Nou’n ganny kree pour viv pour touzour
LEKEL parmi nou ki pa anvi viv lontan e ere? Zis mazinen ki mannyer lavi ti pou gou si nou ti kapab viv ere e an bonn sante! Nou ti pou kapab pas plis letan avek bann dimoun ki nou kontan, fer letour lemonn e aprann fer bann keksoz ki nou kontan.
Pa ti pou gou viv koumsa! Me akoz dimoun i anvi viv pour touzour? Labib i dir ki Bondye in met sa dezir dan nou leker. (Eklezyast 3:11, NWT) Labib i osi dir ki “Bondye i lanmour.” (1 Zan 4:8) Bondye i kontan nou e i pa ti pou’n kree nou avek sa dezir pour viv pour touzour si nou pa pou zanmen kapab viv pour touzour.
I kler ki personn pa anvi mor. Anfet, Labib i dekri lanmor konman en “lennmi.” (1 Korentyen 15:26) Serten dimoun i mor zenn, lezot i viv pli lontan me nou tou nou pou mor en zour. Bokou dimoun i per ler zot mazin lanmor. Eski lanmor pou disparet en zour? Eski sa i vreman posib?
FASON KI NOU’N GANNY KREE I DONN LESPWAR
Eski i sirprann ou ki i pa ti zanmen plan Bondye pour imen mor? Dan Labib, liv Zenez i montre ki i ti plan Bondye pour imen viv pour touzour lo later. Zeova ti kree later ek tou sa ki neseser pour imen viv en lavi ere. I ti kree sa premye zonm, Adan e met li dan zarden Edenn ki ti en paradi. Apre sa “Bondye ti regard tou sa ki i ti’n fer; tou ti tre bon.”—Zenez 1:26, 31.
Bondye ti kree Adan parfe. (Deterononm 32:4) Ev, madanm Adan osi ti parfe mantalman e fizikman. Zeova ti dir avek zot: “Zot ava fer zanfan, zot ava ogmante e ranpli later; zot ava soumet anba zot dominasyon, tou pwason dan lanmer, tou zwazo dan lesyel ek tou zannimo ki bouze lo later!”—Zenez 1:28.
I ti pou pran letan pour zot ranpli later avek zot desandans. Ev ti pou fer zanfan e sa bann zanfan ti pou fer zanfan ziska ki later i ranpli parey Bondye ti anvi o konmansman. (Izai 45:18) Eski i rezonnab pour krwar ki Zeova ti pou ofer Adan ek Ev sa posibilite, si zot ti sipoze viv en serten letan zis pour zot vwar zot zanfan ek petet pti zanfan e apre zot pa konnen ki pou arive?
Pa zis sa, mazin sa travay ki Bondye ti’n donn zot pour domin lo bann zannimo! Adan ti ganny demande pour donn non bann zannimo e sa ti pou pran letan. (Zenez 2:19) Me pour domin lo zot ti pou vedir ki Adan ti pou bezwen aprann plis lo bann zannimo e konpran ki mannyer pour pran swen avek zot. Sa ti pou pran bokou plis letan ki donn non zannimo.
Alor, sa lord ki Bondye ti donn zot pour ranpli later e domin lo bann zannimo i montre ki sa premye koup ti’n ganny kree pour viv lontan. Anfet, i vre ki Adan ti viv pour bokou letan.
PLAN BONDYE I POUR IMEN VIV POUR TOUZOUR DAN EN PARADI LO LATER
ZOT TI VIV POUR BOKOU LETAN
Adan 930 an
Metousela 969 an
Noe 950 an
Ozordi 70-80 an
Labib i montre ki imen in deza viv bokou plis letan ki nou ozordi. Labib i dir: “Adan ti viv an tou 930 an.” Apre i mansyonn sis lezot zonm ki ti viv plis ki 900 an. Sa ti Set, Enos, Kenann, Zared, Metousela, Noe. Zot tou zot ti viv avan Deliz dan letan Noe e Noe ti viv pour 600 an avan Deliz. (Zenez 5:5-27; 7:6; 9:29) Ki mannyer zot ti kapab viv tou sa letan?
Sa bann zonm ti viv pli pros avek perfeksyon. I tre probab i pour sa rezon ki zot ti kapab viv lontan. Me ki mannyer perfeksyon i annan en lefe lo lakantite letan ki ou viv? Ki mannyer lanmor pou disparet? Pour trouv larepons, premyerman nou bezwen konpran akoz nou vye e mor.