1, 2. (a) Ki pep Zeova i kontan pour vwar ozordi? (b) Ki mannyer bann paran Kretyen ek ansyen i kapab ed bann zenn konpran ki savedir batenm?

EN ANSYEN ti dir sa avek Christopher ki ti annan 12 an: “Mon’n konn ou depi ler ou ti ne e mon byen kontan pour tande ki ou ti a kontan batize. Mon ti a kontan demann ou, ‘Akoz ou anvi fer sa pa?’” Sa ansyen ti annan bann bon rezon pour demann sa kestyon. Nou vreman kontan pour vwar plizyer milye zenn batize tou le-z-an. (Eklezyast 12:1) Me bann paran Kretyen ek ansyen dan kongregasyon i anvi fer sir ki bann zenn i fer zot prop desizyon e ki zot konpran ki i vedir pour batize.

² Dan Labib, nou aprann ki dedikasyon ek batenm i konmansman en nouvo lavi pour en Kretyen. Sa nouvo  lavi pou anmenn bokou benediksyon sorti kot Zeova me an menm tan lopozisyon sorti kot Satan. (Proverb 10:22; 1 Pyer 5:8) Sanmenm sa, bann paran Kretyen i bezwen pran letan pour ansenny zot zanfan ki savedir vreman pour vin en disip Kris. Pour bann zenn ki zot paran pa Kretyen, bann ansyen dan kongregasyon pou ed zot avek lanmour pour konpran ki savedir dedikasyon ek batenm. (Lir Lik 14:27-30.) I demann preparasyon pour arive fini en proze konstriksyon, pareyman bann zenn i bezwen prepare avan zot batize pour zot kapab servi Zeova fidelman “ziska lafen.” (Matye 24:13) Kwa ki pou ed bann zenn determinen pour servi Zeova pour touzour? Annou vwar.

3. (a) Ki parol Zezi ek Pyer i ansenny nou lo lenportans pour batize? (Matye 28:19, 20; 1 Pyer 3:21) (b) Ki kestyon nou pou diskite e akoz?

³ Eski ou en zenn ki ti a kontan batize? Si wi, sa i en bon lobzektif! I en gran loner pour batize konman en Temwen Zeova. I osi en keksoz ki en Kretyen i bezwen fer e i en pa vreman enportan pour bann ki pou ganny sove pandan gran ladetres. (Matye 28:19, 20; 1 Pyer 3:21) Ler ou batize, ou montre ki ou’n promet pour servi Zeova pour touzour. Ou vreman anvi gard sa promes, alor sa bann kestyon swivan pou ed ou vwar si ou pare pour batenm: (1) Eski mon ase matir pour fer sa desizyon? (2) Eski sanmenm sa ki mwan mon anvi fer? (3) Eski mon konpran ki savedir dedye mon lavi avek Zeova? Annou diskit sa bann kestyon.

4, 5. (a) Ki mannyer nou konnen ki batenm pa zis pour bann dimoun ki pli vye? (b) Ki savedir en Kretyen matir?

⁴ Labib pa dir ki zis bann ki pli vye oubyen bann ki’n ariv en serten laz ki kapab batize. Nou lir sa dan Proverb 20:11: “Menm en zanfan i montre ki kalite dimoun i ete atraver son bann aksyon, si son kondwit i pir e drwat.” Alor menm en zanfan i kapab konpran ki savedir fer sa ki byen e ki savedir dedye son lavi avek son Kreater. Alor, batenm i en pa enportan e apropriye pour en zenn ki’n demontre ki i matir e ki’n dedye son lavi avek Zeova.​—Proverb 20:7.

⁵ Ki savedir matirite? Matirite pa toultan pe refer avek laz oubyen devlopman fizik en dimoun. Labib i dir ki bann dimoun matir in antrenn zot “abilite pour byen zize” pour konn fer diferans ant sa ki byen ek sa ki  mal. (Ebre 5:14, NW) En dimoun matir i konnen kwa ki byen e dan son leker i’n fini deside pour fer li. Alor i pa fasil pour li ganny enfliyanse pour fer sa ki mal. Deplis, i pa bezwen ki toultan en lot dimoun i dir li ki i bezwen fer sa ki byen. I normal pour ekspekte ki en zenn ki anvi batize pou fer sa ki byen, menm ler son paran oubyen en lot adilt pa avek li.​—Konpar Filipyen 2:12.

6, 7. (a) Dekrir bann defi ki Danyel ti rankontre ler i ti Babilonn. (b) Ki mannyer Danyel ti demontre ki i ti matir?

