1, 2. (a) Ki nou kapab aprann atraver landirans Gideonn ek son 300 zonm? (Vwar portre anler.) (b) Dapre Lik 21:19, akoz landirans i sitan enportan?

ESEY mazin Ziz Gideonn ek son bann solda Izraelit dan en gran batay kont zot bann lennmi. Sa lager pa fasil e zot fatige. En lannwit antye Gideonn ek son bann solda in tay deryer bann Madyanit ek bann ki siport zot pour apepre en zistans 32 kilomet! Ki arive apre? Labib i dir: “Gideonn ti ariv kot Zourden e travers li. Li ek sa 300 zonm ki ti avek li ti fatige.” Me zot pa ankor ranport laviktwar, i ankor annan 15,000 solda pour zot lager avek. Sa bann lennmi in maltret bann Izraelit pour en bann lannen, alor zot pa kapab zis les tonbe. Alor, Gideonn ek son bann solda i kontinyen tay deryer zot lennmi ziska finalman zot arive defet zot tou!​—Ziz 7:22; 8:4, 10, 28.

² Nou osi nou pe lager dan en batay difisil e nou fatige. Parmi nou bann lennmi i annan Satan, son lemonn e nou prop lenperfeksyon. Serten parmi nou pe lager  kont sa bann lennmi pour plizyer lannen. Nou’n ganny bokou batay avek led Zeova. Kantmenm sa, nou pa ankor ganny nou laviktwar final. I kapab arive ki par ler nou fatige lager. Oubyen petet nou fatige esper lafen sa move lemonn. Zezi ti averti ki nou ti pou ganny bann gran tes ek persekisyon pandan sa bann dernyen zour. Me, i ti osi dir ki si nou persevere ouswa andire, nou kapab ranport laviktwar. (Lir Lik 21:19.) Ki savedir landirans? Kwa ki pou ed nou andire? Ki nou kapab aprann avek bann ki’n andire? E ki mannyer nou kapab ‘kontinyen andire, [pour ki sa i] form nou konpletman’?​—Zak 1:4, NW.

3. Ki savedir landirans?

³ Ler Labib i koz lo landirans i pa zis vedir siport oubyen toler en sityasyon difisil. I osi enplik lafason ki nou vwar e santi an rapor avek nou leprev. Landirans i ed nou pour annan kouraz, lafwa ek pasyans. En liv referans i dir ki landirans i ed nou annan en lespwar solid e i anpes nou bes lebra ler nou fer fas avek bann leprev. I ed nou reste ferm e solid menm pandan bann leprev pli difisil. Finalman, i permet nou fer sa bann leprev vin bann laviktwar e ed nou konsantre lo nou lobzektif, non pa nou soufrans.

4. Akoz nou kapab dir ki se lanmour ki pous en dimoun pour andire?

⁴ Lanmour i pous nou pour siport tou, andotmo pour andire. (Lir 1 Korentyen 13:4, 7.) Dan ki sityasyon par egzanp? Lanmour pour Zeova i pous nou pour andir tou sa ki i permet. (Lik 22:41, 42) Lanmour pour nou bann frer ek ser i ed nou pour andir zot lenperfeksyon. (1 Pyer 4:8) Lanmour pour nou konzwen i ed nou andir “problenm” ki menm bann koup ki ere dan zot maryaz i pas atraver e ede fer zot maryaz pli for.​—1 Korentyen 7:28.

5. Akoz Zeova i dan sa pli bon pozisyon pour ed nou andire?

⁵ Demann Zeova lafors. Zeova i sa “Bondye, ki donn [“landirans,” NW] ek konsolasyon.” (Romen 15:5) Zis li ki vreman konpran nou sityasyon, santiman ek lafason ki nou’n grandi. Alor i konn egzakteman kwa ki nou bezwen pour andire. Labib i dir: “I satisfer dezir bann ki annan respe pour li, i tande ler zot kriye pour ganny led e i sov zot.” (Psonm 145:19) Me ki mannyer Bondye pou reponn nou ler nou priy li, pour ganny lafors pour andire?

