1. Dan ki fason en kantite frer ek ser pe esey fer plis dan servis Zeova?

 NOU annan en kantite travay pour fer anmezir sa lemonn i ariv ver son lafen. (Mat. 24:14; Lik 10:2; 1 Pyer 5:2) Nou tou nou anvi donn Zeova nou meyer. En kantite frer ek ser pe fer plis dan sa travay predikasyon. Serten i anvi servi konman pionye. Lezot i anvi servi dan Betel oubyen lo bann proze konstriksyon ki pour lorganizasyon Temwen Zeova. I osi annan en kantite frer ki pe fer zefor pour kalifye pour vin serviter kongregasyon oubyen ansyen. (1 Tim. 3:1, 8) Zeova i kontan pour vwar sa ki son pep i pare pour fer pour servi li.​—Ps. 110:3; Iza. 6:8.

2. Ki mannyer nou kapab santi si nou pa reisi atenn en lobzektif dan servis Zeova?

² Nou kapab santi nou dekouraze si apre en kantite letan nou pa’n arive atenn serten nou bann lobzektif dan servis Zeova. Oubyen nou kapab santi nou dekouraze si nou laz oubyen nou sirkonstans pa permet nou fer serten keksoz dan servis Zeova. (Prov. 13:12) Sanmenm ki ti arive avek Melissa. * Melissa ti pou kontan servi dan Betel oubyen asiste Lekol pour bann Predikater Rwayonm me i dir: “Mon pa kapab fer sa bann servis parski mon’n fini sot laz e parfwa sa i fer mwan dekouraze.”

3. Ki serten i kapab fer pour kalifye pour ganny lezot responsabilite dan servis Zeova?

³ I kapab ki serten ki ankor zenn e an bonn sante i bezwen  devlop serten kalite avan ki zot pare pour ganny lezot responsabilite. Par egzanp, zot kapab entelizan, pran desizyon vitman e pare pour travay me i kapab ki zot bezwen aprann pour devlop plis pasyans, pour pran letan pour fer byen zot travay e annan plis respe pour lezot. Si ou fer zefor spesyal pour devlop bann kalite ki ou bezwen, i kapab ki bann frer i donn ou en responsabilite ler ki ou pa pe ekspekte. Annou vwar legzanp Nick. Ler i ti annan 20 an, i ti vreman dezapwente parski i pa ti ganny apwente konman serviter kongregasyon. I dir: “Mon ti mazinen ki i annan en keksoz mal avek mwan.” Me Nick pa ti esey aret devlop bann kalite ki i ti bezwen. I ti fer son mye dan kongregasyon e dan predikasyon. Ozordi, i pe servi lo en Komite Biro Brans.

4. Ki nou pou vwar dan sa lartik?

⁴ Eski ou dekouraze parski ou pa’n atenn en serten lobzektif dan servis Zeova? Si wi, koz avek Zeova e dir li ki mannyer ou santi. (Ps. 37:5-7, NWT) Ou kapab osi demann konsey avek bann frer ek ser eksperyanse lo ki mannyer ou kapab amelyor ou servis pour Bondye e apre esey fer ou mye pour aplik zot konsey. Si ou fer sa, petet ou pou kapab atenn sa lobzektif. Me parey Melissa ki’n ganny mansyonnen pli boner, petet i pa posib la pour ou fer sa ki ou ti ava kontan fer pour Zeova. Alor, ki mannyer ou kapab kontinyen annan lazwa? Dan sa lartik nou pou reponn sa kestyon. Nou pou vwar (1) kwa ki kapab fer ou zwaye, (2) ki mannyer ou kapab ogmant ou lazwa e (3) ki bann lobzektif ou kapab annan ki pou ed ou annan plis lazwa.

