1, 2. (a) Ki mannyer Izai 60:22 i’n vin vre ozordi dan sa letan lafen? (b) Ki bann bezwen ki i annan dan lorganizasyon Zeova ozordi?

“SA KI pli pti, pou vin en milye; sa ki pli feb, pou vin en nasyon pwisan.” (Izai 60:22) Sa bann parol pe ganny akonplir ozordi dan sa letan lafen. Annefe, pandan lannen 2015, ti annan 8,220,105 temwen Zeova ki ti pres sa bon nouvel lo Rwayonm partou dan lemonn! Bondye ti dir sa parol konsernan logmantasyon parmi son pep: “Mwan [Zeova], mon pa pou tarde pour realiz tousala dan son letan.” Alor, anmezir ki letan i pase i pou annan plis travay pour nou tou fer. Eski nou pe fer tou sa ki nou kapab la konmela pour prese e ansenny sa bon nouvel? En kantite nou bann frer ek ser pe deza fer pionye permanan ouswa pionye asistan. Serten i’n al dan en lot landrwa pour ede dan predikasyon e lezot pe travay dir dan konstriksyon bann Lasal Rwayonm.

² Tou le-z-an, apepre 2,000 nouvo kongregasyon i ganny formen. Sa bann kongregasyon i bezwen bann ansyen ek asistan ministeryel. Sak lannen, plizyer milye  asistan ministeryel i bezwen vin ansyen e plizyer milye lezot frer i bezwen vin asistan ministeryel. I kler ki i annan “bokou keksoz pour fer dan travay Senyer,” pa zis pour bann frer, me osi pour bann ser.​—1 Korentyen 15:58, NW.

3, 4. Ki savedir fer progre spirityel, pour ou?

³ Lir 1 Timote 3:1, NW. Zapot Pol ti felisit bann frer ki ti “fer zefor” pour vin sirveyan. Pour en dimoun arive atrap en keksoz ki lwen avek li, i pou bezwen fer zefor e petet fil son lebra pour ganny sa keksoz. Aprezan, mazin en frer ki ti a kontan kalifye pour vin en asistan ministeryel. I realize ki i bezwen fer zefor pour amelyor son bann kalite Kretyen. Apre ki i konmans servi konman en asistan ministeryel, i kontinyen travay dir pour ki i kapab kalifye pour vin en sirveyan.

⁴ Serten frer ek ser pe fer bann sanzman dan zot lavi, parski zot anvi fer plis dan servis Zeova. Par egzanp, petet zot anvi fer pionye, servi kot Betel oubyen ede konstrir bann Lasal Rwayonm. Annou vwar ki mannyer Labib i kapab ed nou tou pour kontinyen fer progre.

5. Ki mannyer bann zenn i kapab servi zot kouraz dan servis Rwayonm?

⁵ Bann zenn i kapab fer bokou dan servis Zeova, parski zot ankor for e an bonn sante. (Lir Proverb 20:29.) Serten zenn frer ki dan betel i ede pour enprim e anpakte bann liv ek Labib. En kantite zenn frer ek ser i konstrir ouswa ede repar bann Lasal Rwayonm. Serten volonter i ede ler i annan en dezas natirel. Bokou bann zenn pionye i aprann en lot langaz ouswa vwayaz dan en lot pei pour pres sa bon nouvel.

6-8. (a) Ki mannyer en zenn garson ti sanz son pwennvi lo servis Bondye e ki ti son rezilta? (b) Ki mannyer nou kapab “goute e vwar ki Zeova i bon”?

⁶ Nou kontan Zeova e anvi donn li nou meyer. Kantmenm sa, nou kapab santi parey en frer ki apel Aaron. I ti anvi servi Bondye dan lazwa, me i pa ti ere. Menm si depi ler i ti zenn, Aaron ti asiste bann renyon e al predikasyon, i ti dir,“bann renyon ek predikasyon ti annwiyan pour mwan.” Alor, ki i ti fer?

⁷ Aaron ti fer zefor pour lir Labib regilyerman, prepar son bann renyon e fer bann komanter pandan renyon. I ti osi konmans priy pli souvan. Tousala ti ed li pour fer progre spirityel. I ti aprann konn pli byen Zeova e konmans kontan li plis ankor. Avek letan, Aaron ti santi li pli ere. I ti fer pionye, ed lezot ler ti annan bann dezas natirel e i ti al prese dan en lot pei. Ozordi i en ansyen e i pe servi dan Betel. Ki mannyer i santi konsernan son lavi? Aaron ti dir: “Mon’n ‘goute e mon’n vwar ki Zeova i bon.’ Gras a son benediksyon, mon rekonesan anver li. Sa i pous mwan pour fer plis dan son servis e sa i anmenn plis benediksyon.”

⁸ Sa psalmis ti dir: “Goute e vwar ki Zeova i bon.” I ti azoute: “Bann ki pe rod Zeova pa pou mank okenn keksoz ki bon.” (Lir Psonm 34:8-10, NW) ^[1]  (Vwar lezot not.) Wi, ler nou donn Zeova nou meyer, nou santi nou vreman ere parski nou konnen ki nou fer li plezir e Zeova pou gard son promes pour pran swen avek nou.

