Depi ki imen in ganny kree, nou Kreater in servi bann lanz ek profet pour koz avek dimoun. An plis, i’n swazir pour fer son mesaz ek promes ganny ekri. Bondye in promet ki nou pou annan en lavenir ere. Alor, kote nou kapab vwar bann promes Bondye ozordi?

Mesaz Bondye i ganny trouve dan Lekritir sen. (2 Timote 3:16) Ki mannyer Bondye ti servi bann profet pour ekri son mesaz? (2 Pyer 1:21) Bondye ti met son panse dan lespri sa bann ekriven e zot ti ekri son panse. I parey ozordi. Annou pran en legzanp. En biznesmenn i fer son sekreter ekrir en mesaz lo son non. Nou konnen ki sa mesaz i sorti kot sa biznesmenn me i pa sorti kot son sekreter. Pareyman, menm si Bondye ti fer bann zonm ekri son mesaz, sa mesaz i sorti kot Bondye ki loter Lekritir sen.

Mesaz Bondye i vreman enportan. I anvi ki tou dimoun i lir e konpran son mesaz. Sa “bon nouvel eternel” i fasil pour “tou nasyon, tribi, langaz” ganny akse avek. (Revelasyon 14:6) Avek benediksyon Bondye, dimoun i kapab lir sa mesaz an antye ouswa an parti dan plis ki 3,000 langaz. Sa i bokou plis ki okenn lezot liv ki dimoun i kapab lir lo later.