5. Ki nou devret reflesir lo la pour nou annan lazwa? (Eklezyast 6:9)

⁵ Eklezyast 6:9 (NWT) i dir nou kwa ki kapab fer nou zwaye. (Lir.) En dimoun ki apresye “bann keksoz ki lizye i vwar” i satisfe avek sa ki i annan e avek son sirkonstans. Me en dimoun ki tay deryer bann dezir i kontinyen anvi bann keksoz ki i pa kapab gannyen e i pa pou zanmen satisfe. Alor, ki nou kapab aprann? Pour annan lazwa, nou devret konsantre lo sa ki nou annan e pa lo bann keksoz ki nou pa kapab gannyen.

6. Ki legzanp nou pou koz lo la e ki nou pou aprann avek sa legzanp?

⁶ Eski i vreman posib pour satisfe avek sa ki ou deza annan? En kantite dimoun i panse ki i pa posib parski nou kontan pour kontinyen aprann ki mannyer pour fer bann nouvo keksoz. Me i posib pour satisfe avek sa ki nou deza annan. Ki mannyer nou kapab fer sa? Annou vwar sa legzanp lo bann talan ki Zezi ti donnen dan Matye 25:14-30. Nou pou aprann ki mannyer pour annan lazwa e ki mannyer nou kapab ganny plis lazwa dan nou sirkonstans.

7. Eksplik sa legzanp ki Zezi ti donnen lo bann talan.

⁷ Dan sa legzanp, en zonm ti pe al fer en vwayaz. Avan i ti ale, i ti kriy son bann lesklav e donn zot bann talan pour zot fer biznes avek. * Sa zonm ti konnen ki son bann lesklav ti annan diferan abilite. Alor, i ti donn sa premye lesklav senk talan, sa dezyenm lesklav i ti donn de talan  e sa trwazyenm i ti donn zis en talan. Sa de premye lesklav ti travay dir pour fer plis larzan pour zot met. Par kont, sa trwazyenm lesklav pa ti fer nanryen avek sa larzan e son met ti pous li.

8. Akoz sa premye lesklav dan sa legzanp ti vreman kontan?

⁸ Sa premye lesklav ti vreman kontan ki son met ti’n donn li senk talan. Sa ti en kantite larzan e i ti montre ki son met ti annan bokou konfyans dan li. Me ki mannyer sa dezyenm lesklav ti santi? I ti’n kapab dekouraze akoz i pa ti’n ganny menm lakantite talan ki sa premye lesklav ti’n gannyen. Me ki i ti fer?

9. Ki Zezi pa ti dir konsernan sa dezyenm lesklav? (Matye 25:22, 23)

⁹ Lir Matye 25:22, 23. Zezi pa ti dir ki sa dezyenm lesklav ti ankoler ouswa i ti gard rankin akoz i ti’n ganny zis de talan. Zezi pa ti osi dir ki sa lesklav ti konplent e dir: ‘Akoz mon met in donn mwan pli pti gin? Mon travay dir parey sa lesklav ki’n ganny senk talan! Si mon met pa krwar ki mon en bon travayer petet mon ava anter son larzan e travay pour mwan menm olye pour li.’

10. Ki sa dezyenm lesklav ti fer avek son bann talan?

¹⁰ Parey sa premye lesklav, sa dezyenm lesklav ti konpran ki sa travay ki son met ti’n donn li ti enportan. Sa ti fer ki i ti ogmant son de talan ki son met ti’n donn li e fer vin kat. Sa met ti rekonpans sa lesklav pour son travay dir. I ti onor sa lesklav e i ti donn li plis responsabilite!

