1. Ki bann bon keksoz ki ranson i fer nou gannyen?

SAKRIFIS Zezi Kri oubyen ranson i anmenn bokou benediksyon. Par egzanp, gras a ranson, bann zanfan Adan ki kontan ladrwatir pou kapab form parti fanmir Bondye en zour. En lot benediksyon ki nou kapab gannyen, i en lavi ere pour touzour. An plis ki sa, ranson i relye avek bann keksoz ki enportan pour bann ki dan lesyel ek lo later.—Ebre 1:8, 9.

2. (a) Ki bann keksoz enportan dan lesyel ek lo later ki Zezi ti enkli dan son lapriyer? (Vwar portre o konmansman sa lartik.) (b) Ki nou pou diskite dan sa lartik?

² Apepre de-z-an avan ki Zezi ti mor, i ti ansenny son bann disip pour priy koumsa: “Nou Papa ki dan lesyel, ki ou non i ganny sanktifye. Ki ou Rwayonm i vini. Ki ou lavolonte i ganny fer lo later parey dan lesyel.” (Matye 6:9, 10) Annou vwar ki mannyer ranson i relye avek sanktifikasyon non Zeova, dominasyon Rwayonm Bondye ek fer lavolonte Bondye.

3. Ki sa non Zeova i reprezante? Ki mannyer Satan ti sali non Zeova?

³ Premyerman, Zezi ti priye pour ki non Zeova i ganny sanktifye oubyen ganny konsidere konman sen. Sa non Zeova, i reprezant Zeova li menm, sa ki i ete. I sa Personnaz pli drwat e pli pwisan dan liniver antye. Zezi ti osi apel li “Papa sen.” (Zan 17:11) Vi ki Zeova i sen, tou sa ki i fer ek tou lalwa ki i fer i sen. Me dan zarden Edenn, Satan ti kestyonn drwa Bondye pour etabli bann standar pour bann imen. I ti koz manti lo Zeova e i ti sali non oubyen repitasyon Bondye.—Zenez 3:1-5.

4. Ki mannyer Zezi ti demontre ki non Bondye i sen?

⁴ Kontrerman avek Satan, Zezi ti kontan non Zeova e i ti fer tou sa ki i ti kapab pour sanktifye sa non. (Zan 17:25, 26) Ki mannyer i ti fer sa? Par son kondwit ek lansennyman, Zezi ti ed lezot pour vwar ki bann standar Zeova i byen e tou sa ki i demann nou fer i pour nou prop dibyen. (Lir Psonm 40:8-10.) Zezi ti reste fidel menm ler Satan ti fer li soufer atraver en lanmor martir. I ti prouve ki i posib pour en zonm parfe obei Zeova konpletman.

5. Ki mannyer nou kapab demontre ki non Zeova i sen?

⁵ Ki mannyer nou kapab demontre ki nou kontan non Zeova? Par nou kondwit. Zeova i dir nou ki nou devret sen. (Lir 1 Pyer 1:15, 16.) Sa i vedir ki nou ador e obei zis li avek tou nou leker. Menm ler nou ganny persekite, nou fer tou nou posib pour viv dapre sa ki i ansenny nou. Ler nou viv dapre standar Zeova, sa i anmenn laglwar lo son non. (Matye 5:14-16) Nou prouve ki son lalwa i bon e ki Satan i en manter. Nou pa parfe, alor nou pou fer bann fot. Me ler nou fer fot, nou repantir e fer nou mye pour aret fer bann keksoz ki dezonor non Zeova.—Psonm 79:9.

6. Akoz Zeova i kapab aprouv nou konman drwat menm si nou enparfe?

⁶ Ki swa nou bann kretyen swazir oubyen “lezot mouton,” Zeova i pardonn nou pese si nou annan lafwa dan ranson. I aksepte bann ki’n dedye zot lavi avek li konman son bann adorater. I aprouv konman drwat bann Kretyen swazir konman son bann garson e “lezot mouton” konman son bann zanmi. (Zan 10:16; Romen 5:1, 2; Zak 2:21-25) Alor, menm la konmela, ranson i fer li posib pour nou annan en bon relasyon avek nou Papa e pour sanktifye son non.

