1. Ki kestyon nou kapab demande ler nou mazin lo tou sa ki Zeova in kree?

LER nou mazin lo sa gran liniver ki Zeova in kree, nou kapab santi parey psalmis David ki ti priye e dir: “Ler mon admir grander lesyel ki ou’n fer, lalin ek bann zetwal ki ou’n met an plas, ki zonm i ete, pour ki ou mazin li e en imen pour ou pran swen avek li?” (Ps. 8:3, 4) Parey David, ler nou mazin lafason ki nou ptipti konpare avek bann zetwal ki Zeova in kree, nou enpresyonnen ki Zeova i enterese avek nou. Me parey nou pou vwar, Zeova pa ti zis enterese avek Adan ek Ev me i ti fer zot form parti son fanmir.

2. Ki Zeova ti anvi Adan ek Ev i fer?

² Adan ek Ev ti premye zanfan ki Zeova ti annan lo later e Zeova ti kontan zot. Vi ki zot ti form parti son fanmir, i ti ekspekte ki zot zwe zot rol. Bondye ti dir zot: “Fer zanfan e vin bokou, ranpli later e pran swen avek li.” (Zen. 1:28, NWT) Zeova ti anvi ki zot fer zanfan e pran swen avek later. Si Adan ek Ev ti’n obei e fer sa ki Zeova ti’n demann zot pour fer, Adan ek Ev ansanm avek zot desandans ti pou form parti fanmir Zeova pour touzour.

3. Akoz nou kapab dir ki Adan ek Ev ti annan en plas enportan dan fanmir Zeova?

³ Adan ek Ev ti annan en plas enportan dan fanmir Zeova. Dan Psonm 8:5, David ti dir sa parol konsernan ler Zeova ti kree bann imen: “Ou’n donn li en pozisyon ki en pti pe pli ba ki bann lanz e ou’n met laglwar ek splander lo li konman en kouronn.” Zeova pa’n donn bann imen sa menm pouvwar, lentelizans ek abilite ki bann lanz i annan.  (Ps. 103:20) Me bann imen i annan “en pozisyon ki en pti pe pli ba” ki sa bann lanz pwisan. Zis mazin sa! Ler Zeova ti kree nou premye paran, i ti donn zot en lavi merveye.

4. Ki ti arive avek Adan ek Ev ler zot ti dezobei Zeova e ki nou pou diskite dan sa lartik?

 ⁴ Malerezman, Adan ek Ev ti dezobei Zeova e akoz sa, zot ti nepli form parti fanmir Zeova. Parey nou pou vwar dan sa lartik, zot dezobeisans ti anmenn bann move konsekans pour zot desandans. Me plan Zeova pa’n sanze. I anvi ki bann imen obeisan i vin son zanfan pour touzour. Premyerman, annou vwar ki mannyer Zeova in onor bann imen. Apre, nou pou vwar ki nou kapab fer la konmela pour montre ki nou anvi form parti fanmir Zeova. Finalman, nou pou vwar bann benediksyon ki bann manm fanmir Zeova pou gannyen pour touzour.

5. Ki mannyer nou kapab montre Bondye ki nou rekonesan anver li pour kree nou dan son resanblans?

⁵ Zeova in onor nou par kree nou dan son resanblans. (Zen. 1:26, 27) Sa i fer ki nou kapab demontre son bann zoli kalite. Par egzanp, nou kapab demontre lanmour, konpasyon, fidelite ek ladrwatir. (Ps. 86:15; 145:17) Ler nou devlop sa bann kalite, nou onor Zeova e nou montre ki nou rekonesan anver li. (1 Pyer 1:14-16) Ler nou fer bann keksoz ki fer plezir nou Papa ki dan lesyel, nou ere. Vi ki nou annan bann kalite ki Zeova i annan, nou kapab vin bann dimoun ki i anvi dan son fanmir.

