1, 2. (a) Ki kalite problenm bokou dimoun i annan ozordi e ki lefe sa i annan lo zot? (b) Ki lespwar Izai 41:10, 13 i donn nou?

EN SER ki pionye ordiner e ki’n marye avek en ansyen i dir: “Menm si mon annan en bon routin spirityel, mon’n bezwen lite pour fer fas avek lenkyetid pour bokou lannen. I anpes mwan dormi, i annan en lenpak lo mon lasante, i afekte fason ki mon tret lezot e par ler i fer mwan anvi abandonnen.”

² Eski ou kapab konpran santiman sa ser? Malerezman, vi ki nou pe viv dan sa move lemonn Satan, nou anba bokou presyon. Parey en lank ki anpes en bato bouze, lenkyetid i kapab fer nou dekouraze. (Proverb 12:25) Kwa ki kapab fer ou enkyet? Petet nou sagren akoz lanmor en dimoun ki nou kontan e nou pe fer fas avek en maladi grav oubyen persekisyon. Nou kapab osi pe lite pour pran swen avek nou fanmir akoz problenm ekonomik. Anmezir ki letan i pase, stres emosyonnel i kapab fer ou dekouraze e menm perdi ou lazwa. Kantmenm sa, ou kapab asire ki Bondye i pare pour ed ou.​—Lir Izai 41:10, 13.

3, 4. (a) Ki mannyer Labib i servi sa mo “lanmen” ouswa lebra? (b) Kwa ki kapab fer nou bes lebra?

 ³ Labib i souvandfwa servi bann parti lekor pour dekrir bann diferan kalite en dimoun oubyen son bann aksyon. Par egzanp, lebra (literalman, “lanmen”) in ganny mansyonnen plizyer santenn fwa. Ler Labib i dir ki lanmen en dimoun in ganny fortifye, i kapab pe dir ki sa dimoun in ganny ankouraze, in vin pli for e in pare pour pran aksyon. (1 Samyel 23:16, not dan NW; Ezra 1:6, not dan NW) I kapab osi pe dir ki sa dimoun i pli pozitif e i annan lespwar pour lavenir.

⁴ Labib i osi kapab koz lo en dimoun ki’n bes lebra. Ler Labib i dir sa, i pe refer avek en dimoun ki dekouraze oubyen ki’n perdi lespwar. (2 Kronik 15:7, not dan NW; Ebre 12:12) Ler ou strese, fatige, oubyen ou santi ki ou relasyon avek Zeova pe afebli, ou kapab anvi abandonnen. Me kote ou kapab ganny lankourazman? Ki mannyer ou kapab ganny motivasyon ek lafors pour andire e ganny lazwa?

5. (a) Ki mannyer nou kapab santi ler nou annan bann problenm, me ki nou pa devret oubliye? (b) Ki nou pou diskite dan sa lartik?

⁵ Lir Zefanya 3:16, 17. Ler nou annan bann problenm, nou pa devret per, dekouraze oubyen bes lebra. Nou Papa lanmour, Zeova i envit nou pour desarz tou nou traka lo li. (1 Pyer 5:7) Zeova i pran swen avek nou parey i ti pran swen avek nasyon Izrael. I ti dir zot: “Pa krwar lebra [Zeova] i tro kourt pour li pa kapab sove.” I touzour pare pour delivre son bann serviter fidel. (Izai 59:1) Dan sa lartik, nou pou diskit lo trwa legzanp ki dan Labib ki montre ki Zeova i annan sa dezir ek abilite pour fortifye son pep pour ki zot fer son lavolonte malgre bann difikilte. Annou vwar ki mannyer sa trwa legzanp i kapab fortifye ou.

6, 7. Ki nou kapab aprann avek laviktwar bann Izraelit lo bann Amalekit?

⁶ Deswit apre ki bann Izraelit ti’n ganny delivre dan lesklavaz Lezip, bann Amalekit ti atak zot. Moiz ti dir Zozye, en zonm kouraze, anmenn bann Izraelit pour al lager kont bann Amalekit. Apre, Moiz, Aaron ek Our ti al lo en pti montanny pa tro lwen. Laba, zot ti kapab vwar kot sa de larme ti pe lager. Eski sa trwa zonm ti pe sov lager akoz zot ti per? Pa ditou!

⁷ Moiz ti annan en plan ki ti pou ed bann Izraelit ganny laviktwar lo bann Amalekit. Moiz ti tenir baton sa vre Bondye dan son lanmen e lev li ver lesyel. Ler i ti fer sa, Zeova ti donn bann Izraelit sa kouraz pour lager kont bann Amalekit. Par kont, ler Moiz ti nepli kapab kit son lanmen anler, bann Amalekit ti konmans vin pli for ki bann Izraelit. Ler sa ti arive, deswit Aaron ek Our ti ed Moiz. “Zot ti pran en ros e met li asiz lo la. Aaron  ek Our ti tenir son lebra enn lo sak kote. Alor son de lebra ti reste anler ziska soley kouse.” Wi, par son lanmen for, Bondye ti fer bann Izraelit ganny lager.​—Egzod 17:8-13.