11. Ki mannyer nou kapab ganny plis lazwa?

 ¹¹ Pareyman, nou kapab annan plis lazwa ler nou travay dir dan bann travay ki nou annan dan servis Zeova. Annou ‘pas tou nou letan’ dan predikasyon e travay dir dan kongregasyon. (Akt 18:5; Ebr. 10:24, 25) Prepar byen pour bann renyon pour ki nou kapab donn bann komanter ki ankourazan. Pran o serye tou bann demonstrasyon ki ou gannyen pour fer dan renyon lasemenn. Si ou ganny demande pour fer en travay dan kongregasyon, i byen ki ou ariv aler e montre lezot ki zot kapab kont lo ou. Pa bezwen krwar ki sa travay ki ou’n gannyen pa enportan e ki ou pa bezwen pas en kantite letan pe fer li. Fer zefor pour amelyor ou abilite dan sa travay ki ou pe fer. (Prov. 22:29) Si ou travay vreman dir pour Zeova, ou pou vin pli pros avek li e ou pou vreman zwaye. (Gal. 6:4) I pou osi fasil pour ou kontan ler lezot i ganny en responsabilite ki ou ti anvi.​—Rom. 12:15; Gal. 5:26.

12. Kwa ki ti ed Melissa ek Nick pour annan plis lazwa?

¹² Eski ou rapel Melissa ki’n ganny mansyonnen dan paragraf 2, ki ti pou’n kontan al servi Betel oubyen asiste Lekol pour bann Predikater Rwayonm? Menm si i pa ti posib pour li fer sa bann keksoz, i dir: “Mon donn mon meyer dan mon servis pionye e mon esey diferan metod predikasyon. Sa in fer mwan vreman zwaye.” Ki mannyer Nick ti sirmont son dezapwentman ler i pa ti ganny apwente konman serviter kongregasyon? Nick i dir: “Mon ti konsantre lo sa ki mon kapab fer, setadir predikasyon e lo fer bann komanter ankourazan dan renyon. Mon ti osi fer laplikasyon pour servi dan Betel. Son lannen answit, mon ti ganny aksepte.”

13. Ki pou arive si ou donn ou meyer dan ou servis? (Eklezyast 2:24)

¹³ Si ou donn ou meyer dan ou servis, eski ou pou ganny plis responsabilite pli tar? Sa i kapab arive parey i ti arive avek Nick. Me si i pa arive, parey Melissa ou kapab annan plis lazwa e ou pou vreman satisfe avek sa ki ou pe deza fer pour Zeova. (Lir Eklezyast 2:24, NWT.) Ou pou osi annan en kantite lazwa parski ou konnen ki ou pe fer plezir ou Met, Zezi Kri.

14. Ki nou devret gard antet ler nou pe met bann lobzektif dan servis Zeova?

¹⁴ Si ou pe donn ou meyer dan servis Zeova, eski sa i vedir ki ou pa devret esey fer plis pour li? Non. Nou devret met bann lobzektif ki pou ed nou vin bann pli bon proklanmater ek ansenyan e pour vin en pli bon led pour nou bann frer ek ser. Nou pou atenn sa bann lobzektif si nou konsantre lo ed lezot olye konsantre lo nou menm.​—Prov. 11:2, NWT; Akt 20:35.

15. Ki serten lobzektif ki kapab ed ou pour annan plis lazwa?

¹⁵ Ki serten lobzektif ou kapab annan? Demann Zeova pour ed ou konnen ki bann lobzektif ou pou kapab atenn. (Prov. 16:3; Zak 1:5) Eski ou kapab atenn enn sa bann lobzektif ki’n ganny mansyonnen dan  premye paragraf? Par egzanp, eski ou kapab fer pionye asistan ouswa pionye ordiner, servi dan Betel oubyen travay lo bann proze konstriksyon ki pour lorganizasyon Temwen Zeova. Petet ou kapab aprann en  lot langaz oubyen al anons sa bon nouvel avek bann dimoun dan en lot teritwar. Ou kapab aprann plis konsernan serten sa bann lobzektif par lir sapit 10 dan liv Organized to Do Jehovah’s Will e par koz avek bann ansyen dan ou kongregasyon. * Anmezir ou esey atenn sa bann lobzektif, lezot pou kapab vwar ki ou pe fer progre e ou pou ganny plis lazwa.

