1, 2. (a) Ki i kapab arive si dimoun i mank kontrol lo zot lekor? (b) Akoz nou bezwen diskit lo devlop kontrol lo nou lekor?

ZEOVA i kapab ed nou devlop kontrol lo nou lekor. (Galat 5:22, 23) Menm si i kapab demontre kontrol lo son lekor parfetman, nou nou pa kapab fer sa akoz nou enparfe. Anfet, laplipar problenm ki dimoun i annan ozordi i akoz en mank kontrol lo zot lekor. Sa i kapab fer en dimoun tarde fer bann keksoz enportan oubyen anpes li donn son meyer kot lekol ouswa dan travay. Ler dimoun i mank kontrol lo zot lekor, sa i osi kapab fer zot ensilte lezot, bwar pour sou, vyolan, divorse, andete, adikt, ganny met dan prizon, ganny bann problenm emosyonnel, ganny maladi ki transmet par sèks e tonm ansent.​—Psonm 34:11-14.

² Dimoun ki napa kontrol lo zot lekor i met zot lekor dan problenm e zot met lezot dimoun osi dan problenm. Anmezir letan i pase, i kler ki dimoun pe deplizanpli annan mwens kontrol lo zot lekor. Sa pa devret sirprann nou, parski Parol Bondye ti’n fini predir ki en mank kontrol lo lekor ti pou en laprev ki nou pe viv dan “bann dernyen zour.”​—2 Timote 3:1-3.

3. Akoz nou bezwen annan kontrol lo nou lekor?

 ³ Akoz nou bezwen annan kontrol lo nou lekor? I annan de rezon enportan. Premyerman, dimoun ki kapab kontrol zot santiman ek lemosyon i tant pour annan mwens problenm. I osi fasil pour zot annan bann bon relasyon avek lezot e pour evite pran lakoler, trakase ouswa tonm dan depresyon. Dezyenmman, pour reste zanmi avek Bondye, nou bezwen reziste tantasyon e kontrol nou bann move dezir. Sanmenm ki Adan ek Ev pa ti reisi fer. (Zenez 3:6) Pareyman, bokou dimoun ozordi i annan bann problenm grav akoz zot napa kontrol lo zot lekor.

4. Kwa ki devret ankourazan pour bann ki pe lite pour kontrol zot move dezir?

⁴ Zeova i konpran ki nou enparfe e ki i difisil pour nou annan kontrol lo nou lekor. Me i anvi ed nou domin nou bann move dezir. (1 Lerwa 8:46-50) Konman en bon Zanmi, i zantiman ankouraz bann ki parfwa i vwar li difisil pour kontrol zot santiman ek dezir. Dan sa lartik, nou pou aprann avek lafason ki Zeova i demontre kontrol lo son lekor. Nou pou osi diskit lo bann legzanp ki dan Labib, sa ki bon e sa ki move e vwar bann sizesyon pratik ki kapab ed nou.

5, 6. Ki fason Zeova in demontre kontrol lo son lekor?

⁵ Zeova i demontre kontrol lo son lekor parfetman akoz i parfe dan tou sa ki i fer. (Deterononm 32:4) Nou par kont, nou enparfe. Me kantmenm sa nou bezwen egzamin son legzanp pour ki nou kapab pli byen imit li. Sa pou ed nou konnen ki mannyer pour byen reazir dan bann sityasyon ki kapab ofans nou. Ki fason Zeova in demontre kontrol lo son lekor?

⁶ Mazin lo ki mannyer Zeova ti reazir ler Satan ti rebele dan zarden Edenn. I tre probab ki lakizasyon Dyab ti fer bann serviter fidel Zeova ki dan lesyel soke, ankoler e perdi respe pour li. Petet ou santi sa menm fason ler ou mazin lo tou sa ki Satan in fer ki fer nou soufer. Me Zeova pa ti perdi kontrol lo son lemosyon. I ti azir dan sa pli bon fason. Zeova pa’n ankoler vitman e i’n azir dan en fason zis an rapor avek rebelyon Satan. (Egzod 34:6, NWT; Zob 2:2-6) Akoz? Zeova in les letan pase parski i pa anvi ki okenn dimoun i ganny detrir me “i oule ki zot tou zot arive repantir.”​—2 Pyer 3:9.

