1-2. Ki sa pli bon fason pour lir e etidye Labib? Donn en legzanp.

 METON ou pe deside si ou pou aste en lakaz. Ki ou ti pou anvi vwar avan ou fer ou desizyon? Eski i ti pou ase pour ou zis vwar en portre ki montre ki mannyer devan sa lakaz i ete? San dout, ou ti pou anvi vwar sa lakaz pour ou menm pour ou kapab vwar toultour sa lakaz, pour ou al get partou anndan e pour egzamin tou sa ki form parti sa lakaz. Petet ou pou menm anvi egzamin plan sa lakaz. I normal pour ou anvi vwar tou detay konsernan sa lakaz ki ou anvi aste.

² Nou kapab fer en keksoz en pe parey ler nou lir e etidye Labib. En spesyalis Labib i dir ki sa mesaz ki dan Labib i parey “en gro batiman ki vreman gran e ki’n ganny konstrir lo en fondasyon solid.” Alor ki mannyer nou kapab konn pli byen sa ki dan Labib? Si ou lir Labib vitman, petet ou pou zis aprann bann keksoz de baz setadir “bann keksoz elemanter dan parol sakre Bondye.” (Ebr. 5:12) Me parey sa lakaz, ou bezwen etidye Labib pour vwar bann detay enportan. En bon fason pour etidye Labib i pour vwar lafason ki bann diferan porsyon dan Labib i relye avek kanmarad. Fer zefor pour konpran sa bann laverite ki ou krwar ladan e pour konpran akoz ou krwar dan sa bann laverite.

3. Ki zapot Pol ti ankouraz son bann frer ek ser pour fer e akoz? (Efezyen 3:​14-19)

³ Pour nou konpran tou bann detay dan Parol Bondye, nou bezwen etidye o profon bann laverite ki dan Labib. Zapot Pol ti ankouraz bann frer ek ser pour etidye Parol Bondye o profon pour zot kapab “konpran konpletman larzer, longer, oter ek profonder” laverite. Sa ti pou fer ki zot ti pou “anrasinen e byen etabli” dan laverite. (Lir Efezyen 3:​14-19.) Nou osi nou bezwen fer parey. Annou vwar ki mannyer nou kapab etidye Parol  Bondye pour nou kapab konpran li pli byen.

4. Ki nou kapab fer pour vin pli pros avek Zeova? Donn legzanp.

⁴ Konman bann Kretyen, nou pa anvi konpran zis bann lansennyman de baz ki dan Labib. Avek led lespri sen Bondye, nou vreman anvi aprann “menm bann keksoz profon konsernan Bondye.” (1 Kor. 2:​9, 10) Petet ou kapab etidye Parol Bondye pli o profon pour ou kapab vin pli pros avek Zeova. Par egzanp, ou kapab etidye lafason ki i ti demontre lanmour anver son bann serviter dan lepase e ki mannyer sa i montre ki i kontan ou osi. Ou kapab osi etidye lo ki mannyer Zeova ti anvi bann Izraelit i ador li e konpar sa avek lafason ki Zeova i anvi nou ador li ozordi. Petet ou kapab osi etidye o profon bann profesi ki Zezi ti akonpli ler i ti lo later.

5. Eski i annan en topik ki ou ti ava kontan fer resers lo la dan ou letid personnel?

⁵ Serten dimoun ki etidye Labib o profon ti ganny demande konsernan bann keksoz profon ki zot ti pou kontan etidye dan Parol Bondye. Ou kapab vwar serten keksoz ki zot ti dir dan sa bwat “ Bann topik pour letid personnel.” Ou osi ou kapab trouv lazwa par etidye bann topik en pe parey. Pour fer sa, ou kapab servi Watch Tower Publications Index oubyen Liv resers pour Temwen Zeova. Ler ou etidye Labib o profon, sa i kapab fer ou lafwa vin pli for e ed ou pour “konn Bondye.” (Prov. 2:​4, 5) Aprezan annou vwar serten laverite profon ki dan Labib ki nou kapab etidye.

6. (a) Akoz plan Zeova pou toultan ganny akonplir? (b) Akoz nou kapab dir ki plan Zeova pour bann imen e pour later i “eternel”? (Efezyen 3:11)

⁶ Annou vwar sa ki Labib i dir konsernan plan Bondye. Zeova pa parey bann imen. Normalman nou swazir en larout spesifik pour nou ariv kot nou anvi ale.  Si semen i bloke, i kapab ki nou pa pou ariv kot nou pe ale. De lot kote, Zeova in fini deside kote i anvi ale me kontrerman avek bann imen, i kapab pran diferan semen oubyen rod en lot fason pour ariv kot i anvi ale. Plan Bondye i sa destinasyon li menm e pa sa semen ki anmenn lo sa destinasyon. Erezman, dan Labib Zeova in ptitapti revel son “lavolonte eternel,” setadir son destinasyon. (Vwar not letid dan nwtsty dan Efezyen 3:11.) En fason ou en lot, Zeova i toultan reisi parski i’n fer fason pour ki “tou keksoz i ede realiz son plan.” (Prov. 16:4) Alor sa ki Zeova i fer pour dire pour touzour. Me ki plan Zeova e ki azisteman Zeova in fer pour akonpli son plan?