6. Ki mannyer Zeova ti onor bann imen ler i ti pe prepar later?

⁶ Zeova in prepar en zoli landrwa pour nou reste. Zeova ti prepar later pour bann imen bokou letan avan i ti kree sa premye zonm. (Zob 38:4-6, NWT; Zer. 10:12, NWT) Vi ki Zeova i zenere, i’n kree en kantite bon keksoz pour fer nou ere. (Ps. 104:14, 15, 24) Parfwa i ti pran letan pour reflesir lo sa ki i ti’n kree e i ti “vwar ki sa ti bon.” (Zen. 1:10, 12, 31) I ti onor bann imen par donn zot “dominasyon” lo tou bann zoli keksoz ki i ti’n kree lo later. (Ps. 8:6) Bondye i anvi ki bann imen parfe i pran swen avek son zoli kreasyon pour touzour. Eski ou remersye Zeova regilyerman pour sa zoli promes?

7. Ki mannyer Zozye 24:15 i montre ki imen i annan sa liberte pour swazir?

⁷ Zeova in donn nou sa liberte pour swazir. Nou kapab swazir ki nou pou fer dan nou lavi. (Lir Zozye 24:15.) Nou Bondye ki kontan nou i kontan ler nou swazir pour servi li. (Ps. 84:11, NWT; Prov. 27:11, NWT) Nou kapab servi nou liberte pour swazir pour fer lezot bon desizyon. Annou vwar legzanp Zezi.

8. Donn en legzanp lo lafason ki Zezi ti servi son liberte pour swazir.

⁸ Nou kapab swiv legzanp Zezi par swazir pour met lentere lezot avan sa ki pour nou. En zour ler Zezi ek son bann zapot ti vreman fatige, zot ti al dan en landrwa trankil pour zot repoze. Me zot pa ti kapab repoze parski en lafoul ti vwar zot e zot ti anvi ki Zezi i ansenny zot. Ki Zezi ti fer? Zezi pa ti ankoler. O kontrer i ti pran pitye pour sa bann dimoun e “i ti konmans ansenny zot en kantite keksoz.” (Mark 6:30-34) Ler nou swiv legzanp Zezi par servi nou letan ek lenerzi pour ed lezot, nou anmenn loner lo nou Papa ki dan lesyel. (Mat. 5:14-16) Nou  osi montre Zeova ki nou anvi form parti son fanmir.

9. Ki kado Zeova in donn bann imen?

⁹ Zeova in donn bann imen sa abilite pour fer zanfan e sa responsabilite pour ansenny zot zanfan pour kontan Zeova e pour servi li. Si ou en paran, eski ou apresye sa zoli kado? Zeova in donn bann lanz en kantite abilite me i pa’n donn zot sa abilite pour fer zanfan. Alor si ou en paran, apresye ou privilez pour elve ou zanfan. Bann paran in ganny en responsabilite enportan pour elve zot zanfan “dapre disiplin ek gidans Zeova.” (Efe. 6:4; Det. 6:5-7; Ps. 127:3) Pour ed bann paran fer sa, lorganizasyon Bondye in fer en kantite keksoz ki baze lo Labib parey bann piblikasyon, video, lanmizik ek lartik lo Enternet. I kler ki nou Papa ki dan lesyel ek son Garson, i kontan bann zenn. (Lik 18:15-17) Ler bann paran i depan lo Zeova e zot fer zot mye pour pran swen avek zot zanfan, sa i fer Zeova kontan. Bann paran ki fer sa, i osi ed zot zanfan pour annan sa loportinite pour form parti fanmir Zeova pour touzour!

10-11. Ki provizyon Zeova in fer atraver sa ranson?

¹⁰ Zeova in donn son Garson ki i pli kontan pour ki nou kapab revin en manm son fanmir. Parey i dir dan  paragraf 4, ler Adan ek Ev ti fer pese, zot ansanm avek zot bann zanfan ti nepli kapab form parti fanmir Zeova. (Rom. 5:12) Adan ek Ev ti swazir pour dezobei Bondye. Alor, zot ti merit ganny tire dan son fanmir. Me ki ti pou arive avek zot bann zanfan? Zeova i kontan bann imen alor in fer provizyon pour ki bann zanfan Adan ek Ev ki obei li, i kapab ganny adopte dan son fanmir. Zeova ti fer sa atraver sakrifis son sel Garson, Zezi Kri. (Zan 3:16; Rom. 5:19) Sa i fer ki Zeova i kapab adopte 144,000 imen ki fidel konman son bann garson.​—Rom. 8:15-17; Rev. 14:1.

