1, 2. (a) Ki mannyer Temwen Zeova i diferan avek lezot larelizyon? (b) Ki nou pou aprann dan sa lartik ek sa lot ki swiv?

SOUVAN dimoun i kontan demann bann Temwen Zeova, “Lekel zot sef zot?” Zot demann sa kestyon parski laplipar larelizyon i annan en sef ki swa en zonm oubyen en madanm. Par kont, nou, nou fyer pour dir zot ki nou Sef i pa en imen enparfe. O kontrer, nou Sef i Zezi Kri e i obei son Papa Zeova ki son Sef.—Matye 23:10.

² I osi annan en group zonm ki apel, “lesklav fidel e pridan,” ki diriz pep Bondye lo later ozordi. (Matye 24:45) Me ki mannyer nou konnen ki Zeova pe diriz nou atraver son Garson? Nou pou vwar trwa rezon akoz nou kapab asire ki sa i vre. Menm si Zeova in servi serten imen pour gid son pep, nou pou vwar akoz nou kapab asire ki Zeova ti pe gid zot e i ankor sa vre Sef parmi son pep.—Izai 58:11.

3. Ki ti sa lafors ki ti ed Moiz diriz bann Izraelit?

³ Bann ki reprezant Bondye ti ganny lafors lespri sen. Bondye ti swazir Moiz pour diriz bann Izraelit.  Kwa ki ti ed li desarz byen sa responsabilite vreman enportan? Zeova ti donn Moiz “Son lespri sen.” (Lir Izai 63:11-14, NWT.) * Anfet Zeova ki ti pe gid son pep, parski son lespri sen ki ti pe ed Moiz.

4. Kwa ki montre ki Moiz ti annan lespri sen Bondye? (Vwar portre o konmansman sa lartik.)

⁴ Eski dimoun ti kapab remarke ki Moiz ti annan lespri sen Bondye? Byensir! Lespri sen Zeova ti donn Moiz sa abilite pour fer bann mirak e fer Faraon, dirizan Lezip ki ti byen pwisan konn non Bondye. (Egzod 7:1-3) Lespri Sen ti osi ed Moiz pour vin en dirizan ki annan lanmour ek pasyans, pa parey bann sef dan lezot pei ki ti egois e sever. (Egzod 5:2, 6-9) Pa sa i montre klerman ki Zeova in swazir Moiz pour diriz Son pep!

5. Avek lekel ankor ki Zeova ti donn lespri sen pour gid son pep?

⁵ Avek lekel ankor Zeova ti donn son lespri sen pour diriz son pep? Labib i dir: “Zozye, garson Noun, ti ranpli avek lasazes ki lespri sen i donnen.” (Deterononm 34:9, NWT) “Lespri Zeova ti lo Gideonn.” (Ziz 6:34, NWT) “Lespri [Zeova] ti desann lo David.” (1 Samyel 16:13) Tou sa bann zonm ti depan lo lespri sen pour ed zot fer bann keksoz ki zot pa ti kapab fer avek zot prop lafors. (Zozye 11:16, 17; Ziz 7:7, 22; 1 Samyel 17:37, 50) Pa sa i montre klerman ki Zeova ti sa enn ki ti donn zot lafors pour fer bann gran keksoz! Alor zis li ki merit ganny loue.

6. Akoz Bondye ti anvi son pep i respekte bann dirizan Izrael?

⁶ Ki bann Izraelit ti devret fer ler zot ti vwar ki lespri sen Bondye ti donn lafors Moiz, Zozye, Gideonn ek David? Bann Izraelit ti devret respekte zot. Ler dimoun ti pe konplent kont Moiz, Zeova ti demande: “Pour konbyen letan ankor sa pep pou rezet mwan?” (Nonm 14:2, 11) I kler ki Zeova ti swazir sa bann zonm pour diriz Son pep. Ler bann dimoun ti obei, zot ti pe swiv Zeova konman zot Dirizan.