⁶ Eski i vreman posib pour en zenn demontre sa kalite matirite? Annou pran legzanp Danyel. I posib ki i ti en adolesan ler i ti ganny pran avek son paran e anvoye Babilonn. En sel kou, Danyel ti trouv li parmi bann dimoun ki pa ti obei bann komannman Bondye. Me annou egzamin son sityasyon en pti pe plis. An Babilonn i ti ganny trete konman en dimoun spesyal. I ti enn parmi detrwa zenn ki ti’n ganny swazir pour servi lerwa. (Danyel 1:3-5, 13) I paret ki Danyel ti annan en bon pozisyon Babilonn, enn ki i pa ti pou’n zanmen reve pour gannyen an Izrael.

⁷ Alor, ki mannyer Danyel ki ti zenn sa letan ti reazir? Eski i ti les bann dimoun Babilonn enfliyans li oubyen afebli son lafwa? Ditou! Labib i dir ki ler Danyel ti Babilonn, i ti deside “dan son leker ki i pa ti pou sali son lekor,” setadir ki i ti pou reste lwen avek okenn keksoz ki annan  pour fer avek fo ladorasyon. (Danyel 1:8) Pa sa i montre en vre matirite!

8. Ki ou kapab aprann avek legzanp Danyel?

⁸ Ki ou kapab aprann avek legzanp Danyel? En zenn ki matir pou ferm konsernan son krwayans, menm dan bann sityasyon difisil. I pa pou parey en kanmeleon, sa lezar ki sanz son kouler dapre son lanvironnman. Non, i pa azir konman en zanmi Bondye kot Lasal Rwayonm me an menm tan en zanmi lemonn kot lekol. O kontrer, i pou reste fidel menm ler i ganny teste.​—Lir Efezyen 4:14, 15.

9, 10. (a) Ki byenfe en zenn i kapab gannyen ler i reflesir lo fason ki i ti reazir ler son lafwa ti ganny teste resaman? (b) Ki savedir batenm?

⁹ Byensir, nou tou nou enparfe. Bann zenn e osi bann adilt i fer fot par ler. (Eklezyast 7:20) Me si ou anvi batize, i ti a byen ki ou konnen ki kantite ou determinen pour obei bann lord Zeova. Demann ou lekor, ‘Eski mon’n obei Zeova pour en serten letan?’ Reflesir lo ki mannyer ou ti reazir dernyen fwa ki ou lafwa ti ganny teste. Eski ou ti kapab deside kwa ki ti byen pour fer? Parey Danyel, eski en dimoun in ankouraz ou pour servi ou abilite dan lemonn Satan? Ler en keksoz koumsa i tant ou, eski ou kapab konpran ki mannyer Zeova i oule ou azir?​—Efezyen 5:17.

¹⁰ Akoz i enportan pour konn larepons sa bann kestyon personnel? Parski zot pou ed ou vwar ki batenm i en keksoz ki vreman serye. Batenm i montre lezot ki ou’n promet Zeova en keksoz vreman enportan. Ou promet li ki ou pou kontan e servi li avek tou ou leker pour touzour. (Mark 12:30) Tou dimoun ki batize i devret determinen pour gard son promes avek Zeova.​—Lir Eklezyast 5:4, 5. ^[1](Vwar lezot not.)

11, 12. (a) Ki en dimoun i bezwen fer sir ler i pe mazin pour batize? (b) Kwa ki pou ed ou annan en bon pwennvi lo laranzman Zeova pour batenm?

¹¹ Labib i dir ki tou pep Zeova, menm bann zenn, ti pou servi li “volonterman.” (Psonm 110:3) Alor en dimoun ki ti a voudre batize i bezwen fer sir ki sanmenm sa ki li menm li i anvi. Sa i vedir ki ou bezwen konn byen sa ki ou anvi, sirtou si ou’n ganny elve dan laverite.

¹² Anmezir ki ou’n grandi, ou’n vwar bokou dimoun batize, petet menm serten parmi ou bann zanmi oubyen frer ek ser. Me fer atansyon ki ou pa konmans santi ki ou bezwen batize zis akoz ou’n ariv en serten laz oubyen akoz tou lezot dimoun pe batize. Ki mannyer ou kapab fer sir ki ou annan menm pwennvi avek Zeova konsernan batenm? Pran letan pour  reflesir lo akoz batenm i sitan enportan. Ou pou trouv bann bon rezon dan sa lartik ek sa enn ki swiv.

13. Ki mannyer ou kapab konnen si sa desizyon pour batize i sorti dan ou leker?

¹³ En fason ki ou kapab konnen si sa desizyon pour batize i sorti dan ou leker, se pour egzamin ou bann lapriyer. Eski ou priy Zeova souvan? Eski ou priy lo bann keksoz spesifik? Larepons sa bann kestyon pou montre ou ki kalite relasyon ou annan avek Zeova. (Psonm 25:4) Souvandfwa Zeova i reponn nou lapriyer atraver Labib. Alor en lot fason ki ou kapab konnen si ou vreman anvi vin pli pros avek Zeova e servi li avek tou ou leker, se pour egzamin ou progranm letid. (Zozye 1:8) Demann ou lekor: ‘Eski mon fer mon letid personnel regilyerman? Eski mon kontan pour partisipe pandan Ladorasyon Fanmir?’ Larepons sa bann kestyon pou ed ou vwar si ou desizyon pour batize i vreman sa ki ou ou anvi.

