1-3. (a) Ki mannyer bann Kretyen in montre ki zot enpasyan pour zwenn ansanm? (Vwar portre anler.) (b) Ki nou pou vwar dan sa lartik?

LER Corinna ti annan 17 an, son manman ti ganny arete e ganny anvoye byen lwen dan en kan kot i ti ganny forse pour travay. Pli tar, Corinna li i ti ganny anvoye Siberi ki ti byen lwen avek kot i ti reste. Laba i ti travay lo en laferm e ganny trete parey en lesklav. Par ler i ti ganny forse pour travay deor dan sa gro lafreser san ase lenz pour sof li. Me kantmenm sa, Corinna ek en lot ser ti deside ki zot ti pou fer tou sa ki zot ti kapab pour kit sa laferm e al renyon.

² Corinna ti dir: “Nou ti kit kot nou ti travay aswar e marse ziska kot en stasyon tren ki ti 25 kilomet avek nou. Tren ti pas de-z-er bomaten e nou ti bezwen reste dan tren pour sis erdtan avan ki nou ti debarke e mars 10 kilomet ziska kot lasal.” Corinna ti vreman kontan ki i ti’n fer sa traze. I ti dir: “Kot lasal, nou ti etidye Latour Veyer  e sant bann kantik Rwayonm. I ti en leksperyans vreman ankourazan ki ti fortifye nou lafwa.” Sa de ser ti retourn lo laferm trwa zour pli tar, san ki sa fermye ti’n remarke ki zot pa ti la.

³ Pep Zeova in toultan enpasyan pour zwenn ansanm. Par egzanp, bann Kretyen dan premye syek ti enpasyan pour zwenn ansanm pour ador Zeova e aprann konn li. (Akt 2:42, NW) Byensir, i tre probab ki ou osi ou enpasyan pour al lasal. Me parey tou ou bann frer ek ser, ou kapab vwar li difisil pour asiste renyon regilyerman. Petet ou bezwen travay pour plizyer erdtan ouswa ou annan bokou keksoz pour fer oubyen ou toultan fatige. Alor, kwa ki pou ed nou fer tou sa ki nou kapab pour asiste renyon? ^[1](Vwar lezot not.) Ki mannyer nou kapab ankouraz nou bann etidyan Labib ek lezot pour asiste nou bann renyon regilyerman? Sa lartik pou eksplike akoz asiste renyon (1) i bon pour nou, (2) i ed lezot e (3) i fer plezir Zeova. ^[2]​—Vwar lezot not.

4. Ki mannyer ler nou zwenn ansanm sa i ed nou aprann plis lo Zeova?

⁴ Renyon i ansenny nou. Sak renyon i ed nou konn plis lo Zeova. Par egzanp, pa tro lontan pase, laplipar kongregasyon ti etidye sa liv Apros avek Zeova dan Letid Labib Kongregasyon. Ki mannyer ou ti santi ler nou ti diskit lo bann kalite Zeova? Ki mannyer ou ti santi ler ou ti tann bann frer ek ser eksprim zot santiman pour li? San dout, sa ti fer ou kontan Zeova plis ankor. Dan bann renyon, nou osi aprann plis lo Labib ler nou konsantre pandan ki bann diskour ek demonstrasyon pe ganny fer e ler nou ekout byen kan Labib pe ganny lir. (Neemya 8:8) An plis, mazin lo tou sa ki nou aprann sak semenn ler nou prepar lektir Labib pour renyon e tann sa ki lezot in aprann dan sa lektir.

5. Ki mannyer bann renyon in ed ou aplik sa ki ou’n aprann dan Labib e amelyor ou fason prese?

⁵ Bann renyon i montre nou ki mannyer pour aplik sa ki nou aprann dan Labib. (1 Tesalonisyen 4:9, 10) Par egzanp, eski ou’n deza asiste en Letid Latour Veyer ki ti fer ou anvi fer plis dan ou servis pour Zeova, pour amelyor ou lapriyer oubyen pour pardonn en frer oubyen en ser? Sa renyon ki nou gannyen dan lasemenn i montre nou ki mannyer pour anons sa bon nouvel e ki mannyer pour ed lezot konpran laverite sorti dan Labib.​—Matye 28:19, 20.

