An 2012, bann arkeolog ti dekouver bann pti bout po ki date plis ki 3,000 an. Bann serser ti vreman eksite. Akoz? Pa akoz sa bann pti bout po, me akoz sa bann lekritir ki ti lo zot.

Ler bann arkeolog ti finalman met tou bann bout ansanm, zot ti kapab lir sa ki bann Kananeen ti’n ekrir lo sa po. Lo la ti’n ganny ekrir: “Eshba’al Ben Beda,” ki vedir “Eshba’al garson Beda.” Sa i premye fwa ki bann arkeolog i vwar sa non ekrir lo en keksoz sitan vye.

En lot dimoun apele Es-Baal i ganny mansyonnen dan Labib. I ti enn bann garson Lerwa Sail. (1 Kronik 8:33; 9:39) Profeser Yosef Garfinkel, enn parmi bann ki ti vwar sa po ti dir: “I enteresan pour note ki sa non Es-Baal i aparet dan Labib e osi dan rikord bann arkeolog zis pandan renny Lerwa David.” Sa i en lot legzanp ki mannyer bann arkeolog i siport Labib.

Dan Labib garson Sail Es-Baal i osi ganny apele Isboset. (2 Samyel 2:10) Akoz “Baal” ti ganny ranplase par “Isboset”? Bann serser i eksplike ki ekriven Dezyenm Samyel ti kapab evite servi sa non Es-Baal parski sa ti fer bann Izraelit mazin Baal bondye tanpet ki bann Kananeen ti adore. Par kont dan Premye Kronik nou ankor kapab vwar sa non Es-Baal.