1-2. (a) Ki mannyer Zeova in kominik avek bann imen? (b) Ki nou pou diskite dan sa lartik?

ZEOVA i kontan pour kominik avek nou. Dan lepase i ti fer nou konn son bann panse atraver bann profet, bann lanz ek son Garson Zezi Kri. (Amos 3:7; Gal. 3:19; Rev. 1:1) Ozordi, i koz avek nou atraver son Parol Labib. I ti donn nou Labib pour ki nou kapab aprann lo son fason panse e konpran son fason fer keksoz.

² Ler Zezi ti lo later, trwa fwa Zeova ti koz avek li dan lesyel. Annou vwar sa ki Zeova ti dir, sa ki nou kapab aprann avek sa ki i ti dir e lafason ki nou benefisye avek sa ki i ti dir.

3. Ler nou lir Mark 1:9-11, ki Zeova ti dir ler Zezi ti batize e ki bann keksoz enportan son bann parol i konfirmen?

³ Dan Mark 1:9-11 nou vwar sa premye fwa ki Zeova ti koze dan lesyel. (Lir.) I ti dir: “Ou menm mon Garson, sa enn ki mon kontan e ki mon’n aprouve.” Imazinen ki mannyer Zezi ti’n bezwen santi ler i ti antann lavwa son Papa pe dir ki i kontan li e annan konfyans dan li! Parol Zeova ti konfirm trwa keksoz enportan lo Zezi. Premyerman, Zezi i son Garson. Dezyenmman, Zeova i kontan son Garson. Trwazyenmman, Zeova in aprouv son Garson. Annou diskit plis lo sak pwen ki Zeova ti fer resorti lo Zezi.

4. Ki nouvo relasyon Zezi ti annan avek Bondye apre son batenm?

⁴ “Ou menm mon Garson.” Ler Zeova ti dir sa, i ti pe  montre ki aprezan son Garson ti annan en nouvo relasyon avek Li. Ler Zezi ti dan lesyel, i ti deza garson Bondye. Par kont, apre son batenm i ti vin Garson Bondye dan en nouvo fason. I ti ganny swazir par lespri sen e i ti annan sa lespwar pour retourn dan lesyel pour ganny apwente konman Lerwa ek Granpret dan Rwayonm Bondye. (Lik 1:31-33; Ebr. 1:8, 9; 2:17) Alor ler Zezi ti batize, nou kapab konpran akoz Zeova ti dir: “Ou menm mon Garson.”​—Lik 3:22.

5. Ki mannyer nou kapab imit lafason ki Zeova ti eksprim son lanmour ek laprouvasyon?

⁵ “Ou menm . . . sa enn ki mon kontan.” Lafason ki Zeova ti eksprim son lanmour ek laprouvasyon pour son Garson i fer nou rapel ki nou osi nou bezwen rod bann loportinite pour ankouraz lezot. (Zan 5:20) Nou fer pli byen ler en dimoun ki nou kontan i montre ki i kontan nou e felisit nou ler nou fer en bon keksoz. Pareyman, nou bann frer ek ser dan kongregasyon ek nou fanmir i bezwen nou lanmour ek lankourazman. Ler nou felisit lezot, nou ranforsi zot lafwa e ed zot pour servi Zeova fidelman. Bann paran i sirtou bezwen ankouraz zot zanfan. Ler bann paran i felisit zot zanfan senserman e demontre lafeksyon pour zot, sa i ed zot zanfan progrese.

6. Akoz nou kapab annan konfyans dan Zezi Kri?

⁶ “Ou menm . . . ki mon’n aprouve.” Ler Zeova ti dir sa, sa ti montre ki i ti annan konfyans ki Zezi ti pou fer son lavolonte fidelman. Vi ki Zeova ti annan konfyans dan son Garson, nou osi nou kapab annan konfyans total ki Zezi pou fidelman akonpli bann promes Zeova. (2 Kor. 1:20) Ler nou mazin lo  legzanp Zezi, nou pli determinen pour aprann avek li e swiv son legzanp. Zeova i osi annan konfyans ki konman en group, son bann serviter pou kontinyen aprann avek son Garson.​—1 Pyer 2:21.

7. Dapre Matye 17:1-5, kan ki Zeova ti koze dan lesyel e ki i ti dir?

⁷ Lir Matye 17:1-5. Dezyenm fwa ki Zeova ti koze dan lesyel ti ler “laparans Zezi ti sanze.” Zezi ti’n envit Pyer, Zak ek Zan pour al avek li lo en montanny byen o. Laba zot ti vwar en vizyon ekstraordiner. Figir Zezi ti briye e son lenz ti klate. I ti annan laparans de zonm, ki reprezant Moiz ek Eliya, ki ti konmans koz avek Zezi konsernan son lanmor ek rezireksyon. Sa trwa zapot ti “vreman ansonmey,” me ler zot ti sote, zot ti vwar sa vizyon ekstraordiner. (Lik 9:29-32) Apre, en nyaz klate ti kouver zot e zot ti tann en lavwa dan sa nyaz, sa ti lavwa Bondye! Zeova ti eksprim son laprouvasyon ek lanmour pour son Garson zis parey i ti’n fer ler Zezi ti batize. I ti dir: “Sa i mon garson ki mon kontan, sa enn ki mon’n aprouve.” Me safwasi Zeova ti osi dir: “Ekout li.”