6. Ki mannyer nou bann renyon i ankouraz nou e ed nou reste ferm?

⁶ Renyon i ankouraz nou. Lemonn Satan pe sey afeblir nou lafwa e i kapab fer nou strese e dekouraze. Me nou  bann renyon i ankouraz nou e donn nou lafors pour kontinyen servi Zeova. (Lir Akt 15:30-32.) Souvandfwa, nou diskit lo fason ki bann profesi Labib in ganny akonplir. Sa i kapab ed nou pli asire ki bann promes Zeova pour lavenir pou vin vre. Nou bann frer ek ser i ankouraz nou ler zot fer bann prezantasyon e osi ler zot reponn e loue Zeova par sant avek tou zot leker. (1 Korentyen 14:26) Deplis, ler nou koz avek zot avan e apre renyon, nou santi nou bokou pli mye akoz nou annan bokou zanmi ki vreman enterese avek nou.​—1 Korentyen 16:17, 18.

7. Akoz i sitan enportan pour asiste nou bann renyon?

⁷ Dan bann renyon, nou ganny led lespri sen Bondye. Zezi i servi sa lespri sen pour diriz kongregasyon. Anfet, i ti dir nou ki nou devret “ekout sa ki Lespri i dir avek bann [“kongregasyon,” NW].” (Revelasyon 2:7) Lespri sen i kapab ed nou reziste tantasyon e pres avek lardyes. I osi kapab ed nou fer bann bon desizyon. Sanmenm sa nou devret fer tou sa ki nou kapab pour asiste nou bann renyon e ganny led lespri sen Bondye.

8. Ler nou bann frer ek ser i vwar nou kot renyon e tann nou reponn e sante, ki mannyer sa i ed zot? (Vwar bwat “ I toultan santi li pli byen apre.”)

⁸ Dan bann renyon, nou annan loportinite pour montre nou bann frer ek ser ki nou kontan zot. I annan bokou dan nou kongregasyon ki pe fer fas avek bann gro problenm. Zapot Pol ti ekri: “Annou demontre en lentere senser dan lezot.” (Ebre 10:24, 25, NW) En fason pour montre ki nou enterese avek nou bann frer ek ser i ler nou zwenn ansanm pour ankouraz kanmarad. Ler nou asiste renyon, nou montre nou bann frer ek ser ki nou anvi pas letan avek zot, koz avek zot e konnen ki mannyer zot ete. Nou osi ankouraz zot ler nou reponn e sant bann kantik avek tou nou leker.​—Kolosyen 3:16.

9, 10. (a) Eksplike ki mannyer parol Zezi dan Zan 10:16 i ed nou konpran akoz i enportan pour zwenn avek nou bann frer ek ser. (b) Si nou asiste renyon regilyerman, ki mannyer nou kapab ed en dimoun ki’n ganny rezete par son fanmir?

 ⁹ Ler nou asiste renyon, nou ed kongregasyon reste pros avek kanmarad. (Lir Zan 10:16.) Zezi ti konpar li avek en berze e son bann disip en troupo mouton. Annou pran en legzanp: Si de mouton i lo en montanny, de i dan en vale e en lot i en lot landrwa, eski sa senk mouton i en troupo? Non, parski en troupo mouton i reste ansanm e swiv zot berze. Dan menm fason, nou pa devret elwanny nou avek nou bann frer ek ser e pa asiste nou bann renyon. Nou bezwen zwenn ansanm pour form parti “en sel troupo” e swiv “en sel berze.”

¹⁰ Nou bann renyon i ed nou ini konman en fanmir ki kontan kanmarad. (Psonm 133:1) Serten dan kongregasyon in ganny rezete par zot manm fanmir pros, tel parey zot paran oubyen zot frer ek ser. Me Zezi ti promet ki i ti pou donn zot en fanmir ki kontan zot e pran swen avek zot. (Mark 10:29, 30) Si ou asiste renyon regilyerman, ou kapab vin parey en papa, manman, frer oubyen ser en dimoun dan kongregasyon. Ler nou reflesir lo la, sa pou fer nou anvi fer tou sa ki nou kapab pour asiste tou nou renyon.

11. Ler nou asiste renyon, ki mannyer sa i ed nou donn Zeova sa ki i merite?

¹¹ Dan bann renyon, nou donn  Zeova sa ki i merite. Vi ki i nou Kreater, nou bezwen remersye li, onor li e loue li. (Lir Revelasyon 7:12.) Nou kapab fer sa dan renyon ler nou priy Zeova, sant pour li e koz lo li. Pa i en gran loportinite nou annan sak semenn pour ador Zeova!

12. Ki mannyer Zeova i santi ler nou obei son lord pour asiste renyon?

¹² Zeova ki’n kree nou e nou devret obei li. I’n donn nou lord pour kontinyen zwenn ansanm, espesyalman anmezir ki lafen i aprose. San dout Zeova i kontan ler nou obei sa lord. (1 Zan 3:22) I remarke ki nou vreman anvi al nou bann renyon e i apresye tou zefor ki nou fer pour al renyon.​—Ebre 6:10.

