Si Bondye pa responsab pour soufrans ki nou pas ladan akoz i annan lager, maladi, lapovrete, dezas natirel e dimoun ki pe mor lafen? Labib i donn trwa rezon akoz dimoun i soufer:

1. Vorasite, egois e laenn. “Zonm in domin lo son kanmarad pour fer son maler.” (Eklezyast 8:9) Dimoun i soufer akoz zot ganny viktimize par lezot dimoun enparfe ki egois oubyen kriyel.

2. Letan ek sirkonstans. Parfwa, nou soufer “akoz tou i depan lo letan ek sirkonstans.” (Eklezyast 9:11) Sa i akoz en aksidan i kapab arive, dimoun ki dan en move landrwa dan move moman oubyen dimoun pa fer atansyon e fer fot.

3. Sef sa lemonn. Labib i dir lekel ki par deryer soufrans ki bann imen pe pas ladan ler i dir: “Lemonn antye i anba kontrol Satan.” (1 Zan 5:19) “Satan” ki osi ganny apele Dyab, ti en lanz Bondye me “i ti kit laverite.” (Zan 8:44) Lezot lanz ti osi zwenn avek li pour rebel kont Bondye pour zot kapab satisfer zot bann dezir egois. Sa ti fer zot vin bann demon. (Zenez 6:1-5) Depi sa rebelyon, Satan ek son bann demon in annan en move lenfliyans lo lemonn. Sa i sirtou leka dan nou letan vi ki Satan i vreman ankoler e i “pe anbet dimoun lo later antye.” Se pour sa ki Labib i dir “maler pour later.” (Revelasyon 12:9, 12) Anfet, Satan i en sef kriyel ki vreman kontan ler bann imen i soufer. An realite, Satan ki fer dimoun soufer, pa Bondye.

REFLESIR: Zis en move dimoun ki pa kontan lezot ki pou fer bann dimoun inosan soufer. Par kont, Labib i dir ki: “Bondye i lanmour.” (1 Zan 4:8) Vi ki I lanmour, “i pa posib ki Bondye liniver i fer sa ki mal.”​—Zob 34:10.

Sa i kapab fer ou demann ou lekor, ‘Konbyen letan Bondye pou les Satan kontinyen fer nou soufer koumsa?’ Parey nou’n vwar, Bondye i ay tou sa ki mal e i konpran nou douler. Deplis, son Parol i dir: “Larg tou zot traka lo li parski i enterese avek zot.” (1 Pyer 5:7) Bondye i kontan nou e i annan sa pouvwar pour tir tou lenzistis e sa ki fer nou soufer. Sa lartik ki swiv pou eksplik plis lo la. a