1-2. Donn en rezon akoz nou devret enterese avek liv Revelasyon.

 ESKI en dimoun ki ou konnen in deza pret ou son album pour get portre? Anmezir ki ou get sa bann portre, ou vwar bann dimoun ki ou pa konnen. Me enn parmi sa bann portre i atir ou latansyon. Akoz? Parski ou dan sa portre. Ler ou get sa portre, ou esey rapel kan e kote sa portre ti ganny tire. Ou osi esey rode lekel sa bann dimoun ki dan sa portre. Sa portre i vreman spesyal pour ou.

² Liv Revelasyon i parey sa portre. Akoz? Pour omwen de rezon. Premyerman, sa liv Labib in ganny ekrir pour nou. Son premye verse i dir: “En revelasyon sorti kot Zezi Kri, ki Bondye ti donn li pour montre son bann lesklav bann keksoz ki bezwen arive byento.” (Rev. 1:1) Alor, sa ki’n ganny ekrir dan sa liv pa’n ganny ekrir pour tou dimoun me i’n ganny ekrir pour nou akoz nou pe servi Bondye. Konman pep Bondye, nou pa sirprann ler nou konnen ki nou pe partisip dan lakonplisman bann profesi ki dan sa liv. Alor ler nou lir liv Revelasyon, nou pe lir lo bann keksoz ki annan en lefe lo nou personnelman.

3-4. Dapre liv Revelasyon, kan ki sa bann profesi ti pou ganny akonplir e ki lefe sa i devret annan lo nou?

³ Sa dezyenm rezon ki nou devret enterese avek bann profesi dan liv Revelasyon i akoz sa letan ki sa bann profesi pou ganny akonplir. Zapot Zan ti fer nou konn sa ler i ti dir: “Gras a lespri sen, mon ti vwar bann keksoz ki ti pou arive pandan zour Senyer.” (Rev. 1:10) Ler Zan ti ekri sa bann parol ver lannen 96, “zour Senyer” pa ti ankor konmanse. I ti pou konmans bokou lannen pli tar.  (Mat. 25:14, 19; Lik 19:12) Me dapre bann profesi Labib, sa zour ti konmans an 1914 ler Zezi ti vin Lerwa dan lesyel. Depi sa lannen, bann profesi dan liv Revelasyon konsernan pep Bondye ti konmans ganny akonplir. Alor i kler ki nou pe viv “pandan zour Senyer.”

⁴ Nou pe viv pandan sa letan eksitan. Alor nou bezwen ekout byen sa konsey ki dan Revelasyon 1:3 ki dir: “Ere sa enn ki lir aotvwa e bann ki ekout parol sa profesi e ki obei bann keksoz ki’n ganny ekrir ladan, parski letan fikse i pros.” Alor nou bezwen “lir aotvwa,” “ekout parol sa profesi” e “obei” sa ki’n ganny ekrir. Ki serten sa bann parol ki nou bezwen obei?

5. Ki mannyer liv Revelasyon i montre ki i enportan pour fer sir ki nou ladorasyon i akseptab pour Zeova?

⁵ Dan premye sapit liv Revelasyon, nou vwar ki Zezi i konn tou sa ki pe arive dan bann kongregasyon. (Rev. 1:12-16, 20; 2:1) Zezi ti montre ki i konnen ki pe arive ler i ti anvoy bann mesaz pour set kongregasyon dan Lazi Miner. Dan sa bann mesaz, i ti donn lenstriksyon pour ed bann Kretyen dan premye syek pour fer sir ki zot ladorasyon i akseptab pour Zeova. Sa ki Zezi ti dir dan sa bann mesaz i aplik pour pep Bondye ozordi. Ki nou kapab aprann? Zezi i nou Sef e i konnen si nou annan en bon lanmitye avek Zeova. I gid nou, protez nou e vwar tou keksoz. I konnen ki nou bezwen fer pour ki nou kontinyen annan laprouvasyon Zeova. Ki lenstriksyon Zezi ti donnen ki nou bezwen obei?

6. (a) Dapre sa ki Zezi ti dir dan Revelasyon 2:3, 4, ki problenm bann Kretyen dan kongregasyon Efez ti annan? (b) Ki leson nou aprann avek sa ki ti pe arive dan kongregasyon Efez?

