Pandan sa lannen, lorganizasyon ti fer serten sanzman ki ti ede pour fer ki i annan linite parmi bann Etidyan Labib. The Watch Tower ti konmans pibliy bann komanter pour eksplik bann verse ki zot ti servi pandan bann Prayer, Praise, and Testimony Meeting ki ti ganny fer tou le semenn. An plis ki sa, bann Etidyan Labib ti osi enprim en kalandriye ki montre bann verse ki pou ganny diskite sak semenn pandan renyon e zot ti osi met en kantik ki zot ti pou kapab sante pandan ladorasyon fanmir oubyen letid personnel.

Dan zot bann renyon, bann Etidyan Labib ti donn zot “testimony,” setadir zot ti koz lo en leksperyans ki zot in gannyen dan predikasyon e lo rezon ki zot rekonesan anver Zeova. Zot ti osi sant kantik oubyen menm fer en lapriyer. Eva Barney, ki ti batize an 1923 a laz 15 an, i dir: “Si ou ti anvi koz lo en leksperyans, ou ti debout e konmans dir en keksoz en pe koumsa, ‘Mon anvi remersye Senyer pour tou bann bon keksoz ki i’n fer pour mwan.’” Serten frer ek ser ti kontan donn zot bann leksperyans. Ser Barney i osi dir: “Frer Godwin ki ti en frer aze ti remersye Zeova pour en kantite bon keksoz. Me ler son madanm ti vwar ki sa frer ki ti pe kondwir renyon ti konmans vin enkonfortab, i ti redi en pti pe lenz son msye e son msye ti aret koze.”

En fwa par mwan, sak kongregasyon ti fer en Prayer, Praise, and Testimony Meeting ki ti spesyal. Latour Veyer le 1 Avril 1923 i dir sa konsernan sa renyon: “Lanmwatye renyon i devret ganny servi pour fer bann komanter e donn bann leksperyans ki annan pour fer avek travay predikasyon e pour ankouraz bann travayer. . . . Nou krwar ki sa bann renyon ankourazan pou fer bann zanmi vin pli pros avek kanmarad.”

En proklanmater ki apel Charles Martin, ki ti annan 19 an sa letan e ki sorti Vancouver Kanada, ti ganny bokou byenfe avek sa bann renyon. I ti dir pli tar: “Sa ti sa premye landrwa kot mon ti aprann ki pour dir ler mon pe fer predikasyon kazankaz. Souvan en dimoun ti koz lo en leksperyans ki i’n gannyen ler i pe fer predikasyon kazankaz. Sa ti donn mwan bann nide lo ki pour dir e ki mannyer pour sirmont diferan lobzeksyon.”

Bann zour ki ti annan predikasyon ti osi ede pour fer bann frer ek ser vin pli ini. Latour  Veyer le 1 Avril 1923 ti dir: “Pour ki nou tou nou ini dan menm travay . . . , Mardi le 1 Me 1923 i ganny dedye konman en zour predikasyon. Apre sa, tou premye Mardi sak mwan pou en zour predikasyon . . . Tou dimoun dan tou kongregasyon i devret partisip dan sa travay.”

Menm bann Etidyan Labib ki ti ankor zenn ti partisip dan sa travay. Hazel Burford ki ti annan zis 16 an sa letan i dir: “Dan Bulletin i ti annan bann legzanp prezantasyon pour nou aprann parker. a Nou de mon granpapa, nou ti travay dir dan sa bann aktivite.” Me Ser Burford ti ganny opoze avek en dimoun ki i pa ti pe ekspekte. I dir: “En frer aze pa ti kontan ditou ki mon ti pe koz avek dimoun. Sa letan serten pa ti konpran ki tou Etidyan Labib enkli ‘bann garson ek zenn fiy,’ ti devret partisip dan sa travay pour loue nou Gran Kreater.” (Ps. 148:​12, 13) Me Ser Burford pa ti arete. Pli tar i ti asiste dezyenm laklas Lekol Gilead e i ti servi konman en misyonner Panama. Avek letan, sa bann frer ti sanz zot pwennvi konsernan bann zenn ki pe partisip dan predikasyon.

Bann lasanble osi ti ed bann frer ek ser pour vin pli ini. Pandan en kantite sa bann lasanble, i ti annan en zour pour predikasyon. Par egzanp, pandan sa lasanble ki ti ganny fer Winnipeg, Kanada, tou sa ki ti asiste sa lasanble ti ganny envite pour fer predikasyon dan sa landrwa le 31 Mars. Bann frer ek ser ti zwenn bokou plis dimoun pandan sa bann zour predikasyon spesyal e zot ti ganny bann bon rezilta. Le 5 Out, apepre 7,000 dimoun ti asiste en lot lasanble ki ti ganny fer Winnipeg. Sa ti plis dimoun ki ti’n deza asiste en lasanble Kanada sa letan.

Le 18 ziska le 26 Out 1923, en lasanble vreman enportan pour pep Zeova, ti ganny fer Los Angeles Kaliforni. Pandan bann semenn avan sa lasanble, bann lavertisman ti ganny mete dan bann zournal e bann Etidyan Labib ti donn plis ki 500,000 lenvitasyon. I ti annan bann plakar avek bann lavertisman lo la, ki ti ganny  mete lo bann transpor piblik ek bann transpor prive.

