1. Ki ou’n aprann konsernan nou Kreater?

SI OU’N grandi dan en fanmir ki Temwen Zeova, i tre probab ki depi byen zenn ou’n aprann konsernan Zeova. Ou’n aprann ki Zeova i Kreater, ki i annan bann zoli kalite e ki i anvi fer later vin en paradi.​—Zen. 1:1; Akt 17:24-27.

2. Ki mannyer serten dimoun i vwar bann dimoun ki krwar dan en Kreater?

² En kantite dimoun pa krwar ki Bondye i egziste ouswa ki i’n kree tou keksoz. O kontrer zot krwar ki lavi ti konmanse par azar, atraver en form lavi ki’n devlope pour vin bann form lavi pli konplike. Serten sa bann dimoun i annan gran ledikasyon. Zot dir ki lasyans in prouve ki sa ki Labib i dir pa vre e ki dimoun ki krwar dan en Kreater, i bann dimoun ki napa ledikasyon ouswa ki fasilman ganny anbete.

3. Akoz i enportan pour batir nou lafwa?

³ Eski sa ki serten dimoun ki annan gran ledikasyon i dir, pou fer nou doute ki Zeova i nou Kreater? Sa i depan prensipalman lo akoz nou krwar ki Zeova i nou Kreater. Eski nou krwar akoz nou’n ganny dir ki Zeova i nou Kreater oubyen akoz nou’n pran letan pour etidye bann levidans pour nou menm? (1 Kor. 3:12-15) Nenport kantite letan ki nou en Temwen Zeova, nou bezwen kontinyen ranforsi nou lafwa. Si nou fer sa, nou pa pou ganny anbete par “bann filozofi ek fo rezonnman” ki dimoun i dir pou kontredir Parol Bondye. (Kol. 2:8; Ebr. 11:6) Pour ed nou, sa lartik pou diskit lo (1) akoz en kantite dimoun pa krwar dan en Kreater, (2) ki mannyer ou kapab batir ou lafwa dan Zeova ou Kreater e (3) ki mannyer ou kapab gard ou lafwa for.

4. Dapre Ebre 11:1, kisisa lafwa?

⁴ Serten dimoun i krwar ki lafwa i ler dimoun i krwar dan en keksoz san ki zot annan laprev. Me dapre Labib sa i pa vre lafwa. (Lir Ebre 11:1.) Labib i dir ki lafwa i baze lo levidans kler. Alor, menm si nou pa kapab vwar Zeova, Zezi ek Rwayonm Bondye, nou annan levidans ki zot egziste. (Ebr. 11:3) En syantis ki’n vin en Temwen Zeova i dir: “Temwen Zeova i annan levidans pour bann keksoz ki zot krwar ladan. Zot pa inyor bann levidans syantifik.”

5. Akoz bokou dimoun pa krwar ki i annan en Kreater?

⁵ Nou kapab demande: ‘Si i annan levidans kler ki i annan en Kreater, akoz bokou dimoun pa krwar ki Bondye in kree tou keksoz?’ Serten dimoun pa’n zanmen etidye levidans pour zot menm. Robert ki aprezan i en Temwen Zeova, i dir: “Mon pa ti krwar ki i annan en Kreater parski lekol pa’n zanmen ansenny nou ki i annan en Kreater. Ler mon ti annan 22 an, mon ti koz avek bann Temwen Zeova e mon ti aprann ki Labib in donn nou bann bon rezon pour krwar ki Bondye in kree tou keksoz.” *​—Vwar bwat “ En mesaz enportan pour bann paran.”

6. Akoz serten dimoun pa krwar ki i annan en Kreater?

⁶ Serten dimoun pa krwar ki i annan en Kreater parski zot dir ki zot krwar dan zis sa ki zot kapab vwar. Me an realite, zot krwar dan sa ki zot pa kapab vwar.  Par egzanp, zot krwar ki i annan lafors gravite parski zot annan levidans ki i egziste. Sa kalite lafwa ki Labib i koz lo la i baze lo levidans konsernan bann keksoz ki nou pa vwar. (Ebr. 11:1) I pran letan ek zefor pour etidye sa bann levidans pour nou menm e en kantite dimoun pa anvi fer sa zefor pour fer sa. Alor, en dimoun ki pa etidye sa bann levidans pour li menm i kapab krwar ki i napa en Bondye.

7. Eski tou dimoun ki annan en gran ledikasyon pa krwar ki Bondye i egziste? Eksplike.

⁷ Apre ki serten syantis in etidye bann levidans, zot in konvenki ki Bondye in kree liniver. * Parey Robert, ki’n ganny  mansyonnen pli boner, i kapab ki serten in zis mazinen ki i napa en Kreater parski ler zot ti liniversite zot pa’n ganny ansennyen ki i annan en Kreater. Me en kantite syantis in aprann konn e kontan Zeova. Alor, nenport ledikasyon ki nou annan, nou tou nou bezwen fer parey sa bann syantis. Nou bezwen batir nou lafwa dan Bondye akoz personn pa kapab fer sa pour nou.