8. (a) Ki Aza ti fer ler bann Etyopyen ti menas Zida? (b) Ki mannyer nou kapab imit Aza?

⁸ Zeova ti osi pare pour servi son lanmen for pour ed son pep dan letan Lerwa Aza. Labib i koz lo en kantite larme, me sa pli gran larme ti sa enn pour Zera, sa Etyopyen ki ti annan 1,000,000 solda eksperyanse. Sa larme Etyopyen ti annan preski de fwa plis solda ki larme Aza. Eski Aza ti enkyet, per oubyen dekouraze? Eski i ti bes lebra? Non! Deswit Aza ti demann Zeova pour ed li. Dapre en pwennvi militer, i ti paret enposib pour defet sa larme Etyopyen, “me pour Bondye tou i posib.” (Matye 19:26) Bondye ti servi son gran pwisans e i ti “ganny laviktwar lo bann Etyopyen devan Aza,” ki “pandan tou son lavi, son leker ti senser anver [Zeova].”​—2 Kronik 14:8-13, NW; 1 Lerwa 15:14.

9. (a) Kwa ki pa ti aret Neemya pour rekonstri miray Zerizalenm? (b) Ki mannyer Bondye ti reponn lapriyer Neemya?

⁹ Ler Neemya ti al Zerizalenm, ki i ti vwar? I ti vwar ki bann lennmi sorti dan bann pei etranze ti pe menas bann Zwif e sa ti fer ki bann Zwif ti aret konstri bann miray otour Zerizalenm. Sa lavil ti san proteksyon e bann Zwif ti dekouraze. Ki mannyer Neemya ti santi? Eski li osi ti dekouraze e bes lebra? Non! Parey Moiz, Aza ek lezot serviter fidel Zeova, Neemya ti toultan depan lo Zeova. Dan sa sityasyon ki Neemya ti vwar li ladan, i ti demann led avek Zeova e Zeova ti reponn son lapriyer. Bondye ti servi son gran “pwisans” ek son “lanmen for” pour donn kouraz bann Zwif. (Lir Neemya 1:10; 2:17-20; 6:9.) Eski ou krwar ki Zeova i servi son “gran pwisans” ek “lanmen” for pour donn kouraz son bann serviter ozordi?

10, 11. (a) Ki mannyer Satan i esey fer nou bes lebra? (b) Ki Zeova i servi pour donn nou kouraz? (c) Ki mannyer ou’n benefisye avek lenstriksyon Zeova?

¹⁰ Nou kapab asire ki Dyab pa pou zanmen bes lebra. I pou kontinyen atak nou e anpes nou fer nou bann aktivite Kretyen. I servi bann mansonz ek menas ki bann gouvernman, sef relizye ek bann aposta i fer pour fer nou per. Ki son bi? Dyab i anvi fer nou aret anons sa bon nouvel lo Rwayonm. Me Zeova i oule e i kapab ed nou, i fortifye nou avek son lespri  sen. (1 Kronik 29:12) Alor i vreman enportan ki nou demann Bondye son lespri sen pour nou kapab lager kont Satan ek son move lemonn. (Psonm 18:39; 1 Korentyen 10:13) Nou devret rekonesan pour led ki nou gannyen atraver Parol Bondye. Zis mazin sa ki nou aprann sak mwan atraver nou bann piblikasyon. Menm si sa bann parol ki dan Zekarya 8:9, 13 (lir) ti ganny lir anmezir ki tanp Zerizalenm ti pe ganny rekonstrir nou ankor pe benefisye avek sa bann parol ozordi.

¹¹ Zeova i osi fortifye nou avek lenstriksyon ki nou gannyen atraver nou bann renyon Kretyen, lasanble ek bann lekol teokratik. Sa lenstriksyon i kapab ed nou pour servi Bondye avek sa bon motivasyon, met bann lobzektif e desarz byen nou bann responsabilite Kretyen. (Psonm 119:32) Eski ou enpasyan pour ganny fortifye avek lenstriksyon Zeova?

12. Ki nou bezwen fer pour ganny lafors?

¹² Zeova ti ed son pep defet bann Amalekit ek bann Etyopyen e i ti donn Neemya ek bann Zwif lafors pour rekonstri miray Zerizalenm. Pareyman, Bondye pou donn nou sa lafors pour kontinyen prese malgre lezot dimoun pa enterese e malgre nou lenkyetid ek lopozisyon. (1 Pyer 5:10) Zeova pa pou fer mirak pour ki nou bann problenm i disparet. O kontrer, nou bezwen fer nou par. Ki mannyer? Nou bezwen lir Parol Bondye toulezour, prepar e al nou bann renyon sak semenn, kontinyen fer letid personnel, fer ladorasyon fanmir e depan lo Zeova dan nou lapriyer. Pa les nanryen anpes nou servi tou keksoz ki Zeova in donnen pour fortifye e ankouraz nou. Si ou santi ki ou’n bes lebra e ou pa pe fer enn parmi sa bann keksoz, demann Bondye son led. Apre, ou a vwar ki mannyer lespri sen Bondye “i fortifye [ou] e donn [ou] sa dezir ek lafors pour azir.” (Filipyen 2:13, NW) Aprezan, eski ou pou kapab fortifye bann ki pe bes lebra?