6. Parey i’n ganny promet dan Labib, petet ki mannyer Zeova i “donn mwayen pour sorti” ler nou pas dan leprev?

⁶ Ler nou demann Zeova pour ed nou andire, i promet ki i pou “donn mwayen pour sorti.” (Lir 1 Korentyen 10:13.)  Ki mannyer i fer sa? Par ler, i kapab tir sa leprev. Me laplipar ditan, i pou donn nou lafors pour ki nou “a kapab siport [oubyen “andir,” NW] tou avek pasyans” ek lazwa. (Kolosyen 1:11) Vi ki Zeova i konn nou limit fizik, mantal e emosyonnel sitan byen, i pa pou zanmen permet en sityasyon vin telman difisil ki nou pa kapab reste fidel.

7. Servi en legzanp pour eksplike akoz nou bezwen nouritir spirityel pour andire.

⁷ Les nouritir spirityel fortifye ou lafwa. Akoz nouritir spirityel i enportan? Annou vwar en legzanp pour reponn sa kestyon. En dimoun ki anvi mont Montanny Everest i bezwen manz sa ki i ti pou manze dan trwa oubyen kat zour dan zis en zour. Pareyman, nou bezwen en kantite nouritir spirityel pour andire e atenn nou lobzektif. Nou bezwen determinen pour met letan de kote pour fer letid personnel e al nou bann renyon. Sanmenm sa ki pou donn nou sa ki nou bezwen pour gard nou lafwa for.​—Zan 6:27.

8, 9. (a) Dapre Zob 2:4, 5, kwa ki enplike ler nou pas atraver leprev? (b) Ler ou pas atraver bann leprev, ki senn ou kapab imazinen?

⁸ Rapel ou fidelite anver Bondye. Ler nou pas atraver bann leprev, i annan plis ki enplike ki zis nou soufrans. Nou fidelite anver Bondye pe ganny teste. Lafason ki nou reazir ler nou ganny teste i montre si nou vreman vwar Zeova konman sa vre Dirizan liniver. Ki mannyer sa? Satan, en lennmi Bondye ki kont son dominasyon, ti ensilte Zeova par dir ki bann imen i servi Bondye zis pour sa ki zot kapab gannyen. Satan ti dir: “Tou sa ki en zonm i annan i pou donnen pour son lavi.” Apre Satan ti dir sa lo Zob: “Me pour en sanzman, silvouple, anvoy ou lanmen e frap son lezo ek son laser e sirman i pou modi ou dan ou figir.” (Zob 2:4, 5) Eski Satan in sanze depi ki i’n fer sa lakizasyon? Ditou! Plizyer lannen pli tar ler Satan ti ganny tire dan lesyel, i ti ankor pe kontinyen akiz bann serviter Zeova. (Revelasyon 12:10) Ozordi, Satan i ankor pe dir ki bann imen i ador Bondye zis pour sa ki zot gannyen. I anvi vwar nou rezet drwa Bondye pour dirize e aret servi Li.

⁹ Ler ou pe soufer akoz en leprev, zis esey imazin sa senn. Satan ek son bann demon zot lo en kote. Zot pe veye ki ou pou fer e zot pe dir ki ou pou abandonnen. Lo lot kote, i annan Zeova, nou Lerwa Zezi Kri, bann Kretyen swazir ki’n resisite e plizyer milye lanz. Zot osi zot vwar ki i pa fasil pour ou, me zot, zot pe bat lanmen, pe kriye pour ankouraz ou pour kontinyen! I en lazwa pour zot vwar ki ou kapab andire e reste fidel avek Zeova. Apre sa, ou tann Zeova dir ou: “Vin saz, mon garson e rezouir mon leker, pour ki mon a kapab reponn sa enn ki provok mwan.”​—Proverb 27:11.