8. Ki lefe sa vizyon ti annan lo Zezi ek son bann disip?

⁸ Sa vizyon ti montre sa laglwar ek pouvwar ki Zezi ti pou gannyen a lavenir konman Lerwa dan Rwayonm Bondye. San dout, Kris ti ganny ankouraze e fortifye pour fer fas avek bann soufrans ek sa lanmor fermal ki i ti pou bezwen pas atraver. Sa vizyon ti osi ranforsi lafwa bann disip. Sa ti ede pour prepar zot pour bann leprev ki zot ti pou pas atraver e pour fer sa travay dir ki zot ti pou ganny konfye. Apepre 30 an pli tar, zapot Pyer ti refer avek sa vizyon kot laparans Zezi ti sanze, ki montre ki sa vizyon ti ankor kler dan son lespri.​—2 Pyer 1:16-18.

9. Ki konsey pratik Zezi ti donn son bann disip?

⁹ “Ekout li.” Zeova ti fer kler ki i anvi ki nou ekout e obei parol son Garson. Ki Zezi ti dir ler i ti lo later? I ti dir en kantite keksoz ki vo lapenn ekoute. Par egzanp, i ti ansenny son bann disip ki mannyer pour pres sa bon nouvel e plizyer fwa i ti fer zot rapel ki zot bezwen kontinyen veye. (Mat. 24:42; 28:19, 20) I ti osi ankouraz zot pour fer bokou zefor e pour pa zanmen abandonnen. (Lik 13:24) Zezi ti fer resorti ki i vreman enportan pour son bann disip kontan kanmarad, reste ini e pour obei son bann komannman. (Zan 15:10, 12, 13) Bann konsey ki Zezi ti donn son bann disip ti vreman pratik! Sa konsey ti itil dan letan Zezi e i ankor itil ozordi.

10-11. Ki mannyer nou kapab montre ki nou pe ekout Zezi?

¹⁰ Zezi ti dir: “Tou sa ki dan kote laverite i ekout mwan.” (Zan 18:37) Nou montre ki nou pe ekout Zezi ler nou “kontinyen siport kanmarad e pardonn kanmarad volonterman.” (Kol. 3:13; Lik 17:3, 4) Nou osi montre ki nou pe ekout li ler nou anons sa bon nouvel avek devouman “dan letan favorab e dan letan difisil.”​—2 Tim. 4:2.

¹¹ Zezi ti dir: “Mon bann mouton i ekout mon lavwa.” (Zan 10:27) Bann disip Kris i montre ki zot ekout li par aplik son parol. Zot pa ganny distrer par bann “traka lavi.” (Lik 21:34) O kontrer, zot fer li en priyorite pour obei bann  komannman Zezi menm ler i difisil. En kantite nou bann frer ek ser pe pas atraver bann leprev sever. Par egzanp, serten pe ganny atake par bann ki opoz nou, pe fer fas avek lapovrete ouswa bann dezas natirel. Me malgre tousala, zot reste fidel avek Zeova menm si zot pe soufer. Zezi i donn zot sa lasirans swivan: “Sa ki kontan mwan i aksepte mon bann komannman e obei zot. Pareyman, sa ki kontan mwan, mon Papa pou kontan li.”​—Zan 14:21.

12. Ki en lot fason nou kapab montre ki nou pe ekout Zezi?

¹² En lot fason ki nou montre ki nou pe ekout Zezi, i ler nou korpere avek bann ki i’n apwente pour diriz nou. (Ebr. 13:7, 17) Dan sa detrwa dernyen lannen, lorganizasyon Bondye in fer plizyer azisteman. Nou’n ganny bann nouvo zouti pour servi dan predikasyon e nou fason prese osi in sanze. Lafason ki nou renyon lasemenn i ganny fer in sanze e nou annan bann nouvo lenstriksyon lo ki mannyer pour mentenir nou Lasal Rwayonm. Pa nou vreman apresye sa bann lenstriksyon byen planifye ki ganny donnen avek lanmour! Nou kapab asire ki Zeova pou beni zefor ki nou fer pour swiv bann lenstriksyon ki son lorganizasyon i donn nou dan sa moman apropriye.