13, 14. Ki mannyer nou apros avek Zeova ek Zezi dan nou bann renyon?

¹³ Ler nou asiste renyon, nou montre Zeova ki nou anvi vin pli pros avek li ek son Garson. Dan bann renyon, nou etidye Labib e aprann ki nou devret fer e ki mannyer nou devret viv. (Izai 30:20, 21) Menm ler serten ki pa ador Zeova i vin renyon, zot realize ki Bondye pe gid nou. (1 Korentyen 14:23-25) Sa i montre ki Zeova pe diriz nou bann renyon avek son lespri sen e sa ki nou aprann dan renyon i sorti kot li. Alor ler nou asiste renyon, nou ekout sa ki Zeova i dir, nou santi son lanmour e nou vin pli pros avek li.

¹⁴ Zezi, Sef kongregasyon, ti dir: “Kot de ou trwa dimoun in rasanble an mon non, mon la omilye zot.” (Matye 18:20) Labib i osi dir ki Zezi i “mars omilye” bann kongregasyon. (Revelasyon 1:20–2:1) I kler alor ki Zeova ek Zezi i avek nou e pe fortifye nou dan bann renyon. Ki mannyer ou krwar Zeova i santi ler i vwar ou pe fer tou sa ki ou kapab pour vin pli pros avek li ek son Garson?

15. Ki mannyer asiste renyon i montre Bondye ki nou anvi obei li?

¹⁵ Ler nou asiste bann renyon, nou montre Zeova ki nou anvi obei li. Zeova pa fors nou pour fer sa ki i dir. (Izai 43:23) Alor ler nou deside obei son lord pour asiste renyon, nou montre li ki nou kontan li e ki nou krwar ki i annan drwa dir nou ki pour fer. (Romen 6:17) Par egzanp, ki nou pou fer si nou anplwayer i anvi ki nou travay en kantite ki a lafen dizour nou pa kapab asiste nou renyon regilyerman? Oubyen kekfwa gouvernman i dir ki si okenn dimoun i zwenn avek lezot pour ador Zeova, i pou bezwen pey en lanmann, al dan prizon oubyen ganny en pinisyon pli pir ankor. Ouswa parfwa i kapab arive ki nou anvi fer en lot keksoz dan plas al lasal. Dan  sa bann sityasyon, nou bezwen deside ki nou pou fer. (Akt 5:29) Me sak fwa nou deside obei Zeova, nou fer li ere.​—Proverb 27:11.

16, 17. (a) Ki mannyer nou konnen ki bann renyon ti vreman enportan pour bann Kretyen dan premye syek? (b) Ki mannyer Frer George Gangas i santi konsernan bann renyon Kretyen?

¹⁶ Apre ki bann Kretyen ti zwenn ansanm Lapannkot lannen 33, zot ti zwenn ansanm regilyerman pour ador Zeova. Zot ti “kontinyen aprann avek bann zapot, rasanble ansanm.” (Akt 2:42) Zot pa ti aret zwenn ansanm menm ler zot ti ganny persekite par gouvernman Romen e bann sef relizye Zwif. Menm si i pa ti fasil, zot ti fer tou sa ki zot ti kapab pour kontinyen zwenn ansanm.

¹⁷ Ozordi osi bann serviter Zeova i apresye bann renyon e zot kontan ler zot ale. George Gangas, ki ti en manm Konsey Direkter pour plis ki 22 an, ti dir: “Pour mwan, zwenn avek mon bann frer ek ser i enn parmi bann pli gran plezir dan lavi e en sours lankourazman. Mon kontan pour parmi bann premye pour ariv kot Lasal Rwayonm e parmi bann ki kit dernyen, si i posib. I en lazwa pour mwan koz avek pep Bondye. Ler mon avek [pep Bondye] mon santi konmsi mon dan lakour avek mon fanmir dan en paradi spirityel.” I ti azoute: “Sa ki pas premye dan mon lespri ek leker, se pour asiste renyon.”

18. Ki mannyer ou santi konsernan nou bann renyon e ki ou determinen pour fer?

¹⁸ Eski ou osi ou santi koumsa pour ador Zeova? Si wi, kontinyen fer tou sa ki ou kapab pour zwenn avek ou bann frer ek ser dan renyon, menm ler i difisil. Montre Zeova ki ou vreman santi parey Lerwa David, ki ti dir: “Zeova, mon kontan sa lakaz kot ou reste.”​—Psonm 26:8.