7. Ki nou kapab aprann avek legzanp Zeova?

⁷ Legzanp Zeova i ansenny nou ki nou bezwen reflesir byen avan nou koze e pa reazir tro vitman. Alor, ler ou bezwen fer en desizyon enportan, pran letan pour reflesir. Priye pour ganny lasazes pour ou kapab dir e fer sa ki  byen. (Psonm 141:3) Ler nou ankoler i fasil pour perdi kontrol lo nou lemosyon. Sanmenm rezon plizyer dimoun in regret sa ki zot in dir ouswa fer san reflesir!​—Proverb 14:29; 15:28; 19:2.

8. (a) Kote nou kapab trouv bann bon legzanp bann ki ti annan kontrol lo zot lekor? (b) Kwa ki ti ed Zozef pour reziste tantasyon ler madanm Potifar ti esey tant li pour dormi avek li? (Vwar portre o konmansman sa lartik.)

⁸ Ki legzanp dan Labib ki montre lenportans pour annan kontrol lo nou lekor? Petet ou kapab pe mazin legzanp Zozef, garson Zakob. I ti reziste tantasyon ler i ti pe servi dan lakaz Potifar ki ti sef gard Faraon. Madanm Potifar ti vwar Zozef atiran parski i ti “en zoli garson” e plizyer fwa i ti esey tant Zozef pour dormi avek li. Kwa ki ti ed Zozef pour reziste tantasyon? I tre probab ki i ti pran letan pour reflesir byen davans konsernan kwa ki ti pou arive si i ti dormi avek sa madanm. Apre sa, ler sa madanm ti tyonbo li par son lenz i ti kit li e tay deor. I ti dir: “Ki mannyer eski mon pou kapab fer en keksoz osi mal e komet en pese kont Bondye?”​—Zenez 39:6, 9; lir Proverb 1:10.

9. Ki mannyer ou kapab prepar ou lekor pour reziste tantasyon?

⁹ Ki nou aprann avek legzanp Zozef? Si nou ganny tante pour kas enn bann lalwa Bondye, nou bezwen reziste sa tantasyon. Avan vin Temwen Zeova, serten ti manz tro bokou, bwar pour sou, fimen, servi drog, fer imoralite seksyel ouswa lezot keksoz mal. Menm apre ki zot in batize, parfwa i kapab ki zot ankor pe ganny tante pour fer sa bann keksoz. Si sa i arive avek ou, aret en kou e reflesir lo ki mannyer ou ti pou gat ou relasyon avek Zeova si ou ti les ou ganny tante. Ou kapab esey idantifye bann sityasyon kot ou kapab ganny tante e deside ki mannyer ou kapab evit zot. (Psonm 26:4, 5; Proverb 22:3) Si en zour ou ganny sa kalite tantasyon, demann Zeova pour donn ou lasazes ek kontrol lo ou lekor pour ou reziste sa tantasyon.

10, 11. (a) Ki arive avek en kantite zenn kot lekol? (b) Kwa ki kapab ed bann zenn Kretyen pour reziste tantasyon pour kas lalwa Bondye?

¹⁰ Sa ki ti arive avek Zozef pe arive avek bokou zenn Kretyen ozordi. Kim i en legzanp. Son bann kanmarad lekol ti souvan koz lo bann relasyon seksyel ki zot ti’n fer pandan wikenn. Kim ti napa sa bann kalite zistwar pour rakonte. I ti admet ki parfwa i ti santi li “abandonnen e tousel” e ki son bann kanmarad lekol ti krwar ki i ti bet parski i pa ti pe pwente. Me Kim ti saz. I ti konnen ki tantasyon pour fer sèks i kapab vreman for ler nou ankor zenn. (2 Timote 2:22) Lezot kanmarad lekol ti souvan demann li si i ti ankor vyerz. Sa ti donn li loportinite pour eksplike akoz i’n  deside pour pa fer sèks. Nou fyer pour annan bann zenn Kretyen ki determinen pour reziste presyon pour fer imoralite seksyel e zot osi fer Zeova fyer.