⁶ Lir Revelasyon 2:3, 4. Nou pa devret perdi sa lanmour ki nou ti annan pour Zeova o konmansman. Sa mesaz ki Zezi ti anvoy pour kongregasyon Efez i montre ki zot ti’n demontre landirans e ki zot ti pe kontinyen servi Zeova menm si zot ti annan en kantite problenm. Me kantmenm sa, zot ti nepli kontan Zeova parey avan. Pour ki Zeova i aksepte zot ladorasyon, zot ti bezwen reganny sa lanmour. Pareyman, ozordi nou osi nou bezwen andire me nou bezwen fer plis ki sa. Nou bezwen andir pour bann bon rezon. Nou Bondye i enterese avek sa ki nou fer me osi avek akoz nou fer li. Nou motivasyon i enportan pour Bondye akoz i anvi ki nou ador li parski nou vreman kontan li e nou rekonesan anver li.​—Prov. 16:2; Mark 12:29, 30.

7. (a) Dapre sa ki Zezi ti dir dan Revelasyon 3:1-3, ki problenm bann Kretyen dan kongregasyon Sard ti annan? (b) Ki nou bezwen fer?

⁷ Lir Revelasyon 3:1-3. Nou devret reste eveye. Bann Kretyen dan kongregasyon Sard ti annan en lot kalite problenm. Menm si dan lepase zot ti fer en kantite dan servis Zeova, aprezan zot ti pe nepli fer parey. Alor Zezi ti dir ki zot ti bezwen leve. Ki nou kapab aprann? Zeova pa pou oubliy bann travay ki nou’n fer. (Ebr. 6:10) Me kantmenm sa nou pa devret krwar ki sa ki nou’n fer dan lepase i ase. Nou devret kontinyen servi Zeova. Menm si nou nepli kapab fer parey nou ti fer dan lepase, nou bezwen reste okipe “dan  travay Senyer” e reste eveye ziska lafen sa move lemonn.​—1 Kor. 15:58; Mat. 24:13; Mark 13:33.

8. Ki nou aprann avek sa ki Zezi ti dir bann frer ek ser dan kongregasyon Laodise dan Revelasyon 3:15-17?

⁸ Lir Revelasyon 3:15-17. Nou bezwen ador Zeova avek tou nou leker e devoue dan nou servis. Sa mesaz ki Zezi ti anvoy pour bann Kretyen dan kongregasyon Laodise i montre ki zot ti annan en lot kalite problenm. Zot ti nepli enterese avek zot ladorasyon. Dan en sans, zot ti “tyed” e Zezi ti dir ki zot ti “malere [e] fer lapenn.” Zot ti bezwen montre ki zot annan en gran devouman pour Zeova ek son ladorasyon. (Rev. 3:19) Ki nou kapab aprann? Si nou nepli annan sa devouman ki nou ti annan avan, nou bezwen devlop plis lapresyasyon pour bann bon keksoz ki Zeova ek son lorganizasyon in donn nou. (Rev. 3:18) Nou ladorasyon pour Zeova i devret sa keksoz pli enportan dan nou lavi. Alor nou pa devret zanmen les bann keksoz materyel vin sitan enportan pour nou, ki i pran plas bann aktivite spirityel.

9. Dapre sa ki Zezi ti dir bann Kretyen dan kongregasyon Perganm ek Tyatir, ki danze nou bezwen evite?

⁹ Nou bezwen rezet lansennyman bann aposta. Zezi ti reprimann serten Kretyen dan kongregasyon Perganm parski zot ti pe kree divizyon dan kongregasyon. (Rev. 2:14-16) I ti felisit serten dan kongregasyon Tyatir parski zot pa ti’n aprann bann “keksoz profon konsernan Satan” e i ti ankouraz zot pour “tenir ferm” dan laverite. (Rev. 2:24-26) Me i ti annan serten dan sa kongregasyon ki ti napa en lafwa for e zot ti’n swiv bann fo lansennyman. Alor zot ti bezwen repantir. Ki nou kapab aprann? Nou bezwen rezet okenn lansennyman ki al kont lansennyman Zeova ki dan Labib. Bann aposta i ‘fer krwar ki zot annan devosyon pour Bondye me sa napa okenn lefe dan zot lavi.’ (2 Tim. 3:5) Ler nou kontan etidye Parol Bondye, i pli fasil pour nou idantifye e rezet bann fo lansennyman.​—2 Tim. 3:14-17; Zid 3, 4.