Sanmdi le 25 Out, Frer Rutherford ti fer en diskour ki ti annan pour tit “Sheep and Goats,” (Mouton ek kabri). Dan sa diskour, i ti montre klerman ki “mouton” i bann dimoun ki annan sa bon kondisyon leker e ki zot pou viv dan paradi lo later. I ti osi lir en rezolisyon ki ti apel “A Warning,” (En lavertisman). Sa rezolisyon ti kondann bann larelizyon ki swadizan Kretyen e i ti ankouraz bann dimoun ki annan leker senser pour sorti dan “Gran Babilonn.” (Rev. 18:​2, 4) Pli tar bann Etidyan Labib partou dan lemonn ki ti byen devoue, ti distribye plizyer milyon kopi sa rezolisyon.

Lo dernyen zour sa lasanble, plis ki 30,000 dimoun ti ekout sa diskour ki Frer Rutherford ti fer, ki ti annan pour tit “All Nations Marching to Armageddon, but Millions Now Living Will Never Die.” Vi ki bann Etidyan Labib ti’n mazinen ki i ti pou annan sa kantite dimoun, zot ti’n lwe sa stad ki ti’n fek ganny konstrir Los Angeles. Bann frer ti servi loudspeaker ki ti dan stad, ki ti en nouvo teknolozi sa letan, pour asire ki tou dimoun i tande. I ti annan bokou plis dimoun ki ti ekout sa lasanble lo radyo.

Pandan lannen 1923 i ti remarkab lafason ki sa travay predikasyon ti pe agrandi dan Lafrik, Lerop, Lenn ek Sid Lanmerik. En frer ki apel A. J. Joseph ki reste Lenn, ti pe pran swen avek son madanm ek zot sis zanfan e i ti pe osi ede pour prodwir bann piblikasyon dan langaz Hindi, Tamil, Telugu ek Urdu.

An Sera Leonn, de Etidyan Labib ki apel Alfred Joseph ek Leonard Blackman, ti ekri biro brans prensipal Temwen Zeova ki ti Brooklyn, New York pour rod led. Le 14 Avril 1923, zot ti ganny en larepons. Alfred i dir: “En Sanmdi swar byen tar mon ti ganny en koud telefonn ki mon pa ti pe ekspekte.” I ti tann en gro lavwa demande: “Eski ou ki ti ekri Watch Tower Society pour demande pour ganny bann proklanmater?” Alfred ti reponn: “Wi.” Sa lavwa ti reponn: “Zot in anvoy mwan.” Sa dimoun ki ti pe koz avek li ti apel William R. Brown. I ti’n fek arive sa zour sorti dan Karaib ansanm avek son madanm Antonia ek zot de pti fiy ki ti apel Louise ek Lucy. Bann frer pa ti bezwen esper bokou letan pour zot zwenn Frer Brown ek son fanmir.

 Alfred ti osi dir: “Son lannmen bomaten, nou de Leonard nou ti pe fer nou letid Labib lasemenn ler en gran zonm ti zis aparet devan laport. Sa ti Frer Brown. I ti telman devoue pour laverite ki i ti anvi fer en diskour son lannmen.” Dan mwens ki en mwan Frer Brown ti’n donn tou bann piblikasyon ki i ti’n vin avek. Pa bokou letan apre i ti ganny ankor 5,000 liv e dan en ptigin letan zot ti bezwen ankor plis liv. Me dimoun pa ti konn Frer Brown konman en vander liv. Pandan sa kantite letan ki i’n en serviter Zeova devoue, i ti toultan pe refer avek bann verse Labib ler i fer diskour e sa ti fer ki dimoun ti apel li Bible Brown.

Pandan sa letan, bann frer Lalmanny ti deside pour kit biro brans Barmen vi ki i ti tro pti. Osi zot ti’n tande ki larme Franse ti pe vin atak sa lavil. Bann Etidyan Labib ti trouv en batiman an Magdeburg ki ti paret en bon landrwa pour enprim bann piblikasyon. Le 19 Zen, bann frer ti fini anmas tou bann lekipman pour enprimen ek lezot meb e zot ti bouz dan zot nouvo Betel, Magdeburg. Son lannmen apre ki biro prensipal Temwen Zeova ti’n ganny averti ki zot ti’n fini antre dan nouvo Betel, bann zournal ti anonse ki Lafrans ti’n fini pran kontrol lavil Barmen. Sa ti fer bann frer realize ki Zeova ki ti’n protez zot e ed zot.

An Brezil, en frer ki ti apel George Young ki ti’n voyaz en kantite pour anons sa bon nouvel, ti ouver en nouvo Betel e konmans pibliy Latour Veyer dan langaz Portige. Dan zis detrwa mwan, i ti donn plis ki 7,000 magazin. Sarah Ferguson ti vreman eksite ler frer Young ti vizit zot fanmir. Depi 1899 i ti pe lir Latour Veyer me i pa’n zanmen reisi pran batenm. Detrwa mwan pli tar, Ser Ferguson ek son kat zanfan ti reisi pran batenm.

Ver lafen lannen, Latour Veyer le 15 Desanm 1923 ti eksplike ki lefe bann sanzman dan renyon, predikasyon ek lasanble in annan lo bann Etidyan Labib. I dir: “I kler ki bann frer ek ser dan bann kongregasyon i annan en lafwa for. Annou met pare pour fer plis travay e kontinyen servi Zeova avek devouman ek lazwa pandan lannen 1924.”

Lannen 1924 ti osi en lannen vreman eksitan pour bann Etidyan Labib. Pour plizyer mwan bann frer kot Betel ti’n travay lo en bout later lo Staten Island ki pa ti lwen avek Biro brans prensipal Brooklyn. Bann batiman ki zot ti konstri dan sa nouvo landrwa ti fini ganny konstrir boner lannen 1924. Sa bann batiman ti ganny servi pour ed bann frer ek ser pour vin pli ini e pour anons sa bon nouvel dan bann fason ki pa ti posib pour fer avan.