Ed “bann rezidan etranze” pour servi Zeova avek lazwa
“Zeova pe protez bann rezidan etranze.”
KANTIK: 84, 73
1, 2. (a) Ki bann defi serten nou bann frer ek ser i fer fas avek? (b) Ki bann kestyon sa i fer nou demande?
EN FRER ki apel Lije i dir: “Ler lager sivil ti konmanse Burundi, nou fanmir ti kot en lasanble. Nou ti vwar dimoun pe taye, pe tir fizi. Mon paran ti annan 11 zanfan. Nou tou nou ti taye pou sov nou lavi avek zis sa lenz ki ti lo nou. Serten nou fanmir ti vwayaz plis ki 1,600 kilomet pour ariv kot en kan refizye Malawi. Larestan nou ti’n disperse dan lezot landrwa.”
2 I annan plis ki 65 milyon refizye dan lemonn antye ki’n bezwen kit se zot akoz lager oubyen persekisyon. Sa i pli gran kantite refizye ki’n deza ganny rikorde. * (Vwar not.) Plizyer milye parmi sa bann refizye i Temwen Zeova. Plizyer zot in perdi bann dimoun ki zot kontan e preski tou sa ki zot ti annan. Ki lezot defi zot in fer fas avek? Ki mannyer nou kapab ed nou bann frer ek ser servi Zeova e gard zot lazwa ler zot fer fas avek bann tel leprev? (Psonm 100:2) Ki sa pli bon fason pour pres avek bann refizye ki pa ankor konn Zeova?
LAVI EN REFIZYE
3. Ki mannyer Zezi e plizyer son bann disip ti vin bann refizye?
3 Apre ki lanz Zeova ti averti Zozef ki Lerwa Erod ti anvi touy Zezi, Zozef ek son fanmir ti al Lezip konman bann refizye. Zot ti reste laba ziska ki Erod ti mor. (Matye 2:13, 14, 19-21) Plizyer lannen pli tar, bann disip Zezi ti bezwen “disperse dan bann rezyon Zide ek Samari” akoz persekisyon. (Akt 8:1) Zezi ti konnen ki bokou son bann disip ti pou oblize kit zot lakour. I ti dir: “Ler zot ganny persekite dan en lavil, sov dan en lot.” (Matye 10:23) I pa en keksoz fasil pour kit ou lakour pour nenport ki rezon.
4, 5. Ki bann danze bann refizye i fer fas avek ler zot (a) pe sove? (b) pe viv dan en kan refizye?
4 Ler bann refizye pe sove pour kit zot lakour oubyen pe reste dan en kan refizye, zot fer fas avek plizyer diferan danze. Gad, pti frer Lije, i dir: “Nou ti mars pour plizyer semenn e kot nou ti pase nou ti vwar plizyer santenn lekor mor. Mon ti annan 12 an. Mon lipye ti sitan anfle ki mon ti dir mon fanmir kontinyen san mwan. Mon papa pa ti le kit mwan deryer, alor i ti anmenn mwan pour pa les bann rebel tyonbo mwan. Nou ti pran sak zour alafwa, nou ti priy Zeova e met nou konfyans dan li. Par ler nou ti annan zis mang pour manze ki nou ti kase lo bann pye kot nou ti pase.”
5 Laplipar fanmir Lije ti reste plizyer lannen dan bann kan refizye Nasyon-z-ini. Me laba osi i ti annan bann danze. Lije ki aprezan i en sirveyan rezyonal, i eksplike: “Laplipar dimoun ti napa travay. Zot ti koz zot kanmarad, bwar, zwe larzan, vole e viv en lavi imoral.” Pour protez zot lekor kont sa bann move lenfliyans, bann Temwen ti bezwen reste okipe dan kongregasyon. (Ebre 6:11, 12; 10:24, 25) Zot ti servi byen zot letan pour zot kapab reste ferm dan laverite e plizyer zot ti konmans fer pionye. Zot ti gard antet ki en zour zot ti pou sorti dan sa kan refizye zis parey bann Izraelit ti finalman aret viv dan dezer. Sa ti ed zot pour gard en leta lespri pozitif.
DEMONTRE LANMOUR ANVER BANN REFIZYE
6, 7. (a) Ler nou “kontan Bondye,” ki mannyer sa i motiv nou pour tret nou bann frer ek ser? (b) Donn en legzanp.
