LUZIA I BWETE. Ler i ti ankor en zanfan, Luzia ti ganny polyo (poliomyelitis), en maladi ki atak bann nerf dan ou lekor e i osi atrape. Ler i ti annan 16 an, en madanm kot Luzia ti travay ti dir li: “Bondye in pini ou e fer ou paralize akoz ou ti dezobei ou manman.” Bokou lannen pli tar, Luzia i ankor mazinen ki mannyer sa bann parol ti annan en lefe lo li.

LER DAMARIS TI APRANN KI I ANNAN KANSER LASERVEL, son papa ti demann li: “Ki ou’n fer pou ou ganny sa? Ou’n bezwen fer en keksoz vreman mal sanmenm sa Bondye pe pini ou.” Sa komanter ti vreman dekouraz Damaris.

Pour plizyer milye lannen, dimoun i krwar ki Bondye i pini nou avek maladi. Sa liv Manners and Customs of Bible Lands i dir ki bokou dimoun dan letan Kris ti krwar ki “dimoun i malad akoz swa zot oubyen zot fanmir in fer pese e ki zot in ganny sa maladi konman en pinisyon pour sa pese.” Sa liv Medieval Medicine and the Plague i dir ki dan Lepok Mwayennaz, “serten dimoun ti krwar ki Bondye ti anvoy bann lepidemi pour pini zot pour zot pese.” Alor, ler plizyer milyon dimoun ti mor Lerop avek sa lepidemi dan katorzyenm syek, eski Bondye ti pe pini zot akoz zot ti move? Oubyen eski sa lepidemi ti ariv akoz en bakteri, parey bann resers medikal i montre? Serten i kapab pe mazinen, eski Bondye i vreman servi maladi pour fer dimoun soufer akoz zot pese? a

REFLESIR: Akoz Zezi ti geri dimoun ki ti malad, si maladi oubyen soufrans ti pinisyon sorti kot Bondye? Pa sa ti pou vedir ki Zezi ti napa respe pour lazistis Bondye e ki i ti pe al kont lavolonte Bondye? (Matye 4:23, 24) Zezi pa ti pou zanmen al kont lavolonte Bondye. I ti dir: “Mon touzour fer sa ki fer li plezir” e “mon pe fer sa ki mon Papa in donn mwan lord pour fer.”​—Zan 8:29; 14:31.

Labib i fer kler ki Zeova pa “zanmen enzis.” (Deterononm 32:4) Par egzanp, Bondye pa pou zanmen fer en avyon kraze pour touy plizyer santenn dimoun inosan akoz i anvi pini en dimoun lo sa avyon! Vi ki Abraam, en serviter fidel ti konnen ki Bondye i zis, i ti dir ki Bondye pa pou “detri bann zis ansanm avek bann koupab.” I ti osi dir ki Bondye “pa kapab” fer en keksoz koumsa. (Zenez 18:23, 25) Labib i dir ki “Bondye pa azir par mesanste” e i pa “fer sa ki mal.”​—Zob 34:10-12.

I pa Bondye ki pe pini nou ler nou soufer akoz en pese ki nou’n fer. Sa ti evidan ler Zezi ek son bann disip ti vwar en zonm ki ti aveg depi nesans. “Son bann disip ti demann li: ‘Ansenyan, lekel ki’n fer pese pour sa zonm ne aveg, li menm ouswa son paran?’ Zezi ti reponn: ‘I pa ni pese sa zonm, ni pese son paran ki’n fer li aveg, me sa in arive pour ki dimoun i vwar pwisans Bondye.’”​—Zan 9:1-3.

Vi ki sa letan dimoun ti krwar ki zot soufer akoz Bondye pe pini zot, bann disip Zezi ti bezwen sirprann ler i ti dir zot ki ni sa zonm, ni son paran pa’n fer pese ki kapab fer sa zonm aveg. Zezi pa ti zis geri sa zonm aveg me i ti montre ki Bondye pa pini personn parey bokou ti krwar. (Zan 9:6, 7) Ozordi, bann ki pe soufer akoz en  problenm lasante grav i kapab santi zot soulaze ler zot konnen ki pa Bondye ki responsab pour zot soufrans.

Labib i asir nou

• “Bondye pa kapab ganny teste par sa ki mal e li menm i pa teste personn par sa ki mal.” (ZAK 1:13) Anfet, pour plizyer syek sa bann keksoz “mal” in anmenn en ta problenm lo limanite enkli, maladi, douler ek lanmor me tousala pou disparet.

• Zezi ti “geri tou bann ki ti pe soufer.” (MATYE 8:16) Vi ki Zezi ti geri tou bann ki ti vin kot li, Garson Bondye ti demontre ki Rwayonm Bondye pou fer lo later antye.

• “[Bondye] pou eswiy tou larm dan zot lizye, i pou nepli annan ni lanmor, ni dey, ni leokri, ni douler ankor. Sa bann keksoz avan in fini disparet.”​—REVELASYON 21:3-5.

Akoz dimoun i soufer sa kantite? Pour plizyer lannen dimoun in demann zot lekor sa kestyon me zot pa’n trouv larepons. Alor, si pa Bondye ki responsab, akoz nou soufer? Nou pou diskit larepons sa kestyon dan sa lot lartik.