1. Akoz i kapab difisil pour nou obei?

 ESKI parfwa ou vwar li difisil pour obei? Lerwa David ti santi koumsa, alor i ti priy Bondye: “Fer mwan annan sa dezir pour obei ou.” (Ps. 51:12) David ti kontan Zeova. Me parfwa i ti vwar li difisil pour obei e nou osi parfwa nou santi parey. Akoz? Premyerman, nou’n erit sa tandans pour dezobei. Dezyenmman, Satan pe kontinyelman esey fer nou rebel kont Zeova parey li i ti fer. (2 Kor. 11:3) Trwazyenmman, nou viv dan en lemonn kot dimoun i annan en latitid rebel, setadir “sa leta lespri ki pe azir dan bann zanfan dezobeisans.” (Efe. 2:2) Nou bezwen fer bokou zefor pour lager avek sa tandans pour fer pese. Nou bezwen osi reziste sa presyon ki Dyab ek sa lemonn i met lo nou pour dezobei. Alor nou bezwen fer bokou zefor pour obei Zeova ek bann ki i’n donn lotorite.

2. Ki savedir “pare pour obei”? (Zak 3:17)

² Lir Zak 3:17. Zak, sa ekriven ki ti’n ganny enspire pour ekri sa verse, ti dir ki en dimoun ki saz i “pare pour obei.” Reflesir lo sa ki sa verse i vedir. Nou devret anvi e pare pour obei bann ki Zeova in donn serten lotorite. Me Zeova pa ekspekte ki nou obei en dimoun ki demann nou pour dezobei Son bann lord.—Akt 4:​18-20.

3. Akoz i enportan pour Zeova ki nou obei bann ki annan lotorite?

³ Petet nou vwar li pli fasil pour obei Zeova olye en imen. Apre tou, Zeova i toultan donn bann lenstriksyon ki parfe. (Ps. 19:7) Me sa i pa leka avek bann imen parski bann imen ki annan lotorite i enparfe. Kantmenm sa, nou Papa ki dan lesyel in donn bann paran, bann zofisye gouvernman ek bann ansyen dan kongregasyon serten lotorite. (Prov. 6:20; 1 Tesa. 5:12; 1 Pyer 2:​13, 14) Alor  ler nou obei zot, nou pe obei Zeova. Annou vwar ki mannyer nou kapab obei bann imen ki Zeova in donn serten lotorite menm si i kapab ki parfwa nou pa dakor avek bann lenstriksyon ki zot donnen oubyen nou pa anvi swiv zot bann lenstriksyon.

4. Akoz en kantite zanfan i dezobei zot paran?

⁴ Bann zenn i antoure avek lezot zenn ki “dezobeisan anver zot paran.” (2 Tim. 3:​1, 2) Akoz laplipar zenn i dezobei zot paran? Serten paran i fer lekontrer avek sa ki zot dir zot zanfan fer e zot zanfan i santi ki sa i enzis. Lezot zenn i santi ki bann konsey ki zot paran i donn zot nepli itil oubyen i tro strik. Si ou en zenn, eski parfwa ou santi koumsa? I kapab difisil pour obei sa lord ki Zeova i donn nou ki dir: “Obei zot paran an armoni avek lavolonte Senyer parski sa i drwat devan Bondye.” (Efe. 6:1) Kwa ki kapab ed ou pour obei sa lord?

5. Parey nou vwar dan Lik 2:​46-52, akoz i remarkab ki Zezi ti obei son paran?

⁵ Ou kapab aprann pour obei avek legzanp Zezi, ki ti sa pli bon legzanp. (1 Pyer 2:​21-24) I ti en imen parfe ki ti annan bann paran enparfe. Me Zezi ti onor son paran menm ler zot ti fer fot e parfwa zot pa ti konpran li. (Egz. 20:12) Annou vwar sa ki ti arive ler Zezi ti annan 12 an. (Lir Lik 2:​46-52.) Zezi ti al avek son paran Zerizalenm. Me ler zot ti pe retourn kot lakour, zot pa ti remarke ki Zezi pa ti avek zot. I ti responsabilite Zozef ek Mari pour fer sir ki tou zot zanfan ti avek zot apre lafet. Ler zot ti finalman trouv Zezi, zot ti blanm li akoz i ti’n reste Zerizalenm. Zezi ti’n kapab dir zot ki sa ti enzis. O kontrer i ti reponn son paran dan en fason senp e avek respe. Me Zozef ek Mari “pa ti konpran ki i ti pe dir zot.” Kantmenm sa, Zezi ti “kontinyen soumet avek zot.”