6 Vi ki nou “kontan Bondye,” sa i motiv nou pour demontre lanmour anver nou bann frer ek ser, espesyalman ler zot dan difikilte. (Lir 1 Zan 3:17, 18.) Par egzanp, ler bann Kretyen dan premye syek Zide ti napa manze akoz lafamin, kongregasyon ti organize pour ed zot. (Akt 11:28, 29) Zapot Pol ek Pyer ti ankouraz bann Kretyen pour demontre lospitalite anver kanmarad. (Romen 12:13; 1 Pyer 4:9) Vi ki bann Kretyen i ganny ankouraze pour demontre labonte anver bann frer ek ser viziter, pa nou devret fer parey anver nou bann frer ek ser ki an danze oubyen ki’n ganny persekite akoz zot lafwa! * (Vwar not.)
7 Resaman, plizyer milye Temwen Zeova dan les Likrenn in oblize kit zot lakour akoz lager ek persekisyon. Malerezman, serten in ganny touye. Me laplipar bann frer ek ser ki ti’n sove ti ganny akeyir kot bann frer ek ser dan lezot parti Likrenn ek Larisi. Dan tou le de pei, bann frer ek ser pa ti pran par dan lager akoz zot “pa form parti sa lemonn.” Deplis, zot ti kontinyen anons “sa bon nouvel lo parol Bondye” avek devouman.
ED BANN REFIZYE POUR FORTIFYE ZOT LAFWA
8, 9. (a) Ki defi bann refizye i kapab fer fas avek dan en nouvo pei? (b) Akoz zot bezwen nou led?
8 Serten refizye i oblize al viv en lot bor dan zot pei. Par kont, bokou zot i bezwen al reste dan en pei ki zot pa konnen. I vre ki bann gouvernman i donn bann refizye en pe manze, lenz ek en landrwa reste, me sa pa vedir ki zot napa lezot defi pour fer fas avek. Par egzanp, i kapab ki zot pa abitye manz sa kalite manze. Serten refizye ki sorti dan bann pei so i kapab vwar li difisil pour konnen ki lenz ki apropriye pour lafreser. Petet lezot i bezwen aprann servi bann lekipman modern pour premye fwa.
9 Serten gouvernman i annan bann progranm pour ed bann refizye adapte avek zot nouvo lavi dan sa pei. Me souvan, bann gouvernman i ekspekte ki apre detrwa mwan sa bann refizye i fer zot prop debrouy e sa i kapab difisil pour zot fer. Zis mazin sa kantite keksoz zot bezwen aprann an menm tan: en nouvo langaz, nouvo koutim, bann nouvo lalwa konsernan pey bil ek taks, bann nouvo lalwa konsernan ledikasyon e menm konman pour disiplin zanfan! Eski ou kapab demontre pasyans ek respe e ed nou bann frer ek ser ki annan sa bann defi?
10. Ki mannyer nou kapab fortifye lafwa bann refizye ler zot arive? (Vwar portre o konmansman sa lartik.)
10 Par ler bann lotorite i fer li difisil pour nou bann frer ek ser refizye kontakte kongregasyon kot zot pe reste. Serten lorganizasyon gouvernman i menm dir ki zot pou aret ed nou bann frer ek ser. Zot kapab dir ki zot pa pou les bann frer ek ser reste dan sa pei si zot refize aksepte en travay ki anpes zot asiste renyon. Vi ki zot per e santi ki zot pa kapab fer nanryen, serten frer ek ser in aksepte fer sa bann travay. Alor i irzan ki nou zwenn nou bann frer ek ser refizye o pli vit posib apre ki zot in arive. Zot bezwen vwar ki nou kontan zot. Ler nou fer sa e donn zot led pratik, sa i kapab fortifye zot lafwa.
DONN BANN REFIZYE LED PRATIK
11. (a) Ki bann refizye i bezwen ler zot fek arive? (b) Ki mannyer bann refizye i kapab montre ki zot rekonesan?
11 Ler zot fek arive, petet nou bezwen donn nou bann frer ek ser manze, lenz ek lezot keksoz de baz. * (Vwar not.) Menm bann pti kado, tel parey en kravat pour en frer, pou annan en gran valer pour zot. Byensir, bann refizye pa devret ekspekte tro bokou avek lezot, me zot devret rekonesan pour sa ki lezot i fer pour zot. Koumsa, bann frer ek ser ki pe ede pou ganny lazwa. Me selman i enportan ki bann refizye i finalman esey debrouy lo zot menm. Ler zot fer sa, sa pou ed zot pour gard zot dinyite e annan en bon relasyon avek zot bann frer ek ser. (2 Tesalonisyen 3:7-10) Kantmenm sa, bann refizye i bezwen nou led pratik.
