IMAZIN ou pe get en video lo en dimoun popiler, petet en mizisyen renonmen ki ou admire. I konmans par montre li ler i ti ankor zenn pe aprann zwe en lenstriman lanmizik e plizyer fwa kot i ti pe practice. Apre sa, ou vwar li pe fer bann spektak partou dan lemonn e i vin en dimoun popiler. Pa bokou letan apre, ou vwar li konmans vin vye e lo finisyon sa video, i mor.

Sa video i en vre zistwar lo en dimoun ki ti vreman egziste e ki’n mor. Ki swa sa dimoun ti en mizisyen, en syantis, en atlet ouswa en nenport ki dimoun popiler, sa zistwar ti pou parey. I kapab ki sa dimoun in fer en kantite bon keksoz me mazin lo sa kantite keksoz ki i ti’n kapab fer si i pa ti’n vye e mor?

Malerezman, sanmenm ki pou arive avek nou tou. (Eklezyast 9:5) Menm si nou fer tou sa ki nou kapab pou anpes nou vin vye e mor, nou pa resi. Pa zis sa, nou kapab perdi nou lavi en sel kou dan en aksidan oubyen avek en maladi. Parey i dir dan Labib, nou parey lafoumbal dan bomaten ki “aparet pour en pti pe letan e apre i disparet.”​—Zak 4:14.

Vi ki nenport ler nou kapab mor, serten i dir “annou manze e bwar, parski demen nou pou mor.” (1 Korentyen 15:32) Me dimoun i viv koumsa parski zot konnen ki zot kapab mor nenport ler e zot napa lespwar pour lavenir. A en serten moman dan lavi, sirtou ler en dimoun pe pas dan difikilte, i kapab mazinen, ‘Eski i annan en lavi apre sa enn?’ Kote ou kapab ganny larepons?

En kantite dimoun i krwar ki bann syantis i kapab trouv larepons. Bann syantis ek dokter in trouv bann keksoz ki fer li posib pour ogmant lakantite letan ki nou viv. Serten syantis pe menm rod fason pour fer ki nou viv pli lontan posib. Ki swa sa bann syantis i reisi oubyen non, kestyon i: Akoz nou vin vye e mor? Eski i annan lespwar ki lanmor pou disparet en zour? Sa lartik ki swiv pou koz lo sa bann topik e i reponn sa kestyon: ‘Eski i annan en lavi apre sa enn?’