¹¹ I osi annan plizyer milyon lezot serviter fidel ki pe obei e fer lavolonte Zeova. Zot annan lespwar pour form parti fanmir Zeova apre sa tes final a lafen sa Mil an. (Ps. 25:14; Rom. 8:20, 21) Sa lespwar i fer ki zot kapab apel Zeova, “Papa.” (Mat. 6:9) Bann dimoun ki pou resisite pou kapab aprann konsernan sa ki Zeova i anvi zot fer. Avek letan, bann ki swazir pour swiv gidans Zeova pou form parti son fanmir.

12. Ki kestyon nou pou reponn aprezan?

¹² Parey nou’n vwar, Zeova in deza fer en kantite keksoz pour onor bann imen. I’n adopte bann Kretyen swazir konman son bann garson e i’n donn bann ki form parti sa “gran lafoul” sa lespwar pour vin son bann zanfan dan nouvo lemonn. (Rev. 7:9) Ki nou kapab fer la konmela pour montre Zeova ki nou anvi form parti son fanmir pour touzour?

13. Ki nou kapab fer pour form parti fanmir Zeova? (Mark 12:30)

¹³ Montre ki ou kontan Zeova par servi li avek tou ou leker. (Lir Mark 12:30.) Parmi tou bann bon kado ki Zeova in donn nou, enn ki pli bon i ki nou kapab ador li. Nou montre Zeova ki nou kontan li par “obei son bann komannman.” (1 Zan 5:3) Enn bann keksoz ki Zeova i anvi nou obei i sa lord ki Zezi ti donnen pour fer disip e batiz dimoun. (Mat. 28:19) Zezi ti osi donn nou lord pour kontan kanmarad. (Zan 13:35) Zeova pou aksepte  bann ki obei son bann komannman konman son serviter e zot form parti en fanmir enternasyonal ki ador li.​—Ps. 15:1, 2.

14. Ki mannyer nou kapab demontre lanmour pour lezot? (Matye 9:36-38; Romen 12:10)

¹⁴ Demontre lanmour pour lezot. Lanmour i sa kalite pli enportan ki Zeova i annan. (1 Zan 4:8) Zeova in demontre lanmour pour nou, menm avan ki nou ti konn li. (1 Zan 4:9, 10) Nou swiv son legzanp ler nou demontre lanmour pour lezot. (Efe. 5:1) Enn bann pli bon fason ki nou kapab demontre lanmour pour bann dimoun, i par ed zot aprann konsernan Zeova tan ki i ankor annan letan. (Lir Matye 9:36-38.) Ler nou ed zot, zot kapab aprann ki zot bezwen fer pour zot kapab form parti fanmir Zeova. Apre ki en dimoun in batize, nou bezwen kontinyen kontan li e demontre respe pour li. (1 Zan 4:20, 21) Ki mannyer nou kapab fer sa? En fason i ler nou annan konfyans ki i annan bann bon motivasyon. Koumsa si nou pa konpran akoz ki i’n fer en keksoz, nou pa pou krwar ki i’n fer sa keksoz pour bann rezon egois. O kontrer nou pou onor nou frer e konsider li pli enportan ki nou.​—Lir Romen 12:10; Fili. 2:3.

15. Anver lekel ki nou devret demontre konpasyon ek labonte?

¹⁵ Demontre konpasyon ek labonte anver tou dimoun. Si nou anvi form parti fanmir Zeova pour touzour, nou bezwen aplik sa ki Labib i dir. Par egzanp, Zezi ti ansenny nou ki nou devret demontre konpasyon ek labonte anver tou dimoun menm anver nou bann lennmi. (Lik 6:32-36) Parfwa i kapab difisil pour fer sa. Me nou bezwen mazin e azir parey Zezi. Ler nou fer nou mye pour obei Zeova e pour swiv legzanp Zezi, nou montre nou Papa ki dan lesyel ki nou anvi form parti son fanmir pour touzour.

