Si sa ti vre, mazinen ki lefe sa ti pou annan lo nou lavi. Par egzanp, garson en frer ti komet swisid. Leker son papa ti kase. Dan li menm i ti mazinen si Zeova in get lavenir e deside ki li ek son madanm ti pou kapab andir sa kalite maler. Dan sa lemonn, bokou nou pou fer fas avek maler. Alor, eski nou devret krwar ki Zeova i kontrol tou sa ki arive dan nou lavi?

Si nou get byen 1 Korentyen 10:13, nou pou vwar ki Labib pa dir ki Zeova i konn davans sa ki nou kapab andire e apre deside ki leprev nou pou gannyen. Akoz nou dir sa? Annou vwar kat rezon.

Premyerman, Zeova in donn imen sa liberte pour swazir. I anvi nou fer nou prop desizyon. (Deterononm 30:19, 20; Zozye 24:15) Si nou swazir pour fer bann desizyon ki fer plezir Zeova nou kapab depan lo li pour gid nou. (Proverb 16:9) Me ler nou fer bann move desizyon, nou bezwen sibir son konsekans. (Galat 6:7) Alor si Zeova i swazir ki leprev nou pou pas atraver, eski nou vreman annan liberte pour swazir?

Dezyenmman, Zeova pa protez nou kont “levennman san ekspekte.” (Eklezyast 9:11, NWT) En dimoun i kapab ganny en aksidan zis akoz i pa dan sa landrwa apropriye e ni dan sa bon moman. Zezi ti koz lo en lensidan kot 18 dimoun ti mor ler en latour ti tonm lo zot. I ti fer kler ki pa Bondye ki ti responsab. (Lik 13:1-5) I pa lozik pour krwar ki avan en aksidan i arive, Bondye i deside lekel ki pou viv oubyen lekel ki pou mor.

Trwazyenmman, sakenn ant nou i bezwen gard son lentegrite avek Zeova. Satan ti dir Zeova ki son bann serviter i servi Li akoz sa ki Li i donn zot. Satan ti dir ki nou pa pou reste fidel avek Zeova si nou fer fas avek bann leprev. (Zob 1:9-11; 2:4; Revelasyon 12:10) Si Zeova ti protez nou kont serten leprev, i pou paret ki sa ki Satan ti dir i vre.

Katriyenmman, Zeova pa swazir pour konn tou keksoz ki pou arive avek nou davans. I vre ki Zeova i kapab konnen ki pou arive dan lavenir si i anvi. (Izai 46:10) Me Labib i montre ki i pa deside konn tou keksoz davans. (Zenez 18:20, 21; 22:12) Zeova i en Bondye lanmour e drwat, alor i pa enterfer avek nou liberte pour fer nou prop swa.—Deterononm 32:4; 2 Korentyen 3:17.

Ki Pol ti pe esey dir ler i ti dir ki Zeova “pa pou permet ki zot ganny tante plis ki zot kapab siporte”? La, Pol ti pe dekrir sa ki Zeova i fer pandan leprev, me pa avan. * (Vwar not.) Si nou met konfyans dan Zeova, i pou ed nou fer fas avek nenport ki leprev. (Psonm 55:22) Aprezan nou pou vwar de rezon akoz Pol ti kapab dir sa.

Premye rezon i parski “napa tantasyon ki zot in gannyen ki lezot pa’n gannyen.” Osi lontan ki nou pe viv dan sa lemonn Satan nou tou nou pou pas dan bann sityasyon difisil e menm bann trazedi. Me si nou depan lo Zeova,  nou kapab andir sa bann leprev e reste fidel. (1 Pyer 5:8, 9) Dan bann premye verse sapit 10 dan 1 Korentyen, Pol ti ekrir konsernan serten tes bann Izraelit ti pas atraver dan dezer. (1 Korentyen 10:6-11) Bann ki ti depan lo Zeova ti kapab andir sa bann leprev. Me serten ti dezobei Zeova. Zot pa ti reste fidel akoz zot pa ti depan lo li.

Dezyenm rezon i parski “Bondye i fidel.” Ki sa i vedir? Ler nou vwar ki mannyer Zeova in pran swen avek son bann serviter dou dilon listwar, nou vwar ki i ti fidelman ed “bann ki kontan li e ki gard son komannman.” (Deterononm 7:9) Nou aprann ki Zeova i toultan gard son bann promes. (Zozye 23:14) Nou kapab asire ki (1) Zeova pa pou permet okenn leprev vin tro difisil ki nou pa kapab andire e (2) i pou ‘donn nou semen sorti.’

Ki mannyer Zeova i donn “semen sorti” bann ki depan lo li? I vre i kapab tir leprev. Me gard antet ki Pol ti dir ki Zeova pou “donn zot semen sorti pour ki zot kapab andire.” Alor, Zeova i souvan fer semen sorti pour nou par donn nou lafors pour reste fidel. Annou vwar serten fason ki i fer sa.

• Zeova i “rekonfort nou dan tou nou bann leprev.” (2 Korentyen 1:3, 4) I kapab kalme nou lespri, leker ek lemosyon atraver Labib, lespri sen e lesklav fidel.—Matye 24:45; Zan 14:16, not; Romen 15:4.

• Zeova i kapab servi son lespri sen pour gid nou. (Zan 14:26) Lespri sen i kapab ed nou mazin bann resi Labib ek bann prensip pour ki nou kapab fer bann desizyon saz.

• Zeova i kapab servi son bann lanz pour ed nou.—Ebre 1:14.

• Zeova i kapab servi nou bann frer ek ser pour ed nou. Zot kapab fortifye nou par sa ki zot dir e fer.—Kolosyen 4:11.

Alor, ki nou’n aprann avek parol Pol dan 1 Korentyen 10:13? Zeova pa swazir ki leprev nou pas atraver. Me nou kapab asire si nou met konfyans dan Zeova nou kapab andir nenport leprev. Nou konnen ki Zeova pou toultan donn nou en semen sorti pour ki nou kapab reste fidel avek li.