e ed mwan viv en lavi ki fer plezir Bondye.​—Proverb 13:20.

Pandan sa letan, Tony osi ti pe etidye Labib avek Temwen Zeova. Anmezir ki zot ti reponn son bann kestyon par servi Labib, li osi i ti konvenki ki sa ki i ti pe aprann ti laverite. Tony ti fer bann gran sanzman dan son lavi. I ti aret frekant bann zanmi ki vyolan, aret vole e aret fim kanabis. Pour nou fer plezir Zeova, nou ti vwar li neseser pour aret viv en lavi imoral e elve nou garson dan en bon lanvironnman. Nou ti marye an 1982.

Mon rapel mon ti rod bann lartik dan bann Latour Veyer ek Awake! a ki ti koz lo bann dimoun ki ti’n reisi fer bann sanzman ki mon ti anvi fer. Zot legzanp ti ankouraz mwan en kantite. Mon ti ganny lafors pour mwan travay dir e pou pa bes lebra. Mon ti kontinyelman priy Zeova pour pa abandonn mwan. Nou de Tony nou ti batize konman Temwen Zeova an 1982.

Sa lanmitye ki mon’n devlope avek Zeova in sov mon lavi. Nou de Tony, nou’n osi eksperyans sipor Zeova pandan bann moman difisil. Pandan sa bann moman, nou’n aprann pour depan lo Bondye e nou’n santi ki i’n touzour ed e soutenir nou fanmir.​—Psonm 55:22.

I’n en gran plezir pour ansenny nou garson ek nou fiy lo Zeova. Ozordi mon annan sa menm lazwa pour vwar mon bann pti zanfan pe ganny konnesans lo Bondye.

Mon nepli mank sonmey aswar akoz mon enkyet lo lavenir ek lanmor. Nou de Tony nou vizit bann kongregasyon Temwen Zeova sak semenn pour ankouraz zot. Ansanm avek zot nou ansenny bann dimoun ki si zot demontre lafwa dan Zezi, zot osi zot kapab viv pour touzour.