7. Apre ki bann premye imen ti rebele, ki mannyer Zeova ti sanz lafason ki i ti pou akonpli son plan? (Matye 25:34)

⁷ Bondye ti koz avek bann premye imen konsernan son plan, setadir sa ki i ti anvi pour zot. I ti anvi ki zot “fer zanfan e vin bokou, ranpli later e pran swen avek li. Zot [ti] pou domin lo . . . tou zannimo lo later.” (Zen. 1:28) Ler Adan ek Ev ti rebel, sa ti fer ki pese ti antre dan lemonn me sa pa ti pou anpes Zeova akonpli son plan. O kontrer, i ti aziste lafason ki i ti pou akonpli son plan. Deswit, Zeova ti deside pour etabli en Rwayonm dan lesyel ki pou akonpli son plan, setadir sa ki i ti anvi pour bann imen e pour later depi o konmansman. (Lir Matye 25:34.) Ler sa letan ki Zeova ti’n swazir ti arive, i ti anvoy son Garson premye ne lo later pour ansenny dimoun konsernan sa Rwayonm e pour donn son lavi konman en ranson pour sov nou dan pese ek lanmor. Apre Zeova ti resisit Zezi e fer li retourn dan lesyel pour li dirize konman Lerwa dan Rwayonm Bondye. Me i annan plis keksoz ki nou kapab aprann konsernan plan Bondye.

8. (a) Ki mesaz prensipal Labib? (b) Dapre Efezyen 1:​8-11, kwa ankor ki Zeova pou akonpli? (Vwar portre lo kouvertir.)

⁸ Sa mesaz prensipal dan Labib i konsernan non Zeova ki pou ganny sanktifye ler i akonpli son plan pour later. I pour fer sa atraver son Rwayonm ki pou ganny dirize par Kris. I napa nanryen ki kapab sanz plan Zeova. I’n garanti ki i pou fer sa ki i anvi zis parey i’n dir. (Izai 46:​10, 11; Ebre 6:​17, 18) Later pou vin en paradi kot bann desandans Adan ek Ev ki parfe e ki drwat pou “viv ere pour touzour.” (Ps. 22:26) Me pa zis sa ki Zeova pou akonpli. Zeova i anvi ki tou son bann serviter ki dan lesyel e lo later i ini ansanm. Sa pou fer ki tou sa ki vivan pou soumet avek Zeova konman zot Dirizan. (Lir Efezyen 1:​8-11.) Eski pa lafason ki Zeova i akonpli son plan i enpresyonan?

9. Ler nou lir Labib, ki nou aprann konsernan lavenir?

⁹ Mazin sa profesi ki Zeova ti koz lo la dan zarden Edenn ki trouve dan Zenez 3:15. b Sa profesi i koz lo bann levennman ki ti pou akonpli plan Zeova me sa bann levennman ti pou arive plizyer milye lannen pli tar. Par egzanp, Bondye ti dir Abraam ki apre plizyer zenerasyon, enn son bann desandans ti pou vin Kris. (Zen. 22:​15-18) Apre parey i ti’n ganny predir lannen 33, Zezi ti ganny morde dan son talon. (Akt 3:​13-15) Sa dernyen  levennman ki sa profesi i koz lo la i ler sa desandans i kraz latet Satan e sa pou arive dan plis ki 1,000 an dan lavenir. (Rev. 20:​7-10) Labib i donn plis lenformasyon lo sa ki pou arive ler sa laenn ki i annan ant lemonn Satan ek lorganizasyon Zeova pou’n ariv lo son moman pli entans.

10. (a) Ki bann levennman ki pou arive byento? (b) Ki mannyer nou kapab prepar nou lespri ek leker? (Vwar not.)

¹⁰ Reflesir lo sa bann levennman ekstraordiner ki Labib in predir konsernan lavenir. Premyerman, bann nasyon pou dir konmkwa i annan “lape ek sekirite!” (1 Tesa. 5:​2, 3) “En sel kou,” gran ladetres pou konmanse ler bann nasyon i atak fo larelizyon. (Rev. 17:16) Apre sa, petet nou pou vwar en keksoz ekstraordiner arive ler “Garson zonm pe vini lo nyaz dan lesyel avek gran laglwar ek pwisans.” (Mat. 24:30) Zezi pou ziz bann imen e i pou separ bann mouton avek bann kabri. (Mat. 25:​31-33, 46) Pandan sa letan, Satan pou pe kontinyen lager kont Zeova. Sa laenn ki i annan pou fer li motiv en group nasyon ki’n ralye ansanm pour atak pep Bondye. Labib i apel sa group nasyon ki’n ralye ansanm, Gog sorti dan pei Magog. (Ezek. 38:​2, 10, 11) A en serten moman, bann Kretyen swazir ki ankor lo later pou ganny anmennen dan lesyel pour zot zwenn ansanm avek Kris ek son larme pwisan, kot zot pou partisip dan lager Armagedon. Sa i dernyen parti sa gran ladetres. c (Mat. 24:31; Rev. 16:​14, 16) Apre sa, Kris pou diriz later pour mil an.—Rev. 20:6.