10. Parey Zezi, ki ou kapab konsantre lo la anmezir ki ou pe andir bann leprev?

¹⁰ Konsantre lo rekonpans ou landirans. Meton ou pe dray ou loto tousel  aswar. Dan milye semen, loto i tenny avek ou. Ou dan en nespes bwa kot napa personn. Ou esey bat lakle detrwa fwa, me loto pa marse menm. Pli move, napa okenn mekanisyen dan sa landrwa. Me apre ou rapel ki enn ou zanmi ki en mekanisyen i reste dan sa lot distrik e si ou esey pous ou loto ziska kot li, i pou kapab aranze. Lavi i kapab parey sa vwayaz. Kekfwa ou bezwen pas par bann moman vreman difisil e ou santi ki sa bann problenm i tro bokou pour ou. Petet menm Zezi ti santi koumsa. Ler i ti lo poto martir, i ti ganny imilye e i ti dan en ta douler. Sa ti bezwen sa moman pli difisil dan son lavi! Kwa ki ti ed li andire? Labib i dir ki i ti reflesir lo “lazwa ki i merite.” (Ebre 12:2, 3) Zezi ti konsantre lo rekonpans son landirans, sirtou, ki i ti pou ede sanktifye non Bondye e ede siport son drwa pour dirize. I ti konnen ki sa leprev pa ti pou dir pour lontan e ki son rekonpans dan lesyel ti pou dir pour touzour. Ozordi, bann leprev ki ou pas atraver i kapab afekte ou en kantite e fer ou soufer, me zis rapel ki zot pa pou dir pour touzour.

11. Akoz nou devret pran aker leksperyans “bann ki’n andire”?

¹¹ Nou pa bezwen andir nou tousel. Zapot Pyer ti ekri bann Kretyen pour ankouraz zot pour andir bann leprev sorti kot Satan. I ti ekri: “Reste ferm dan lafwa e reziste li, parski zot konnen ki tou zot bann frer dan lemonn antye pe pas par menm soufrans.” (1 Pyer 5:9) Leksperyans “bann ki’n andire” i montre nou ki mannyer pour reste fidel, i donn nou lasirans ki nou kapab reisi e i ed nou rapel ki nou fidelite pou ganny rekonpanse. (Zak 5:11, NW) Annou vwar detrwa legzanp. ^[1]​—Vwar lezot not.

12. Ki nou kapab aprann avek legzanp bann seriben ki ti ganny mete Edenn?

¹² Bann seriben i bann lanz ki annan en o pozisyon. Apre ki Adan ek Ev ti’n fer pese, Zeova ti donn serten seriben en nouvo latas lo later, enn ki vreman diferan avek sa ki zot ti pe fer dan lesyel. Zot legzanp i kapab ansenny nou ki mannyer pour andire ler nou ganny en latas difisil. Labib i dir ki Zeova “ti met bann seriben ver les zarden Edenn e en lepe dife ki ti pe kontinyen tournen pour bar sa semen ki anmenn ver pye lavi.” ^[2](Vwar lezot not.) (Zenez 3:24) Ler nou lir Labib, nou pa vwar ki bann seriben ti konplent  oubyen santi ki zot ti tro enportan pour fer sa travay. Zot pa ti santi ki zot nanryen fer ouswa kit sa travay ale. O kontrer, zot ti fer sa travay ziska ki zot ti fini. Petet sa ti plis ki 1,600 an apre, ler Deliz ti vini.

13. Ki mannyer Zob ti kapab andir son bann leprev?

¹³ Zob, sa zonm fidel. Par ler ou kapab ofanse akoz en zanmi oubyen enn ou fanmir in dir ou en keksoz dekourazan. Oubyen i kapab ki ou vreman malad ouswa ou pe soufer akoz ou’n perdi en dimoun ki ou kontan dan lanmor. Par kont, nenport kwa ki arive, ou kapab ganny soulaze avek legzanp Zob. (Zob 1:18, 19; 2:7, 9; 19:1-3) Zob pa ti konnen akoz en sel kou i ti pe ganny tou sa bann leprev ki ti pe fer li soufer, me i pa ti zanmen bes lebra. Kwa ki ti ed li andire? Premyerman, i ti kontan Zeova e i ti per pour fer en keksoz ki Zeova pa kontan. (Zob 1:1) Zob ti anvi fer Bondye plezir dan botan e dan movetan. An plis, Zeova ti ed Zob vwar Son pwisans par koz avek li konsernan serten keksoz merveye ki I ti’n kree. Sa ti konvenk Zob plis ankor ki Zeova ti pou tir son bann leprev kan i ler. (Zob 42:1, 2) Sanmenm sa ki ti arive. “Zeova ti retir sa bann soufrans lo Zob e redonn li tou sa ki ti pour li. Zeova ti donn li de fwa plis ki sa ki i ti annan avan.” Zob ti viv en bon pe letan e i ti “satisfe avek son lavi.”​—Zob 42:10, 17.