10. Kwa ankor ki nou kapab aprann avek sa ki Zezi ti dir kongregasyon Perganm ek Tyatir?

¹⁰ Nou bezwen rezet tou sort kalite imoralite seksyel. I ti annan en lot problenm  dan kongregasyon Perganm ek Tyatir. Zezi ti reprimann serten dan sa bann kongregasyon parski zot pa ti’n rezet imoralite seksyel. (Rev. 2:14, 20) Ki nou kapab aprann? Menm si nou’n servi Zeova pour plizyer lannen e nou annan en kantite responsabilite dan son lorganizasyon, nou pa kapab ekspekte ki Zeova i aksepte nou ladorasyon si nou pe fer okenn keksoz imoral. (1 Sam. 15:22; 1 Pyer 2:16) I anvi ki nou kontinyen viv dapre son bann standar moral menm si standar moral sa lemonn i vin pli move.​—Efe. 6:11-13.

11. Ki nou’n aprann ziska aprezan? (Vwar osi bwat “ Leson pour nou ozordi.”)

¹¹ Ki nou’n aprann ziska aprezan? Nou’n vwar ki nou bezwen fer sir ki nou ladorasyon i akseptab pour Zeova. Si nou pe fer en keksoz ki kapab fer Zeova pa aksepte nou ladorasyon, nou bezwen fer bann sanzman deswit pour ki nou ganny laprouvasyon Zeova. (Rev. 2:5, 16; 3:3, 16) Me nou kapab aprann en lot keksoz avek sa ki Zezi ti dir dan son bann mesaz ki i ti anvoy pour bann kongregasyon. Ki Zezi ti dir?

12. Ki nou kapab aprann avek sa ki Zezi ti dir bann Kretyen dan kongregasyon Smirn ek Filadelfi? (Revelasyon 2:10)

¹² Aprezan annou vwar sa ki Zezi ti dir bann Kretyen dan kongregasyon Smirn ek Filadelfi. Zezi ti dir sa bann Kretyen ki zot pa devret per ler zot ganny persekite parski Zeova pou rekonpans zot si zot reste fidel. (Lir Revelasyon 2:10; 3:10) Ki nou kapab aprann? Nou bezwen ekspekte ki nou ganny persekite e nou bezwen pare pour andire ler sa i arive. (Mat. 24:9, 13; 2 Kor. 12:10) Akoz i enportan pour nou rapel sa?

13-14. Ki lefe sa bann levennman ki ganny mansyonnen dan Revelasyon sapit 12 i annan lo pep Bondye?

¹³ Liv Revelasyon i montre ki pandan “zour Senyer,” pep Bondye pou ganny persekite. Dan sapit 12 liv Revelasyon i dir ki i ti annan en lager dan lesyel zis apre ki Zezi ti vin Lerwa dan Rwayonm Bondye. Mikael ek son bann lanz ti lager avek Satan ek bann demon. Mikael i li menm li Zezi Kri apre ki i ti’n retourn dan lesyel. (Rev. 12:7, 8) Mikael ti ranport laviktwar e bann lennmi Bondye ti ganny zete lo later. Sa in anmenn en kantite soufrans lo later. (Rev. 12:9, 12) Me ki lefe sa i annan lo pep Bondye?

¹⁴ Liv Revelasyon i dir nou sa ki Satan i fer apre ki i ti’n ganny zete lo later. Vi ki i nepli kapab al dan lesyel, i atak bann  Kretyen swazir ki ankor lo later. Sa bann Kretyen swazir i bann reprezantan Rwayonm Bondye e zot pe “rann temwannyaz konsernan Zezi.” (Rev. 12:17; 2 Kor. 5:20; Efe. 6:19, 20) Ki mannyer sa profesi in ganny akonpli?

15. Lekel sa “de temwen” ki Revelasyon sapit 11 i koz lo la e ki ti arive avek zot?

¹⁵ Satan ti fer bann lennmi Bondye atak bann Kretyen swazir ki ti pe diriz sa travay predikasyon. Dan sa profesi ki dan liv Revelasyon, sa “de temwen” ki ti ganny touye i reprezant bann Kretyen swazir ki ti pe diriz sa travay predikasyon. * (Rev. 11:3, 7-11) An 1918, i ti annan bann fo lakizasyon ki ti ganny anmennen kont wit parmi sa bann frer ki ti pe dirize dan lorganizasyon Zeova. Sa bann frer ti ganny kondannen plizyer lannen prizon. Sa ti fer laplipar dimoun krwar ki sa travay ki bann Kretyen swazir ti pe fer ti’n aret net.