¹¹ Labib i osi donn nou legzanp bann dimoun ki pa ti reziste tantasyon pour fer imoralite seksyel. I osi montre bann move konsekans ki nou gannyen ler nou napa kontrol lo nou lekor. Si ou dan en sityasyon parey Kim, mazin sa zenn onm bet ki ganny dekrir dan Proverb sapit 7. Mazin osi lo Amnonn e bann move konsekans son konportman. (2 Samyel 13:1, 2, 10-15, 28-32) Bann paran i kapab ed zot zanfan pour devlop kontrol lo zot lekor ek lasazes ler zot koz lo sa bann legzanp dan ladorasyon fanmir.

12. (a) Ki mannyer Zozef ti kontrol son santiman ler i ti avek son bann frer? (b) Dan ki bann sityasyon nou bezwen kontrol nou santiman?

¹² En lot fwa, Zozef ti kit en bon legzanp lo demontre kontrol lo son lekor. Sa ti letan son bann frer ti vin aste manze Lezip. Pour konpran sa ki zot ti pe vreman mazinen, Zozef pa ti dir zot ki i ti zot frer. Ler i ti nepli kapab tenir son lemosyon, i ti kit son bann frer pour li al plere dan en landrwa prive. (Zenez 43:30, 31; 45:1) Si en frer ouswa en ser i fer en keksoz ki ofans ou, imit legzanp Zozef pou ed ou annan kontrol lo ou lekor pour evite dir ouswa fer en keksoz ki ou pou regrete pli tar. (Proverb 16:32; 17:27) Petet ou annan bann fanmir ki’n ganny ekskli dan kongregasyon. Si wi, ou pou bezwen kontrol ou bann santiman pour evite annan kontak ki pa neseser avek zot. Sa i kapab difisil pour fer. Me i pou pli fasil si ou rapel ki ou pe imit legzanp Zeova e pe obei son bann komannman.

13. Ki leson nou kapab aprann avek bann levennman ki ti arive dan lavi Lerwa David?

¹³ Nou osi benefisye avek legzanp Lerwa David. Ler Sail ek Simei ti provok li, David pa ti ankoler ouswa servi son lotorite kont zot. (1 Samyel 26:9-11; 2 Samyel 16:5-10) Par kont, pa toultan ki David ti annan kontrol lo son lekor. Nou konn sa ler nou lir konsernan son pese avek Bat-Seba e son reaksyon anver vorasite Nabal. (1 Samyel 25:10-13; 2 Samyel 11:2-4) Nou kapab aprann bann bon leson avek David. Premyerman, bann sirveyan parmi pep Bondye i sirtou bezwen annan kontrol lo zot lekor pour zot pa mal servi zot lotorite. Dezyenmman, personn pa devret tro konfidan pour krwar ki i pa pou zanmen les li ganny tante.​—1 Korentyen 10:12.

14. Ki leksperyans en frer ti pas ladan e akoz nou bann reaksyon dan sa bann menm sityasyon i enportan?

¹⁴ Ki ou kapab fer pour amelyor lafason ki ou demontre kontrol lo  ou lekor? Annou vwar sa ki ti arive avek Luigi. En transpor ti tap deryer son loto. Menm si drayver sa transpor ti annan tor, i ti konmans kriy avek Luigi e i ti anvi lager avek li. Luigi ti priy Zeova pour li gard son kalm e esey kalme sa lot drayver. Me sa zonm ti kontinyen dispit. Alor Luigi ti ekri detay lasirans sa zonm e ale pandan ki sa zonm ti ankor pe dispit. En semenn pli tar, Luigi ti pe fer en retourn vizit kot en madanm. Son msye ti sa drayver! Sa zonm ti anbarase e i ti demann leskiz pour son move konportman. I ti ofer pour kontakte lakonpannyen lasirans Luigi, pour ki son loto i kapab ganny repare pli vit. Sa zonm ti partisip dan sa diskisyon lo Labib e i ti kontan sa ki i ti aprann. Akoz sa, Luigi ti realize ki degre i ti enportan ki i ti’n reste kalm apre sa aksidan e ki mannyer keksoz ti’n kapab mal pase si i ti’n pran lakoler.​—Lir 2 Korentyen 6:3, 4.

