DANIEL EK MIRIAM ti marye Septanm lannen 2000 e zot ti annan en lavi konfortab Barcelona, Lespanny. Daniel i eksplike: “Nou travay ti permet nou manz dan bann gran gran restoran, vwayaze e met bann lenz ser. Nou ti osi al prese regilyerman.” Me apre sa, en keksoz ti arive.

Dan en lasanble 2006, Daniel ti tann en diskour ki ti demann sa kestyon: “Eski nou pe fer tou sa ki nou kapab pour ed bann ki pe ‘ganny trennen ver labatwar’ pour vin lo sa semen ki anmenn ver lavi eternel?” (Proverb 24:11) Sa diskour ti eksplike ki nou annan sa responsabilite pour pres mesaz Labib parski lavi bann dimoun i depan lo la. (Akt 20:26, 27) Daniel i rapel, “Mon ti santi konmsi Zeova ti pe koz avek mwan.” Sa diskour ti osi fer resorti ki nou pli ere ler nou fer plis dan servis Zeova. Daniel ti konnen ki sa i vre akoz i ti kapab vwar ki Miriam, ki ti’n fini konmans fer pionye, ti vreman ere.

Sa diskour ti telman annan en lefe lo Daniel ki i ti deside ki i’n ariv ler pour fer en gran sanzman dan son lavi. I ti konmans travay mwens, konmans fer pionye e mazinen ki kantite i ti pou ere si li ek Miriam ti kapab servi kot i annan en bezwen pour plis proklanmater Rwayonm.

An Me 2007, Daniel ek Miriam ti kit zot landrwa travay e al reste Panama, en pei ki zot ti’n vizite avan. Zot teritwar ti bann diferan zil dan Larsipel Bocas del Toro ki dan Lanmer Karaib. Laplipar dimoun ki reste laba i sa ki nou apel Guaymi. Daniel ek Miriam ti mazinen ki zot kapab reste Panama pour apepre wit mwan avek sa larzan ki zot ti’n met dekote.

Zot ti vwayaz par bato ek bisiklet pour vizit bann dimoun lo sa bann diferan zil. Zot ankor rapel premye fwa ki zot ti mont zot bisiklet lo bann montanny apik pour apepre 30 kilomet dan sa gro lasaler. Daniel ti sitan fatige ki i ti pros pour tonm sek. Par kont, bann fanmir Guaymi ki zot ti zwenn ti demontre lospitalite anver zot, sirtou apre ki zot ti’n aprann serten lekspresyon dan zot langaz. I pa ti pran bokou letan pour zot ganny 23 letid Labib.

Ki ti arive apre ki zot ti’n depans tou zot larzan? Daniel i dir: “Avek larm dan nou lizye nou ti konmans mazin pour retourn Lespanny. Nou ti tris pour kit nou bann letid Labib.” Me en mwan pli tar, zot ti ganny en nouvel eksitan. Miriam i dir: “Nou ti ganny envite pour servi konman pionye spesyal. I ti en gran lazwa pour nou kapab reste dan nou servis!”

Akoz bann sanzman dan lorganizasyon, Daniel ek Miriam ti bezwen aret servi konman pionye spesyal an 2015. Ki zot ti pou fer aprezan? Zot ti annan konfyans dan sa promes ki ganny trouve dan Psonm 37:5, (NWT): “Met ou lavi dan lanmen Zeova, depan lo li e li i pou azir dan ou faver.” Zot ti rod en travay pour zot kapab fer pionye ordiner e ozordi zot servi dan en kongregasyon Veraguas, Panama.

Daniel i dir: “Avan nou ti kit Lespanny, nou pa ti asire si nou ti pou kapab viv en lavi senp. Ozordi, sanmenm ki nou fer e nou pa mank nanryen ki vreman enportan.” Ki pli gran lazwa zot annan? Zot dir: “Ler nou ed bann dimoun ki annan limilite aprann konn Zeova, sa i donn nou en lazwa ki pa kapab ganny konpare!”