8-9. (a) Ki kestyon nou pou reponn aprezan? (b) Ki byenfe ou pou gannyen ler ou etidye kreasyon?

⁸ Ki mannyer ou kapab batir ou lafwa dan ou Kreater? Annou vwar kat fason.

⁹ Etidye kreasyon. Ou kapab batir ou lafwa dan Kreater, par obzerv bann zannimo, plant ek zetwal. (Ps. 19:1; Iza. 40:26) Pli ou etidye sa bann keksoz, pli ou pou asire ki Zeova i Kreater. Dan nou bann piblikasyon, i annan bann lartik ki donn bann detay konsernan kreasyon. Menm si i difisil pour konpran, pa bezwen sot sa bann lartik. Aprann otan ki ou kapab. Pa oubliye pour al lo nou sit Enternet jw.org, pour revwar bann video lo kreasyon ki nou’n gannyen tou dernyenman dan nou bann lasanble.

10. Donn en legzanp ki montre ki i annan en Kreater? (Romen 1:20)

¹⁰ Ler ou etidye kreasyon, reflesir byen lo bann keksoz ki ou kapab aprann lo ou Kreater. (Lir Romen 1:20.) Par egzanp, soley i donn lasaler ek lalimyer ki neseser pour ki i annan lavi lo later. Me serten reyon soley i kapab danzere. Nou bezwen ganny proteze avek sa bann reyon. Ki mannyer? I annan en gas otour later ki protez nou avek sa bann reyon danzere. Ler sa bann reyon i vin pli for, sa gas ki protez later i ogmante. Ler ou analiz tousala, pa ou pou dakor ki i bezwen annan en Kreater ki kontan nou e ki entelizan?

11. Kote ou pou trouv bann lenformasyon pour ranforsi ou lafwa ki i annan en Kreater? (Vwar bwat “ Serten lenformasyon pour batir ou lafwa dan Kreater.”)

¹¹ Ou kapab trouv en kantite lenformasyon konsernan kreasyon dan Watch Tower Publications Index e par fer resers lo nou sit Enternet jw.org. Pour konmanse, ou kapab lir bann lartik ek bann video dan sa seri “Was It Designed?” Sa bann lartik ek video i kourt e zot donn bann lenformasyon konsernan bann zannimo ek plant. Zot osi donn legzanp lo lafason ki bann syantis in esey kopye sa ki zot vwar dan lanatir.

12. Ler nou etidye Labib, ki serten keksoz nou bezwen reflesir lo la?

¹² Etidye Labib. Sa syantis ki’n ganny mansyonnen dan paragraf 4 pa ti krwar deswit ki i annan en Kreater. Me avek letan, i ti konvenki ki i annan en Kreater. I dir: “Rezon ki mon annan lafwa i pa zis akoz sa ki mon’n aprann ler mon’n etidye lasyans. I osi akoz sa ki mon’n aprann ler mon’n etidye Labib.” I kapab ki ou konn byen Labib me pour batir ou lafwa dan ou Kreater, ou bezwen kontinyen etidye Parol Bondye. (Zoz. 1:8, NWT; Ps. 119:97, NWT) Par egzanp, mazin lafason ki Labib i egzakt ler i dekri bann keksoz ki’n arive dan lepase. Osi, mazin lo tou bann profesi Labib ki’n ganny akonplir e ki mannyer bann ekriven Labib pa’n kontredir kanmarad. Ler nou fer sa, nou pou ranforsi nou lafwa  ki i annan en Kreater ki saz, ki kontan nou e ki’n donn nou son Parol Labib. *​—2 Tim. 3:14; 2 Pyer 1:21.

13. Donn en legzanp ki montre lasazes ki trouve dan Parol Bondye?

¹³ Ler nou etidye Parol Bondye, reflesir byen lo ki mannyer son bann konsey i kapab itil. Par egzanp, depi lontan Labib in averti ki lanmour pour larzan i danzere e i anmenn “en kantite douler.” (1 Tim. 6:9, 10; Prov. 28:20, NWT; Mat. 6:24) Eski sa konsey i ankor kapab ed nou ozordi? Sa liv The Narcissism Epidemic i dir ki laplipar ditan dimoun ki krwar ki larzan i sa keksoz pli enportan dan lavi, pa ere e zot tonm dan depresyon. Menm dimoun ki anvi ganny plis larzan zot pa ere e zot annan plis problenm lasante. Alor, ler Labib i dir ki nou pa devret kontan larzan, sa i vreman en bon konsey. Eski ou kapab mazin lezot konsey Labib ki’n ed ou? Ler ou reflesir lo tou bann bon konsey ki dan Labib, ou pou vwar ki nou Kreater ki kontan nou i konn sa ki pli bon pour nou e nou pou toultan depan lo li. (Zak 1:5) Sa pou fer ki nou lavi pou pli ere.​—Iza. 48:17, 18, NWT.

