ASTROLOZI: Serten i krwar ki lavenir en dimoun i depan lo pozisyon bann zetwal ler sa dimoun i ne. Zot get zot oroskop pour konnen ki pou ariv zot dan lavenir e pour ed zot fer bann desizyon.

FENG SHUI: Lezot i krwar ki si zot konstri oubyen aranz zot lakaz dan serten fason sa pou anmenn boner dan zot lavi. Lo Wing a ki reste Hong Kong i dir: “En eksper dan feng shui ti dir mwan ki si mon met en kalite kristal dan en landrwa spesifik dan mon laboutik, sa pou ed mwan ganny plis larzan.”

LADORASYON ZANSET: I osi annan lezot ki krwar ki si zot ador zot bann zanset ki’n mor, sa bann zanset pou protez e beni zot. Van ki reste Vyetnanm i dir: “Mon ti krwar ki ler mon ador mon bann zanset, mon ti pou ganny en meyer lavi la konmela e en bon lavenir pour mwan ek mon zanfan.”

REENKARNASYON: Bokou i krwar ki lavi pa zanmen fini, ki en dimoun i ne ankor e ankor apre son lanmor. Zot krwar ki bann keksoz ki zot pe eksperyanse dan zot lavi la konmela, ki swa bon ou move, i akoz bann keksoz ki zot ti fer dan en lavi ki zot in deza viv avan.

Menm si bokou dimoun i dir ki zot pa krwar dan sa bann keksoz, kantmenm sa zot kontinyen pratik bann keksoz parey lir dan lanmen, oroskop, servi kart pour predir lavenir e lezot ankor, an krwayan ki sa bann pratik pou kapab ed zot konn zot lavenir.

Eski bann ki met konfyans dan sa bann pratik ek krwayans i annan en bon lavi ek en meyer lavenir?

Annou vwar legzanp Hào ki reste Vyetnanm. I ti servi oroskop ek feng shui e i ti ador bann zanset pour gid li. Eski i ti reisi? Hào i dir: “Mon ti perdi en ta larzan, mon ti annan en ta det ek problenm fanmir e mon ti ganny depresyon.”

Pareyman, Qiuming ki sorti Taywann osi ti krwar dan astrolozi, reenkarnasyon, desten, feng shui ek ladorasyon zanset. Apre ki i ti byen egzamin sa bann krwayans, i ti dir: “Mon realize ki sa bann lansennyman ek koutim i an konfli avek kanmarad e zot konfizan. Mon ti vwar ki bann keksoz ki astrolozi ti predir ti souvandfwa fo. Konsernan reenkarnasyon, si ou pa mazin bann keksoz ki’n pase dan sa lavi ki ou ti viv avan, ki mannyer ou pou kapab sanze e fer pli meyer dan sa lot lavi?”

Parey Hào, Qiuming ek plizyer lezot ankor in aprann, nou lavenir pa depan lo desten, zetwal, bann zanset ki’n mor oubyen si nou ne ankor. Eski sa i vedir ki nou napa okenn kontrol lo nou lavenir?

Bokou i santi ki en ledikasyon pli o nivo ek larises i sa garanti pour en meyer lavenir. Me ki rezilta bann ki ti fer sa swa in gannyen?