7. Ki mannyer bann lanz ti ed Moiz?

⁷ Bann lanz ti ed bann ki reprezant Bondye. (Lir Ebre 1:7, 14.) Bondye ti servi bann lanz pour gid Moiz. Premyerman, en lanz ti “aparet  avek li dan sa brousay” e donn li sa misyon pour liber bann Izraelit e diriz zot. (Akt 7:35) Dezyenmman, Bondye ti servi bann lanz pour donn Moiz Lalwa pour enstri bann Izraelit. (Galat 3:19) Trwazyenmman, Zeova ti dir li: “Al diriz mon pep dan sa landrwa ki mon’n dir ou. Mon lanz pour al par devan.” (Egzod 32:34) Labib pa dir ki bann Izraelit ti vwar en lanz pe fer sa bann keksoz. Par kont, lafason ki Moiz ti enstri e gid sa pep, i montre ki bann lanz ti’n ed li.

8. Ki mannyer bann lanz ti ed Zozye ek Ezekya?

⁸ Lekel ankor ki bann lanz ti ede? Labib i dir ki en lanz, “sef larme [Zeova]” ti ed Zozye pour ranport laviktwar kont bann Kananeen. (Zozye 5:13-15; 6:2, 21) Pli tar ler Lerwa Ezekya ti diriz pep Bondye, en gran larme Asiryen ti menase pour detri Zerizalenm. Dan en lannwit, “lanz [Zeova] ti sorti e touy 185,000 zonm.”—2 Lerwa 19:35.

9. Menm si bann ki ti reprezant Bondye ti enparfe, ki bann Izraelit ti devret fer?

⁹ Bann lanz i parfe, me sa bann zonm ki zot ti ede ti enparfe. Par egzanp, en fwa Moiz pa ti onor Zeova. (Nonm 20:12) Zozye pa ti demann Bondye ki pour fer ler bann Gibeonnit ti anvi fer en lalyans avek zot. (Zozye 9:14, 15) En serten moman dan son lavi Ezekya ti vin orgeye. (2 Kronik 32:25, 26) Menm si sa bann zonm ti enparfe, sa pa ti en rezon pour bann Izraelit pa swiv zot gidans. Bann Izraelit ti kapab vwar ki Zeova ti pe servi bann lanz pour siport sa bann zonm. Pa sa i montre klerman ki Zeova ti pe gid son pep!

10. Ki mannyer Lalwa Bondye ti gid Moiz?

¹⁰ Parol Bondye ti gid bann ki reprezant Bondye. Labib i apel sa bann Lalwa ki ti ganny donnen avek bann Izraelit konman “lalwa Moiz.” (1 Lerwa 2:3) Me Labib ti fer kler ki Zeova ti sa enn ki ti donn pep Izrael Lalwa. Moiz osi ti bezwen obeir Lalwa. (2 Kronik 34:14) Par egzanp, apre ki Zeova ti dir li ki mannyer pour konstri tabernak, “Moiz ti fer egzakteman tou sa ki [Zeova] ti’n ordonn li.”—Egzod 40:1-16.

11, 12. (a) Ki Zozye ek lezot lerwa ki ti diriz pep Bondye ti ganny demande pour fer? (b) Ki mannyer Parol Bondye ti gid sa bann zonm ki ti pe dirize?

¹¹ Zozye ti annan en parti Parol Bondye ler i ti vin dirizan e Zeova ti dir li: “Ou devret lir li avwabas lizour konman aswar, pour fer sir ki ou fer tou dapre sa ki’n ganny ekrir.” (Zozye 1:8, NWT) Bann lerwa ki pli tar ti diriz pep Bondye ti bezwen lir Lalwa toulezour, ekri en kopi e obei “tou bann parol lalwa ek bann regleman.”—Lir Deterononm 17:18-20.

¹² Ki mannyer Parol Bondye ti gid bann dirizan? Mazin lo legzanp Lerwa Zosya. Apre ki Lalwa Moiz ti ganny trouve, sekreter Zosya ti konmans lir sa lalwa avek Zosya. * (Vwar not.) “Kan lerwa ti antann parol liv lalwa, i  ti desir son lenz.” Apre sa Parol Bondye ti motiv Zosya pour detri tou bann zidol dan sa pei e i ti organiz sa pli gran lafet Lapak ki’n deza ganny fer. (2 Lerwa 22:11; 23:1-23) Vi ki Zosya ek lezot dirizan ti swiv Parol Bondye, zot ti pare pour fer bann azisteman dan bann direktiv ki zot ti donn pep Bondye. Sa bann sanzman ti ed sa pep pour obei Bondye.