13. Ki byenfe nou gannyen ler nou ekout Zezi?

¹³ Ler nou ekout tou sa ki Zezi ti ansennyen, nou ganny bokou byenfe. Zezi ti promet son bann disip ki son bann lansennyman ti pou donn zot lafors. I ti dir: “Zot pou reganny lafors. Parski i fasil pour vin mon disip e sa ki mon demann zot pour anmennen i pa lour.” (Mat. 11:28-30) Parol Bondye, ki enkli sa kat Levanzil lo lavi Zezi ek son minister, i redonn nou lafors spirityel e fer nou vin saz. (Ps. 19:7; 23:3, NWT) Zezi ti dir: “Ere sa bann ki tann parol Bondye e obei li!”​—Lik 11:28.

14-15. (a) Dapre Zan 12:27, 28, ki sa trwazyenm fwa Zeova ti koze dan lesyel? (b) Akoz parol Zeova ti pou’n rekonfort Zezi e donn li lafors?

¹⁴ Lir Zan 12:27, 28. Levanzil Zan i koz lo en trwazyenm fwa ki Zeova ti koze dan lesyel. Detrwa zour avan Zezi i mor, i ti Zerizalenm pour selebre son dernyen  Lapak. I ti dir: “Mon lespri i fatige.” Apre i ti priye: “Papa glorifye ou non.” An retour, son Papa ti koze dan lesyel e dir: “Mon’n glorifye li e mon pou glorifye li ankor.”

¹⁵ Lespri Zezi ti fatige parski i ti annan en gro responsabilite. I ti konnen ki i pe al ganny fwete e pas atraver en lanmor kriyel e ki i ti pou bezwen reste fidel anver Zeova. (Mat. 26:38) Pli enportan ki tou, Zezi ti anvi glorifye non son Papa. Zezi ti ganny akize konmkwa ki i ti’n koz kont Bondye e i ti enkyet ki son lanmor ti pou anmenn repros lo Bondye. Nou kapab asire ki sa ki Zeova ti dir ti reasir Zezi! I ti kapab asire ki non Zeova ti pou ganny glorifye. Sa ki son Papa ti dir ti’n bezwen rekonfort li e donn li lafors pour fer fas avek sa ki i ti pe al pas atraver. Menm si petet Zezi ti sa sel dimoun sa letan ki ti konpran sa ki Zeova ti pe dir, Zeova ti fer sir ki Son bann parol i ganny rikorde dan Labib pour nou tou.​—Zan 12:29, 30.

16. Akoz par ler nou kapab enkyet konsernan repros ki ganny anmennen lo non Bondye?

¹⁶ Parey Zezi, i kapab ki nou osi nou enkyet konsernan repros ki’n ganny anmennen lo non Zeova. Petet nou osi nou sibir bann lenzistis parey Zezi. Oubyen i kapab ki nou ganny afekte avek bann fo zistwar ki bann opozan i fannen lo nou. Petet nou mazin lo repros ki sa bann zistwar i anmennen lo non Zeova ek son  lorganizasyon. Dan bann letan koumsa, sa ki Zeova ti dir i donn nou bokou rekonfor. Nou pa bezwen tro enkyet. Nou kapab asire ki “lape Bondye ki depas tou sa ki nou kapab konpran i protez [nou] leker ek lespri par Kris Zezi.” (Fili. 4:6, 7) Zeova pou toultan glorifye son non. Atraver Rwayonm, i pou repar tou domaz ki Satan ek sa lemonn i anmenn lo Son bann serviter fidel.​—Ps. 94:22, 23, NWT; Iza. 65:17.

17. Anliny avek Izai 30:21, ki mannyer Zeova i koz avek nou ozordi?

¹⁷ Zeova i ankor pe koz avek nou ozordi. (Lir Izai 30:21.) I vre ki nou pa tann Bondye pe koz avek nou dan lesyel. Par kont, i’n donn nou son Parol an ekri, Labib, kot nou kapab trouv son bann lenstriksyon. An plis ki sa, lespri sen Zeova i pous “sa administrater fidel” pour kontinyen donn Son bann serviter zot rasyon manze. (Lik 12:42) I annan en kantite piblikasyon ki’n ganny enprimen e lo Enternet, ensi ki en kantite video ek lanrezistreman odyo ki kapab ed nou gard nou lafwa for.

18. Ki mannyer parol Zeova i ranforsi ou lafwa e donn ou kouraz?

¹⁸ Annou gard antet sa ki Zeova ti dir son Garson ler i ti lo later! Nou swete ki sa ki Bondye ti dir sa trwa fwa, parey nou vwar dan Labib, i donn nou konfyans ki Zeova i annan tou keksoz anba kontrol e ki i pou repar tou domaz ki Satan ek son move lemonn in anmennen. Annou determinen pour ekout byen lavwa Zeova. Si nou fer sa, nou pou kapab reisi andir nenport problenm ki nou pe fer fas avek la konmela e okenn defi ki pou arive a lavenir. Labib i rapel nou: “Zot bezwen landirans pour ki zot kapab ganny sa ki Bondye in promet zot apre ki zot in fer son lavolonte.”​—Ebr. 10:36.