6-7. Kwa ki kapab ed bann zenn pour obei zot paran?

⁶ Zenn, eski parfwa ou vwar li difisil pour obei ou paran ler zot fer fot oubyen ler zot pa konpran ou? Kwa ki kapab ed ou? Premyerman, reflesir lo lafason ki Zeova i santi. Labib i dir ki ler ou obei ou paran, “sa i fer plezir Senyer.” (Kol. 3:20) Zeova i konnen ki parfwa ou paran pa konpran ou oubyen ki parfwa zot fer bann lareg ki paret enzis. Me kantmenm sa, ler ou swazir pour obei zot, ou fer Zeova kontan.

⁷ Dezyenmman, mazin lo lafason ki ou paran i santi. Ler ou obei ou paran, ou fer zot kontan e zot annan plis konfyans dan ou. (Prov. 23:​22-25) I tre probab ki ou pou osi vin pli pros avek zot. En frer ki apel Alexandre ki reste Belzik, i dir: “Ler mon ti konmans fer sa ki mon paran ti demann mwan pour fer, nou relasyon ti sanze. Nou ti vin pli pros e nou ti pli ere.” b Trwazyenmman, si ou aprann pour obei ou paran, sa pou ed ou dan lavenir. Paulo, ki reste Brezil, i dir: “Ler mon’n aprann pour obei mon paran, sa in ed mwan pour obei Zeova e lezot dimoun ki annan lotorite.” Parol Bondye i donn ou en bon rezon akoz ou bezwen obei ou paran. I dir: “Pour ki tou i al  byen pour zot e zot reste en kantite letan lo later.”—Efe. 6:​2, 3.

8. Akoz en kantite zenn i swazir pour obei zot paran?

⁸ En kantite zenn in vwar ki ler zot obeisan, keksoz i mars byen. Luiza, ki li osi i reste Brezil, ti vwar li difisil o konmansman pour konpran akoz en serten letan i ti napa drwa pour annan en telefonn. I ti vwar ki laplipar zenn dan son laz, i annan en telefonn. Me apre i ti realize ki son paran ti pe protez li. Aprezan i konnen ki ler i obei son paran, i pa devret santi ki zot pe priv li parski zot konsey i sa ki i bezwen. En zenn ser ki apel Elizabeth, ki reste Leta-z-ini, i ankor vwar li difisil parfwa pour obei son paran. Elizabeth i dir: “Ler mon pa vreman konpran akoz mon paran i met serten lareg, mon reflesir lo bann moman kot zot bann lareg in protez mwan.” Monica, ki reste Larmeni, i dir ki keksoz i toultan mars pli byen pour li ler i obei son paran olye dezobei zot.

9. Ki mannyer en kantite dimoun i santi konsernan obei lalwa?

⁹ En kantite dimoun i dakor ki nou bezwen bann gouvernman e ki nou devret obei serten lalwa ki sa “bann lotorite” i met an plas. (Rom. 13:1) Me sa bann menm dimoun i kapab ezite pour obei en lalwa ki paret enzis oubyen ki zot pa dakor avek. Par egzanp, bann lalwa konsernan pey taks. Dapre en resers ki ti ganny fer dan en pei Lerop, en kantite dimoun dan sa pei ti krwar ki en dimoun i kapab pa pey taks si i krwar ki i enzis pour pey taks. Alor i pa drol ki bann dimoun dan sa pei pa pey tou taks ki gouvernman i ekspekte zot peye.

10. Akoz nou obei menm bann lalwa ki nou pa kontan?

¹⁰ Labib i dir ki bann gouvernman imen i fer dimoun soufer, ki zot ganny kontrole par Satan e ki byento zot pou ganny detrir. (Ps. 110:​5, 6; Ekle. 8:9; Lik 4:​5, 6) Labib i osi dir ki “sa ki opoz lotorite i al kont laranzman Bondye.” Pour le moman, Zeova in permet bann gouvernman pour dirize. Pour ki i annan lord dan lemonn, i ekspekte ki nou obei sa bann gouvernman. Alor, nou bezwen “donn zot sa ki zot demande,” sa i enkli taks, respe ek lobeisans. (Rom. 13:​1-7) Petet nou kapab krwar ki en lalwa i fer nou lavi difisil, i enzis oubyen i kout nou pour obei. Me nou obei Zeova e Zeova i demann nou pour obei sa bann lotorite tan ki zot pa demann nou pour dezobei son bann lord.—Akt 5:29.