7. Ki benediksyon ki ranson i fer posib pour gannyen?

⁷ Dan sa model lapriyer, Zezi ti dir: “Ki ou Rwayonm i vini.” Ki mannyer ranson i relye avek Rwayonm Bondye? Dan Rwayonm Bondye, oubyen gouvernman, i annan Zezi ek sa 144,000 Kretyen ki’n ganny swazir parmi bann imen. Ranson i fer li posib pour sa bann imen al dan lesyel apre ki zot in resisite. (Revelasyon 5:9, 10; 14:1) Zot pou vin bann lerwa ek pret e zot pou diriz later ansanm avek Zezi pour mil an. Pandan sa letan, Zeova pou servi Rwayonm  pour fer later vin en paradi e tou imen vin parfe. Bann serviter Zeova dan lesyel e lo later pour vin en sel fanmir. (Revelasyon 5:13; 20:6) Zezi pou detri Satan e retir tou sa bann dega ki Satan in fer.—Zenez 3:15.

8. (a) Ki mannyer Zezi ti ed son bann disip konpran lenportans Rwayonm Bondye? (b) Ki mannyer nou siport sa Rwayonm ozordi?

⁸ Zezi ti ed son bann disip pour konpran lenportans Rwayonm Bondye. Ki mannyer? Deswit apre son batenm, Zezi ti konmans anons “bon nouvel Rwayonm Bondye” partou kot i ti ale. (Lik 4:43) I ti osi dir son bann disip ki zot ti pou vin son bann temwen “dan bann landrwa pli elwannyen lo later.” (Akt 1:6-8) Ozordi, atraver travay Rwayonm, bann dimoun i annan sa loportinite pour aprann konsernan ranson e pour vin bann sitwayen Rwayonm Bondye. Nou montre ki nou bann sitwayen fidel par ed bann Kretyen swazir pour anons sa bon nouvel dan lemonn antye.—Matye 24:14; 25:40.

9. Akoz nou kapab annan konfyans ki Zeova pou akonpli son plan pour bann imen?

⁹ Ki Zezi ti oule dir ler i ti dir: “Ki ou lavolonte i ganny fer”? Ler Zeova i dir ki en keksoz pou arive, i pou arive. (Izai 55:11) Rebelyon Satan pa ti kapab anpes Zeova fer sa ki i oule. Ki ti lavolonte Zeova pour later? I ti oule ki later i ranpli avek bann zanfan parfe Adan ek Ev. (Zenez 1:28) Si Adan ek Ev ti mor san ki zot ti’n fer zanfan, plan Bondye pour ranpli later avek zot zanfan pa ti pou’n ganny akonplir. Alor, Zeova ti les zot fer zanfan. Ranson i donn tou bann ki demontre lafwa loportinite pour vin parfe e pour viv pour touzour. Zeova i kontan bann dimoun e i oule ki nou annan sa lavi merveye ki i ti’n deside pour donn nou depi o konmansman.

10. Ki byenfe bann dimoun mor i gannyen atraver ranson?

¹⁰ Ki pou arive avek sa plizyer bilyon dimoun ki’n mor san ki zot ti konn Bondye? Zeova i oule ki dimoun i viv. Alor, i pou redonn lavi tou bann ki’n mor. Ranson i fer posib ki zot reganny lavi. Koumsa, zot pou kapab aprann konn Zeova e pour viv pour touzour. (Akt 24:15) Zeova i Sours lavi. Ler Zeova i donn lavi bann ki’n mor, i vin zot Papa. (Psonm 36:9) Dan sa model lapriyer, Zezi ti dir ki Zeova i “nou Papa ki dan lesyel.” (Matye 6:9) Zeova in donn Zezi sa rol vreman enportan e sa i pour resisit bann mor. Zezi ti dir: “Mwan menm rezireksyon ek lavi.”—Zan 6:40, 44; 11:25.

11. Ki lavolonte Bondye pour “gran lafoul”?

¹¹ Zezi ti dir: “Nenport dimoun ki fer lavolonte Bondye, se li ki mon frer ek mon ser ek mon manman.” (Mark 3:35) I lavolonte Bondye ki dimoun sorti dan tou nasyon, tribi ek langaz i vin son bann adorater. Zot ganny dekrir konman “en gran lafoul ki personn pa ti kapab konte.” Zot demontre lafwa dan ranson e zot oule obei Bondye. Zot loue li e dir: “Nou’n ganny sove gras a nou Bondye, sa Enn ki lo tronn e gras a sa Pti Mouton.”—Revelasyon 7:9, 10.