13. Ki mannyer bann dirizan parmi pep Bondye ti diferan avek bann dirizan dan lezot nasyon?

¹³ Bann dirizan lezot nasyon ti ganny gide par lasazes imen. Par egzanp, bann dirizan Kananeen ek zot pep ti fer bann move keksoz ki ti enkli relasyon seksyel antre fanmir, avek zannimo, omoseksyalite, sakrifis zanfan e ador zidol. (Levitik 18:6, 21-25) An plis, bann sef Babilonnyen e Ezipsyen ti napa menm lalwa konsernan lapropte ki pep Bondye ti annan. (Nonm 19:13) Par kont pep Bondye ti kapab vwar ki mannyer zot bann sef fidel ti ankouraz zot pour gard zot ladorasyon pir, pour prop fizikman e evit okenn limoralite seksyel. Pa i kler ki Zeova ti pe gid zot!

14. Ki mannyer Zeova ti disiplin serten dirizan parmi son pep?

¹⁴ Pa tou lerwa ki ti diriz pep Bondye ki ti swiv son lenstriksyon. Bann lerwa enfidel ti refize swiv gidans lespri sen Bondye, son bann lanz ek son Parol. Dan serten ka, Zeova ti disiplin oubyen ranplas sa bann dirizan. (1 Samyel 13:13, 14) Pli tar, Zeova ti swazir en dimoun ki ti pou vin en dirizan parfe.

15. (a) Ki mannyer bann profet ti demontre ki en sef parfe ti pe vini? (b) Lekel ki ti sa sef parfe?

¹⁵ Pour plizyer santenn lannen, Zeova ti promet ki i ti pou swazir en sef oubyen en dirizan parfe pour son pep. Par egzanp, Moiz ti dir bann Izraelit: “[Zeova], ou Bondye ava anvoy parmi zot prop pep, en profet parey mwan. Zot ava ekout li.” (Deterononm 18:15) Izai ti dir ki sa Enn pou vin “en dirizan e komandan.” (Izai 55:4, NWT) Danyel ti ekri ki Mesi ti pou vin “Dirizan.” (Danyel 9:25, NWT) Finalman Zezi Kri ti idantifye son lekor konman “Sef” pep Bondye. (Lir Matye 23:10.) Bann disip Zezi ti pare pour swiv li e zot ti krwar ki Zeova ki ti’n swazir li. (Zan 6:68, 69) Kwa ki ti konvenk zot ki Zezi Kri ti sa enn ki Zeova ti pou servi pour gid son pep?

16. Kwa ki prouve ki Zezi ti ganny lafors avek lespri sen?

¹⁶ Lespri sen ti donn Zezi lafors. Ler Zezi ti batize, Zan ti vwar “lesyel pe ouver e lespri sen parey en kolonm, pe desann lo li.” Deswit apre sa “lespri sen ti fer li al dan dezer.” (Mark 1:10-12) Pandan son minister lo later, lespri sen ti donn Zezi lafors pour ansennyen e fer bann mirak. (Akt 10:38)  An plis, lespri sen ti ed Zezi pour demontre bann kalite parey lanmour, lazwa ek en lafwa for. (Zan 15:9; Ebre 12:2) Tousala i montre ki ti napa en lot sef ki ti ganny led lespri sen parey Zezi. Pa sa i montre klerman ki Zeova ti’n swazir Zezi konman Sef!

17. Ki bann lanz ti fer pour ed Zezi?

¹⁷ Bann lanz ti ed Zezi. Pa bokou letan apre ki Zezi ti batize, “bann lanz ti vini e zot ti konmans pran swen avek li.” (Matye 4:11) Plizyer erdtan avan son lanmor “en lanz sorti dan lesyel ti aparet avek li e fortifye li.” (Lik 22:43) Zezi ti konnen ki Zeova ti pour anvoy bann lanz pour ed li kan i ti bezwen.—Matye 26:53.