16. Ki ti arive an 1919 e ki Satan in kontinyen fer?

¹⁶ Sa profesi dan Revelasyon sapit 11 i osi dir ki apre en pti pe letan, sa “de temwen” i revin vivan. Mwens ki enn an apre ki sa bann frer ti ganny met dan prizon, sa profesi ti ganny akonplir dan en fason ki personn pa ti pe ekspekte. An Mars 1919, sa bann Kretyen swazir ti sorti prizon e pli tar bann sarz kont zot ti ganny retire. Deswit bann frer ti rekonmans sa travay predikasyon. Me sa pa ti anpes Satan kontinyen atak pep Bondye. Depi sa letan, Satan pe persekit pep Bondye e sa persekisyon i parey “en larivyer.” (Rev. 12:15) I pour sa rezon akoz nou tou nou “bezwen demontre landirans ek lafwa.”​—Rev. 13:10.

17. Ki led pep Bondye ti gannyen menm si Satan ti pe atak zot?

¹⁷ Liv Revelasyon i eksplike ki pep Bondye ti pou ganny led ler zot ganny persekite. I ti pou konmsi “later” pe “anval sa larivyer.” (Rev. 12:16) Sanmenm sa ki ti arive. Parfwa serten dimoun dan lemonn Satan ki pli rezonnab i ed pep Bondye. Par egzanp, serten dan sistenm zidisyer ti ed pep Bondye dan bann ka ankour. Plizyer fwa, bann serviter Zeova  in ranport laviktwar dan bann ka ankour e sa in donn zot serten liberte. Ki mannyer zot in servi sa laliberte? Zot in byen servi tou loportinite pour fer sa travay ki Zeova in donn zot. (1 Kor. 16:9) Me ki sa travay ki Zeova in donn zot?

18. Ki sa travay prensipal ki nou annan pandan bann dernyen zour?

¹⁸ Zezi ti dir ki avan lafen i arive, son bann disip ti pou anons sa “bon nouvel Rwayonm” partou lo later. (Mat. 24:14) Pandan ki zot pe fer sa, zot pou ganny led en lanz ouswa en group lanz ki annan en “bon nouvel eternel pour anonse avek tou bann ki reste lo later, avek tou nasyon, tribi, langaz ek pep.”​—Rev. 14:6.

19. Ki en lot mesaz bann ki kontan Zeova i bezwen anonse?

¹⁹ Pep Bondye pa pe zis anons sa bon nouvel Rwayonm, zot osi bezwen travay ansanm avek bann lanz ki ganny mansyonnen dan Revelasyon sapit 8 ziska sapit 10. Sa bann lanz i anonse ki i pou annan diferan maler ki pou tonm lo bann ki rezet Rwayonm Bondye. Alor, Temwen Zeova pe anons en mesaz zizman ki parey “lagrel ek dife” e ki montre zizman Bondye lo diferan bout dan lemonn Satan. (Rev. 8:7, 13) Bann dimoun i bezwen konnen ki lafen i pros pour zot kapab fer bann sanzman e sirviv zour lakoler Zeova. (Zef. 2:2, 3) Me laplipar dimoun pa kontan sa mesaz. Alor, nou bezwen annan kouraz pour anons sa mesaz. Pandan gran ladetres, sa dernyen mesaz zizman pou fer dimoun pli ankoler ankor.​—Rev. 16:21.

20. Ki nou pou vwar dan sa de lartik ki swiv?

²⁰ Nou vreman bezwen obei “parol sa profesi” parski nou pe ede dan lakonplisman sa bann profesi ki dan liv Revelasyon. (Rev. 1:3) Me ki mannyer nou kapab andire ler nou ganny persekite e kontinyen anons sa bann mesaz avek kouraz? I annan de keksoz ki pou ankouraz nou. Premyerman, sa ki liv Revelasyon i dir konsernan bann lennmi Bondye e dezyenmman, bann benediksyon ki nou pou gannyen si nou reste fidel. Dan sa de lartik ki swiv, nou pou vwar konsernan sa de keksoz.