14. Dekrir diferans ant dedikasyon ek batenm.

¹⁴ Serten zenn pa vreman konpran diferans ant dedikasyon ek batenm. Serten i dir ki zot in fini dedye zot lavi avek Zeova me ki zot pa ankor pare pour batize. Eski sa i posib? Dedikasyon i en lapriyer kot ou promet Zeova pour servi li pour touzour. Ler ou batize, ou montre lezot ki ou’n fini fer en dedikasyon avek Zeova. Alor avan ki ou batize ou bezwen konpran ki savedir dedye ou lavi avek Bondye.

15. Ki savedir dedikasyon?

¹⁵ Ler ou dedye ou lavi avek Zeova, ou dir li ki aprezan ou pour li. Ou promet ki servi li i pou sa keksoz pli enportan dan ou lavi. (Lir Matye 16:24.) En tel promes avek Bondye i vreman serye! (Matye 5:33) Alor ki mannyer ou montre ki ou konnen ki ou nepli pour ou menm, me ki aprezan ou pour Zeova?​—Romen 14:8.

16, 17. (a) Servi en legzanp pour eksplike ki savedir aret viv pour ou lekor. (b) Ler en dimoun i fer en dedikasyon, ki i pe vreman dir?

¹⁶ Annou pran en legzanp. Meton en zanmi i fer ou kado en loto. I donn ou papye transfer e i dir: “Lala, sa loto i pour ou.” Me apre i dir ou: “Mon pou gard lakle e mwan ki pou dray loto, pa ou.” Ki mannyer ou ti pou santi konsernan sa kado? Ki mannyer ou ti pou santi anver sa zanmi ki’n donn ou sa loto?

¹⁷ Ler en dimoun i dedye son lavi avek Zeova, i dir Bondye: “Mon pe donn ou mon lavi. Mon pour ou.” Zeova i annan drwa ekspekte ki sa dimoun i gard son promes. Me ki pou arive si dan kasyet sa dimoun i konmans dezobei Zeova par pwente avek en dimoun ki pa ador Bondye? Oubyen ki pou arive si sa dimoun i aksepte en travay ki diminyen lakantite letan ki i kapab pase dan predikasyon oubyen ki fer li mank lasal souvan? Dan sa ka sa dimoun pa pe gard son promes avek Zeova.  I konmsi i’n gard lakle sa loto. Ler nou dedye nou lavi avek Zeova, nou dir avek li, “Mon lavi i pour ou, pa pour mwan.” Alor nou pou toultan fer sa ki Zeova i anvi menm ler i pa sa ki nou nou anvi. Annou imit Zezi, ki ti dir: “Mon’n sorti dan lesyel pour vin fer, non pa mon prop lavolonte, me lavolonte sa enn ki’n anvoy mwan.”​—Zan 6:38.

18, 19. (a) Ki mannyer sa ki Rose ek Christopher in dir i montre ki batenm i en gran privilez ki anmenn bokou benediksyon? (b) Ki mannyer ou santi anver sa privilez pour batize?

¹⁸ I kler ki batenm i en desizyon serye. I en gran privilez pour dedye nou lavi avek Zeova e batize. Bann zenn ki kontan Zeova e ki konpran ki savedir dedikasyon, pa ezite pour dedye zot lavi avek Bondye e batize. Zot pa regret zot desizyon. Rose, en adolesan ki’n batize, i dir: “Mon kontan Zeova e napa en lot keksoz ki kapab fer mwan pli ere ki servi li. Mon desizyon pour batize i sa enn ki mon’n pli asire ki tou lezot desizyon ki mon’n deza fer dan mon lavi.”

¹⁹ Ki ti arive avek Christopher ki nou’n koz lo la o konmansman? Ki mannyer i santi konsernan son desizyon pour batize a laz 12 an? I dir ki i byen kontan ki i ti pran sa desizyon. I ti konmans servi konman en pionye ordiner a laz 17 an e i ti vin en asistan ministeryel a laz 18 an. Ozordi i pe servi dan Betel! I dir: “Batize ti sa bon desizyon. Mon lavi i ranpli avek bann travay satisfezan pour Zeova ek son lorganizasyon.” Si ou ti a kontan batize, ki mannyer ou kapab prepare? Nou pou reponn sa kestyon dan sa lot lartik.