1, 2. (a) Ki sa pri ki tou bann serviter Bondye i enpasyan pour gannyen? (b) Kwa ki ed nou pour gard nou lizye lo sa pri? (Vwar portre o konmansman sa lartik.)

BANN Kretyen swazir i annan en lespwar presye. Zot enpasyan pour al viv dan lesyel. Zapot Pol ti apel sa lespwar pour al viv dan lesyel konman “sa pri.” (Filipyen 3:14) Dan lesyel, zot pou diriz ansanm avek Zezi dan son Rwayonm e travay avek li pour ed bann imen vin parfe. (Revelasyon 20:6) Sa i en lespwar merveye, pa i vre! Lezot mouton pe esper avek enpasyans pour en lot kalite pri. Zot annan sa lespwar pour viv pour touzour dan Paradi lo later e sa lespwar i fer zot vreman ere!​—2 Pyer 3:13.

² Pol ti anvi ed son bann frer ek ser swazir pour reste fidel pour zot kapab ganny sa pri. I ti dir zot: “Gard zot lespri fikse lo bann keksoz ki annan pour fer avek lesyel.” (Kolosyen 3:2) Zot ti bezwen reste konsantre lo sa zoli lespwar pour al dan lesyel. (Kolosyen 1:4, 5) Par mazin  bann benediksyon ki Bondye in promet, tou Kretyen i kapab gard zot lizye fikse lo sa pri. Sa i vre ki swa zot annan sa lespwar pour viv dan lesyel ouswa lo later.​—1 Korentyen 9:24.

3. Ki lavertisman Pol ti donn bann Kretyen?

³ Pol ti osi averti bann Kretyen lo bann danze ki ti kapab anpes zot ganny sa pri. Par egzanp, i ti ekri bann Kretyen Kolosyen konsernan bann fo Kretyen ki ti pe esey fer plezir Bondye par swiv Lalwa Moiz dan plas met zot lafwa dan Kris. (Kolosyen 2:16-18) Pol ti osi diskit lo bann danze ki ankor egziste ozordi ki kapab anpes nou osi ganny sa pri. I ti eksplike ki mannyer pour rezet bann dezir imoral e ki nou kapab fer ler nou annan problenm dan nou fanmir oubyen avek nou bann frer ek ser dan kongregasyon. Sa bann bon konsey i kapab ed nou ozordi. Alor annou egzamin serten sa bann lavertisman ki i ti donnen avek lanmour ki nou vwar dan son let pour bann Kolosyen.

4. Akoz bann dezir imoral i kapab anpes nou ganny sa pri?

⁴ Apre ki Pol ti’n rapel son bann frer konsernan zot bann lespwar merveye, i ti ekri: “Alor, met amor zot bann move dezir ki annan pour fer avek imoralite seksyel, lenpirte, move dezir seksyel san kontrol, dezir pour fer sa ki mal ek vorasite.” (Kolosyen 3:5) Bann dezir imoral i kapab vreman for e zot kapab kas nou relasyon avek Zeova e fer nou perdi nou lespwar pour lavenir. En frer ki ti komet imoralite e ki pli tar ti retourn dan kongregasyon i dir ki son bann dezir imoral ti vin sitan for ki i “pa ti kapab arete ziska ki i ti tro tar.”

5. Ki mannyer nou kapab protez nou lekor avek bann sityasyon ki danzere?

⁵ Nou bezwen fer byen atansyon si nou dan en sityasyon ki kapab fer nou dezobei bann standar moral Zeova. Par egzanp, i saz pour en koup ki pe pwente pour met serten limit depi o konmansman konsernan bann keksoz parey touse, anbrase e tousel ansanm. (Proverb 22:3) Lezot sityasyon danzere i kapab arive ler nou vwayaze pour travay oubyen ler nou travay avek en dimoun lot sèks. (Proverb 2:10-12, 16) Ki ou kapab fer pour protez ou lekor? Fer dimoun konnen ki ou en Temwen Zeova. Konport ou byen e pa zanmen bliye ki rod latraksyon en dimoun lot sèks i kapab anmenn dezas. Nou osi bezwen fer atansyon si nou santi nou tris oubyen tousel. Nou kapab anvi ki en dimoun i bezwen nou oubyen kontan nou. Nou kapab santi nou sitan tousel ki nou aksepte latansyon nenport ki dimoun. Sa i danzere. Si zanmen ou santi koumsa, pa les nanryen anpes ou ganny sa pri. Rod led avek Zeova ek ou bann frer ek ser.​—Lir Psonm 34:18; Proverb 13:20.