16. Ki mannyer nou kapab protez repitasyon bann serviter Zeova ki parey en fanmir?

¹⁶ Protez repitasyon bann serviter Zeova ki parey en fanmir. Dan en fanmir, en pti garson i souvan swiv legzanp son gran frer. Si sa gran frer i aplik bann prensip Labib dan son lavi, i pou en bon legzanp pour son pti frer. Si sa gran frer i fer bann move keksoz, i kapab ki sa pti frer pou swiv son move legzanp. I menm parey avek fanmir Zeova. Si en Kretyen ki ti fidel i vin en aposta ouswa i fer bann keksoz imoral, i kapab ki lezot pou swiv son legzanp e fer bann keksoz ki mal. Bann Kretyen ki fer sa, i gat repitasyon bann serviter Zeova ki parey en fanmir. (1 Tesa. 4:3-8) Nou pa devret swiv bann move legzanp e nou pa devret les nanryen gat nou lanmitye avek nou Papa ki dan lesyel ki kontan nou.

17. Ki kalite fason panse nou devret evite annan e akoz?

¹⁷ Met nou konfyans dan Zeova olye dan bann keksoz materyel. Zeova i promet pour donn nou manze, lenz ek landrwa reste si nou met son Rwayonm premye e obei son bann standar ki drwat. (Ps. 55:22; Mat. 6:33) Ler nou annan konfyans dan sa promes, nou pa pou krwar ki bann keksoz materyel pou protez nou e fer nou ere. (Fili. 4:6, 7) Nou konnen ki sa sel fason pour ganny lape lespri, i ler nou fer lavolonte Zeova. Menm si nou annan sa mwayen pour aste en kantite keksoz, nou devret reflesir lo si nou annan letan ek lenerzi pour servi e pran swen avek sa bann keksoz. Eski i kapab ki nou vin tro atase avek nou bann keksoz  materyel? Nou bezwen gard antet ki Zeova in donn nou en travay pour fer. Sa i vedir ki nou pa devret les nou ganny distrer. Nou pa anvi vin parey sa zonm ki ti sitan kontan son bann keksoz materyel ki i ti deside pour pa swiv Zezi. Alor i ti mank sa loportinite pour servi Zeova e pour ganny adopte konman enn son bann garson!​—Mark 10:17-22.

18. Ki bann imen obeisan pou gannyen pour touzour?

¹⁸ Bann imen obeisan pou ganny sa pli gran loner pour kontan Zeova e pour ador li pour touzour. Sa bann ki annan sa lespwar pour viv lo later pou kontan pour pran swen avek later ki en lakour parfe ki Zeova in kree. Byento, Rwayonm Bondye pou fer later ek tou sa ki lo la, zoli ankor. Zezi pou retir tou problenm ki desizyon Adan ek Ev in anmennen ler zot ti deside pour kit fanmir Bondye. Zeova pou resisit plizyer milyon dimoun pour donn zot sa loportinite pour viv pour touzour avek en lasante parfe. Zot pou viv lo later ki pou’n vin en paradi. (Lik 23:42, 43) Ler bann imen ki servi Zeova pou’n vin parfe, zot tou zot pou annan sa “laglwar ek splander” ki David ti koz lo la.​—Ps. 8:5, NWT.

19. Ki nou devret gard antet?

¹⁹ Si ou form parti sa “gran lafoul,” ou annan en zoli lespwar. Bondye i kontan ou e i anvi ki ou form parti son fanmir. Alor fer tou sa ki ou kapab pour fer li plezir. Gard promes Bondye dan ou lespri ek ou leker toulezour. Apresye sa privilez ki ou annan pour ador ou Papa ki dan lesyel e apresye sa lespwar ki ou annan pour ador li pour touzour!