11-12. Parey nou vwar dan Lik 2:​1-6, ki Zozef ek Mari ti fer pour obei en lalwa menm si i ti difisil pour zot e ki ti arive? (Vwar portre.)

 ¹¹ Nou kapab aprann avek legzanp Zozef ek Mari ki ti pare pour obei bann lotorite menm ler i ti difisil pour zot fer li. (Lir Lik 2:​1-6.) Ler Mari ti apepre nef mwan dan son lansentman, li ek Zozef ti fer fas avek en sityasyon vreman difisil. Ogis, ki ti diriz Lanpir Romen, ti donn en lord pour tou dimoun al anrezistre. Zozef ek Mari ti bezwen fer en vwayaz apepre 150 kilomet, dan bann landrwa kot i ti annan en kantite montanny, pour zot al Betleenm. Sa vwayaz ti pou enn ki ti pou enkonfortab sirtou pour Mari. I kapab ki Mari ek Zozef ti enkyet konsernan lasante Mari e konsernan lasante sa pti baba. Petet zot ti enkyet konsernan sa ki ti pou arive si Mari ti donn nesans dan semen, sirtou parski sa zanfan ti pou vin sa Mesi ki ti’n ganny promet. Eski sa ti en leskiz pour zot pa obei gouvernman?

¹² Menm si Zozef ek Mari ti annan rezon pour enkyet, zot ti obei lalwa. Sa ti fer ki Zeova ti beni zot. Mari ti ariv Betleenm sen e sof. I ti donn nesans en pti baba an bonn sante e i ti menm ede pour akonpli profesi Labib.—Mik. 5:2.

13. Ler nou obei, ki lefe sa i kapab annan lo nou bann frer ek ser?

¹³ Ler nou obei lotorite, sa i anmenn byenfe pour nou e pour lezot. Ki mannyer sa? Premyerman, nou pa pou ganny sa move konsekans ki bann ki dezobei lalwa i gannyen. (Rom. 13:4) Ler nou obei bann lotorite, sa i kapab annan en lefe lo lafason ki dimoun i vwar Temwen Zeova. Par egzanp, plizyer lannen pase an Nizerya, bann solda ti antre dan en Lasal Rwayonm pandan en renyon parski zot ti pe rod bann dimoun ki ti pe fer protestasyon akoz zot pa ti oule pey taks. Me sa zofisye ansarz ti demann bann solda pour kit Lasal Rwayonm e i ti dir: “Temwen  Zeova i toultan pey zot taks.” Sak fwa ou obei lalwa, ou ede pour gard sa bon repitasyon ki Temwen Zeova i annan e petet en zour sa bon repitasyon i kapab protez ou bann frer ek ser.—Mat. 5:16.

14. Kwa ki ti ed en ser pour obei lotorite?

¹⁴ Parfwa, i kapab ki nou pa anvi obei bann lotorite. En ser ki apel Joanna, ki reste Leta-z-ini, i dir: “I ti vreman difisil pour mwan obei bann lotorite parski serten manm mon fanmir pa’n ganny trete byen avek bann lotorite.” Me Joanna ti deside ki i ti pou bezwen sanz son fason panse. Premyerman, i ti aret lir bann komanter lo rezo sosyal ki fer li annan en move pwennvi lo bann lotorite. (Prov. 20:3) Dezyenmman, i ti priy Zeova pour ed li annan konfyans dan li dan plas anvi en sanzman dan gouvernman. (Ps. 9:​9, 10) Trwazyenmman, i ti lir bann lartik dan nou bann piblikasyon konsernan pa pran kote. (Zan 17:16) Aprezan Joanna i dir ki ler i respe e obei lotorite, sa i fer li santi li kalm e i annan lape lespri.

15. Akoz i kapab difisil pour obei bann lenstriksyon ki lorganizasyon Zeova i donnen?

¹⁵ Zeova in demann nou pour “obei sa bann ki pe diriz” kongregasyon. (Ebr. 13:17) Zezi i nou Sef e i parfe. Me bann frer ki i’n apwente pour dirize dan kongregasyon i enparfe. Parfwa i kapab difisil pour obei zot, sirtou si zot demann nou pour fer en keksoz ki nou pa anvi fer. En fwa, ler zapot Pyer ti ganny en lenstriksyon, i ti ezite pour obei. Ler en lanz ti dir li manz bann zannimo ki enpir dapre Lalwa Moiz, trwa fwa Pyer ti refize pour manze. (Akt 10:​9-16) Akoz i ti refize? Sa nouvo lenstriksyon pa ti fer sans pour li. I ti’n abitye fer keksoz dan en lot fason. Si Pyer ti vwar li difisil pour obei lenstriksyon sorti kot en lanz parfe, i pa drol ki parfwa nou vwar li difisil pour obei lenstriksyon sorti kot bann zonm ki enparfe.

