En letan kot laenn pou nepli egziste!
Menm si nou kapab aret ay lezot, nou pa kapab anpes dimoun otour nou annan laenn. Bann dimoun inosan i kontinyen soufer akoz lezot i ay zot. Alor, lekel ki kapab met en lafen avek laenn pour touzour?
Zis Zeova Bondye ki pou kapab met en lafen avek laenn pour touzour. Sanmenm sa ki Labib i promet Bondye pou fer.—Proverb 20:22.
BONDYE POU RETIR TOU BANN KEKSOZ KI FER NOU ANNAN LAENN
-
1. SATAN OUBYEN DYAB. Satan, sa lanz ki ti rebel kont Bondye i responsab pour laenn ki nou vwar ozordi. Bondye pou detri Satan ek tou bann ki swiv li.—Psonm 37:38; Romen 16:20.
-
2. LEMONN SATAN KI RANPLI AVEK LAENN. Bondye pou elimin tou keksoz ki promot laenn, enkli bann politisyen koronpi ek bann sef relizye. I pou osi elimin sa sistenm komersyal ki pran lavantaz lo dimoun e ki fer annan koripsyon.—2 Pyer 3:13.
-
3. LENPERFEKSYON IMEN. Labib i dir ki tou imen in erit lenperfeksyon, ki vedir nou annan sa tandans pour mazin, santi e fer bann keksoz mal. (Romen 5:12) Alor nou osi annan sa tandans pour ay lezot. Bondye pou ed nou retir sa bann tandans e apre laenn pou nepli egziste.—Izai 54:13.
LABIB I PROMET EN LEMONN KOT POU NAPA LAENN
-
1. I POU NAPA LENZISTIS. Rwayonm Bondye ki dan lesyel pou diriz lo later e i pou retir lenzistis pour touzour. (Danyel 2:44) Diskriminasyon ek prezidis pou nepli egziste. I pou anmenn lazistis pour bann ki pe soufer ozordi.—Lik 18:7.
-
2. TOU DIMOUN POU ANPE. Napa personn ki pou soufer akoz vyolans ek lager. (Psonm 46:9) Tou dimoun lo later pou kontan lape alor later pou en landrwa ki an sekirite pour viv.—Psonm 72:7.
-
3. TOU DIMOUN POU PARFE E VIV POUR TOUZOUR. Tou dimoun pou annan lanmour senser pour kanmarad. (Matye 22:39) Personn pa pou soufer. Ni menm bann move panse oubyen bann move souvenir pa pou fer nou soufer. (Izai 65:17) Sa letan kot laenn pou nepli egziste, imen “pou trouv bokou plezir dan labondans lape.”—Psonm 37:11.
Eski ou ti pou kontan viv dan en lemonn koumsa? Menm konmela, bokou dimoun pe aplik bann prensip Labib ki pe ed zot pour aret annan laenn. (Psonm 37:8) Sanmenm ki sa plizyer milyon Temwen Zeova pe fer partou dan lemonn. Menm si zot sorti dan diferan landrwa e zot annan diferan kiltir zot ini ansanm e zot kontan kanmarad.—Izai 2:2-4.
Temwen Zeova ti pou kontan partaz avek ou sa ki zot in aprann lo fason pour fer fas avek lenzistis ek diskriminasyon. Sa ki ou aprann i kapab ed ou pour aret annan laenn e konmans kontan lezot. Ou kapab aprann pour demontre lanmour pour bann ki pa apresye ou lanmour oubyen menm pour bann ki kontinyen demontre laenn. Sa i fer ki ou pou kapab annan lazwa la konmela e ou relasyon avek lezot pou amelyore. Me sa ki pli enportan, ou pou aprann ki ou kapab fer pour viv anba Rwayonm Bondye, sa letan kot laenn pou nepli egziste.—Psonm 37:29.
Ou pou kapab kontan sa osi
LATOUR VEYER
Ki Rwayonm Bondye pou fer?
Zezi ti konnen ki Rwayonm Bondye i sa sel gouvernman ki pou kapab rezourd bann problenm lo later. Ki sa Rwayonm in fer pour ki nou annan plis konfyans dan sa ki i pou fer a lavenir?
