• Ganny swazir par Bondye. “Mwan ki’n etabli mon lerwa. . . . Mon ava donn ou tou nasyon e later antye ava vin ou propriyete.”​—Psonm 2:6, 8.

• En desandans Lerwa David. “En zanfan in ne pour nou; nou’n ganny en garson. . . . Son lotorite pou kontinyen grandi e lape pou rennyen pour touzour pour tronn David ek son rwayonm.”​—Izai 9:6, 7.

• Ne Betleenm. “Ou Betleenm . . . , kot ou, pou sorti pour mwan, sa enn ki pou gouvern Izrael. . . . I ava ganny glorifye partou dan lemonn.”​—Mika 5:2, 4.

• Ganny rezete e met amor. “I ti ganny meprize e abandonnen. . . . I ti’n ganny blese, akoz nou bann [fot], kraze, akoz nou bann pese.”​—Izai 53:3, 5.

• Ganny resisite e glorifye. “Ou pa pou abandonn mwan dan lemonn lanmor. Ou pa pou les ou zanmi fidel fini dan lafos. . . . Pre avek ou, lakontantman pa zanmen fini.”​—Psonm 16:10, 11.

I annan en sel dimoun dan listwar imen ki kalifye konman sa pli bon Dirizan. Sa i pa lot ki Zezi Kri. Anfet, en lanz ti dir Mari, manman Zezi: “Bondye Zeova pou donn li tronn son papa David. . . . I pou napa en lafen avek son Rwayonm.”​—Lik 1:31-33.

Zezi pa ti zanmen vin en dirizan lo later. Plito, i pou diriz bann imen konman Lerwa dan Rwayonm Bondye dan lesyel. Akoz Zezi i sa pli bon Dirizan? Annou vwar ki Zezi ti fer ler i ti lo later.

•   Zezi ti vreman enterese avek dimoun. Zezi ti ed tou dimoun, zonm konman fanm, zenn konman vye e i pa ti get sa ki zot ti’n fer dan lepase oubyen zot ran sosyal. (Matye 9:36; Mark 10:16) Ler en dimoun ki ti ganny lalep ti sipliy li: “Ou kapab fer mwan vin pir si ou oule,” Zezi ti pran pitye pour li e geri li.​—Mark 1:40-42.

• Zezi ti ansenny nou ki mannyer pour fer plezir Bondye. I ti dir: “Ou pa kapab lesklav Bondye e lesklav Larises an menm tan.” I ti osi dir ki nou devret fer pour lezot sa ki nou ti a kontan lezot i fer pour nou. Ozordi, nou konn sa prensip konman Lareg-d-or. Deplis, i ti montre ki Bondye pa zis enterese avek sa ki nou fer me osi avek nou santiman ek panse. Alor, pour nou fer plezir Bondye, nou devret annan kontrol lo sa ki nou santi dan nou leker. (Matye 5:28; 6:24; 7:12) Zezi ti dir ki pour nou vreman ere, nou devret aprann sa ki Bondye i anvi nou fer e apre fer li.​—Lik 11:28.

• Zezi ti montre nou ki mannyer pour demontre lanmour. Sa ki Zezi ti fer e dir ti tous leker bann dimoun ki ti ekout li e vreman ed zot. “Lafoul ti vreman etonnen par son fason ansennyen, parski . . . i ti ansenny sa ki sorti kot Bondye.” (Matye 7:28, 29) Zezi ti ansenny zot pour: “Kontan zot lennmi.” I ti menm priy pour serten ki ti responsab pour touy li: “Papa, pardonn zot, parski zot pa konnen ki zot pe fer.”​—Matye 5:44; Lik 23:34.

Zezi i sa enn ki pli kalifye pour vin Dirizan sa lemonn akoz i bon e i pou ed nou. Me kan i pou konmans dirize?