13, 14. (a) Ki mannyer en frer ti ganny fortifye apre ki son madanm ti’n mor? (b) Ki mannyer nou kapab fortifye lezot?

¹³ Zeova in donn nou en kantite frer ek ser dan lemonn antye pour ankouraz nou. Zapot Pol ti dir: “Fortifye bann ki’n bes lebra oubyen bann ki zot zenou pe tranble. Kontinyen mars lo sa bon semen.” (Ebre 12:12, 13, NW) Bann premye Kretyen ti ganny sa kalite led avek zot bann frer ek ser. Ozordi osi i parey. Annou vwar en legzanp. Ler madanm en frer ti mor e ler sa frer ti fer fas avek lezot leprev, i ti dir: “Mon’n aprann ki nou pa kapab swazir nou bann tes, ni kan zot devret arive e ki kantite fwa zot devret arive. Lapriyer ek letid personnel in parey en zile sovtaz ki’n anpes mwan koule. Mon’n ganny rekonforte par mon bann frer ek ser spirityel e mon’n osi realize ki i enportan pour annan en  bon relasyon avek Zeova avan ki bann problenm i arive.”

¹⁴ Aaron ek Our ti tenir lebra Moiz e zot ti siport li ler zot ti pe lager avek bann Amalekit. Ozordi osi, nou kapab rod fason pour siport e ed lezot. Serten nou bann frer i soufer akoz zot aze, akoz problenm lasante, persekisyon zot fanmir, zot reste tousel oubyen zot in perdi enn ki zot kontan dan lanmor. Nou kapab ed bann zenn ki anba presyon pour reisi dan sa lemonn oubyen fer sa ki mal. (1 Tesalonisyen 3:1-3; 5:11, 14) Rod bann fason pour demontre lentere senser dan bann frer ek ser kot Lasal Rwayonm, dan predikasyon, pandan en repa oubyen lo telefonn.

15. Ki lefe bann parol pozitif i kapab annan lo nou bann frer ek ser?

¹⁵ Apre ki Aza ti’n ganny sa laviktwar enpresyonan lo sa gran larme Etyopyen, profet Azarya ti ankouraz li ek son pep. I ti dir: “Me ou, annan kouraz e pa bes lebra, akoz ou pou ganny en rekonpans pour ou aksyon.” (2 Kronik 15:7, not dan NW) Sa bann parol ti motiv Aza pour fer en kantite sanzman pour retabli vre ladorasyon. Pareyman, nou bann parol pozitif i kapab ankouraz lezot e ed zot pour kontinyen servi Zeova. (Proverb 15:23)  Pa zanmen oubliye ki ou bann frer i ganny fortifye par ou bann komanter ankourazan dan bann renyon.

16. Ki mannyer bann ansyen i imit Neemya? Donn bann legzanp kot bann frer ek ser in ed ou personnelman.

¹⁶ Avek led Zeova, Neemya ek bann Zwif pa ti bes lebra. Zot ti kapab rekonstri bann miray Zerizalenm dan zis 52 zour! (Neemya 2:18, not dan NW; 6:15, 16) Neemya pa ti zis debout e get bann ki pe travay. Li osi ti ede konstri miray Zerizalenm. (Neemya 5:16) Bann ansyen i osi kapab imit Neemya par ede dan konstriksyon, dan netwayaz ek mentenans Lasal Rwayonm. Sa bann ansyen i osi ed bann frer ek ser pour pa bes lebra ler zot “leker i ranpli avek lafreyer,” ler zot vizit e travay avek zot dan predikasyon.​—Lir Izai 35:3, 4.

17, 18. Ler nou annan bann problenm oubyen lenkyetid, ki nou kapab asire?

¹⁷ Nou vin pli ini ler nou travay ansanm avek nou bann frer ek ser. Sa i osi ed nou vin zanmi pour lavi diran e ranforsi nou konfyans ki nou pou ganny bann benediksyon anba Rwayonm Bondye. Ler nou ed lezot pour pa bes lebra, nou ed zot pour andire ler zot dan bann sityasyon difisil e ed zot annan en lespwar pozitif pour lavenir. An plis ki sa, ler nou ed lezot nou vin pli for e i ed nou pour konsantre lo lavenir.

¹⁸ Ler nou medit lo ki mannyer Zeova in ed e protez son bann serviter fidel dan le pase, nou lafwa ek konfyans dan li i vin pli for. Alor, ler ou annan bann problenm ek lenkyetid, “pa bes lebra”! Ou kapab asire ki si ou demann led Zeova dan lapriyer, i pou tyonbo ou avek son lanmen for e i pou anmenn ou ver bann benediksyon dan lavenir.​—Psonm 73:23, 24.