Ki mannyer nou kapab ed nou bann frer ek ser refizye? (Vwar paragraf 11-13)
12, 13. (a) Ki mannyer nou kapab donn bann refizye led pratik? (b) Donn en legzanp.
12 Nou pa bezwen en kantite larzan pour ed bann refizye. Sa ki zot bezwen plis, i nou letan ek nou lanmour. Par egzanp, ou kapab montre zot konman pour servi transpor piblik ouswa konman pour aste bon manze ki pa tro ser. Ou osi kapab montre zot ki mannyer pour rod bann keksoz tel parey en masin koud oubyen masin koup zerb pour zot kapab ganny en lapey. Pli enportan ankor, ou kapab ed zot pour byen entegre
dan zot nouvo kongregasyon. Si i posib, donn zot en pasaz pour al renyon. Ou osi kapab eksplik zot sa pli bon fason pour pres avek dimoun dan teritwar e travay avek zot dan predikasyon.13 Ler kat zenn refizye ti ariv dan en kongregasyon, diferan ansyen ti donn zot led pratik. Zot ti montre sa bann refizye konman pour dray, ki mannyer pour ekri en let e fer laplikasyon pour en travay. Bann ansyen ti osi montre zot ki mannyer pour organiz byen zot progranm pour ki zot met servis Zeova premye dan zot lavi. (Galat 6:10) Pa bokou letan apre, sa kat zenn ti pran servis pionye. Zot ti fer progre konman Kretyen e evite form parti lemonn Satan gras a led sa bann ansyen e zot prop zefor pour annan bann lobzektif dan servis Zeova.
14. (a) Ki tantasyon bann refizye i bezwen reziste? (b) Donn en legzanp.
14 Parey tou lezot Kretyen, bann refizye i bezwen reziste tantasyon ek presyon pour met bann keksoz materyel avan zot relasyon avek Zeova. * (Vwar not.) Lije ek son bann frer ek ser ki nou’n koz lo la avan i rapel bann leson enportan ki zot papa ti ansenny zot lo lafwa ler zot ti pe sove. Zot dir: “I ti zet enn par enn sa detrwa keksoz ki pa ti neseser ki nou ti pe anmennen. Finalman, i ti lev sa sak vid anler e dir avek en sourir: ‘Zot vwar? Se tou ki zot bezwen!’”
DONN BANN REFIZYE SA KI ZOT PLI BEZWEN
15, 16. (a) Ki mannyer nou kapab fortifye lafwa nou bann frer ek ser? (b) Ki mannyer nou kapab ed zot emosyonnelman?
15 Bann refizye i bezwen plis ki manze ek lenz. Zot bezwen ganny sipor emosyonnel e lankourazman ki dan Labib. (Matye 4:4) Bann ansyen i kapab ede par rod bann piblikasyon ki dan langaz bann refizye e ed zot ganny kontak avek bann frer ek ser ki koz zot langaz. Sa i vreman enportan parski bann refizye in oblize kit deryer tou sa ki zot ti abitye avek. Zot pe mank zot fanmir, kominote ek kongregasyon. Zot bezwen santi lanmour ek konpasyon Zeova parmi zot bann frer ek ser Kretyen. Si non, bann refizye i kapab rod led avek dimoun ki sorti dan zot prop pei me ki pa bann serviter Zeova. (1 Korentyen 15:33) Ler nou fer zot santi ki zot form parti kongregasyon, nou travay avek Zeova pour protez “bann rezidan etranze.”
16 Zezi ek son fanmir pa ti kapab retourn kot zot osi lontan ki bann ki ti pe persekit zot ti ankor pe dirize. Pareyman, sa i kapab rezon akoz ki serten refizye pa kapab retourn se zot ozordi. Par kont, i kapab ki lezot pa anvi retourn kot zot. Lije i dir ki plizyer paran pa anvi retourn avek zot zanfan dan zot pei parski zot ti vwar manm zot fanmir ganny vyole e touye laba. Pour ed nou bann frer ek ser, nou bezwen “annan menm fason panse ek santiman, kontan kanmarad parey bann 1 Pyer 3:8) Akoz persekisyon, serten refizye pa asosye avek lezot e zot santi zot onte pour koz lo zot soufrans, espesyalman dan prezans zot zanfan. Demann ou lekor, ‘Si mon ti’n pas atraver sa kalite soufrans, ki mannyer mon ti pou kontan lezot i tret mwan?’