12. Ki nou aprann konsernan plan Zeova pour bann imen atraver lapriyer Zezi?

 ¹² Nou’n aprann bokou lo Zeova ek son plan pour bann imen avek model lapriyer Zezi. Premyerman, nou bezwen fer tou sa ki nou kapab pour sanktifye non Zeova e donn li loner. (Izai 8:13) I posib pour nou ganny sove gras a sakrifis Zezi, ki osi anmenn loner lo non Bondye. Anfet, non Zezi i vedir “Zeova i delivrans.” Dezyenmman, Zeova pou servi son Rwayonm pour donn tou bann byenfe ki posib atraver ranson avek bann imen obeisan. Trwazyenmman, nou annan konfyans ki nanryen pa pou kapab anpes lavolonte Zeova ganny fer.—Psonm 135:6; Izai 46:9, 10.

13. Akoz nou batize?

¹³ En fason enportan ki nou montre ki nou apresye ranson i par dedye nou lavi avek Zeova e batize. Ler nou fer sa, nou montre ki nou annan lafwa dan ranson e ki “nou pour Zeova.” (Romen 14:8) Ler nou batize, nou demann Zeova pour donn nou “en konsyans kler.” (1 Pyer 3:21) Zeova i reponn nou par donn nou bann byenfe ki vin avek ranson e nou asire ki i pou donn nou tou keksoz ki i’n promet.—Romen 8:32.

14. Akoz Zeova i donn nou sa lord pour kontan lezot?

¹⁴ Tou sa ki Zeova i fer pour nou i akoz i kontan nou. I son lavolonte ki son bann adorater i imit li e kontan kanmarad. (1 Zan 4:8-11) Ler nou demontre lanmour anver bann dimoun, nou montre ki nou anvi “vin zanfan [nou] Papa ki dan lesyel.” (Matye 5:43-48) Sa de pli gran komannman i premyerman, kontan Zeova, dezyenmman, kontan lezot. (Matye 22:37-40) En fason demontre lanmour pour bann dimoun se ki nou ansenny zot sa bon nouvel lo Rwayonm Bondye. Si nou obei lord Zeova pour kontan lezot, espesyalman nou bann frer ek ser, nou lanmour pour li pou “vin parfe.”—1 Zan 4:12, 20.

15. (a) Ki bann benediksyon ki aprezan nou gannyen sorti kot Zeova? (b) Ki bann benediksyon nou pou gannyen a lavenir?

¹⁵ Zeova i asir nou ki akoz nou annan lafwa dan ranson, nou pese i “ganny efase.” I kapab pardonn nou pese konpletman. (Lir Akt 3:19-21.) Parey nou’n vwar pli boner, ranson i fer li posib pour Zeova adopte serten imen pour vin son bann garson dan lesyel. Sa bann imen i bann Kretyen swazir. (Romen 8:15-17) I envit “lezot mouton” pour form parti son fanmir ki pou viv lo later. Apre ki zot in vin parfe, i pou annan en test final. Si zot fidel avek li, i pou adopte zot osi konman son bann zanfan. (Romen 8:20, 21; Revelasyon 20:7-9) Zeova pou toultan kontan tou son bann zanfan. Sa ranson pou kontinyen anmenn bann byenfe pour touzour. (Ebre 9:12) Zeova in donn nou sa kado presye ki personn pa pou kapab aras nou.

16. Ki mannyer ranson i liber nou?

¹⁶ Si nou repantir ler nou’n fer pese, napa nanryen ki Satan i kapab fer pour anpes nou vin manm fanmir Zeova. Zezi ti mor “enn fwa pour tou.” Alor, ranson in ganny peye enn fwa pour tou. (Ebre 9:24-26) Adan ti met lanmor lo nou, me sakrifis Zezi pou fer nou ganny lavi eternel. Ranson i kapab liber nou avek lemonn Satan ek lafreyer lanmor.—Ebre 2:14, 15.

17. Ki lanmour Zeova i vedir pour ou?

¹⁷ Bann promes Bondye pou toultan ganny akonplir. Zis parey son bann lalwa ki pa zanmen sanze, Zeova pa pou zanmen sanze. I pa pou zanmen dezapwent nou. (Malaki 3:6) Zeova pa’n zis donn nou sa kado lavi, me in osi donn nou son lanmour. “Nou konnen e nou krwar ki Bondye i kontan nou. Bondye i lanmour.” (1 Zan 4:16) Son bann promes i toultan vin vre. Byento later pou vin en zoli paradi. Tou dimoun pou imit Zeova e tou dimoun pou kontan kanmarad. Apre, tou son bann serviter dan lesyel ek lo later pou dir: “Ki nou bondye i ganny louanz, laglwar, lasazes, remersiman, loner, pwisans ek lafors pour touzour e touzour. Amenn.”—Revelasyon 7:12.