18, 19. Ki mannyer Parol Bondye ti gid lavi Zezi ek son lansennyman?

¹⁸ Parol Bondye ti gid Zezi. Depi konmansman son minister ziska son lanmor lo en poto martir Zezi ti les Lekritir gid li. Menm ler i ti pe mor, i ti koz lo bann profesi lo Mesi. (Matye 4:4; 27:46; Lik 23:46) Par kont, bann sef relizye sa letan ti diferan avek Zezi. Zot ti inyor Parol Bondye ler i pa ti annakor avek zot bann lansennyman. Zezi ti sit parol Bondye ler i ti dir zot: “Sa pep i onor mwan avek zot labous, me zot leker i vreman lwen avek mwan. I anven ki zot pe kontinyen ador mwan, parski se bann komannman zonm ki zot ansennyen.” (Matye 15:7-9) Zeova pa ti pou zanmen kapab swazir bann zonm ki pa ti swiv son Parol pour diriz son pep.

¹⁹ Zezi ti osi servi Parol Bondye ler i ti ansenny lezot. Ler bann sef relizye ti sey met li dan pyez i pa ti servi son  prop lasazes oubyen leksperyans pour reponn zot. O kontrer i ti ansenny bann dimoun par servi Lekritir. (Matye 22:33-40) An plis Zezi ti kapab enpresyonn lezot avek bokou bann zistwar lo son lavi dan lesyel oubyen lo kreasyon liniver. O kontrer parski i ti kontan Parol Bondye, i ti anvi partaz avek lezot e “i ti ouver zot lespri pour ki zot konpran byen sinifikasyon Lekritir.”—Lik 24:32, 45.

20. (a) Ki mannyer Zezi ti onor Zeova? (b) Ki diferans ti annan ant latitid Erod Agripa 1 avek sa ki pour Zezi?

²⁰ Menm si bann ki ti ekout Zezi ti enpresyonnen par son bann parol, i ti toultan donn loner son Ansenyan, Zeova. (Lik 4:22) Ler en zonm ris ti esey onor Zezi avek sa tit “Bon Ansenyan,” avek limilite Zezi ti dir: “Akoz ou apel mwan bon? Napa personn ki bon eksepte Bondye.” (Mark 10:17, 18) Par kont, Erod Agripa 1 ki ti vin dirizan Zide apepre wit an pli tar ti annan en latitid vreman diferan avek sa ki pour Zezi. En zour dan en renyon spesyal, Erod ti met en lenz rwayal vreman ser e enpresyonan. Ler bann dimoun ti vwar li e tann li, zot ti kriye: “Lavwa en bondye sa, pa lavwa en zonm!” Erod ti kontan ganny loner. Me ki ti arive apre? “Deswit lanz Zeova ti frap li akoz i pa ti’n donn Bondye laglwar. Lever ti manz li e i ti mor.” (Akt 12:21-23) Pa sa i montre klerman ki Zeova pa ti’n swazir Erod pour vin dirizan! Par kont, Zezi ti montre ki Bondye ti’n swazir li e i ti toultan onor Zeova konman sa Sef Siprenm parmi Son pep.

21. Ki nou pou vwar dan sa lot lartik?

²¹ Zeova ti anvi Zezi i vin Dirizan pour plis ki zis detrwa lannen. Apre son rezireksyon, Zezi ti dir son bann disip: “Mon’n ganny tou lotorite dan lesyel e lo later.” I ti azoute: “Mazinen! mon avek zot tou le zour ziska lafen sa lemonn.” (Matye 28:18-20) Me ki mannyer Zezi i kapab diriz pep Bondye lo later si i envizib dan lesyel? Lekel ki Zeova ti pou servi pour reprezant Zezi lo later? Ki mannyer bann Kretyen ti pou kapab rekonnet bann ki reprezant Bondye? Dan sa lot lartik nou pou reponn sa bann kestyon.