LER NOU PRES AVEK BANN REFIZYE KI PA TEMWEN
17. Ki mannyer nou travay predikasyon i soulaz bann refizye?
17 Plizyer refizye i sorti dan bann pei kot predikasyon i enterdi. Gras a bann Temwen devoue, plizyer milye refizye pe tann “mesaz Rwayonm” pour premye fwa. (Matye 13:19, 23) Plizyer refizye ki “fatige” i ganny rekonforte e soulaze dan nou bann renyon e zot vitman dir: “Bondye i vreman parmi zot.”
18, 19. Ki mannyer nou kapab pridan ler nou pres avek bann refizye?
18 Nou bezwen vin saz e “pridan” ler nou pres avek bann refizye. (Matye 10:16; Proverb 22:3) Ou bezwen annan pasyans e ekout bann refizye byen ler zot pe koze, me pa koz lo politik. Nou devret swiv lenstriksyon sorti kot biro brans, ensi ki bann sorti kot bann lotorite sa pei pour ki nou pa met nou ek lezot an danze. Parski bann refizye i annan diferan larelizyon ek kiltir, nou bezwen aprann konn zot e annan respe pour zot santiman ek lopinyon. Par egzanp, dimoun sorti dan serten pei i serye konsernan lafason ki bann madanm i devret abiye. Alor ler nou pres avek zot, i ti a byen pour abiy dan en fason ki pa pou ofans zot.
19 Nou oule ed bann dimoun ki pe soufer, menm bann ki pa servi Zeova. Ler nou fer sa, nou pe imit sa bon Samariten dan legzanp Zezi. (Lik 10:33-37) Sa pli bon fason pour ed bann dimoun se ansenny zot sa bon nouvel. En ansyen ki’n ed plizyer refizye ti dir ki i enportan ki deswit nou dir zot ki nou Temwen Zeova. Nou devret fer zot konnen avan tou, ki nou anvi ed zot konpran sa zoli lespwar ki dan Labib e ki nou pa la pour donn zot led materyel.
BANN BON REZILTA
20, 21. (a) Ki bon rezilta i annan ler nou demontre lanmour senser anver bann refizye? (b) Ki nou pou aprann dan sa lot lartik?
20 Ler nou demontre lanmour senser anver “bann rezidan etranze,” nou ganny bann bon rezilta. Ler msye en ser ki apel Alganesh ti mor, li ek son sis zanfan ki ti ankor zenn, ti sov persekisyon Leritre. Zot ti bezwen vwayaz wit zour dan dezer. Finalman, byen fatige, zot ti ariv Soudan. I dir: “Bann frer ek ser laba ti tret nou konman zot fanmir pros. Zot ti donn nou manze, lenz, landrwa reste e ed nou avek transportasyon. Lekel ankor ki ti pou akey bann etranze se zot zis akoz zot ador menm Bondye? Zis Temwen Zeova!”
21 Ki arive avek bann zanfan ki vin avek zot paran? Dan sa lot lartik, nou pou aprann ki mannyer nou tou nou kapab ed sa bann fanmir servi Zeova avek lazwa.
^ par. 2 Dan sa lartik, sa mo “refizye” pe refer avek bann dimoun ki’n bezwen kit se zot akoz lager, persekisyon oubyen dezas natirel. Zot oblize al viv dan en lot pei ouswa en lot bor dan zot prop pei. Lorganizasyon UNHCR (United Nations High Commissioner for Refugees) i dir ki 1 dan 113 dimoun dan lemonn antye i oblize kit se zot.
^ par. 6 Vwar sa lartik “Pa oubliye demontre lanmour anver bann etranze” dan Latour Veyer Oktob 2016 paz 3-8.
^ par. 11 O pli vit posib ki bann refizye in arive, bann ansyen i devret swiv lenstriksyon ki trouve dan liv Organized to Do Jehovah’s Will, sapit 8, paragraf 30. Bann ansyen i kapab ekri zot prop biro brans par servi jw.org pour kontakte en kongregasyon dan pei sa refizye. Antretan, bann ansyen i kapab demann bann kestyon avek bon zizman konsernan son kongregasyon ek minister pour konnen ki mannyer i pe fer spirityelman.
^ par. 14 Vwar sa de lartik “Personn pa kapab servi de met” ek “Pran kouraz Zeova pou sekour ou!” dan Latour Veyer le 15 Avril 2014 paz 17-26.