6. Ki nou devret rapel ler nou pe swazir divertisman?

⁶ Pour met amor bann dezir imoral, nou bezwen rezet bann divertisman imoral. Bann divertisman ki egziste ozordi i rapel nou ki mannyer keksoz ti ete Sodonm ek Gomor. (Zid 7) Bann  ki prodwir sa bann divertisman i fer konmsi imoralite seksyel i normal e san danze. Alor nou bezwen touzour fer atansyon. Nou pa kapab aksepte nenport ki divertisman ki sa lemonn i ofer nou. O kontrer, nou bezwen swazir bann divertisman ki pa pou anpes nou ganny sa pri lavi.​—Proverb 4:23.

7. Ki problenm ki kapab annan dan kongregasyon Kretyen?

⁷ Nou byen kontan ki nou form parti kongregasyon Kretyen. Nou etidye Parol Bondye dan bann renyon e siport kanmarad avek lanmour. Sa i ed nou pour konsantre lo sa pri. Me par ler i annan bann mal konprenezon ki kapab fer problenm antre nou. Si nou pa rezourd sa bann problenm, zot kapab fasilman fer nou gard rankin.​—Lir 1 Pyer 3:8, 9.

8, 9. (a) Ki bann kalite ki pou ed nou ganny sa pri? (b) Kwa ki pou ed nou gard lape si en Kretyen i ofans nou?

⁸ Nou pa kapab les rankin anpes nou ganny sa pri. Pol ti eksplike ki bann Kretyen i bezwen fer: “Konman sa bann ki Bondye in swazir, ki sen e ki Bondye i kontan, demontre lafeksyon avek tandres ek konpasyon, labonte, limilite, ladouser ek pasyans. Kontinyen siport kanmarad e pardonn kanmarad volonterman menm si en dimoun i annan rezon pour konplent akoz en lot. Parey Zeova in volonterman pardonn zot, zot osi zot devret fer parey. Me an plis ki sa, demontre lanmour parski i soud keksoz ansanm dan en fason parfe.”​—Kolosyen 3:12-14.

⁹ Lanmour ek labonte i kapab ed nou pour pardonn lezot. Si nou’n ganny ofanse par en keksoz ki en lot in dir oubyen fer, nou kapab mazin bann lokazyon ki nou ti dir oubyen fer bann keksoz mal avek lezot me zot ti pardonn nou. Pa nou ti bokou apresye zot lanmour ek labonte. (Lir Eklezyast 7:21, 22.) Nou vreman rekonesan ki Kris i ini tou bann vre adorater. (Kolosyen 3:15) Nou tou nou kontan sa menm Bondye, nou pres sa menm mesaz e nou tou nou annan menm problenm. Si nou annan lanmour ek labonte e pardonn kanmarad, kongregasyon pou vin pli ini e nou kapab reste konsantre lo ganny sa pri.

10, 11. (a) Akoz zalouzi i danzere? (b) Ki mannyer nou kapab fer sir ki zalouzi pa anpes nou ganny sa pri?

¹⁰ Zalouzi i kapab anpes nou ganny sa pri. Bann legzanp dan Labib i montre ki degre zalouzi i danzere. Par egzanp, Kaen ti zalou son frer Abel e touy li. Kora, Datan ek Abiranm ti zalou Moiz e zot ti rebel kont li. Lerwa Sail ti zalou David e esey touy li. Sa ki Parol Bondye i dir i vre: “Kot i annan zalouzi ek dispit, i pou osi annan dezord ek tou sort keksoz mal.”​—Zak 3:16.

¹¹ Si nou travay dir pour vreman demontre lanmour ek labonte, i pa pou fasil pour nou vin zalou. Parol Bondye i dir: “Lanmour i pasyan e i bon. Lanmour pa zalou.” (1 Korentyen 13:4) Pour ki nou pa vin zalou, nou devret  vwar keksoz parey Zeova. Nou bezwen vwar nou bann frer ek ser konman manm en sel lekor, setadir kongregasyon. Labib i dir: “Si en parti lekor i ganny onore, tou lezot parti lekor i rezoui avek li.” (1 Korentyen 12:16-18, 26) Si en bon keksoz i arive avek enn nou frer, nou pa pou zalou, me nou pou kontan pour li. Mazin lo bon legzanp Zonatan, ki ti garson Lerwa Sail. Zonatan pa ti zalou ler David ti ganny swazir pour vin lerwa olye li. I ti menm ankouraz e donn David son sipor. (1 Samyel 23:16-18) Eski nou kapab demontre menm lanmour ek labonte parey Zonatan?

12. Ki konsey dan Labib ki pou ed nou fanmir ganny sa pri?

¹² Ler tou manm fanmir i aplik bann prensip Labib, i pou annan lape dan nou fanmir, nou pou ere e nou pou ganny sa pri. Pol ti donn sa konsey saz pour bann fanmir: “Zot bann madanm, soumet avek zot msye parski se koumsa ki bann madanm Kretyen i devret fer. Zot bann msye, kontinyen kontan zot madanm e pa bezwen pran lakoler avek zot. Zot bann zanfan, obei zot paran dan tou keksoz parski sa i fer plezir Senyer. Zot bann papa, pa bezwen fer zot zanfan ankoler pour ki zot pa dekouraze.” (Kolosyen 3:18-21) Eski ou kapab vwar ki mannyer sa konsey i kapab ed ou fanmir?