16. Ki zapot Pol ti fer menm si i kapab ki ti’n konsider sa lenstriksyon ki i ti’n gannyen konman pa rezonnab? (Akt 21:​23, 24, 26)

¹⁶ Zapot Pol ti “pare pour obei” menm ler i ti ganny lenstriksyon ki ti paret drol pour li. Bann Kretyen Zwif ti’n tann bann rimer konsernan Pol, ki ti fer zot krwar ki Pol ti pe ansenny dimoun “pour rezet Lalwa Moiz” e i ti pe mank respe pour Lalwa Moiz. (Akt 21:21) Bann ansyen Zerizalenm ti dir Pol anmenn kat zonm avek li kot tanp kot i ti pou pirifye son lekor pour montre ki i pe obei Lalwa Moiz. Me Pol ti konnen ki bann Kretyen ti nepli anba Lalwa Moiz e ki i pa ti’n fer nanryen mal. Kantmenm sa, i pa ti ezite pour fer sa ki sa bann zonm ti’n dir li. “Son lannmen, Pol ti al avek sa bann zonm e zot ti pirifye zot lekor.” (Lir Akt 21:​23, 24, 26.) Lefet ki Pol ti obei, sa ti ede pour gard linite dan kongregasyon.—Rom. 14:​19, 21.

17. Ki ou aprann avek leksperyans Stephanie?

¹⁷ En ser ki apel Stephanie ti vwar li difisil pour aksepte en desizyon ki biro brans dan son pei ti’n fer. Stephanie ek son msye ti pe servi dan en group ki koz en lot langaz e zot ti kontan zot servis. Apre, biro brans ti deside pour aret sa group e sa koup ti ganny demande pour al servi dan en kongregasyon ki koz zot  prop langaz. Stephanie i dir: “Mon pa ti zwaye. Mon pa ti krwar ki i ti annan plis bezwen dan nou langaz.” Kantmenm sa, Stephanie ti deside pour siport sa desizyon. I dir: “Avek letan, mon ti konpran ki sa ti en desizyon saz. Nou’n vin parey bann paran pour serten frer ek ser dan kongregasyon ki zot fanmir pa dan laverite. Mon pe fer letid avek en ser ki ti inaktif. Aprezan mon osi annan plis letan pour fer letid personnel.” Stephanie i osi dir: “Mon annan en konsyans kler parski mon konnen ki mon’n fer mon mye pour obei.”

18. Ki byenfe nou gannyen ler nou obei?

¹⁸ Nou kapab aprann pour obei. Zezi ti “aprann lobeisans,” pa akoz i ti viv dan bann kondisyon parfe me “atraver bann keksoz ki i ti soufer.” (Ebr. 5:8) Parey Zezi, souvandfwa nou aprann pour obei ler nou fer fas avek bann sityasyon difisil. Par egzanp, ler pandemi COVID-19 ti fek konmanse, eski ou ti vwar li difisil pour obei ler nou ti ganny demande pour aret asiste renyon kot Lasal Rwayonm e pour aret fer predikasyon kazankaz? Lefet ki ou’n obei, sa in protez ou, in ede ki i annan linite dan kongregasyon e sa in fer Zeova kontan. Sa i fer ki aprezan, nou pli byen pare pour obei okenn lenstriksyon ki nou pou gannyen pandan gran ladetres. Nou lavi i kapab depan lo nou lobeisans.—Zob 36:11.

19. Akoz ou anvi vin en dimoun ki obei?

¹⁹ Nou’n aprann ki ler nou obei, nou ganny en kantite benediksyon. Me sa rezon pli enportan akoz nou swazir pour obei Zeova i parski nou kontan li e nou anvi fer li plezir. (1 Zan 5:3) Nou pa pou zanmen kapab repey Zeova pour tou sa ki i’n fer pour nou. (Ps. 116:12) Me nou kapab obei li ek bann ki annan lotorite. Ler nou obei, nou montre ki nou saz. Bann dimoun ki saz i fer plezir Zeova.—Prov. 27:11.