11. Lefet ki nou pou viv pour touzour, ki sa i vedir pour ou? (Vwar portre.)

¹¹ Aprezan annou mazin lo sa ki pou arive apre sa mil an. Labib i dir ki nou Kreater ‘i’n menm met dezir pour viv pour touzour dan nou leker.’ (Ekle. 3:11) Reflesir lo ki sa pou vedir pour ou e pour ou lanmitye avek Zeova. Dan sa liv Apros avek Zeova lo paz 319, i dir en keksoz enteresan: “Apre ki nou’n viv  pour san-t-an, mil an, menm pour plizyer bilyon lannen, nou pou konn plis lo Zeova ki nou konnen ozordi. Me nou pou kontinyen santi ki i annan ankor en kantite keksoz merveye ki nou bezwen aprann. . . . Lavi eternel pou vreman ris e ranpli avek diferan keksoz pour aprann—e vin pli pros avek Zeova pou toultan reste sa keksoz pli satisfezan.” Me antretan, ki lezot keksoz nou kapab aprann anmezir ki nou kontinyen etidye Parol Bondye?

12. Ki mannyer nou kapab vwar sa ki pe arive dan lesyel? Donn en legzanp.

¹² Parol Bondye i donn nou en nide lo ki mannyer i ete dan prezans Zeova “lao dan lesyel.” (Iza. 33:5) Labib i revel bann keksoz merveye konsernan Zeova ek sa parti son lorganizasyon ki dan lesyel. (Iza. 6:​1-4; Dan. 7:​9, 10; Rev. 4:​1-6) Par egzanp, nou kapab lir konsernan bann keksoz enpresyonan ki Ezekyel ti vwar ler “lesyel ti ouver e [i] ti vwar bann vizyon sorti kot Bondye.”—Ezek. 1:1.

13. Dapre Ebre 4:​14-16, ki ou apresye avek sa ki Zezi pe fer dan lesyel?

¹³ Reflesir lo sa ki Zezi pe fer pour nou dan lesyel konman nou Lerwa ek Granpret ki konpran nou. Atraver Zezi, nou kapab vin kot “tronn labonte ekstraordiner” Bondye dan lapriyer e demann li pour pran pitye pour nou e ed nou “ler nou bezwen” led. (Lir Ebre 4:​14-16.) Toulezour, nou bezwen reflesir lo sa ki Zeova ek Zezi in fer pour nou e sa ki zot pe fer pour nou la konmela dan lesyel. Sa lanmour ki zot annan pour nou i devret tous nou leker e  motiv nou pour devoue dan nou servis.—2 Kor. 5:​14, 15.

14. Ki enn bann pli bon fason nou kapab montre ki nou rekonesan anver Zeova ek Zezi? (Vwar portre.)

¹⁴ Enn bann pli bon fason ki nou montre ki nou rekonesan anver Bondye e anver son Garson, i ler nou fer zefor pour ed lezot pour vin Temwen Zeova e pour vin bann disip Zezi. (Mat. 28:​19, 20) Sanmenm sa ki zapot Pol ti fer pour montre son rekonesans anver Bondye ek Kris. I ti konnen ki i lavolonte Zeova ki “tou sort kalite dimoun i ganny sove e ganny konnesans egzakt lo laverite.” (1 Tim. 2:​3, 4) I ti travay dir dan predikasyon e ed otan dimoun ki i kapab pour li kapab “sov serten parmi zot par tou mwayen posib.”—1 Kor. 9:​22, 23.

15. Dapre Psonm 1:​2, kwa ki pou fer nou zwaye?

¹⁵ Ekriven sa premye Psonm ti dir ki en dimoun ki ere e ki reisi i en dimoun ki “pran plezir dan lalwa Zeova” e ki “medit lo Son lalwa avwabas lizour konman aswar.” (Ps. 1:​1-3) En tradikter Labib ki apel Joseph Rotherham ti fer komanter lo sa verse dan son liv Studies in the Psalms. I ti dir ki en dimoun i devret “sitan kontan pour ganny gidans Bondye ki i pou rod li, etidye li e pran en kantite letan pour reflesir lo la.” I ti osi dir ki “si en zour i pase e en dimoun pa’n lir Labib, sa zour pou en gaspiyaz.” Ler ou etidye bann detay enportan dan Labib e vwar ki mannyer sa bann detay i konnekte avek kanmarad, sa i kapab fer li gou pour etidye Labib. I vreman gou pour etidye Parol Bondye o profon!

16. Ki nou pou vwar dan sa lartik ki swiv?

¹⁶ Bann laverite ki Zeova i ansenny nou dan son Parol, i pa tro difisil pour nou konpran. Dan sa lartik ki swiv, nou pou vwar enn parmi bann laverite profon. Sa i konsernan gran tanp spirityel Zeova, ki Pol ti koz lo la dan son let pour bann Kretyen Ebre. Ou pou trouv bokou plezir pour etidye sa topik.