Bondye ti dir Adan: “Zour ki ou manz sa fri, ou pou mor.” (Zenez 2:17) Si Bondye ti’n kree Adan pour vin vye e mor, i ti pou napa rezon pour donn li sa lord. Adan ti konnen ki si i pa manz sa fri i pa ti pou mor.

Adan ek Ev pa ti bezwen manz sa fri pour reste vivan vi ki zarden ti ranpli avek en kantite pye dibwa ki raport lezot fri. (Zenez 2:9) Si zot pa ti’n manz sa fri, zot ti pou’n demontre zot lobeisans anver sa Enn ki’n donn zot lavi. Sa ti pou’n osi montre ki zot rekonnet drwa Bondye pour dir zot ki pour fer.

Pour konpran akoz Adan ek Ev ti mor, nou bezwen egzamin en konversasyon ki’n annan en lefe lo nou tou. Satan ti servi en serpan pour koz mansonz pour fer ditor. Sa resi Labib i dir: “Serpan ti pli rize parmi tou bann zannimo sovaz ki [Zeova] Bondye ti’n kree. I ti demann sa fanm, ‘Eski Bondye in vreman dir: Ou pa devre manz tou bann fri lo bann pye ki dan zarden?’”​—Zenez 3:1.

Alor Ev ti reponn: “Nou kapab manz bann fri lo bann pye ki dan zarden. Me kanta fri sa pye dibwa ki dan milye zarden, Bondye in dir: Pa manz li, pa ni tous li, sankwa ou pou mor.” Serpan ti dir sa fanm: “Zot pa pou mor. Bondye i konnen ki letan zot pou manz sa fri, zot lizye pou ouver, zot pou vin parey Bondye, e zot pou konn lebyen ek lemal.” Satan ti pe esey dir ki Zeova i en manter ki pa ti anvi Adan ek Ev ganny en bon keksoz.​—Zenez 3:2-5.

Ev ti krwar sa ki i ti tande. I ti get byen sa pye dibwa e ti vwar sa fri sitan atiran ki i ti anvoy son lanmen, pran enn sa fri e konmans manze. Labib i dir: “I ti donn osi en morso son mari” kan i ti avek li e i ti konmans manze.​—Zenez 3:6.

Bondye ti’n bezwen sagren pour vwar son bann zanfan ki i ti kontan, dezobei li volonterman! Ki i ti fer? I ti dir Adan: “Ou pou . . . retourn dan lapousyer, kot ou sorti. Annefe, ou’n ganny tire dan lapousyer, ou pou retourn dan lapousyer.” (Zenez 3:17-19) Vi ki Adan ti dezobei, i “ti viv antou 930 an e apre i ti mor.” (Zenez 5:5) Adan pa ti al dan lesyel oubyen kontinyen viv en lot landrwa. I pa ti egziste avan ki Zeova ti kree li avek lapousyer. Alor ler i ti mor, i ti nepli vivan zis parey lapousyer ki i ti’n ganny fer avek. I ti aret egziste. Pa sa i vreman tris!

Vi ki Adan ek Ev ti dezobei Bondye volonterman, zot ti perdi zot lavi parfe ek sa lespwar pour viv pour touzour. Me Adan ek Ev ti dezobei e zot pese pa ti afekte zis zot tousel. Zot ti konmans sanze fizikman, zot ti vin enparfe akoz pese e tou zot desandans in erit pese. Romen 5:12 i dir: “Atraver en sel zonm [Adan] pese in antre dan lemonn e pese in anmenn lanmor, alor tou dimoun i mor parski tou dimoun in fer pese.”

Labib i dekri pese ek lanmor konman “sa vwal dey ki pe kouver tou bann pep, sa dra ki’n kouver tou bann nasyon.” (Izai 25:7) Sa vwal pe kouver limanite parey en ler anpwazonnen e napa fason sove. I vre ki “tou i mor dan Adan.” (1 Korentyen 15:22) Sa i fer nou demann menm kestyon ki Pol ti demande: “Lekel ki pou delivre mwan avek sa lekor ki pe touy mwan?” Eski i annan enn ki kapab delivre mwan?​—Romen 7:24.