14. Ler ou etidye Labib, ki ou aprann lo Zeova?

¹⁴ Etidye Labib avek sa lobzektif pour aprann konn Zeova pli byen. (Zan 17:3) Anmezir ou etidye Labib ou pou aprann konsernan personnalite Zeova ek son bann kalite. I sa bann menm kalite ki ou’n aprann ler ou ti etidye kreasyon. Ler ou aprann konsernan bann kalite Zeova, sa i fer ou konvenki ki Zeova i vreman egziste. (Egz. 34:6, 7, NWT; Ps. 145:8, 9, NWT) Anmezir ki ou aprann konn Zeova pli byen, ou lafwa dan li pou vin pli for, ou pou kontan li plis e ou pou annan en pli bon lanmitye avek li.

15. Ki byenfe ou pou gannyen ler ou koz avek lezot konsernan ou lafwa?

¹⁵ Koz avek lezot konsernan ou lafwa dan Bondye. Ler ou fer sa, ou lafwa pou vin pli for. Me ki ou pou fer si en dimoun ki ou koz avek dan predikasyon pa asire si i annan en Bondye e ou pa konnen ki pour dir li? Esey rod larepons ki baze lo Labib dan enn nou bann piblikasyon e koz avek li lo la. (1 Pyer 3:15) Ou kapab demann en proklanmater pour ed ou reponn sa kestyon. Ki swa sa dimoun i aksepte sa ki Labib i dir oubyen non, ou menm ou benefisye avek sa resers. Ou lafwa pou vin pli for. Sa pou fer ki ou pa pou krwar ler bann dimoun ki paret saz e annan en gran ledikasyon, i dir ki napa en Kreater.

16. Ki i kapab arive si nou pa kontinyen batir nou lafwa?

¹⁶ Nenport ki kantite letan ki nou’n servi Zeova, nou bezwen kontinyen batir nou lafwa dan li. Akoz? Parski si nou pa fer atansyon, nou lafwa pou afebli. Parey nou’n vwar, lafwa i baze lo levidans konsernan bann keksoz ki nou pa vwar. I kapab fasil pour oubliy sa ki nou pa kapab vwar. Alor Pol ti dir ki en mank lafwa i en “pese ki kapab fasilman anpay nou.” (Ebr. 12:1) Me ki mannyer nou kapab fer sir ki nou lafwa i reste for?​—2 Tesa. 1:3.

17. Kwa ki kapab ed nou gard nou lafwa for?

¹⁷ Premyerman, sipliy Zeova regilyerman pour li donn ou son lespri sen. Akoz?  Parski lafwa i en kalite ki lespri sen i ed nou pour devlope. (Gal. 5:22, 23) Nou pa kapab batir nou lafwa dan nou Kreater san led son lespri sen. Si nou kontinyen demann Zeova son lespri sen, i pou donn nou. (Lik 11:13) Nou kapab priye e dir: “Donn nou plis lafwa.”​—Lik 17:5.

18. Dapre Psonm 1:2, 3, ki privilez nou kapab gannyen?

¹⁸ Ou osi kapab etidye Parol Bondye regilyerman. (Lir Psonm 1:2, 3.) Ler sa Psonm ti ganny ekrir, pa bokou Izraelit ki ti annan en kopi Lalwa Bondye ki konplet. Me bann lerwa ek pret ti kapab ganny akse avek bann kopi e tou le set an, bann zonm, madanm, zanfan ek bann rezidan etranze ti kapab ekoute ler Lalwa Bondye ti ganny lir. (Det. 31:10-12) Dan letan Zezi, pa bokou dimoun ki ti annan kopi Lekritir. Laplipar kopi ti ganny garde dan bann sinagog me ozordi laplipar dimoun i annan akse avek en porsyon Parol Bondye oubyen an antye. Sa i en gran privilez. Ki mannyer nou kapab montre ki nou apresye sa privilez?

19. Ki nou bezwen fer pour gard nou lafwa for?

¹⁹ Nou kapab montre ki nou apresye sa privilez pour annan Parol Bondye par lir li regilyerman. Nou devret annan en letan spesifik pour lir e etidye Labib. Me pa zis lir li ler nou annan letan. Si nou fer sir ki nou etidye Labib regilyerman nou kapab gard nou lafwa for.

20. Ki ou devret determinen pour fer?

²⁰ Nou pa parey bann dimoun ki “saz e entelizan” dan sa lemonn. Nou annan en lafwa ki baze lo levidans ki dan Parol Bondye. (Mat. 11:25, 26) Labib i eksplik nou akoz sityasyon lemonn pe vin pli pir e ki Zeova pou fer pour amelyor sa sityasyon. Alor, annou determinen pour ranforsi nou lafwa e ed otan dimoun ki nou kapab pour annan lafwa dan nou Kreater. (1 Tim. 2:3, 4) Osi, annou kontinyen reste enpasyan ziska sa letan kot tou dimoun ki lo later pour loue Zeova e dir sa parol ki dan Revelasyon 4:11: “Zeova nou Bondye, ou merit laglwar . . . parski ou’n kree tou keksoz.”