14. Dapre 2 Korentyen 1:6, ki mannyer landirans Pol ti ed lezot?

¹⁴ Zapot Pol. Eski ou pe ganny opoze oubyen menm persekite? Eski ou en ansyen ouswa sirveyan rezyonal ki santi ki ou annan tro bokou responsabilite? Si wi, legzanp zapot Pol i kapab ed ou. Pol ti soufer akoz i ti ganny persekite e i ti toultan trakase pour bann  frer ek ser. (2 Korentyen 11:23-29) Malgre sa, Pol pa ti zanmen bes lebra e son legzanp ti ankouraz lezot. (Lir 2 Korentyen 1:6.) Pareyman, ou landirans i kapab ankouraz lezot osi pour andire.

15, 16. (a) Ki mannyer landirans i kapab “form” nou konpletman? (b) Donn legzanp ki mannyer landirans i kapab ‘form nou konpletman’?

¹⁵ Disip Zak ti ganny enspire pour ekri: “Kontinyen andire parski sa pou form zot konpletman, zot pou san defo dan tou laspe e zot pa pou mank nanryen.” (Zak 1:4, NW) Ki mannyer landirans i kapab “form” nou konpletman? Ler nou pas dan en leprev, nou remarke ki petet nou bezwen demontre plis pasyans, lapresyasyon ek lanmour. Anmezir ki nou andir sa leprev, nou pou aprann pour montre sa bann kalite plis ankor e dan sa fason nou pou amelyor nou personnalite Kretyen.

¹⁶ Vi ki landirans i kapab fer nou vin en pli bon Kretyen, nou pa ti pou anvi kas lalwa Zeova zis pourvi ki sa leprev i arete. Par egzanp, si ou pe lalit avek bann panse imoral, pa bezwen les ou ganny tante! Demann Zeova pour ed ou rezet bann move panse. Oubyen, si en manm ou fanmir pe opoz ou, pa bes lebra! Reste determinen pour kontinyen servi Zeova. Sa pou ed ou ranforsi ou konfyans dan Zeova. Pa oubliye, ki pour ganny laprouvasyon Bondye, nou bezwen andire.​—Romen 5:3-5; Zak 1:12, NW.

17, 18. (a) Donn legzanp pour eksplike akoz i enportan pour andire ziska lafen. (b) Ki ou kapab asire anmezir lafen i aprose?

¹⁷ Nou bezwen andire ziska lafen, pa zis pour en serten letan. Meton en bato pe koule. Pour sirviv, bann pasaze i bezwen naze ziska lo lans. Sa dimoun ki abandonnen ler i konmans naze pou noye. Sa enn ki abandonnen zis avan i ariv lo lans osi pou noye. Alor si nou anvi viv dan nouvo lemonn, nou bezwen kontinyen andire. Annou annan menm latitid ki zapot Pol ki ti dir: “Nou pa perdi kouraz.”​—2 Korentyen 4:1, 16.

¹⁸ Parey Pol, nou asire ki Zeova pou ed nou andire ziska lafen. Pol ti ekri: “Nou sorti avek laviktwar konplet par sa enn ki’n kontan nou. Mon annan sa lasirans ki ni lanmor, ni lavi, ni bann lanz, ni bann pouvwar, ni letan prezan, ni lavenir, ni okenn pisans, ni bann zabitan dan lemonn ki anler, ni dan lemonn ki anba, ni okenn lezot kreatir pa pou zanmen kapab separ nou avek lanmour Bondye dan Kris-Zezi nou Senyer.” (Romen 8:37-39) Wi, par ler nou pou fatige. Me annou touzour imit Gideonn ek son bann solda. Zot ti fatige, me zot pa ti zanmen bes lebra. “Zot ti kontinyen tay deryer zot”!​—Ziz 8:4.