15, 16. Ki mannyer letid Labib i kapab ed ou ek ou fanmir pour devlop kontrol lo zot lekor?

¹⁵ En letid Labib ki ganny fer  regilyerman e dapre sirkonstans en Kretyen, i kapab ed li devlop kontrol lo son lekor. Rapel ki Bondye ti dir Zozye: “Sa liv lalwa pa pou kit ou labous. Ou ava medit lo li lizour e lannwit, pour ki ou ava azir dapre tou sa ki’n ekri. Konmsa, ou ava prospere e ou ava reisi.” (Zozye 1:8) Me ki mannyer letid Labib i kapab ed ou pour devlop kontrol lo ou lekor?

¹⁶ Nou’n aprann ki dan Labib i annan bann legzanp ki montre ki mannyer nou benefisye ler nou annan kontrol lo nou lekor e ki mannyer nou soufer ler nou napa. Zeova ti fer ekri sa bann legzanp pour en rezon. (Romen 15:4) I saz pour nou lir, etidye e reflesir byen lo sa bann legzanp. Esey konpran ki mannyer zot aplik pour ou ek ou fanmir. Demann Zeova pour ed ou aplik konsey ki dan son Parol. Si ou realize ki ou mank kontrol lo ou lekor dan serten domenn, ou bezwen admet sa. Apre priy lo la e fer bokou zefor pour vwar ki mannyer ou kapab amelyore. (Zak 1:5) Fer resers dan nou bann piblikasyon pour trouv bann konsey pratik ki kapab ed ou.

17. Dan ki fason bann paran i kapab ed zot zanfan pour devlop kontrol lo zot lekor?

¹⁷ Ki mannyer ou kapab ed ou zanfan pour devlop kontrol lo zot lekor? Bann paran i konnen ki zot zanfan pa’n ne avek sa kalite. Alor zot devret ansenny zot zanfan bann bon kalite par zot prop legzanp. (Efezyen 6:4) Si ou vwar ki ou zanfan i mank kontrol lo zot lekor, demann ou lekor si ou pe vreman kit en bon legzanp pour zot. Ou kapab kit en bon legzanp ler ou al predikasyon, asiste renyon e fer ladorasyon fanmir regilyerman. Deplis, pa bezwen per pour dir ou zanfan non ler i neseser! Zeova ti met bann limit pour Adan ek Ev. Sa bann limit ti’n kapab ed zot pour aprann respekte lotorite Zeova. Dan menm fason, ler paran i disiplin zot zanfan e kit en bon legzanp pour zot, sa i kapab ansenny zot zanfan pour annan kontrol lo zot lekor. Lanmour pour lotorite Bondye e respe pour son bann standar i parmi bann keksoz pli enportan ki ou kapab ed ou zanfan pour annan.​—Lir Proverb 1:5, 7, 8.

18. Akoz nou bezwen byen swazir nou bann zanmi?

¹⁸ Ki swa nou en paran oubyen non, nou devret byen swazir nou zanmi. Si ou bann zanmi i kontan Zeova, zot pou ankouraz ou pour annan bann bon lobzektif e evit problenm. (Proverb 13:20) Zot bon legzanp pou motiv ou pour devlop kontrol lo ou lekor parey zot. San dout ou bon kondwit pou ankouraz zot osi. Ler nou devlop kontrol lo nou lekor, sa pou ed nou ganny laprouvasyon Bondye, viv en bon lavi e partaz bann bon keksoz avek bann ki nou kontan.