9, 10. Akoz i enportan pour ou “espere”?

⁹ Petet nou annan sa dezir pour fer plis dan servis Zeova. Me si depi lontan nou pe espere pour ganny en privilez dan kongregasyon ouswa pour ki nou sityasyon i sanze? Petet nou bezwen annan plis pasyans. (Mika 7:7) Kantmenm Zeova i permet ki sa sityasyon ki nou ladan i kontinyen, nou kapab asire ki i pou touzour siport nou. Nou kapab aprann avek legzanp Abraam. Zeova ti promet li ki i ti pou ganny en garson, me i ti bezwen espere pour plizyer lannen avan ki Izaak ti ne. Pandan sa letan, Abraam ti annan pasyans e i pa ti zanmen perdi lafwa dan Zeova.​—Zenez 15:3, 4; 21:5; Ebre 6:12-15.

¹⁰ Byensir, i pa fasil pour espere. (Proverb 13:12) Me si nou kontinyen mazin lo nou sityasyon e lo nou dezapwentman, nou pou santi nou vreman dekouraze. O kontrer, nou kapab servi sa letan pour amelyor bann kalite ki nou pou bezwen pour arive okip serten responsabilite dan kongregasyon.

11. Ki bann kalite spirityel ki nou kapab fer zefor pour devlope e akoz zot enportan?

¹¹ Devlop bann kalite ek abilite ki ou bezwen. Ler ou lir Labib e medit lo sa ki ou lir, ou kapab aprann pour vin saz, pour reflesir, pour rezonn klerman e pour osi fer bann bon desizyon. Anfet, bann frer i bezwen annan sa bann kalite ek abilite pour pran swen avek kongregasyon. (Proverb 1:1-4; Tit 1:7-9) Ler nou etidye Labib, nou kapab trouve ki mannyer Zeova i santi konsernan plizyer keksoz. Apre sa, sak zour nou kapab servi sa ki nou’n aprann pour fer bann desizyon ki fer plezir Zeova. Par egzanp, nou pou konnen ki mannyer pour tret lezot, ki mannyer pour servi larzan e ki mannyer pour swazir divertisman ek lenz.

12. Ki mannyer bann manm kongregasyon i kapab montre ki zot diny konfyans?

¹² Travay dir dan nenport ki responsabilite ou gannyen. Ler pep Bondye ti pe rekonstrir tanp, Neemya ti bezwen bann zonm pour okip diferan responsabilite. I ti swazir sa bann ki ti annan en bon repitasyon. I ti konnen ki sa bann zonm ti kontan Bondye e ki zot pou travay dir dan nenport ki travay ki zot gannyen pour fer. (Neemya 7:2; 13:12, 13) Dan menm fason ozordi, sa bann ki fidel e ki travay dir, pou annan en bon repitasyon e zot kapab ganny donnen plis responsabilite. (1 Korentyen 4:2) Alor, ki swa nou en  frer ouswa en ser, nou devret toultan donn nou meyer dan nenport ki travay ki nou ganny demande pour fer.​—Lir 1 Timote 5:25.

13. Ki mannyer ou kapab swiv legzanp Zozef si lezot pa tret ou dan en fason ki zis?

¹³ Depan lo Zeova. Ki ou kapab fer si lezot pa tret ou dan en fason ki zis? Petet ou kapab eksplik zot ki mannyer ou santi. Me, si ou kontinyen defann ou lekor e ensiste ki ou annan rezon, ou kapab agrav sa sityasyon. Nou kapab aprann bokou avek legzanp Zozef. Son bann frer pa ti tret li byen. Dimoun ti koz mansonz lo li e i ti ganny met dan prizon pour en keksoz ki i pa ti’n fer. Me Zozef ti depan lo Zeova. I ti rapel bann promes Zeova e sa ti fer li reste fidel. (Psonm 105:19) Dan sa bann letan difisil, i ti devlop en kantite zoli kalite ki pli tar ti ed li ler i ti ganny donnen bann travay enportan pour fer. (Zenez 41:37-44; 45:4-8) Si lezot pa’n tret ou dan en fason ki zis, priy Zeova pour ganny plis lasazes. I pou ed ou reste kalm e pour koz zantiman avek zot.​—Lir 1 Pyer 5:10.

14, 15. (a) Akoz nou devret kontinyen “vey byen” lafason ki nou prese? (b) Ki mannyer ou kapab aziste avek bann diferan sanzman? (Vwar portre lo paz 15 ek sa bwat “ Eski ou pare pour esey en nouvo metod?”)

¹⁴ Pol ti dir avek Timote pour kontinyen  amelyor lafason ki i eksplik bann Lekritir. Pol ti dir: “Vey byen ou fason viv e fer atansyon ou lansennyman.” (1 Timote 4:13, 16) Timote ti deza pe prese pour plizyer lannen. Alor, akoz i ti bezwen amelyore? Timote ti konnen ki dimoun ek zot bann sityasyon i sanze. I ti anvi ki dimoun i kontinyen ekout li, alor i ti pou bezwen kontinyen amelyore e sanz lafason ki i ti pe ansenny zot. Nou osi, nou bezwen fer parey anmezir ki nou prese ozordi.