16. Ki ou kapab fer si pour le moman ou pa pe kapab atenn en serten lobzektif?

¹⁶ Me ki ou pou fer si pour le moman, ou pa pe kapab atenn enn sa bann lobzektif ki’n ganny mansyonnen dan sa lartik? Esey met serten lobzektif ki ou kapab atenn. Annou vwar serten legzanp.

17. Dapre 1 Timote 4:13, 15, ki en frer i kapab fer pour vin en pli bon ansenyan?

¹⁷ Lir 1 Timote 4:13, 15. Si ou en frer, ou kapab esey vin en pli bon orater oubyen ansenyan. Akoz? Parski si ou travay dir pour vin en bon lekter, orater ek ansenyan, ou pou pli kapab ed bann ki pe ekout ou. Esey met sa lobzektif pour etidye e aplik sak leson ki dan sa brosir Amelyor ou abilite pour lir e ansennyen. Etidye sa bann leson enn par enn. Practice regilyerman kot lakour e aplik sa ki ou pe aprann ler ou fer diskour. Rod konsey avek asistan konseye oubyen lezot ansyen “ki travay dir pour ansenny e koz lo parol Bondye.” * (1 Tim. 5:17) Konsantre lo aplik sa leson ki dan sa brosir e osi lo ed ou lodyans pour ranforsi zot lafwa  oubyen motiv zot pour aplik sa ki zot pe aprann. Ler ou fer sa, ou ek ou lodyans pou ganny plis lazwa.

18. Kwa ki kapab ed nou atenn nou bann lobzektif dan predikasyon?

¹⁸ Nou tou nou annan sa responsabilite pour anons sa bon nouvel e fer disip. (Mat. 28:19, 20; Rom. 10:14) Eski ou ti pou kontan amelyor ou abilite dan sa travay enportan? Etidye sa brosir Ansennyen e apre, met bann lobzektif spesifik ki pou ed ou aplik sa ki ou pe aprann. Ou kapab ganny bann bon sizesyon dan Nou minister ek lavi Kretyen​—Kaye renyon e dan bann video legzanp en prezantasyon ki ganny montre dan renyon lasemenn. Esey diferan sizesyon pour vwar lekel ki pli aplikab pour ou. Ler ou aplik sa bann sizesyon, ou pou vin en pli bon ansenyan e sa pou fer ou annan plis lazwa.​—2 Tim. 4:5.

19. Ki mannyer ou kapab devlop bann kalite ki fer plezir Bondye?

¹⁹ Ou pa devret oubliye ki enn bann lobzektif pli enportan ki ou kapab annan i pour ou devlop bann kalite ki fer plezir Bondye. (Gal. 5:22, 23; Kol. 3:12; 2 Pyer 1:5-8) Ki ou kapab fer pour atenn sa lobzektif? Meton ou anvi ranforsi ou lafwa. Ou kapab lir bann lartik dan nou bann piblikasyon ki donn bann sizesyon ki pou ed ou fer sa. Ou pou ganny bann byenfe ler ou get bann progranm Televizyon JW ki montre ki mannyer bann frer ek ser in demontre lafwa ler zot in fer fas avek bann difikilte. Apre reflesir lo diferan fason ki ou kapab imit zot lafwa.

20. Ki nou kapab fer pour nou annan plis lazwa e pour nou pa tro dezapwente?

²⁰ Nou tou, nou ti pou kontan fer plis pour Zeova. Dan nouvo lemonn nou pou kapab fer tou sa ki nou ti pou kontan pour Zeova. Me pour le moman si nou servi tou loportinite ki nou annan dan servis Zeova, nou kapab annan plis lazwa e nou pa pou tro dezapwente. Pli enportan ankor, nou pou onor Zeova nou “Bondye ere.” (1 Tim. 1:11) Alor annou trouv lazwa dan sa ki nou deza pe fer!