13. Ki mannyer en ser Kretyen i kapab ed son msye ki pa Temwen pour anvi servi Zeova?

¹³ Petet ou en ser ki ou msye pa servi Zeova. Ki ou pou fer si ou santi ki i pa tret ou parey i devret? Petet ou pou ankoler e dispit avek li, me eski sa pou  amelyor ou sityasyon? Menm si ou ki’n ganny dernyen parol, eski ou pou fer li anvi servi Zeova? I probab ki non. Me si ou demontre respe pour li konman sef fanmir, ou kapab ede pour ki i annan plis lape dan ou fanmir e ou pou onor Zeova. Ou bon legzanp i menm kapab fer ou msye anvi servi Zeova e koumsa zot tou le de zot kapab ganny sa pri.​—Lir 1 Pyer 3:1, 2.

14. Ki en msye Kretyen i devret fer si son madanm ki pa Temwen napa respe pour li?

¹⁴ Petet ou en frer ki ou madanm pa servi Zeova. Ki ou kapab fer si ou santi ki i napa respe pour ou? Si ou esey montre li lekel ki ansarz kot lakour par kriy avek li, eski i pou annan plis respe pour ou? Definitivman non! Bondye i ekspekte ki ou en msye ki annan lanmour e ki imit Zezi. (Efezyen 5:23) Zezi, sef kongregasyon, i touzour annan pasyans ek lanmour. (Lik 9:46-48) Si ou imit Zezi, avek letan i kapab ki ou madanm i anvi servi Zeova li osi.

15. Ki mannyer en msye Kretyen i montre son madanm ki i kontan li?

¹⁵ Zeova i enstri bann msye: “Kontinyen kontan zot madanm e pa bezwen pran lakoler avek zot.” (Kolosyen 3:19) En msye ki annan lanmour i onor son madanm. Ki mannyer? I ekoute ler i eksprim son lopinyon e i dir li ki son lopinyon i enportan pour li. (1 Pyer 3:7) Menm si i pa kapab toultan fer sa ki son madanm i demande, ler i ekout li, sa i kapab ed li fer en pli bon desizyon. (Proverb 15:22) En msye ki annan lanmour pa fors son madanm pour annan respe pour li. O kontrer, i esey ganny son respe. Ler en msye i kontan son madanm ek son zanfan, i annan plis sans ki zot ere  anmezir ki zot servi Zeova e ganny sa pri lavi.

16, 17. Konman en zenn, ki mannyer ou kapab evite ankoler avek ou paran?

¹⁶ Petet ou en adolesan e ou santi ki ou paran pa konpran ou oubyen ki zot tro strik. Sa i kapab fer ou telman ankoler ki ou demann ou lekor si ou menm anvi servi Zeova. Me si ou kit Zeova, ou pou vwar ki napa personn dan sa lemonn ki kontan ou parey ou paran Kretyen ek ou bann zanmi dan kongregasyon.

¹⁷ Reflesir lo sa: Si ou paran pa zanmen disiplin ou, ki mannyer ou pou konnen ki zot vreman kontan ou? (Ebre 12:8) Byensir, zot pa parfe, alor lafason ki zot disiplin ou i kapab fer ou ankoler. Pa konsantre lo sa. O kontrer, esey konpran bann rezon pour sa ki zot fer e dir. Reste kalm e pa azir tro vit. Parol Bondye i dir: “Sa enn ki pa koz bokou i posed konnesans; sa enn ki lespri i kalm i rezonnab.” (Proverb 17:27) Fer li ou lobzektif pour vin en dimoun matir ki aksepte konsey e aprann avek sa bann konsey menm si i pa’n donnen dan en bon fason. (Proverb 1:8) Pa zanmen oubliye ki ler ou annan paran ki kontan Zeova, sa i en kado presye. Zot anvi ed ou pour viv pour touzour.

18. Akoz ou determinen pour fikse ou regar lo sa pri?

¹⁸ Ki swa nou annan sa lespwar pour viv pour touzour dan lesyel ouswa dan paradi lo later, sakenn ant nou i enpasyan pour ganny en lavenir merveye. Nou lespwar i en keksoz ki reel. I baze lo promes Kreater liniver ki’n dir: “Konnesans [Zeova] pou ranpli later.” (Izai 11:9) Byento tou dimoun lo later pou ganny ansennyen par Bondye. I vo lapenn travay dir pour ganny sa pri. Alor pa zanmen oubliy sa ki Zeova in promet ou e pa les nanryen anpes ou ganny sa pri!