¹⁵ Dan serten landrwa, ler nou pres portanport, nou trouve ki bokou dimoun pa kot lakour. Dan lezot landrwa, i kapab ki dimoun i kot zot me nou pa kapab ariv kot zot laport, petet akoz nou pa kapab antre dan sa batiman kot zot reste. Si sa i leka dan ou teritwar, eski ou kapab esey en lot metod pour zwenn dimoun?

16. Ki mannyer temwannyaz an piblik i vin en bon metod?

¹⁶ Plizyer frer ek ser i kontan rann temwannyaz an piblik. Par egzanp, zot al dan bann stasyon tren, stasyon bis, bazar e lezot landrwa piblik pour zwenn dimoun pour koz avek. En Temwen i kapab konmans en konversasyon avek en dimoun konsernan en rapor dan nouvel. Sa Temwen i osi kapab dir en bon keksoz lo zanfan sa dimoun oubyen demann en kestyon konsernan son travay. Si i paret ki sa dimoun pe apresye sa konversasyon, sa proklanmater i kapab mansyonn en pwen dan Labib e demann sa dimoun ki i panse lo la. Souvan, dimoun i anvi konn plis lo Labib.

17, 18. (a) Ki mannyer ou kapab vin pli konfidan ler ou pe rann temwannyaz an piblik? (b) Akoz ou vwar santiman David ler i ti pe loue Zeova konman en keksoz ki annan valer pour ou dan predikasyon?

¹⁷ Petet ou vwar li difisil pour konmans en konversasyon lo semen avek dimoun ki ou pa konnen. Koumsanmenm ki Eddie, en pionye ki reste New York ti santi. Me i ti vwar en keksoz ki ti ed li pour vin pli konfidan. I dir: “Pandan nou ladorasyon fanmir, mwan ek mon madanm ti fer resers pour trouv larepons pour bann lobzeksyon e bann diferan lopinyon ki dimoun i annan. Nou osi rod bann sizesyon avek lezot Temwen.” Ozordi, Eddie i enpasyan pour rann temwannyaz an piblik.

¹⁸ Ler nou trouv plis lazwa dan predikasyon e nou amelyor lafason ki nou koz avek dimoun lo sa bon nouvel, nou progre spirityel pou ganny rekonnet par lezot dimoun. (Lir 1 Timote 4:15.) Nou menm kapab ed en dimoun pour vin en serviter Zeova. David ti dir: “Mon pou loue Zeova toultan, mon pou touzour loue li avek mon labous. Konsernan Zeova, mon pou vant mon lekor; Bann dimoun ki annan limilite pou tande e zot pou zwaye.”​—Psonm 34:1, 2, NW.

19. Akoz ki en serviter fidel Zeova i devret zwaye, menm si i pe reste dan bann sityasyon difisil?

¹⁹ David ti osi dir: “Tou sa ki ou’n fer pou loue ou [Zeova]. Tou dimoun ki reste fidel pou remersye ou. Zot ava koz lo laglwar ou renny e rakont ou  pwisans. Zot ava fer tou dimoun konn ou bann mervey ek splander laglwar ou rwayonm.” (Psonm 145:10-12) Tou sa ki kontan Zeova e ki fidel avek li, i annan en gran dezir pour koz lo li avek lezot. Me, ki ou pou fer si ou pa kapab pres portanport sa kantite ki ou ti ava kontan, pour rezon maladi ouswa lavyeyes? Touzour mazinen ki ou pe loue Zeova sak fwa ou koz lo li avek ou lantouraz, ki swa bann ners ouswa dokter. Si ou dan prizon akoz ou lafwa, ou kapab koz lo Zeova avek lezot e sa i rezouir leker Zeova. (Proverb 27:11) I osi vreman kontan si ou pe servi li malgre ki lezot manm ou fanmir pa pe fer li. (1 Pyer 3:1-4) Menm dan bann sityasyon difisil ou kapab loue Zeova, kontinyen apros li e fer progre spirityel.

20, 21. Si ou ganny plis travay dan lorganizasyon Zeova, ki mannyer ou kapab vin en benediksyon pour lezot?

²⁰ Zeova pou sirman beni ou si ou kontinyen vin pli pros avek li e fer tou sa ki ou kapab pour servi li. Petet si ou fer serten azisteman dan ou progranm ouswa fason viv, ou pou annan plis loportinite pour ed dimoun aprann konsernan bann zoli promes Bondye. Petet ou pou osi kapab ed ou bann frer ek ser plis ankor. Zis mazin ki mannyer ou bann frer ek ser pou kontan ou ler zot vwar ou pe travay dir dan kongregasyon!

²¹ Nenport ki kantite lannen ki nou’n servi Zeova, nou tou nou kapab kontinyen apros avek li e fer progre spirityel. Dan sa lot lartik ki swiv, nou pou diskit lo ki mannyer nou kapab ed lezot fer en tel progre.